Mataibo 9
9
1Dai bhodïrï ïpamu tïsai Suxi barkoïrï dai ïpamu daibusai basadïrï go gïï sudagi xako oidakami ïgai. 2Dai go óídakami ïmo baakoxiana buapi ïmo kïïrhi ix makïdï mai oiñïitadai tukugadï. Daidi gï tïgito nïidi Suxi xïï kïïga buaboitudai ïgai ami buapakai ïgai go kokoadï daidi potïtïdai ïgai go kokoadï,
—Maiti soi gïlda aapi kïïrhi— itïtïdai. —Kaxi gï oigïrhi aanï bïïxi go soimaaxkami ix makïdï ibuadana aapi— itïtïdai.
3Dai ami darakatadai chïki tïtïgiadami go sïïrhikami ix makïdï mai buaboitudai go Suxi. Dai ïgai pobïnïrhidi,
—¿Ix tuixidï pokaiti Suxi sai oigïrhi soimaaxkamigadï go kïïrhi? Parunai gobai Diuxi tudu— gïn ïrhidi ïgai. —Mosïkaxi Diuxi bia sïïrhikami xi oigïldagi soimaaxkamigadï odami dai buanadagi iibhïadï tudu— gïn ïrhidi ïgai.
4Dai Suxi kïï maatï ix gïn tïtïitoi ïgai daidi potïtïdai,
—¿Ix tuixidï gïn tïtïitoi aapimï sai mai bia aanï gubukarhigai ix oigïrhiadagi go soimaaxkamigadï odami? Soimaaxi tïtïitoi aapimï tudu. 5¿Mai ix pokaitiña aapimï sai xorai biakagi gubukarhigai ix duadiagi ïmo kokoadï ix makïdï mai oiñïdagi tukugadï sai ïgai bia gubukarhigai ïpï ix oigïldagi soimaaxkamigadï? 6Daiñi aanï ïr Diuxi otosadï ix makïdï ïmo kïïrhi busai. Dai gïn tïïgidamu aanï sai bia aanï gubukarhigai ix oigïldagi go soimaaxkamigadï bïïxi óídakami— itïtïdai.
Dai bhodïrï potïtïdai Suxi go ix makïdï mai bhaigakatadai oiñïitadai tukugadï,
—Aapi kïïrhi, bañigiñi dai bhïka gï baakoxi dai noragi gï kiiyamu— itïtïdai.
7Daidi go kokoadï otoma bañi dai bhïiyi baakoxigadï dai nora kiidïrï.
8Dai bïïxkatai go odami nïidi dai ka mai tïtïgaitadai ix dukatai gïn tïtïïgitoagi daidi ikaitimi,
—Xïïxi ïr gïïdukami Diuxi dai gïr otoxi ïmo kïïrhi kïïga biakami gubukarhigai— ikaitimi go odami.
Abïnaki Suxi go Mataibo sai oijadana
9Bhodïrï bhaitïkioma jii Suxi dai daibusai xako kïïka ïmo kii. Dai ami darajatadai gubukadagai bipiakami dai gataanïitadai ïgai kuota go iimïdami. Dai ami tïï Suxi ïmo tanïdami kuota Mataibo tïgidukami. Dai Suxi potïtïdai,
—Gin oidañi aapi kïïrhi— itïtïdai.
Daidi go Mataibo oton oi go Suxi.
10Dai ïmo imidagai Mataibo kiidïrï dakatadai go Suxi dai ami darakatadai mui taanïdami kuota ïmadï jaa ix makïdï soimaaxi ibuadami aagaiña go judidiu dai gakuadatadai ïgai go Suxi ïmadï. Ami mesa buidïrï darakatadai ïgai ïmadï mamaatïrdamigadï Suxi ïpï tudu. 11Dai ami darakatadai ïïmoko ïpï ix makïdï ïr gatïtïïgiadami sïïrhikami daidi ïr fariseos. Dai nïiditai ïgai sai Suxi ïmadï gakuayi soimaaxi ibuadami sai potïtïdai ïgai go mamaatïrdamigadï Suxi,
—¿Tuixidï urapïkïi gïn amu galtutiakami odami dai asta gakuayi ïgai ïmadï?— itïtïdai ïgai.
12Dai Suxi kaï daidi potïtïdai,
—Daiñi, kïï maatï aapimï sai odami ix makïdï mai kokokoñi mai aagai duduadadami. Dïï gia ix makïdï kabami kokokoñi ïgai gia aagai gobai— itïtïdai Suxi go fariseos. 13—Kaxkïdï gï agai sai maatïkagi aapimï ix tïiya ïrhidi Diuxi ñokidïrï xako ikaiti sai,
—Aanï Diuxi ipïrhidi sai soi gïn ïrhiadagi odami jaa bïïtarï mai pokaxi aagai aanï go naana maaxi daxdaragai ix makïdï ibuayi odami gin bïïtarï— ikaiti Diuxi ñokidï.
Gobai gï agai xi maatïkagi aapimï. Gï agai tudu xi maatïkagi aapimï sai aanï dibia mai xu bapaida iñagaitai odami sai gin urabana ix makïdï ïïgi kïï buañixikami gïn aagai iibhïadï. Bapaidimi aanï odami ix makïdï kïï maatï saidi ïr soimaaxi ibuadami tudu— itïtïdai.
14Ïmo imidagai ïïmoko go mamaatïrdamigadï Juan mïï aagidi go Suxi daidi potïtïdai,
—¿Ix tuixidï aatïmï ix makïdï urabaka go Juan dai go ix makïdï urabaka go fariseos dudatai maita gakuayi ibuadatai aatïmï xadutudaragai Diuxi bïïtarï dai ix makïdï aapi gï urabaka gia gakuayi?— itïtïdai.
15Daidi potïtïdai Suxi,
—Gïn aagidamu aanï ïmo maaxidaragai aatagi sai maatïkana aapimï ix tui. Daiñi, aanï ïr ïmo ontadami dukai ïmo kunataragïrï. Dai gin mamaatïrdamiga ïr bapaidarxikami dukai ami go kunataragïrï. Kaxkïdï gï agai sai kïïga bhai gïn ïrhiada ïgai dai gakuada gin ïmadï darakatai. Xadïrï soi gïn ïrhidiña ïgai dai maiti gakuadana kia ïmadï dakatai aanï tudu. Dïï gia ayimu ixtuigako maigobai gin baidakatudamu aanï dai aidï gia maiti gakuadamu ïgai ïïmo imidagai ïmo xadutudaragai dukai— itïtïdai.
Suxi aagai ïmo maaxidaragai aatagi aagaitai sai odami bia xi dagitoagi go ïïkidadï buaboidaradï ix ipïrhiadagi ix bhïiya go utudui buaboidaragai ix makïdï gatïtïïgidi Suxi
16Dai oi Suxi go aatagidï dai potïtïdai ïgai go odami,
—Xadïrï dadaxdana odami ïmo ikuxi utudui ïmo ikuxi kïrhiñdadïrï. Go utudui ikuxi arhidutuda antaada dai asta bamioma sarañi antaada xako gï dadaxdi gobai tudu— itïtïdai.
17—Dai podukai ïpï xadïrï sudadana odami ïmo ogi tukayu kïrhiñdadïrï utudui bino. Ix pobuadagi ïgai aidï gia gokiïrï kopi antaada go ogi tukayu dai bïïxi aaxta antaada go bino. Daiñi, go utudui bino gï susudadai utudui tutukayuïrï. Podukai mai xïbuayi tomarhi go bino dai tomarhi go ogi tutukayu ïpï— itïtïdai.
Suxi duduadi kokokoñiadï buaboitudakai ïgai Suxi
18Kia mesa buidïrï dakatadai Suxi aidï dai kia gamamaakaitadai aatagi bai ami dibia ïmo kïïrhi ix makïdï biakatadai ïmo sïïrhikami kiupaigadïrï go judidiu. Ami ayi ïgai dai tootonakïdï kïkiba buidïrï Suxi daidi potïtïdai,
—Utudami ugidagai gin maara oki. Dïï gia buaboitudai aanï sai ix mïï taatagi aapi gï ïkakïdï, kïïga duakatuda antaada ïpamu— itïtïdai.
19Dai otoma oi Suxi ïmadï mamaatïrdamigadï gamo kiidïrï go kïïrhi.
20-21Boiyïrï iimïitadai ïgai kia bai ami ayi ïmo oki gokiamadïrï go Suxi. Ka bhaibuxtama dan goka umigi soimaaxkatadai ïgai masadaigadï. Dai pobïrhiditadai ïgai sai, ix mos taatagi ïgai Suxi baasaradï ugiaradï sai kaxkïdï ka duadi antaada. Dai mos taata ïgai baasaradï bai Suxi máí ix ïmadutai taata.
22Dai gokiamako nïnïaba go Suxi daidi potïtïdai,
—Bhai gï ïrhiada aapi oki. Ka kïïga buaboitu aapi dai kaxkïdï ka duayi aapi— itïtïdai. Dai mos potïkai Suxi otoma duayi go oki.
23Dai bhodïrï ayi go Suxi go sïïrhikami biakami kiidïrï. Dai tïï ïgai go iibadami ix makïdï soi ïrhiaragan dukai gaiibai. Dai ami darakatadai bhai mui óídakami ïpï dai gïgïr susuanaitadai. Ka mos xia kaititadai ïgai ami tudu. 24Daidi Suxi potïtïdai,
—Iimibïrai— itïtïdai. —Maiti ïr mukiadï go arhi oki. Mos koso gobai— itïtïdai.
Bai go óídakami aasïi mai buaboidaitai.
25Dïï gia ka bubuakïkai go odami sai baa Suxi xako kaatïkatadai go arhi oki dai bhïiyi ïkadï bai kïkiba go arhi oki. 26Pogïdui tudu. Daidi gokiïrï bïïxi go aipako óídakami máí go gïdukami maaxidaragai ix makïdï idui Suxi ami duakatuldakai ïgai go arhi oki.
27Dai bhodïrï jii Suxi abhiadïrï dai no boiyamu iimïi ïgai daidi goka kïkïïrhi mai nïadami oiditadai. Daidi gïgïr iñakimi go kïkïïrhi daidi ikaitimi,
—Aapi Suxi, aapi ïr pipiixaradï go rey Dabidkaru. Soi gïlda aatïmïkïdï dai gïr soiña— ikaitimi.
28Dai ayi Suxi kiiyana dai ami baa. Dai go kïkïïrhi mai nïadami bapai ïpï daidi Suxi potïtïdai,
—¿Buaboitudai mïxi saidi ixtutuidikïi aanï ix gïn duduadagi?— itïtïdai.
Daidi go kïkïïrhi potïtïdai,
—Ïjï aapi Gïr Nukadakami, buaboitudai aatïmï— itïtïdai.
29Daidi taata Suxi bupuidï go kïkïïrhi daidi potïtïdai,
—Po gï duñimu ixdukatai buaboitudai aapimï— itïtïdai.
30Daidi otoma duayi bupuidï go kïkïïrhi dai ka nïnïaba bii ïgai. Daidi Suxi potïtïdai,
—Maiti abïr maigobai aagiada saidi aanï duduadi— itïtïdai.
31Dïï gia go kïkïïrhi mai ïïgidi dai bhaiyoma ka bubuakïkai ïgai abhiadïrï sai aipakoga aagaiña gobai. Daidi bïïxi óídakami ami munisipiïrï máí ix tuma duitadai Suxi.
Duadi Suxi ïmo kïïrhi ix makïdï mai bhaigakatadai ñokadagi
32Kia abhai kiiyañdïrï bubuakimitadai go kïkïïrhi ïgai ix makïdï duayi bupuidï bai ami dada jaa. Buapidi ïgai go Suxi ïmo kïïrhi ix makïdï mai bhaigakatadai ñokiagi biakatai ïgai ïmo diabora tïañikarudï ïrana. 33Dai busaitu Suxi go diabora tïañikarudï bai kïïga ño go kïïrhi ïpamu. Dai go óídakami nïidi aidïxi busaitu Suxi go tïañikarudï go diabora daidi mai tïtïgaitadai go óídakami ixtumaxi gï tïtïgitoagi. Daidi ikaitiña ïgai,
—Tomarhi ïmo imidagai maiti nïidiña aatïmï tami Israelïrï ix gï duadiagi ïmo odami podukai ix makïdï mai ñokaitadai biakatai ïmo diabora tïañikarudï podukai— ikaitiña.
34Dïï gia go fariseos mai bhai gïn ïrhiditadai nïiditai ixtumaxi idui Suxi daidi ikaitiña,
—Go diabora ïgai dai mamaakai gubukarhigai go Suxi dai kaxkïdï bhaiga ïgai ix odamiañdïrï bubaidagi tïtïañikarudï go diabora. Go diabora ïr tïanïdamigadï go tïañikarudï tudu— ikaitiña go fariseos.
35Aidïpïrï go Suxi aipakoga aimïraitadai daidi didibiditadai ïgai mui go gïgïr kiiki ïmadï aarhi kiiki ïpï ami Galilea munisipioana. Ami kiikiïrï aïjïiña ïgai kikiupaigadïrï go judidiu dai ami mamaakaiña ïgai aatagi aagaitai go bhai ïrhiaragai ix makïdï ikaiti sai toma gatïanïda agai Diuxi. Dai aipakoga duduadaiña ïgai bïïxi go naana maaxi kokokoñiadï ïpï.
36Dai mui óídakami aïjïiña xako dakagi Suxi dai Suxi soi gï ïrhi go óídakami bïïtarï. Nïidi ïgai sai go óídakami mai tïtïgaitadai ix dukatai iduñagi dai kïïgakïrï óídakagi dai sai mai biakatadai ïgai xorai soiñagi tudu. Nïidi ïgai sai go óídakami ïpïan maaxkana kañiñiru ix makïdï mai biakana nukadakamigadï tudu.
37Daidi potïtïdai Suxi go mamaatïrdamigadï aidï sai,
—Sïïrhikïdï muidu óídakami ix makïdï tïgito xorai tïïgidagi ixtumaxi ïr buaboi dïï biïga mui aatabuadami xorai tïïgidagi. Ïpïan dukami ïgai ïmo yoobaragai xïïxkadï gïïpigakagi yoobaragai dai chïkidukagi yoobadami— itïtïdai. 38—Daanïdabïrai Diuxi tudu sai otosana mui odami saidi yooban duñagi ïgai óídakami soikïitai ix buaboitudagi ïgai— itïtïdai. —Diuxi ïgai dai gatïanïi go yoobaragïrï tudu— itïtïdai.
Currently Selected:
Mataibo 9: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
