Markos 2

Suxi duadi kokoadï ix makïdï mai bhaiga oiñïdagi

1Dai bhodïrï chïki tasaikïdï ïpamu nora Suxi gamo Kapernaumamu dai otoma máí odami xi kiiyïrï daja ïgai. 2Dai gïn ïmpagi kïïga mui odami dai Suxi gamamaatïturhimi Diuxi ñokidï. Lïïchikïdï ka mai bhaiga tomarhi baakigai mos ïï muidukatai odami. 3Amaxi ayi maakoba kïkïïrhi dai uxiïrï bhïkati ïmo kokoadï kïïrhi. Go kokoadï mai bhaiga ix oiñïdagi tukugadï. 4Mïï kidigamadïrï ayi ïgai dïï mai tïtïgai ix dukatai aituldagi go kokoadï xako dakatadai Suxi mos ïï muidukatai odami. Daidi tïtïsai ïgai baki daama dai xako dakatadai Suxi sïïrhi daama kupioko dai ami sïïrhi tïbañi go kokoadï uxiïrï. 5Dai aidïxi Suxi tïï xïï kïïga buaboitudai ïgai, potïtïdai ïgai go kokoadï,

—Sogigi aapi— itïtïdai, —Ka bïï buañixikami bii gï ibhïdaga ix makïdï soimaaxi ibuadana aapi— itïtïdai.

6Daidi ami darajatadai mamaatïtuldiadami sïïrhikami ix makïdï mai buaboitudai go Suxi. Dai ïgai pogïnïrhidi,

7—¿Ix tuixidï pomaaxi ñokai Suxi? Parunadan kaiti gobai Diuxi— gïn ïrhidi ïgai. —¿Mai xu mosïkaxi Diuxi ïgai dai bia sïïrhikami xi buanadagi odami iibïadï soimaaxkamigadï?— gïn ïrhidi ïgai.

8Dai Suxi kïï maatï ix tïtïitoi ïgai aidï daidi potïtïdai,

—¿Tui mïxi podukai gïn tïtïitoi aapimï? 9Daiñi, gokadu go ñoki ix makïdï kïï bhaiga xi tïdagi aanï go kokoadï. Kïï bhaiga aanï xi tïdagi sai iibhïadï ka buayi soimaaxkamigadï, xi ïpï kïï bhaiga aanï xi tïdagi ïpï, sai bañigana dai sai bhïna baakoxigadï dai sai imïna. ¿Makïdï go bïï goka ñoki gobai bamioma mai xijaiga ix tïdagi aanï aidï?— itïtïdai Suxi go mamaatïtuldiadami sïïrhikami.

10Dai potïtïdai ïgai ïpï,

—Daiñi, aanï ïr Diuxi otosadï ix makïdï aagai Diuxi ïïki, dai xibi idi ñokikïdï ix makïdï aagamu aanï gïn tïïgidamu in xi aanï bia sïïrhikami tami oidigi daama xi buanadagi odami iibïadï soimaaxkamigadï— itïtïdai.

Dai bhodïrï potïtïdai ïgai go kokoadï,

11—Aapi aanï gï aagidi, bañigiñi dai bhïiyi gï baakoxi dai noragi gï kiiyamu— itïtïdai Suxi.

Taidi go kokoadï otoma bañi dai bhïiyi baakoxigadï dai busai abhiadïrï dai bïïxi go odami nïidi. 12Dai go odami ka mai tïtïgaitadai ix dukatai gïn tïtïïgitoagi daidi ikaitimi,

—Xïïxi ïr gïïdukami Diuxi. Tomarhi ïmo imidagai mai nïidiña aatïmï go maaxi— ikaitimi odami.

Suxi báí ïmo kïïrhi Lebi tïgidukami sai oidana

13Bhodïrï jii go Suxi ïpamu go gïï sudagi ugidamu. Dai mui odami gïn ïmpagi ami tai Suxi gamaatïturhi Diuxi ñokidï. 14Bhodïrï bhaitïkioma jii Suxi dai nobai daibuskimi ïgai xako kïïka ïmo kii dai ami darajatadai gubukadagai bipiakami dai gataanïi kuota go iimïdami.

Dai Suxi tïï ïmo tanïdami kuota Lebi tïgidukami xi ami dakatadai. Alfeo maradï ïgai. Dai Suxi potïtïdai aidï,

—Gin oidañi aapi kïïrhi— itïtïdai.

Taidi Lebi oton oi go Suxi.

15Mui tanïdami kuota ïmadï jaa soimaaxi ibuadami oidiña go Suxi no aipakoga. Ïmo imidagai muidutai ïgai gakuadatadai Suxi ïmadï dai kiidïrï Lebi gakuayi ïgai. Mesa buidïrï daraka ïgai ïmadï ix makïdï oidatukïi go Suxi bïïxkatai. 16Ami darakatadai ïïmoko ïpï ix makïdï ïr maatïtuldiadami sïïrhikami dai ïr fariseo. Dai tïïgakai ïgai xorai ïmadï gakuadatadai Suxi, sai gatïkakaimi Suxi mamaatïrdamigadï aidï daidi potïtïdai,

—¿Tuixidï gïn amu urapïkïi odami galtutuigakami, dukami tanïdami kuota dai asta gakuayi dai gayïyi ïgai ïmadï?— astïkakaimi ïgai.

17Dai Suxi kaï daidi potïtïdai,

—Daiñi, ix makïdï mai soimaaxi ibuayi ïmadï ix makïdï mai kokokoñi ïgai bïï goka mai aagai duduadadami. Dai ix makïdï gia ïr soimaaxi ibuadami dai ix makïdï kabami ïr kokokoñiadï ïgai gia agai duadiadami. Kaxkïdï tudu dibia aanï ïmo duadiadami dukai soimaaxi ibuadami bïïtarï. Dai mai xu dibia aanï go makïdï ïr kïïga ibuadami bïïtarï. Mai bapaidimi aanï ïgai tudu— itïtïdai Suxi go fariseo.

Maiti gï agai xi soi gïn ïldagi mamaatïrdamigadï Suxi gïn ïmadï dakatai Suxi kia

18Ïmo imidagai go ix makïdï urabaka go Juan ïmadï ix makïdï urabaka go fariseo mai dïïkatadai kuadagai ibuadatai ïmo xadutudaragai dukai. Dai odami gïn tïgito nïidi xi go ix makïdï urabaka Juan mai dïïkatadai kuadagai aidï dïï Suxi mamaatïrdamigadï gia kïïga kuayi. Dai ïïmoko go odami mïï tïkakai go Suxi daidi potïtïdai,

—¿Ix tuixidï go ix makïdï urabaka go Juan dai go ix makïdï urabaka go fariseo mai dïïka kuadagai dai ix makïdï aapi gï urabaka gia kïïga kuayi?— itïtïdai.

19Taidi Suxi potïtïdai go tïkakadami,

—Maitï agai xi soi gïlda gin mamaatïrdamiga xibi kia. Kia ïmadï daja aanï di. Dïï gia xudu ka imïdagi aanï tabhiadïrï, aidï gia soi gïlda antaada ïgai dai aidï gia mai dïïka antaada ïgai kuadagai xadutudaitai. ¿Mai ix pobai gï ibuayi ïpï ïmo kunataragïrï? Daiñi, xadïrï mai kuadana dai xadïrï soi gïldakana ix makïdï ïr bapaidarxikami ïmo kunataragïrï xudu kia ïmadï dakagi go ix makïdï gaonta agai di. Pomaaxi gin mamaatïrdamigakïdï ïpï. Aanï kia ïmadï daja kaxkïdï kïïga kuayi ïgai. 20Dïï gia xudu aanï ix makïdï gin onta iñagai ka maigo imiagi aidï gia mai kuada antaada go bapaidarxikïdï xadutudaitai. Dai podukai aanï ïpï. Daiñi, ayimu ixtuigako aanï ix makïdï gin onta iñagai imimu tabhiadïrï dai aidï gia ix makïdï ïr gin bapaidarxikami gia mai dïïkamu kuadagai dai podukai xadutuadamu— itïtïdai.

Suxi aagai go yukuxi kïkïïrhiokoidadï aatagidï

21Dai apia aatagaimi Suxi dai xibi maaxidaragai ñoki dukai aagai ïgai ïmo aatagi daidi ikaiti,

—Mai kïïgadu daxdaragai ïmo ikuxi utudui ïmadï ïmo ikuxi kïrhiñdadï. Mos arhiduturïi go ikuxi utudukïdï dai bamioma sarañi antaada gobai bhaiyoma— ikaiti. 22—Dai go bino ïpï xudu yoobikagi kia maiti gï susudadai gobai ogi tutukayu kïkïïrhiokoidadïrï. Go ogi tutukayu arhiï gakïrïi dai kaapaturïi. Tadu tapai gobai dai bïï aaxi go bino— ikaiti. —Go bino yoobikami uutudui tutukayu abïr bïïtarï— ikaiti Suxi.

Suxi ipïrhiditadai xi odami mai saagida bhïiyagi Suxi buaboidaradï ïmadï jaa buaboidaragai. Ïjïkobai ïgai kaxkïdï.

Go ibhïxtaragai tasai

23Ïmo imidagai ibhïxtaragai tasïrï go mamaatïrdami tïrhigi ïxikami saagida iimïitadai Suxi ïmadï baidi bainkumaimi ïgai tïrhigi mumuradï saagida iimïitai. 24Baidi go fariseos ñokidi go Suxi aidï daidi potïtïdai,

—Daiñi, ¿tuixidï go ix makïdï gï urabaka ibuayi aaduindagai ix makïdï gïr daidi Moises ix ibuadagi aatïmï go ibhïxtaragai tasïrï?— itïtïdai go fariseos.

25-26Daidi Suxi potïtïdai go fariseos aidï sai,

—¿Maiti mïx kia nïidi tomarhi ïmo imidagai go ojai xako ojixi ix maaxi idui go Dabid ïïki aidïxi go kïïrhi Abiata tïgidukïdï ïr bhaitï kïakïdï judidiu daxdadami? Dai no imïitadai Dabid aidï ïmadï aaduñdï dai kabami bhiugikoñitugai. Daidi go Dabid baa kiiyïrï xako aïjïi Diuxi dai bhïiyi Diuxi daxdaradï pan. Go pan gobai mosïkaxi daxdadami biakana oigaragai xi ugiagi. Tai Dabid uu gobai tomaxi maiti ïr daxdadami ïgai. Dai aa oi aaduñdï ïpï. Podui ïgai dai maiti ïr soimaaxkami gobai— itïtïdai Suxi.

27—Daiñi, Diuxi dáí go ibhïxtaragai tasai xi ïr ibhïxtaragai bïïtarïkagi óídakami. Kaxkïdï kïï maatiga maaxi xi gïïpi bamioma gï agai ix xadutuadan dukai nïijada aatïmï óídakami dai go ibhïxtaragai tasai otïrhioma gï agai ix xadutuadagi. Odami bamioma ïr namïakami xi bhai go ibhïxtaragai tasai di. 28Daiñi, aanï ïr Diuxi otosadï ix makïdï aagai Diuxi ïïki dai bia aanï sïïrhikami xi tïanïdagi bïïxi aïkatai dai asta go ibhïxtaragai tasai bïïxi tïanïi aanï— itïtïdai Suxi go fariseo.

Currently Selected:

Markos 2: NTP

Highlight

Copy