Mataibo 7
7
Suxi potïtïdai go odami sai gï agai ïmoko xi ïpïgioma buanagi ïïgi soimaaxkamigadï dai aidï gia bhagakamu xi soiñagi jaa soimaaxi ibuadami sai buanadana soimaaxkamigadï ïpï
1Daidi apia oidi Suxi aatagi daidi potïtïdai ïgai go odami,
—Maiti abïr soi dukai nïijada jaa po gïn ïrhiditai aapimï saidi bamioma ïr gïpiïrï bïtïkami ïgai xi aapimï. Xorai podukai nïijadagi jaa kaxi ïr gïpiïrï kaatïkamika agai Diuxi bïïtarï tudu. 2Dai ixdukai nïijadagi aapimï jaa podukai gïn nïijadamu Diuxi aapimï ïpï— itïtïdai.
3—Daiñi, aapimï ojoidi xi soi dukai nïijadagi jaa dai pokaitadagi saidi ïgai bamioma ïr soimaaxi ibuadami xi aapimï. Podukai nïidi aapimï jaa tomaxi kabami ïr soimaaxi ibuadami aapimï dai go gaa otïrhioma ïr soimaaxi ibuadamikagi.
Gobai ïr ïpïan dukami xi maigobai dasa ïrhiadagi aapimï ïmo arhi tukuragai bujidïañdïrï ïmai biakatai aapimï ïmo gïï uxi ïïgi gïn bujiïrï. ¿Dukatai soiñana aapimï go gïmai podukai di?— itïtïdai. 4—¿Bhai ix kïïgadu xi aagidagi aapi ïmo gï aaduñi sai maigobai dasa agai aapi ïmo arhi tukuragai bujidïañdïrï ïïgi biakatai aapi ïmo gïï uxi ïïgi gï bujiïrï? Xadïrï. 5Xi pobuadagi aapi aidï gia kïï tuigakami gï dadasai aapi mai kïï tuigakatai aapi. Gï agai bhaiyoma sai ïpïgioma maigobai dasagi go gïï uxi gï bujiañdïrï. Dai aidï gia bhaigakamu aapi xi soiñagi gï aduñi ix makïdï bia ïmo arhi tukuragai bujidïrï. ¿Mai ix pomaaxi gobai?— itïtïdai.
Suxi gamaa ñoki dai pokaiti sai ix tumaxi gamamaakai Diuxi maiti ïr pupuirugami bïïtarï
6Dai bhodïrï Suxi aagai ïmo maaxidaragai ñoki daidi potïtïdai ïgai go odami sai,
—Ixtumaxi Diuxi amadïrï imïdagi kïïga buañixi dai kabami ïr namïakami. Maiti gï agai tudu xi tïïgidagi gobai pupuirugami ix makïdï mai bhïbhïjïi ixtumaxi ïr buaboi. Ïgai googoxi dai tataixorhi gïn dukami tudu pupuirugakatai ïgai. Xi tïïgidagi aapimï ixtumaxi Diuxi amadïrï imïi gobai ïr ïpïan dukami xi oidadagi aapimï googoxi xiïpï tataixorhi ixtumaxi namïakami. Kïixona antaada ïgai dai asta gï kïiya antaada dai bïïxi naato saasarai antaada gï tukuga tomaxi gatïtïïgidi aapi ixtumaxi kïïga namïakami— itïtïdai.
Suxi aagai ix dukatai daanïdagi Diuxi
7-8—Abïr mai ugutai daanïda Diuxi xïxkadï tïgitokagi aapimï ixtumaxi bai ïgai gïn maakimu. Diuxi amadïrï abïr gaaga mïx ixtumaxi tïgitokagi daidi tïigimu aapimï. Ïpïan dukami gobai xïïxkadï sosonadagi aapimï ïmo kitaagiña no xibhïkai dai tanïdagi baakigai. Xïïxkadï pobuadagi aapimï gï kupioskïi gobai sai ami bapakiagi aapimï. Pomaaxi xïïxkadï mai ugutai daanïdagi aapimï Diuxi ïpï. Diuxi mamaakai ixtumaxi kïïgadukami xorai tanïdagi tudu— itïtïdai Suxi.
9—Daiñi aapimï kïkïïrhi, ¿Bhai ix maakana aapimï gïn maamara ïmo odai gïn taanïitai ïgai ïmo pan? Xadïrï ¿aba? 10Dai ix gïn taañiagi ïgai ïmo batopa ¿Bhai ix maakana aapimï ïmo kooyi? Cho ïpï. 11Kïïga mamaakai aapimï gïn maamara naana maaxi kïkïïgadukami tudu, tomaxi mai xii kïï tutuiga aapimï. Dai Diuxi ix makïdï tïbagiana oidaga gïïpi bamioma kïï tuiga xi bhai aapimï. Kaxkïdï gï maatï sai ïgai maakimu ixtumaxi kïïgadukami xorai tañiagi— itïtïdai.
12Daidi potïtïdai Suxi go odami ïpï sai,
—Mïx tumaxi ipïrhiadagi aapimï saidi gïn buidadagi jaa, podukai abïr buidada aadïrï ïgai. Podukai gïr maatïturhi go sïïrhikamigadï Moises ïmadï go ojadï go ñiñokituldiadamigadï Diuxi tudu— itïtïdai Suxi go odami.
Suxi gamaa ïmo ñoki aagaitai goka boi dai aagaitai go yaatabogami ix makïdï gatïtïïgidi ñoki
13Daidi Suxi potïtïdai go odami ïpï sai,
—Arhidu go kuuparagai ix makïdï ïr go bakigai xako gatïanïi Diuxi xako kïïgakïrï óídaga odami. Ami abïr bapaki tudu— itïtïdai. —Go gïmai kuuparagai ïmadï go boi ix makïdï go gïï táí amakoga kaatï gobai gia gïïdu dai mui óídakami bapakïi ami dai taatamai gïgïbidaragai ami. 14Dïï gia go kuuparagai ix makïdï ïr go baakigai xako kïïgakïrï óídaga odami xako gatïanïi Diuxi gobai sïïrhikïdï arhidu gajiakoga dai ami go boi sïïrhikïdï arhidu gajiakoga ïpï. Kaxkïdï chïkidu go óídakami ix makïdï bapakïi ami— itïtïdai.
15—Gïn nukadabïrai sai maiti gïn bupuirumadagi jaa ix makïdï tïtïïgiadami gïn aagai Diuxi ñokidï dai maiti ïr buaboi. Ïgai kïï tutiakami maaxi dïï gïn nukadabïrai. Ipïrhidi ïgai sai óídakami kañiñiru tutiakami ïrhiadagi dïï ïgai sïsïïyi gïn dukami bhaiyoma galtutiakatai. Soi buadana ïgai óídakami tudu— itïtïdai.
16—Kïïga maatïkamu aapimï xorai go bupuirumadami óídakami nïiditai ix tumaxi buayi ïgai. Daiñi, go naana maaxi sïïxidakami uxi ix makïdï oidaga oidigana gobai mai ibhiatai uba xiïpï igoxi ¿aba? 17Mosïkaxi go kïkïïgadukïdï uxi kïï bhai maaxi ibhiatïi dai go soimaaxkïdï uxi gia cho. 18Ïmo soimaaxi uxi xadïrï ibhiatïdana kïïgadukami ibhiadï dai ïmo uxi kïïgadukami mai ibhiatai soimaaxi ibhiadï ïpï— itïtïdai. 19—Dai xi ïmo uxi mai kïïgadukagi ibhiadï gï dadaitudai gobai dai gï mïmïidi. 20Pomaaxi gobai, kïïga gï maatï ix bhai kïïgadu ïmo uxi nïiditai ibhiadï dai podukai ïpï gï maatï ïmo tïtïgiadami ñoki ix bhai kïïgadu ïpï nïiditai bïïxi ixtumaxi buayi ïgai ix bhai kïïgadu— itïtïdai.
Suxi aagidi go odami sai muidutai ïgai maiti ïr buaboitudadami kïïgakïrï tomaxi pokaitadagi ïgai saidi Suxi ïr Tïanïdamigadï
21—Daiñi— itïtïdai. —Diuxi gin Oga tïbagiana daja. Dai aanï agai sai mosïkaxi odami ix makïdï ibuadagi ixtumaxi Diuxi ipïrhidi biaka agai oigaragai xi urabagi go odami ix makïdï tïanïi ïgai. Oidaga mui óídakami ix makïdï mai biaka agai oigaragai ix tïanïdagi Diuxi tudu. Dai aanï aagai sai mai biakamu ïgai oigaragai tomaxi dudatai Tïanïdami gin aagaiña ïgai. 22Xïxkadï mïïka gin buitapi gukibagi ïgai dai aagamu aanï xorai kïï idui dai xorai mai kïï idui, aidïpïrï mui óídakami pobai gin tïdamu sai,
—Gin tïanïdamiga, ¿Mai ix aagidiña aatïmï ñoki jaa aagaitai gï tïtiaraga, dai bubaidiña aatïmï tïtïañikarudï go diabora dai ibuadana aatïmï naana maaxi maaxidaragai ïpï? Bïïxi gobai ibuadana aatïmï aagaitai gï tïtiaraga—
gin tïdamu ïgai aidï.
23Dïï gia potïdamu aanï aidï sai,
Maiti ïr gin aaduñi aapimï. Tomarhi ïmo imidagai maiti ïr gin aaduñikatadai aapimï tudu. Ka maiti gïn nïijada in ïrhidi soimaaxi ibuadamikatai aapimï.
Potïdamu aanï tomaxi dudatai Tïanïdami gin aagaiña ïgai— itïtïdai Suxi go odami.
Suxi aagidi go odami sai gï agai sai ïïgiada ïgai ñokidï
24—Daiñi— itïtïdai. —Odami ix makïdï kaïkana gin ñoki dai ïïgidi, ïgai gia kïïgadu tïgibudadï. Ïpïan dukami ïgai ïmo kïsadami baaki ix makïdï ïmo aitiana kïkïïsai ïmo baki saidi kïïga kabakana simientogadï. 25Go baaki gobai kïï kabakami kïakamu. Mai gïïximu gobai tomaxi kabami dudukiagi xiïpï xi kabami ïbïrdagi ïpï— itïtïdai.
26—Dïï gia odami ix makïdï mosïkaxi kaïkagi gin ñoki dai mai ïïgiadagi gobai, ïgai gia ïr ïpïan dukami ïmo kïsadami baaki ïpï dïï ïgai gia buiruga. Ïïpïan dukami ïgai ïmoko ix makïdï oratana kïi baakidï 27dai gokiïrï duudu oidigi dai gïïpi daibusai sudagi. Dai kabami ïbï oidigi ïpï buidïrï go baki daidi bïïxi naato daitu— itïtïdai.
28Podukai aatagidi Suxi go óídakami tudu. Muidukatadai óídakami ami tudu dai muidutai mai tïtïgaitadai ixtumaxi gïn tïtïgitoagi kaïkatai aatagidï. 29Kïïga maatï kaï go odami sai Suxi buaboikïdï biakatadai ïmo sïïrhikami Diuxi amadïrï tudu kaïkatai aatagidï. Maatigia maaxi sai bamioma bia ïgai sïïrhikami dai gubukarhigai xi bhai go tïtïgiadami go sïïrhikami tudu. Kaxkïdï mai tïtïgaiña go óídakami ix tumaxi gïn tïtïgitoagi kaïkatai ñokidï.
Currently Selected:
Mataibo 7: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida