Markos 1

Go Juan oidigana aimïraiña dai gamamaakaiña ñoki

1Idi ojai aagai Suxi Kristo Diuxi maradï. Aidï abhiadïrï xi tukamïrï pokaititadai Diuxi sai oidigi daama dibiagai Suxi aagai gobai. Idi ïr gobai ix makïdï bhai ïrhiaragai aatagi aagai aatïmï.

2Ïïki oidakatadai ïmo kïïrhi Isaias tïgidukami. Ïgai ïr ïmo aagadamikatadai Diuxiañdïrï ñoki, daidi gaoja ïgai ix kaiti Diuxi. Ïmo imidagai Diuxi aataga ïmadï maradï dai Isaias oja ix kaiti ïgai. Diuxi potïtïdai maradï aidï,

—Aapi ïr gin maara. Dai otosamu aanï ïmoko gin otoxikami aapi gï bhaitïki bai ïgai aagidana odami sai karhioga dibia aapi oidigi daama, itïtïdai Diuxi. Podukai kaxi bhai gïn dukagi odami pïx xuduku aiyagi, itïtïdai. 3Oidigana dakamu gin otosa dai odami mïï ayimu xi ïgai tïdamu aidï sai, —Kaxi miadaimi ix tuigako ayimu gïr Tïanïdamiga— tïdamu ïgai. —Kaxkïdï abïr maigobai dasa bïïxi gajiadïrï bïïtïkïdï tïgibudagai dai ïmo sïïrhiñikami abïr bhïiyi. Ix maaxi kaatï ïmo boiyi sïïrhiñikami pomaaxkami abïr bhïiyi tïgibudagai. Podukai abïr bhai gïn buada xi dibiagi ïgai, tïdamu gin otoxikami— Po tudu kaiti Diuxi mai kia dibiakai maradï oidigi daama.

Gobai ïr ojadï go Isaiaskaru ix makïdï oja ïgai ïïki tudu. 4Dai go Juankïdï buaboi busai go ñoki gobai. Ïgai oidigana dibia dai ami gamamaakaiña ñoki. Gïïgïrï ñokaiña ïgai dai aagidiña odami sai gï agaitadai ix gïn bapakonakagi bai podukai maaxi kaatïkagi ix ka máí odami xi ïr soimaaxi ibuadami ïgai dai sai xibi ka ïma dukai bhïiyi ïgai tïgibudagai. Podukai ka bïïxi oigïrhixikami biiyagi ïgai soimaaxkamigadï ixtukïdï gïpiïrï bïïtïkami ïgai. 5Bïïxi aipadïrï Judeañdïrï daibuiña óídakami ami oidigana dai Jerusalenañdïrï ïpï dai kaïka agai ixtuma aagaiña go Juan. Dai mos aagakai odami ixtuma soimaaxkami maaxi ibuadana ïgai baidi go Juan bapakonaiña akiana. Jordan tïgidu go aki ïgai.

6Go Juan yukuxidï kameyo popodïkïdï duñixi dai ogi giburadï. Dai kuadana ïgai sosoyi ïmadï saiburhi papaigadï. 7Dai mamaakaiña ïgai ñoki go odami daidi potïtïdaiña,

—Kaïkabïrai gin aaduñi— itïtïdaiña. —Gin gokiïrï dibiagai ïmoko ix makïdï gïïpi bamioma ïr gubukadagai biakami in xi aanï. Aanï tomarhi mai bia oigaragai xi ïmo pioñigadï dukai upandagi gigiaradï susakadï tudu. 8Dai aanï gïn bapakoi sudagikïdï dïï gia ïgai ix makïdï dibiagai ïma dukai gïn bapakoñimu. Ïgai gïn maakimu Diuxi Ibhïadï gïn abhana. Podukai gïn bapakoñimu ïgai— ikaitiña go Juan.

Gï bakuanatu go Suxi

9Aidïpïrï busai Suxi Nasaretañdïrï. Go Nasaret ïr ïmo arhi kiiki dai Galileïrï bipiïyi. Gïï kaatï oidigi xako Galilea tïgidu. Ami tudu dibia go Suxi dai ayi xako dajatadai Juan. Dai go Juan bakoi go Suxi Jordan akiïrï. 10Bhodïrï mos busai go Suxi sudagiañdïrï dai tïï ïgai tïbagi ix kupiokan tïi dai tïï ïgai Diuxi Ibhïadï ïpï ix tïbañimi ïmo tugu dukai dai gï abhana bii. 11Dai gï kaidatu ïmo ñoki tïbagiañdïrï daidi kaiti,

—Aapi ïr gin maara ix makïdï kïïgakïrï oigïdai aanï. Aapi tudu ïr gin bhai ïrhiaraga— ikaiti go ñoki.

12Dai bhodïrï Diuxi Ibhïadï busaitu go Suxi abhiadïrï dai oidigamakoga imitu. 13Gokobhai tasai bii go Suxi oidigana kïkïixi saagida dai go Diabora daibuiña dai tïañimi ïgai go Suxi sai ibuada soimaaxkami sa bhai ïïgidana. Dai Diuxi tïtïañikarudï soikïiña go Suxi.

Suxi gï aaga idui aaduindadï

14Gokiïrï aidïxi ka maixatadai go Juan bai Suxi dibia Galileamu dai gï aaga aagidimi odami Diuxi ñokidï bhai ïrhiarakami.

15—Kaxi ti ayi ixtuigako agaitadai Diuxi ïïki— ikaitimi ïgai. —Ka miadaimi ixtuigako Diuxi tïanïda agai. Xibi gï agai mïxi ïma dukai gïn tïtïgitokagi dai buaboida kaïkagi Diuxi ñokidï bhai ïrhiarakami— ikaitimi.

Suxi bapaidi kïkïïrhi xi oijadana

16Ïmo imidagai go gïï sudagi Galilea tïgidukïdï ugidana sïïrhi imïitadai Suxi dai tïï ïgai go Ximuñi ïmadï Andïrïxi. Go Andïrïxi ïr sukurhidïkatadai Ximuñi. Sudaïrï surhigimi ïgai gïn rediga ixtukïdï bubaidiña ïgai batopa. Podukai ibuadana ïgai dai gamaitïkïiña ixtukïdï óídakagi. 17Dai go Suxi potïtïdai aidï,

—Gin oidabïrai nai aanï gïn maatïtuldana mïx dukatai gaagagi odami baidi gin buaboitudaiña— itïtïdai go Suxi.

18Dai otoma anaaxi bia ïgai batopa buikarudï dai oi go Suxi.

19Baidi go Suxi apia imïi dai bhaitïkioma tïï ïgai goka kïkïïrhi, maamaradï Sebedeo. Ïmoko Jakobo tïgidu dai go gïmai Juan, ïgai ïr gasukurhi. Ïmo barko ïrana darajatai daraxdi ïgai gïn batopa buikaru rede. 20Daidi go Suxi báí sai oidanaïgai dai anaaxi barko ïrana bia ïgai ogadï ïmadï pipioñigadï dai oi ïgai go Suxi.

Suxi ayi Kapernaumïrï

21Bhodïrï Suxi oi imidagai ïmadï go kïkïïrhi ix makïdï báítadai ïgai dai ayi Kapernaumïrï ukami. Ibhïxtaragai tasïrï ayi ïgai amïka dai baa go Suxi kiupaigadïrï judidiu. Abhai kiupiïrï gï aaga gamamaatïturhimi ïgai Diuxi ñokidï. 22Dai bïïxkatai ix makïdï kaï mai tïï ix dukatai gïn tïtïgitoagi kaïkai xïï kïïga ñokai go Suxi. Ïmo gubukadagai biakami dukai gamamaatïturhi ïgai dai mai xu ix maaxi aatagai go ix makïdï ïr maatïtuldiadami judidiu sïïrhikamigadï. 23Dai ami judidiu kiupaigadïrï dajatadai ïmo kïïrhi biakami ïmo soimaaxi ibhïdakami Diaborañdïrï. Odami Diabora tïañikarudï aagaiña go maaxi. Daidi go Diabora tïañikarudï iñakitu go kïïrhi 24baidi potïtïdai ïgai Suxi,

—Tui pïxi gïr saagida bapakïi aapi Suxi, Nasaretañdïrï oidakami. Gïr koda pïx agai dai dibia— itïtïdai. —Aanï an gia kïïga gï maatï dai maatï aanï pïxi ïr Diuxi maradï ix makïdï tomarhi ïmo imidagai mai soimaaxi ibuayi— itïtïdai go kïïrhi ix makïdï biakatadai ïmo Diabora tïañikarudï ïrana.

25Taidi go Suxi bhagaimi go Diabora tïañikarudï daidi potïtïdai,

—Maiti ñokada. Mos sai busai go kïïrhiañdïrï dai dagito— itïtïdai Suxi.

26Tai amaxi go Diabora tïañikarudï suikiturhi go kïïrhi dai gïgïrï iñakimi dai busai kïïrhiañdïrï. 27Tai bïïxkatai ix makïdï ami darajatadai arhiï duduadimu, dai aipako ikaitimi,

—Idi gia mai nïidiña aatïmï— ikaitimi. —Tuma utudui gïr maatïturhimi gobai tudu. Idi kïïrhi gia sïïrhikïdï bia gubukadagai. Asta Diabora tïtïañikarudï bïïxi ïïgidi dai bubuakai odamiañdïrï di— ikaitimi odami.

28Dai otoma ayi go aatagi bïïxi Galileïrï óídakami ix maaxi aatabuayi go Suxi.

Go Suxi duadi tumudï Ximuñi

29Bhodïrï mos busai Suxi Judidiu kiupaigadïañdïrï tai oi ïgai go Jakobo ïmadï Juan dai ayi kiidïrï Ximuñi ïmadï Andïrïxi. 30Dai ami kaatïkatadai tumudï Ximuñi. Oiditadai toiñdagai. Mïtai otoma aagidi go Suxi. 31Bai ïgai miadïrï kïïkiba xako kaatï go oki dai nobiañdïrï bhïiyi dai bañigi. Mos podui ïgai dai ka dagito go toiñdagai dai go oki kaxi gï aagakai bhibhi go Suxi ïmadï aaduñdï.

32Dai aidïxi ka tuka oidigi mïtai buapi go Suxi bïïxi go kokokoñiadï dai ix makïdï biakana Diabora tïtïañikarudï ïpï. 33Mos kaburhi guka kitaagiañdïrï muidutai ami kiikiïrï óídakami. 34Dai Suxi duduadi mui naana maaxi kokodagai bipiakami dai bubaitu odamiañdïrï mui Diabora tïtïañikarudï. Go Diabora tïtïañikarudï kïï maatï go Suxi dïï ïgai mai daadagitoiña ix ñokada ïgai xi mai maaxiko buajana odami buitapi xorai ïgai.

Suxi gadibiji Galileana óídakami

35Xadiko ïïki kia buimoko bañi go Suxi dai oidigamu dui dai amïka aataga agai ïmadï Diuxi. 36Taidi go Ximuñi ïmadï aaduñdï gaagamu go Suxi. 37Dai potïtïdai ïgai tïïgakai,

—Bïïxi odami aba gï gaagai— itïtïdai.

38Dïï gia go Suxi potïtïdai,

—Maitï aagai xi mosïka tanai aagada aanï Diuxi ñokidï. Timïda xibhïakoga jaa kiikiamu dai ami aaga ïpï. Gobai tudu ibuada iñagai aanï dai dibia tami oidigi daama— itïtïdai go Suxi.

39Dai dïgabusai ïgai bïïxi xako ukami ajïi Galilea dai ami dibiji ïgai go judidiu kikiupaigadïrï. Ami gamaamakaimi ïgai ñoki dai bubaidimi Diabora tïtïañikarudï odamiañdïrï ïpï.

Suxi duadi ïmoko ix makïdï dubarhi tukugadï laalachi

40Dai ami dibia ïmo kïïrhi xako dajatadai go Suxi dai kabami ïr kokoadï ïgai. Dubarhimi tukugadï kokodagaikïdï. Lepra tïgidu go kokodagai ïgai. Dai gï totonakïdï kïkiba go kokoadï aidï dai daañimi go Suxi,

—Pïx ipïldagi kïïga gin duadi antaada aapi— itïtïdai go kïïrhi.

41Taidi Suxi soi gïldan taadatu dai gï nobikïdï taata daidi potïtïdai,

—Ipïrhidiana ix gï duadiagi aapi, xibi an aagai pïx duadana aapi— itïtïdai.

42Mos potïi Suxi tai maigo jii kokodagai dai ka kïï duayi go kïïrhi. 43-44Taidi Suxi kïï sïïrhi ñokidi go kïïrhi daidi potïtïdai aidï,

—Daiñi— itïtïdai. —Maiti aagiada tomarhi ïmadutai pïx dukatai duayi. Mos sai imi dai gï tïïgida buidïrï go judiu daxdadami dai ami daaxida aapi go daaxidaragai ix makïdï tanïi Moises ojaradï sïïrhikami buañidaragai bïïtarï go soimaaxkami ix makïdï bia aapi gï abhana. Podukai nïijadamu odami pïx ka duayi— itïtïdai Suxi.

45Dïï mos go kïïrhi mai ïïgi dai mos jii dai bhaiyoma otoma aagidimi bïïxi óídakami ix dukatai pogïdui. Dai xibi ka maiti ixtui Suxi ix baakiagi kiiyïrï saagida mos ïï muidukatai ix makïdï nïijada ïrhiditadai. Mos ugidïrï aimïraiña ïgai xako mai tipu óídakami. Dai modukai bïïxkïrï muidutai aipadïrï ajiopaiña dai ajïiña xako aimïraiña ïgai.

Currently Selected:

Markos 1: NTP

Highlight

Copy