Markos 3

Suxi duadi ïmo kïïrhi ix makïdï gakixapi nobidï

1-2Taidi kia ïr ibhïxtaragai tasïrï tai ïpamu baa go Suxi ïmo kiupaigadïrï judidiu bai ami dakatadai ïmo kïïrhi ix makïdï gakixapi ïmo nobidï. Dai jaa ix makïdï mai oigïdai go Suxi nïida agai sa bhai duadana ïgai go kïïrhi ibhïxtaragai tasïrï bai podukai biaka ïgai ixtukïdï gïpiïrï buajagi. 3Daidi Suxi potïtïdai go kïïrhi ix makïdï gakixapi ïkadï,

—Gimi dai kïkiba tami xako gï nïijadagi go gaa— itïtïdai.

4Dai bhodïrï potïtïdai ïgai go odami ix makïdï ami daraka,

—¿Ix kaiti aidï Moises ojadï sïïrhikami? ¿Gïr maakai xi ïgai oigaragai xi soikida aatïmï odami ibhïxtaragai tasïrï xi soi buidada aatïmï xio? ¿Gïr maakai xi oigaragai tïx kïïgakïrï bubaidagi odami xi muagi xio?— itïtïdai Suxi.

Dïï go odami mai ñokai daraka. 5Baidi go Suxi kabami nïnïidi bhaamudakïdï dai soi gï ïrhi nïiditai xïï ïr kaapakami iibïadï ïgai. Dai potïtïdai ïgai go kokoadï aidï,

—Sïïrhiñañi gï ïka— itïtïdai.

Tai ïgai sïïrhi dai ka duadixikami bii. 6Taidi bubuaja go fariseo abhiadïrï dai abïnakida agai go Erodïxi aaduñdï dai mua agai go Suxi.

Mui odami oiditadai go Suxi

7Dïï mos go Suxi jii go gïï sudagi ugidamu ïpamu ïmadï mamaatïrdamigadï, dai mui odami Galileañdïrï dai Judeañdïrï óídakami oi ïpï. 8Dai jaa odami kajioma ïpï xi ibuadatadai go Suxi dai dada dai nïida agai. Dada odami Judeañdïrï dai Jerusalenañdïrï dai Idumeañdïrï dai baasmokoradïrï go gïï aki Jordan dai asta mïï Tiroañdïrï dai Sidonañdïrï ïpï. Sïïrhikïdï mui dada odami aipadïrï aidï dai nïida agai go Suxi. 9Baidi go Suxi ka ïkiaxdïrï aagidi go mamaatïrdami sai bhai duiñdana ïmo barko bai ami daaka agai ïgai sai mai nïituskïiña mosïïki odami. 10Go Suxi ka sïïrhikïdï mui duduadi odami gï gubukadakïdï bai kaxkïdï aa kokokoñiadï taata ïrhidi go Suxi dai aipako nïituskïiña. 11Baidi go odami ix makïdï biakatadai Diabora tïtïañikarudï gïn totonakïdï gugukaiña Suxi buidïrï mos tïïgakai baidi go Diabora tïtïañikaru iñakitudaiña. Daidi potïtïdaiña ïgai,

—Aapi ïr Diuxi maradï kïïrhi— itïtïdaiña ïgai tïïgakai go Suxi.

12Dai Suxi sïïrhikïdï dáídi go Diabora tïtïañikaru ix maaxiko aagada xorai ïgai.

Suxi darai kïkïïrhi saidi ïr mamaatïrdamigadï

13Bhodïrï tïsai Suxi ïmo gidamu dai abhiadïrï bai ïgai go ix makïdï ipïrhi ïgai xi ïmadï dakagi bai ïgai oi. 14Daidi darai ïgai bhaibuxtama dan goka kïkïïrhi go odami saagidañdïrï sai ïgai ïmadï ajiopïda agai dai aagada agai Diuxi ñokidï xibhïako odami buitapi otosakai ïgai. 15Dai maa ïgai gubukadagai xi odamiañdïrï bubaida ïgai Diabora tïtïañikaru. 16Darai ïgai go Ximuñi ix makïdï Piduru aagaiña ïgai, 17dai Jakobo dai Jakobo xïgidï ix makïdï Juan tïgidu. Ïgai bïï goka ïr Sebedeo maamaradï dïï Suxi kobondami maamaradï aagaiña mos ïï gïïgïrï ñokadamikatai ïgai. 18Dai darai ïgai go Andïrïxi, ïpï dai Pirhi, dai Bartolomé, dai Mataibo, dai Tomás, dai Jakobo ix makïdï ïr maradï Alfeo, dai Tadeo, dai Ximuñi. Idi Ximuñi ïgai dai politiko aagaiña ixtumaxi bubaida ïrhiditai ïgai go romanos Israelañdïrï. 19Dai Suxi dáí go Udaxi Iskariote ïpï. Go Udaxi ïgai dai gokiïrï gatïïgi go Suxi mïsai muana.

Suxi mai ïmadï aatabuayi go Beelsebú

20Dai gokiïrï Suxi ayi kiiyïrï dai ami baa ïmadï mamaatïrdamigadï. Tai ïpamu sïïrhikïdï mui gïn ïmpagi odami ami kiiyïrï bai ïgai ka mai bhaigakatadai tomarhi gaugiagi mos ïï muidukatai dadidakami.

21Dai Suxi susukurhidï kaï ix dukatai ïpïbuimitadai daidi ikaiti aidï,

—Kaxi gï buirutu ïgai— ikaiti.

Dai gamo dui ïgai dai baidatika agai. 22Dai ami darakatadai mamaatïtuldiadami sïïrhikami ïpï Jerusalenañdïrï óídakami. Ïgai bui ñokai go Suxi dai pokaititadai sai go Suxi bia go Beelsebú agaikïdï. Go Beelsebú ïr bhaitï kïakamigadï bïïxi go Diabora tïtïañikarudï. Daidi ikaitiña ïgai,

—Ïgai baa Beelsebú gubukadadïkïdï bubaidimi gobai Diabora tïtïañikaru— ikaitiña ïgai mos kïïdaitai go Suxi.

23Daidi go Suxi báí go odami dai aagidi ïmo aatagi maaxidaragai aatagikïdï. Dai potïtïdai ïgai,

—¿Bhai ix ixtuidana go Diabora xi ïïgi gï busaidagi odamiañdïrï?— itïtïdai. 24—Daiñi. Ix ïmapïkïrï óídakami ïïgi gïn kokodagi mos aipako gïn kodi antaada ïgai dai gïn xia duada antaada. 25Dai ix ïmo kiiyïrï óídakami ïïgi gïn kokodagi ïgai mos aipako gïn kodi antaada ïpï dai gïn xia duadiagi. 26Dai xi go Diabora ïïgi gï bui gïxia ïrhiada xadïrï ixtuidïna ïgai, bhaiyoma mos ugiti antaada ïgai— itïtïdai Suxi.

27Dai apia aatagaimi ïgai daidi potïtïdai,

—Tomarhi ïmadutai mai baakia antaada kiidïrï ïmo kïïrhi gubuakami dai ïïxidagi. Ïbogiami xi ïpïgioma gï burhiagi go gubuakami gia gï dagito antaada ïgai mïx ïïxidagi ixtuma biakagi kiidïrï— itïtïdai Suxi.

28—Kïïga abïr gïn tïgito kaïka idi gin aatagi— itïtïdai. —Kïï bhaiga ix oigïrhidagi odami tomax tuma soimaaxkami ix makïdï ibuayi ïgai, tomaxi naana dukai parunadan kaitiada ïgai Diuxi bui. 29Dïï gia xorai parunada ñokada Diuxi Ibhïadï bui, ïgai gia ïïgi gï abhana bimu gobai soimaaxkami tomax tuigako. Gobai mai bia soiñi— itïtïdai Suxi. 30Pobai itïtïdai Suxi go odami ix makïdï pokaititadai sai go Suxi biakana ïmo Diabora tïañikarudï tudu.

Suxi susukurhidï dai dïïdï dibiji go Suxi

31Dai gokiïrï ami dada go Suxi susukurhidï ïmadï dïïdï, dïï mos kidigamadïrï bii ïgai dai abhiadïrï otoxi ñoki go Suxi sai dibiana. 32Bai ïgai ix makïdï sonoana darakatadai go Suxi potïtïdai,

—Kidigana daraja gï daada ïmadï gï susukurhi daidi gï gaagai— itïtïdai.

33Dai Suxi potïtïdai,

—Gïn aagidamu aanï xorai ïgai dai gin daada dai gin susukurhi dukai nïidi aanï— itïtïdai.

34Dai nïidi ïgai ix makïdï gï xikorhi daraja daidi potïtïdai,

—Aapimï gin dïï dai gin susukurhi dukami gin bïïtarï. 35Daiñi— itïtïdai. —Toma xorai dai ibuadagi ixdukatai Diuxi ipïrhidi ïr gin dïï dai gin susukurhi dukami gin bïïtarï— itïtïdai ïgai go ix makïdï ami darajatadai.

Currently Selected:

Markos 3: NTP

Highlight

Copy