Mataibo 6
6
Suxi aagidi go mamaatïrdamigadï ix dukatai gï agai xi soikïda ïgai soititigami
1—Gin aaduñi, kïïga bhai maaxi xi ibuada aapimï ixtumaxi ïr kïïga. Dïï gia gïn nukadabïrai dai kïïga abïr gïn tïgito nïida ix tuma bïïtarï ibuadagi aapimï. Maiti gï agai tudu xi kïï tutiakami dukai ibuadagi aapimï sai jaa odami kïï tutiakami gïn aagaiña. Xi po maaxi bïïtarï buadagi aapimï ixtumaxi ïr kïïga aidï gia ka mai bhïimu aapimï gïn maitïki ix makïdï bia Diuxi gïn Oga gïn bïïtarï. 2Maiti abïr ibuada ix dukai ibuayi go odami ix makïdï kïï tutiakami gïn dadasai dai mai kïï tutuiga tudu. Xïïxkadï soikïda agadagi ïgai ïmo soitigami gïgïr ibaiña trompetakïdï sai bïïxi go óídakami maatïkana. Po buayi ïgai ipïrhiditai sai kïïga gïn tïgito nïijadagi jaa dai kïïga ñokada ïgai bïïtarï tudu. Dai kïïga ïr buaboi sai kïïga ñokada antaada jaa aagaitai ïgai dïï mosïkaxi gobai ïr maitïkidïka agai ïgai. Diuxi mai maaki agai ïmai maitïki tudu— itïtïdai Suxi.
3—Dïï aapimï gia maiti abïr pobuada. Xïïxkadï gamaaki agadagi aapimï soiñi soititigami maiti abïr mamaaxdada jaa buitapi. 4Ïxtotai dukai abïr maakada tudu soiñi soititigami sai podukai mosïkaxi Diuxi gïr Oga nïijadamu. Aidï gia Diuxi ïgai dai gïn maakimu gïn maitïkiga. Ïgai kïïga nïidi tudu— itïtïdai.
Suxi aagidi go mamaatïrdamigadï ix dukatai daanïdana ïgai Diuxi
5—Kaxi gïn aagidi aanï sai oidaga odami ix makïdï kïï tutiakami gïn dadasai dai mai kïï tutuiga. Ïgai daanïiña Diuxi kïï tutiakami dukai gïn dadasaitai. Dïï gia aapimï maiti gï agai xi ïpïandukai gadaanïdagi. Ïgai ojoidi xi jaa nïijadagi xïïxkadï gadaanïdagi ïgai. Dai kaxkïdï jaa buitapi gukakana kiupiana xiïpï no kaiyana. Ipïrhidi ïgai sai jaa nïijadagi dai kïïga tutiakami ïrhiadagi kaxkïdï. Gobai gaagai ïgai tudu sai kïï tutiakami ïrhiadagi jaa gadaanïitai ïgai óídakami buitapi. Dai aanï agai sai mosïkaxi gobai ïr maitïkidïka agai ïgai— itïtïdai.
6—Maiti gï agai xi pobuadagi aapimï tudu xïxkadï gadaanïda agadagi aapimï Diuxi— itïtïdai. —Gï agai bhaiyoma xi imïdagi aapi xako mai tipu jaa dai ami kuupandagi go kuuparagai dai ïxtotai dukai daanïdagi Diuxi gïr Oga. Dai ami dakamu Diuxi gïn ïmadï xako ïxtotai darakagi aapimï. Dai ïgai gïn nïijadamu gadaanïitai aapimï dai gïn maakimu gïn maitïkiga— itïtïdai.
7—Dai maiti gï agai xi muiyoko ïgalbaaxi aagada aapimï ñoki ix makïdï mai maatigian kaiti. Maiti gï agai sai ïpïan dukai ibuadagi go ix makïdï oidi ïma maaxi buaboidaragai tudu. Maiti ïr soiñi gobai. Ix makïdï pobuayi poïrhidi sai Diuxi kaïkamu mos ïï tïbïpi dai muiyoko aagaitai ïgai ñoki. Dïï maiti ïr buaboi gobai. 8Maiti gï agai sai muiyoko dai tïbïpi aagada aapimï ïgalbaaxi ñoki podukai gin aaduñi. Diuxi ïkiaxdïrï ka kïïga maatï ixtuma tïgito aapimï mai kia aagidakai aapimï tudu— itïtïdai.
9Daidi Suxi potïtïdai go mamaatïrdamigadï,
—Xïxkadï gadaanïdagi aapimï adukai abïr aagada— itïtïdai.
—Diuxi gïr Oga ix makïdï tïbagiana daja. Gï daanïi aatïmï sai aapi ibuada saidi óídakami kïïga gï xadutudaiña.
10Ipïrhidi aatïmï sai otoma gatïanïda aapi tami oidigi daama.
Saidi gï duna ixdukatai aapi ipïrhidi, ix dukai gï buayi tïbagiana tudu.
11Gïr óídañi kuadagai xïïxi tïgito aatïmï xibi bïïtarï.
12Dai gïr oigïldañi xïïxkadï soimaaxi ibuadagi aatïmï.
Gïr oigïldañi ix dukatai oigïrhiña aatïmï jaa xïxkadï soi gïr buidadagi ïgai.
13Gïr soiñañi sai mai ïïgiada aatïmï soimaaxi tïgibudagai. Dai gïr soiñañi xïïxkadï gïr abïnakiadagi go diabora sai soimaaxi ibuada aatïmï ïpï— Podukai aagidi Suxi go mamaatïrdamigadï sai podukai daanïda ïgai Diuxi.
14Daidi potïtïdai ïgai ïpï sai,
—Ix kïïga oigïrhiada aapimï jaa xïxkadï mai kïï ibuadagi ïgai aidï gia Diuxi gïn oigïrhiadamu aapimï ïpï xïxkadï mai kïï ibuadagi aapimï. 15Dïï gia xi mai oigïrhiada aapimï jaa aidï gia Diuxi maiti gïn oigïrhiadamu gïn soimaaxkamiga ïpï— itïtïdai.
Suxi gamaa ïmo ñoki aagaitai xïxkadï mai dïïkagi ïmoko kuadagai xadutudaitai Diuxi
16Dai oi Suxi go aatagi daidi potïtïdai,
—Daiñi— itïtïdai. —Ïïmo odami xïïxkadï maiti gakuadagi ïgai ïmo xadutudaragai dukai gadaanïitai Diuxi aidï mai gaxiubaiña kuupadï dai mai bakuanaiña buibasodï. Soi gïn ïrhiadan maaxkana ïgai tudu ipïrhiditai sai nïijadagi jaa dai podukai kïï tutiakami gïn dadasai ïgai. Dai kïïga ïr buaboi sai ïïmo óídakami kïï tutiakami aaga antaada tudu. Dïï gia mosïkaxi gobai ix makïdï aagagi odami ïgai bïïtarï ïr maitïkidïka agai. Mai buimu ïgai ixtumaxi Diuxi amadïrï tudu. Kïï tutiakami gïn dadasai ïgai dïï mos maiti ïr buaboi kaxkïdï— itïtïdai.
17-18—Dïï gia aapimï maiti gï agai xi ipïrhiada sai jaa gïn nïijadagi xïxkadï gadaanïdagi aapimï maiti gakuadatai aapimï ïmo xadutudaragai bïïtarï. Xïxkadï gadaanïdagi aapimï maiti gakuadatai gï agai bhaiyoma sai kïïga bhai gïn buadagi aapimï kïïga gïn gaxiubakai dai kïïga gïn bakuanakai gïn buibasa ix dukai ibuayi aapimï bïïx tasai. Aidï gia mai maatïkamu jaa sai ibuayi aapimï ïmo xadutudaragai Diuxi bïïtarï xïïxkadï mai kuadatai daanïdagi aapimï. Dïï Diuxi gïr Oga gia nïijadamu dai gïn maakimu gïn maitïkiga xadutudaitai aapimï ïgai— itïtïdai Suxi.
Suxi gamaa ïmo ñoki aagaitai go tuminxi ïmadï bïïxi ixtumaxi namïakami biakagi ïmoko
19Daidi Suxi potïtïdai go mamaatïrdamigadï ïpï sai,
—Maiti gï agai xi gaatabuadagi aapimï kabami gïn bidaka ïrhiditai tami oidigi daama. Maiti gï agai sai bhai tuada aapimï mui naana maaxi ixtumaxi namïakami. Gobai ix makïdï oidaga tami oidigi daama tudu. Bïïxi gobai mos ugiatïi tudu kuayitai tokimara maamaradï dai bhitamaitai gobai dai gaïxiditai ïïxibogami ïpï— itïtïdai.
20—Gï agai bhaiyoma sai tïbagiana bhai tutuada aapimï ixtumaxi namïakami. Ami gia mai ugiatïi gobai. Ami mai kuayi go tokimara maamaradï tudu dai mai bhitamai gobai dai mai bapakïi go ïïxibogami ïpï. 21Kïïga maatiga maaxi tudu sai xako biakagi ïmoko ixtumaxi namïakami sai ami gï tïgito aimïraiña ïgai. Kaxkïdï gï agai mïxi tïbagiana biakagi ixtumaxi namïakami sai gobai tïgito ajiopada aapimï— itïtïdai.
22—Gïn aagidamu aanï ïmo maaxidaragai aatagi aagaitai bïïxi go ixtumaxi namïakami oidaga tami oidigi daama. Daiñi, ganïadagakïdï gï maatï ix maaxi bïïxi ixtumaxi. Dai podukai ïpï gatïgibudagakïdï mamaatïrïi odami ixtumaxi ïr buaboi. Gatïgibudagakïdï nïñiadan dukai ibhïadï odami tudu. 23Dïï gia xi mai maaxkagi gïn bupuji aidï gia tukagiïrï dukai ajiopai aapimï. Dai pomaaxi ïpï xïxkadï mai kïïgadukagi gïn tïgibudaga. Ix tïgito ajiopadagi aapimï dai buaboitudagi aapimï mosïkaxi ixtumaxi oidaga tami oidigi daama gobai gïn sobhikïi xi maatïkagi aapimï ixtumaxi ïr buaboi. Mai nïadami dukai bipiïyi gïn ibhïdaga tudu. Pomaaxi aapimï xïxkadï adaimuagi aapimï mosïkaxi ixtumaxi oidaga tami oidigi daama tudu— itïtïdai.
24—Gïn aagidamu aanï ïpï ïmo maaxidaragai aatagi go tuminxikïdï— itïtïdai. —Daiñi, ïmo gapioñi sabïdixikami mai bhaiga xi gokadukagi tïtïanïdamigadï ¿aba? Ix gokadu biakagi ïgai aidï gia mosïkaxi ïmoko oigïdamu dai kïï bimu ïmadï dai go gïmai ïmadï mai kïï bimu dai kïïdadamu ïgai. Dai podukai ïpï mai bhaiga ïmoko xi ïr pioñigadïkagi Diuxi dai adaimuagi go tuminxi ïpï— itïtïdai Suxi.
25—Kaxkïdï aanï aagai sai maiti gï agai mïxi kabami buamï gïn ïrhiadagi ixtumaxikïdï ix makïdï tïgito aapimï tami oidigi daama gïn oidakaraga bïïtarï. Maiti abïr buamï gïn ïrhiada tudu ix bhai biakamu aapimï ixtuma ugiagi dai ixtuma iiyagi. Dai maiti abïr buamï gïn ïrhiada yukuxikïdï ïpï. ¿Mai ix bamioma namïga gï ibhïdaga xi bhai go kuadagai? ¿Dai mai ix bamioma namïga gï tukuga xi bhai go yukuxi ïpï? ¿Kaxkïdï ix tuixi mos ïï kabami buamï gïn ïrhidi ixtumaxi mai xi namïga, go kuadagaikïdï dai go yukuxikïdï tudu?— itïtïdai.
26—Gïn tïgito abïr nïida go ujurugi tudu. Ïgai maiti gaïsai dai maiti gayobai dai tomarhi mai ïmpaidi kuadagai trojïrï. Diuxi gïr Oga ix makïdï tïbagiana daja ïgai dai bhibhidi kaxkïdï. ¿Dai mai ix bamioma namïga aapimï xi bhai go ujurugi? Ïjï tudu. Dai kaxkïdï kïïga gï maatï sai mai bia aapimï ix tuixi buamï gïn ïrhiadagi ixtumaxikïdï— itïtïdai.
27—Dai gïn tïgitobïrai ïpï ix bhai xi ixtutuidikïi aapimï xi tami oidigi daama oidakagi ïmo tasai bamioma xïïxi gïn maa Diuxi. Xadïrï ixtuidana aapimï ¿aba? Maiti ixtutuidikïi xi bamioma tïbïratudagi gïr oidakaraga tami oidigi daama tomaxi kabami buamï gï ïrhiadagi ïmoko gokïdï tudu— itïtïdai.
28—Dai maiti gï agai xi buamï gïn ïrhiadagi aapimï go yukuxikïdï ix tumaxi gïn aadadagi ïpï. Gïn tïgitobïrai nïida ix dukatai gïrai yooxigai oidigana tudu. Ïgai tomarhi mai aatabuayi dai mai yukuxtai. 29Dïï gia tomaxi mai aatabuayi ïgai bïïxkïrï bamioma kïï titiodi ïgai xi bhai asta go gïï rey Solomon ix makïdï yukuxidï kabami kïï tiodikatadai— itïtïdai.
30—¿Dai mai ix bamioma namïga aapimï xi bhai go yooxigai?— itïtïdai. —Go yooxigai mai xii kabami namïga tudu. Mosïkaxi chïki tasai oidigana gukakana ïgai dai gokiïrï gï ïmpaidiña gobai dai gï mïmïidiña. Dïï bïïxkïrï kïïga titioditudai Diuxi ïgai ïpïandukai xi kïïga yukuxtudagi ïgai. Dai aapimï gïïpi bamioma namïga xi bhai go yooxigai dai kaxkïdï kïïga gï maatï sai Diuxi kïïga gïn nukadamu aapimï ïpï. Agia mai xii kïïga buaboitudai aapimï buamï gïn ïrhiditai aapimï go yukuxikïdï tudu— itïtïdai.
31—Maiti gï agai tudu xi buamï gïn ïrhiadagi aapimï tïgitokatai ix tuma ugiagi xiïpï ixtuma iiyagi xiïpï ixtuma gïn aadagi— itïtïdai. 32—Gobai ïr ix makïdï adaimïi odami ix makïdï mai buaboitudai Diuxi tudu. Gokïdï buamï gïn ïrhidiña ïgai. Maiti gï agai gobai tudu. Diuxi gïr Oga ix makïdï tïbagiana daja kïïga maatï ixtumaxi tïgitokana aapimï kaxkïdï— itïtïdai.
33—Gï agai bhaiyoma sai buamï gïn ïrhiada aapimï ipïrhiditai sai Diuxi gïn tïanïdagi. Buamï abïr gïn ïrhiada aapimï sai gï agai xi duñagi ixtumaxi ïr sïïrhi, ixtumaxi Diuxi ipïrhidi tudu. Ix bamioma buamï gïn ïrhiada aapimï ix gï ibuadagi ixtumaxi Diuxi ipïrhidi aidï gia Diuxi gïn maakimu bïïxi ixtumaxi tïgito aapimï gïn oidakaraga bïïtarï— itïtïdai.
34—Maiti abïr buamï gïn ïrhiada ixtumaxi daibuña agai bhaitïkioma ïpï. Maiti abïr buamï gïn ïrhiada ix bhai mai xijiakamu gïn oidakaraga gokiïrioma tudu. Ka bia aapimï xijiakami ixtumaxi buamï gïn ïrhiadagi gïn oidakaragai xibi bïïtarï. Dai kaxkïdï maiti gï agai xi buamï gïn ïrhiadagi xoroko bïïtarï ïpï— itïtïdai Suxi.
Currently Selected:
Mataibo 6: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida