Mataibo 8
8
Suxi duadi ïmo kïïrhi ix makïdï kabami xia gï buimitadai tukugadï kokodagaikïdï
1Dai naatokai Suxi aatagidï sai bhodïrï tïbai ïgai ami gidiañdïrï xako gamaatadai ïgai go aatagi. Dai mui óídakami oi maigo taana ami gidiañdïrï. 2Dai ami dibia ïmo kïïrhi xako imïitadai go Suxi dai buidïrï ayi. Kabami ïr kokoadï ïgai. Ka dubarhimikatadai tukugadï kokodagaikïdï tudu. Lepra tïgidu go kokodagai ïgai. Dai gï totonakïdï kïkiba go kokoadï ami buidïrï Suxi daidi potïtïdai,
—Aapi Gïr Nukadakami, ix ipïldagi aapi kïïga gin duadi antaada aapi— itïtïdai go kïïrhi.
3Daidi go Suxi taata nobikïdï daidi potïtïdai,
—Ipïrhidiana ix gï duadiagi aapi. Xibi an aagai sai duadïna aapi— itïtïdai.
Mos potïi Suxi bai amaxi kïïga duayi go kïïrhi.
4Daidi bhodïrï Suxi potïtïdai,
—Maiti aagida tomarhi ïmadutai ix ka duayi aapi— itïtïdai. —Mos sai imi aapi go gïï kiupiana bhaiyoma dai ami gï tïïgida buidïrï go dadaxdadami sai ïgai aagana ix ka duayi aapi. Dai bhodïrï ami go dadaxdadami buidïrï tïïgida go daxdaragai ix makïdï ojixi go Moises sïïrhikamigadïrï, ix makïdï gï agai xi ibuadagi odami xïïxkadï ka dagitoagi go lepra kokodagai tudu. Podukai maatïkamu go gaa odami ix ka duadixikami gï aa go dadaxdadami tudu— itïtïdai Suxi go kïïrhi.
Suxi duadi pioñigadï ïmo tïanïdami sandadaru romano
5Daidi bhodïrï ayi Suxi xako Kapernaum tïgidu ïmo kiiki. Dai ïmo tïanïdami sandadaru romano ami ayi buidïrï Suxi dai daañimi. Dai potïtïdai,
6—Aapi gin Tïanïdamiga, amïka gin kiiyïrï kaatï ïmo gïïrhi gin pioñiga dai mai bhaiga oiñïdagi tukugadï— itïtïdai. —Sïïrhikïdï kabami koko tudu— itïtïdai.
7Daidi Suxi potïtïdai,
—Amïka imimu aanï gï kiiyamu daidi duadamu— itïtïdai.
8-9Daidi go tïanïdami sandadaru potïtïdai,
—Cho aapi gin Tïanïdamiga, maiti ïr ajïakami aanï xi bakiagi aapi gin kiiyïrï mos ïï gïïpi bamioma namïakatai aapi xi aanï— itïtïdai. —Kïïga gï buaboitudai aanï sai mosïkaxi gï ñokikïdï duadiagi gin pioñi— itïtïdai. —Kïïga maatï aanï gobai. Aanï ïr sandaru tudu dai bia aanï xi ïïgiadagi ñokidï gin tïanïdamiga. Dai aanï tïanïi jaa sandadaru ïpï dai bia ïgai xi gin ïïgiadagi gin ñoki ïpï. Dukami xi aagidagi aanï sai maigobai imïna ïmoko ka biakana ïgai xi gin ïïgiadagi. Dai xi aagidagi aanï ïmoko sai bhaigobai dibiana, biakana xi otoma dibiagi ïgai. Dai bia aanï gin pipioñiga ïpï dai ixdukatai aagidagi aanï bia ïgai xi gin ïïgiadagi. Kaxkïdï kïïga buaboitudai aanï sai ix aapi tabhiadïrï aagagi aapi sai duadana gin pioñiga otoma duadiamu ïgai. Mai bia aapi xi imiagi amïka tudu— itïtïdai go tïanïdami sandadaru go Suxi.
10Dai kïïga bhai ïrhiarakïdï kaï Suxi go ñokidï go tïanïdami sandadaru. Daidi potïtïdai Suxi go óídakami ix makïdï oidi ami boiyana,
—Kïïga ïr buaboi ixtumaxi gïn aagidamu aanï xibi— itïtïdai. —Aanï aagai sai mai tïtïgaiña aanï ïmai xorai ïpïan ïxi buaboitudagi idi tïanïdami sandadaru. Kïïga buaboitudai gobai tudu. Mai tïtïgaiña aanï ïmai xorai poïxi kïïga buaboitudadagi tomarhi gin aaduñi judidiu saagida ix makïdï tami Israelïrï óídaga tudu— itïtïdai.
11—Daiñi— itïtïdai. —Go Diuxi nukaturhi ojadï go Judidiu ïïki sai ïgai nukadakana. Kaxkïdï gï agaitadai ïgai ix biakagi oigaragai ix Diuxi tïanïdagi. Dïï gia aanï agai sai muidutai ïgai uraba agai go odami ix makïdï tïanïi Diuxi. Dai bhaiyoma mui óídakami ix makïdï maiti ïr judidiu gia uraba agai Diuxi gatïanïitai ïgai. Bïïxi aipadïrï oidigi daamaiñdïrï dadi agai ïgai dai urabamu go aaduñdï Diuxi tudu. Xarhi utamajadïrï dadimu ïgai dai uruñiamajadïrï ïpï dai ugimu ïgai ïmadï go Abraamkaru dai go Isaakaru dai go Jakobokaru ami xako gatïanïi Diuxi— itïtïdai.
12—Dïï gia go judidiu ix makïdï gï agaitadai xi urabagi mai uraba agai. Dai bhaiyoma Diuxi otosa agai maigobai xako bïïxkïrï tukamuga dai ami suanïdamu ïgai dai kïrïndamu taatamudï kokokatai— itïtïdai Suxi go odami ami.
13Daidi bhodïrï potïtïdai Suxi go tïanïdami sandadaru,
—Ka bhaiga aapi xi noragiagi ïpamu. Kaxi gin buaboitu aapi xi kaxkïdï pogïdui gï pioñi gïïrhi ixdukatai aagai aapi gin buaboidaitai— itïtïdai.
Dai kaduku aidïxi potïi Suxi kaduku duayi go pioñi.
Suxi duadi tumudï go Piduru
14Dai bhodïrï jii Suxi kiidïrï Piduru. Ami tïï ïgai tumudï Piduru xi ami kaatïkatadai kabami oiditai toiñdagai. 15Dai taata Suxi ïkadï go kokoadï dai otoma dagito go toiñdagai. Daidi bañi ïgai dai bhii ïgai go Suxi.
16Dai bhodïrï ka dupikai tasai saidi go óídakami ami buapi Suxi mui kokokoñiadï ïmadï mui ix makïdï biakatadai tïtïañikarudï go diabora. Dai Suxi go ïïgi ñokidï gubukarhigadïkïdï bubaitu go tïtïañikarudï go diabora dai duduadi bïïxi go kokokoñiadï ïpï. 17Po dui ïgai ixtumaxi oja go Isaiaskaru ïïki. Go Isaias ïr ïmo ñokituldiadamigadï Diuxi dai oja ïgai ïmo ojai aagaitai Diuxi Otosadï, aagaitai go Tïanïdami tudu. Dai ikaiti ami go ojiïrï sai,
—Diuxi otosadï maigobai dáí go kokodagai ïmadï bïïxi ixtuma soi taatamaiña aatïmï— po tudu oja go Isaiaskaru ïïki.
Kaxkïdï duduadi Suxi go kokokoñiadï ïmadï ix makïdï biakatadai tïtïañikarudï go diabora ibuadatai ïgai ixdukatai oja go Isaiaskaru ïïki.
Suxi aagidi mamaatïrdamigadï sai xijiakamu ix oijadagi ïgai
18Muidukatadai odami ami xako dakatadai Suxi aidï go gïï sudagi abhana. Dai nïiditai Suxi mos ïï mui odami sai aagidi ïgai mamaatïrdamigadï sai baidakana ïmo barkoïrï baasadïrï go gïï sudagi. 19Dai mai kia tïtïsai ïgai go barkoana bai ami Suxi buidïrï ayi ïmo kïïrhi ix makïdï ïr tïtïgiadami sïïrhikami. Dai potïtïdai ïgai Suxi,
—Aapi gin mamaatïtuldiadamiga, aanï gï oijadamu tomaxakoga aimïrdagi aapi— itïtïdai.
20Dai Suxi ipïrhiditadai sai go kïïrhi maatïkana sai xijiaka agai ix oijadagi ïgai Suxi daidi potïtïdai ïgai,
—Aapi kïïrhi, asta go kakaxokai biakana xako kokosïdagi oidigana dai go ujurugi ïpï bia kokosadï, dïï gia aanï ix makïdï ïr otosadï Diuxi dai ïmo kïïrhi busai, aanï gia mai bia tomarhi xakoga gin ibhïxtagi— itïtïdai.
21Dai mai kia tïtïsai ïgai barkoana bai ïpï ïmai mamaatïrdamigadï Suxi potïtïdai,
—Gin Tïanïdamiga, gï oijada in ïrhidi aanï dïï gin maakañi oigaragai kia xi imïdagi aanï gin kiiyamu. Mïï kiiyana biiya in ïrhidi kia asta xïïxkadï mukiagi gin oga. Dai asta yaasakai aatïmï aidï gï oijadamu aanï— itïtïdai.
22Daidi Suxi potïtïdai,
—Cho— itïtïdai. —Daiñi, gï oga kia ïr mukiadï duu ibhïadï. Kaxkïdï dagitoñi go aaduñdï ix makïdï koidadï duu ibhïadï ïpï sai yaasana. Dai aapi mos sai gin oijada— itïtïdai.
Suxi mamaaxidi sai bia gubukarhigai ix tïanïdagi go ïbïrhi ïmadï sudagi Diuxikatai ïgai
23Dai bhodïrï tïsai Suxi go barkoïrï dai mamaatïrdamigadï tïtïsai ïpï. 24Dai bhodïrï aidïxi kaxi go sudagi ïrana iimïitadai ïgai bai kabami ïïbï. Xigarhi buimi go sudagi ïbïrhikïdï tudu. Karhioga dupimitadai go barko dïï gia go Suxi mos koso ami go barkoïrï kaatïkatai.
25Daidi go mamaatïrdamigadï nïñitu go Suxi dai potïtïdai,
—Gïr Nukadakami gïr soiñañi. Kaxi atrhioga bhaiko aatïmï— itïtïdai.
26Dai Suxi potïtïdai,
—¿Ix tuixi duduadimuka aapimï? Sïïrhikïdï mai kïïga gin buaboitudai aapimï xorai aanï tudu— itïtïdai.
Dai bhodïrï bañi go Suxi dai ñokidi ïgai go ïbïrhi ïmadï sudagi dai otoma dodorhi bii gobai.
27Dai go mamaatïrdamigadï mai tïtïgaitadai ixtumaxi gïn tïtïgitoagi daidi pokaitiña,
—¿Xorai go Suxi dai asta go ïbïrhi ïmadï sudagi bïïxi ïïgidi?— ikaiti.
Goka kïkïïrhiañdïrï bubaitu Suxi mui tïtïañikarudï go diabora
28Barkoana imïitadai Suxi ïmadï mamaatïrdamigadï tudu. Dai baasadïrï dïgabusai ïgai go gïï sudagi dai ayi xako Gadara tïgidu oidigi. Ami oidakatadai tïtïjobai xako yaasapaiña koidadï go judidiu. Dai ami saagidañdïrï go tïtïjobai bubuaka goka kïkïïrhi biakami tïtïañikarudï go diabora. Sïïrhikïdï oomarhiga ïgai. Mai bhaigakatadai óídakami xi ami miadïrï dïgabuskïdagi mos ïï oomarhigakatai ïgai. Abhiadïrï bubuaka go kïkïïrhi tudu dai mïï buidïrï ayi ïgai go Suxi. 29Dai iñakimi ïgai daidi ikaitimi,
—¿Ix tuixi gï bapasai aapi tami gïr ïmadï, aapi Diuxi Maradï?— ikaitimi. —¿Kaxi pïx soimaaxi gïr taatatulda ïrhidi mai kia aïkai ix tuigako?— ikaiti.
30Daidi no maigobai saadakatadai óídakami mui tataixorhi aidï. 31Daidi go tïtïañikarudï go diabora potïtïdai go Suxi,
—Pïx gïr bubiadagi idi kïkïïrhiañdïrï pai gïr dagito tïtai bapakia aatïmï go tataixorhiïrï— itïtïdai.
32Daidi Suxi potïtïdai,
—Iimibïrai tudu— itïtïdai.
Daidi go diabora tïtïañikarudï bubuaka go kïkïïrhiañdïrï dai mïï tataixorhiïrï bapai. Daidi go tataixorhi maigobai taana boopoi dai go gïï sudagiïrï surhi dai bïïxi bhaikoi.
33Daidi go nunukadami tataixorhi dïgabuna boopoi dai kabami duduadimutugai. Dai mïï aagidi kiikiana bïïxi ixtumaxi pogïduitadai go tataixorhi dai go kïkïïrhi ïpï ix makïdï biakatadai diabora tïtïañikarudï. 34Dai bïïxi go óídakami ami kiikiañdïrï iji dai mïï nïidi agai go Suxi. Dai tïïgakai ïgai go Suxi sai aagidi ïgai sai imïna abhiadïrï.
Currently Selected:
Mataibo 8: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida