Mataibo 5
5
Suxi aagai ixdukatai aatabuayi Diuxi gatïanïitai ïgai
1Kïïga mui óídakami oiditadai go Suxi aipakoga tudu. Dai tïïgakai Suxi mosïïki odami sai tïsai ïgai ïmo gidana dai ami daiba. Dai ami dada go mamaatïrdamigadï Suxi ïpï. 2Dai maa Suxi ñoki daidi potïtïdai ïgai,
3—Aapimï ix makïdï ïr soititigami duu maatïkatai sai tïgito soiñi gïn ibhïdagïrï, aapimï kïïga bia ïmo bhai ïrhiaragai. Diuxi ïr gïn Reyga kaxkïdï dai ïgai gïn tïanïda agai— itïtïdai.
4—Dai aapimï ix makïdï soigakoñi xibi ka kïïga bia ïmo bhai ïrhiaragai ïpï. Kïïga bhai gïn ïjïldamu aapimï xïxkadï gïn tïanïdagi Diuxi tudu— itïtïdai.
5—Dai podukai ïpï aapimï ix makïdï mai gïgïrdukïdï dukai gïn ïrhidi jaa bïïtarï dai bhaiyoma mai tïtïanïdami dukai gïn nïnïidi aapimï ïïgi. Aapimï kïïga bia ïmo bhai ïrhiaragai ïpï. Diuxi gïn maakimu bïïxi go oidigi saidi gïn tuidagaka agai gobai kaxkïdï—.
6—Dai aapimï ix makïdï kabami ipïrhidi sai kïïga buañixikagi gïn ibhïdaga, aapimï kïïga bia aapimï ïmo bhai ïrhiaragai ïpï. Kïïga gïn maakimu Diuxi ixtumaxi aagai aapimï. Buañixikami gïn biamu ïgai tudu— itïtïdai.
7—Dai aapimï ix makïdï soi ïlda nïijadagi jaa dai oigïrhiadagi xïïxkadï mai kïïga gïn buidadagi ïgai, aapimï ïpï kïïga bia ïmo bhai ïrhiaragai. Diuxi soi ïlda gïn nïijadamu tudu dai gïn oigïldada agai ïpï kaxkïdï— itïtïdai.
8—Dai aapimï ix makïdï kïïga buañixi tïgibudadï kïïga bia bhai ïrhiaragai ïpï. Nïijadamu ïgai Diuxi kaxkïdï— itïtïdai.
9—Dai aapimï ix makïdï kabami gaatabuayi gaagaitai ix dukatai soikïdagi óídakami saidi kïïgakïrï gïn nïijada ïgai aipakoga, aapimï kïïga bia ïmo bhai ïrhiaragai ïpï. Diuxi pokaitada agai sai aapimï ïr maamaradï kaxkïdï— itïtïdai.
10—Dai oidaga ïïmadutai aapimï ix makïdï Diuxi bïïtarï óídaga. Kïï sïïrhi ibuayi aapimï ibuadatai ixtumaxi Diuxi ipïrhidi tudu. Dai jaa óídakami soi gïn buididiña nïiditai ixdukatai óídaga aapimï. Dïï gia aanï aagai sai kïïga bia aapimï ïmo bhai ïrhiaraga ïpï. Diuxi ïr gïn Reyga kaxkïdï dai bia aapimï oigaragai ix gïn tïanïna ïgai— itïtïdai.
11—Kïïga bia aapimï bhai ïrhiaragai tomaxi óídakami gïn parunadagi dai soi gïn buidadagi gin oiditai aapimï tudu. Bia aapimï bhai ïrhiaragai tomaxi yaatagïdagi óídakami dai naana maaxikïdï gïpiïrï gïn bupadagi ïgai jaa buitapi ïpï gin oiditai aapimï. 12Bhaiga bïnïrhiada xïïxkadï po gïn buidadagi ïgai tudu. Kïïga maatï aapimï sai bia aapimï ïmo namïakami maitïki tïbagiana kaxkïdï. Daiñi, xïxkadï soi gïn buidadagi jaa gin urabakatai aapimï aidï ïpïandukami aapimï go ñiñokituldiadamigadï Diuxi ix makïdï óídakatadai ïïki. Kïïga maatï aapimï sai podukai buididiña óídakami ïïki go ñiñokituldiadamigadï Diuxi ïpï tudu— itïtïdai.
13Daidi apia gatïtïïgidi ñoki Suxi go mamaatïrdamigadï daidi potïtïdai,
—Daiñi— itïtïdai. —Kïïga ïr ïmo soiñi aapimï go oidigi daama óídakami bïïtarï ïpïan dukai go onai ïr soiñi kuadagai bïïtarï. Dïï gia ix ka mai yoobikagi go onai ¿Aidï gia dukatai gï duna sai gï yoobitudagi gobai ïpamu? Ka maiti ïr soiñikana gobai tudu. Gobai mos gï dadaitudai kaiyana dai mos kïitapaiña go dïgabuskïdami ka maiti ïr soiñikatai gobai. Dai aapimï ix maiti ïr soiñikagi jaa bïïtarï aidï gia ïpïan dukami aapimï go onai ix makïdï ka mai yoobi ïpï dai ka maiti ïr soiñi— itïtïdai.
14Daidi Suxi aagidi ïmo maaxidaragai ñoki daidi potïtïdai,
—Gï agai sai gïn tïgitokagi aapimï sai bïïxi óídakami gïn tïgito nïidiña ix dukatai óídaga aapimï. Daiñi, ïpïan dukai gobai xïïxkadï ïmo gïï kiiki kïï maaxkïrï kïïka ïmo gidana. Mai bhaiga ïxtoagi gobai tudu. Dai pomaaxi aapimï ïpï. Kïïga maaxi bïïxi óídakami buitapi ix dukatai óídaga aapimï tudu— itïtïdai.
15—Dai ïmo kudakarui gïn dukami aapimï ïpï. Daiñi, go óídakami tukamugana dukai óídaga mai maatïkatai ixtumaxi ïr buaboi dai aapimï ïr kudagi dukai ïgai bïïtarï. Ga tïtïgidi aapimï ix tumaxi ïr buaboi tudu. Dai kïïga maatï aapimï sai ïmo kudakarui ïr kukudada bïïtarï aipakoga kiiyïrï xako dakagi gobai. Xadïrï gï iñana gobai ïmo asarai uta ka kudagïkatai gobai tudu. Dai bhaiyoma tïka gï dadasai gobai sai kïïga maaxkana ami kiiyïrï. 16Ïmo kudakarui dukai aapimï tudu buitapi óídakami. Dai kaxkïdï aanï aagai sai gï agai sai kïïga maaxiko dukai óídakagi aapimï ibuadatai ixtumaxi ïr kïïga óídakami buitapi. Podukai go óídakami gïn tïgito nïijadamu ix dukatai óídaga aapimï. Dai maatï nïijadamu ïgai sai Diuxi gïr Oga ix makïdï tïbagiana daja ïgai dai gïn soikïi sai podukai óídakagi aapimï dai kïïga ñokadamu óídakami Diuxi bïïtarï nïiditai gobai— itïtïdai.
Suxi maa ïmo ñoki aagaitai go sïïrhikamigadï Diuxi ix makïdï oja go Moises dai jaa ñiñokituldiadamigadï Diuxi ïïki
17Dai Suxi oi aatagidï daidi potïtïdai ïgai mamaatïrdamigadï sai,
—Gï agai xi maatïkana aapimï ix tuma bïïtarï dibia aanï— itïtïdai. —Maiti gï agai tudu xi po gïn ïrhiada sai dibia aanï maigobai dasa iñagaitai go sïïrhikami ix makïdï oja go Moiseskaru. Tomarhi mai maigobai daituda iñagai ojadï go gaa ñiñokituldiadamigadï Diuxi ïpï. Bhaiyoma dibia aanï dai bïïxi naato iduña iñagai bïïxi ixtumaxi aagai go sïïrhikamiïrï. 18Mai ugiti agai gobai ojadï tudu asta xïï tïbïpi kïakagi go oidigi ïmadï tïbagi kia. Asta go arhidukïdioma ojadï go sïïrhikami mai ugiti agai tudu. Aanï aagai sai mai ugiti agai gobai asta xïxkadï ukami bïïxi ïpïdui ixtumaxi ojixi ami sïïrhikamiana— itïtïdai.
19—Daiñi, oidaka antaada ïmoko xorai po gï ïrhiadagi sai mai xii namïga ïmo ñoki Diuxi sïïrhikamigadïrï. Dïï gia xi gajiadïrï biagi ïgai go ñoki dai abïnakiada ïgai jaa sai gajiadïrï biagi ïpï, aanï aagai sai xorai pobuadagi ïr go bamioma mai namïakamika agai Diuxi bïïtarï gatïanïitai ïgai— itïtïdai.
—Dïï gia xorai ïïgiadagi sïïrhikamigadï Diuxi dai abïnakiadagi jaa sai ïïgiadagi ïpï, ïgai gia ïr ïmo namïakamika agai Diuxi bïïtarï dai biakamu oigaragai saidi tïanïna Diuxi— itïtïdai.
20—Kïïga abïr gïn tïgito ajiopada tudu. Daiñi, kïï maatï aapimï sai go fariseos dai go tïtïïgiadami sïïrhikami kabami gïn aajagïiña ïïgida ïrhiditai ïgai go sïïrhikamigadï Diuxi. Podukai bamioma buañixikami óídaga ïgai xi jaa mui óídakami. Dïï gia aanï aagai sai gï agai óídakami sai apia bamioma buañixikagi xi bhai go fariseos. Ïma dukai mai biakamu ïgai oigaragai xi urabagi Diuxi gatïanïitai ïgai— itïtïdai Suxi.
Suxi maa ïmo ñoki aagaitai go bhamudagai
21—Daiñi— itïtïdai. —Kïïga maatï aapimï sai Diuxi daidi go ïïki óídakami sai aipakoga gïn kodadagi. Aagidi ïgai sai xorai gamuagi kaxi ïr gïpiïrï kaatïkami dai dudunukami maakimu gïgïbidaragai. 22Potïtïdai Diuxi go óídakami ïïki tudu. Dïï gia aanï aagai xibi sai tomaxi mosïkaxi bhamukagi ïmo odami buidïrï ïmai kaxi ïr gïpiïrï kaatïkami ïpï dai go dudunukami maaki agai gïgïbidaragai.
Dai xi ïmo odami pokaitadagi sai ïmai odami maiti ïr soiñi gokïdï kaxi gïpiïrï kaatïkami bipiïyi ïgai ïpï dai biakamu xi baan kïkibagi dudunukamiana sai aagana ïgai ix tuma gïgïbidaragai biaka agai ïgai.
Dai xi ïmo odami buirugami aagagi ïmai odami kaxi ïr ajïakami xi taatagi ïgai gïgïbidaragai go gïï taiyïrï— itïtïdai Suxi. 23—Kaxkïdï kïïga abïr gïn tïgitoka ix dukatai buidadagi aapimï jaa. Daiñi, xi ïmadutai aapimï gadaxda agadagi daxdaragai go gïï kiupiana dai ami gï tïgitokagi ïgai sai mai kïï idui ïgai ïmai buidïrï dai sai kaxkïdï ka maiti gï oigïdai ïgai, 24gï agai xi amaxi daxdakaruana biagi ïgai go daxdaragai dai mïï imi agai dai bhai duñagi ñoki go gïmai ïmadï— itïtïdai.
25Dai apia gamamaakai Suxi aatagi daidi potïtïdai ïgai mamaatïrdamigadï,
—Daiñi, xi biakagi aapi gï buidïrï kaatïkamiga dai buatuldagi aapi, dai ïgai gï baan kïsa agadagi dunukami buidïrï, gï agai xi otoma bhai duñagi aapi ïgai ïmadï. Gï agai xi bhai duñagi aapi mai kia aïkai aapimï ami dunukamiïrï tudu. Ïma dukai go dunukami gï tïañi antaada maixaragai. 26Daiñi— itïtïdai. —Aanï aagai sai xi gï maixagi go dudunukami aidï gia mai busaimu aapi asta xudu ka bïïxi naato aa namïki aapi ix makïdï buaturhi aapi. Kaxkïdï gï agai sai bhai duñagi aapi mai kia aïkai dudunukamiana tudu— itïtïdai.
27Dai maa Suxi ïpï ïmo ñoki go odami daidi potïtïdai,
—Kïï maatï aapimï sai Diuxi ikaiti sïïrhikamigadïrï sai maiti gï agai sai ïmadï bopodagi ïmai ix makïdï maiti ïr aduñdïkagi. 28Dai aanï aagai ïpï sai maiti gï agai tomarhi ïmadutai aapimï xi galnaxi gï tïgitoagi ïmo oki bïïtarï ïpï tomaxi mosïkaxi mïkaxdïrï nïidi aapi dai podukai gï tïgito. Aanï aagai tudu saidi xorai podukai gï tïgitokagi ka ïpïan ïxi soimaaxi ibuayi xi ka ïmadï boitadai ïgai.
29Kaxkïdï gï agai sai maigobai daitudagi gï buji sai mai gïpiïrï gï daitudagi gobai ix soimaaxi gï duiñtuldagi gobai tudu. Gï agai xi maigobai daitudagi gobai tomaxi ïr go bamioma kïïgadukïdï bujidïkagi. Xioma ïr kïïga tudu xi mai bujikagi ïmoko dai mai xu xi Diuxi taiyïrï daitudagi ïgai tudu— itïtïdai.
30—Dai podukai ïpï gï ïïkakïdï. Xi gï ïkakïdï gïpiïrï gïxiagi aapi soimaaxi ibuadatai ïgaikïdï gï agai sai guikuta ïgai— itïtïdai. —Xioma ïr kïïga ix ïmo ïkakagi aapi dai Diuxi ïmadï oidakagi dai mai xu ix gokadukagi gï ïïka dai Diuxi go gïï taiyïrï gï daitudagi tudu— itïtïdai Suxi.
31—Dai ikaitiña óídakami ïïki ïpï sai,
Xïïxkadï ïmo kïïrhi dagito ïrhiada oñigadï sai mosïkaxi biakatadai xi maakiagi ïmo paperhi xako ikaiti sai ka dagito agai dai go paperhikïdï ka biakatadai ïgai oigaragai ix dagitoagi.
32Dïï gia aanï ïma dukai aagai. Daiñi, aanï aagai sai mosïkaxi xi go oki ïmadï daibuñagi ïmai aidï gia kunadï bia oigaragai ix dagitoagi. Dïï gia xi go oñigadï mai ïmadï daibuñagi ïmai aidï gia go kunadï ïr duñidï sai gïpiïrï daitudai ïgai oñigadï dagitokai ïgai. Go oñibarudï ïmadï bii antaada ïmai gokiïrï dai gobai ïr soimaaxi tudu. Dai go kïïrhi ix makïdï ïmadï biiyagi go oki soimaaxi ibuayi ïpï ïmadï biïkai ïgai go oki oñibarudï ïmai— itïtïdai Suxi go odami.
Suxi maa ñoki go óídakami dai aagidi sai xïxkadï pokaitadagi ïmoko saidi iduña agadagi ixtumaxi gï agai xi mosïkaxi ïjï ikaitiadagi ïmoko xiïpï sai cho ix maiti iduña agadagi ïpï
33Dai Suxi oi aatagidï daidi potïtïdai ïgai go odami sai,
—Kïïka maatï aapimï saidi go ïïki óídakami pokaitiña saidi,
ix gï baasagi ïmoko saidi iduña agai ixtumaxi Diuxi bïïtarï aagaitai saidi Diuxi ïr nïijadami saidi buaboikïdï iduña agai sai mai xadutuadan buayi ïgai Diuxi ix maiti ibuadagi ixtumaxi agaitadai ïgai dai gï báí Po tudu ikaitiña go ïïki óídakami, ikaitiña ïgai— itïtïdai Suxi.
34Dïï gia aanï ïma dukai aagai— itïtïdai. —Aanï aagai sai, xïxkadï ikaitiadagi aapimï saidi iduña agai ixtumaxi maiti abïr pokaitada sai Diuxi ïr nïijadami sai buaboikïdï iduña agai aapimï. Ix iduña agadagi aapimï ixtumaxi abïr mosïkaxi ikaitiada sai —ïjï, iduñimu aanï—. Dai ix maiti iduña agadagi aapimï aidï gia, —cho, maiti iduñimu aanï— abïr ikaitiada dai mosïkaxi. Maiti abïr aagada ïma maaxi ixtumaxi maaxituda ïrhiditai sai buaboikïdï iduña agai aapimï tudu— itïtïdai.
—Daiñi, aanï aagai ïpï sai tomaxi mai aagada ïrhiada aapimï Diuxi dai mosïkaxi aagadagi aapimï saidi go tïbagiana óídakami ïr nïijadami saidi iduñimu aapimï ixtumaxi. Go tïbagi ïr Diuxi tuidadï dai kaxkïdï ka aagadankaiti aapimï Diuxi ïpï, aagaitai go tïbagi dai mai xadutuadan buayi aapimï Diuxi aagaitai gobai. Tïbagiana daja Diuxi tudu gatïanïitai ïgai abhiadïrï. Kaxkïdï maiti abïr gïn bapasada saidi buaboikïdï iduña agai aapimï ixtumaxi aagaitai saidi go tïbagiana óídakami ïr nïijadami— itïtïdai.
35—Dai podukai ïpï maiti abïr pokaitada saidi go oidigi daama óídakami ïr nïijadami saidi iduñimu aapimï ixtumaxi ïpï. Go oidigi ïr Diuxi tuidadï ïpï, daama kïakan dukai Diuxi ïïkasodï tudu. Dai maiti abïr aagada go Jerusalen podukai ïpï. Gobai ïr Diuxi tuidadï ïpï dai ix aagadagi aapimï gobai ka mai xadutuadan buayi aapimï Diuxi. Go gïï kiiki Jerusalen ïr xako gatïanïi Diuxi gïr Reyga ix makïdï bïïxi adaama gatïanïi tudu. Dai kaxkïdï ix aagadagi aapimï sai go Jerusalen ïr nïijadami kaxi aagadankaiti aapimï sai Diuxi ïr nïijadami ïpï— itïtïdai.
36—Dai podukai ïpï, maiti gï agai xi gïn bapasadagi pokaitadagi ïpï sai gï guikutana gïn moo ix maiti iduñagi aapimï ixtumaxi aagadagi aapimï. Gobai ïr ïmo mai xadutudaragai Diuxi bïïtarï ïpï. Daiñi, Diuxi tuidadï gïn momo tudu dai mosïkaxi ïgai bia gubukarhigai ix tïanïdagi gïn momo. Aapimï mai bia gubukarhigai tomarhi xi tojatudagi xi ïpï tukutudagi ïmo gïn kuupa tudu. 37Ix iduña agadagi aapimï ixtumaxi abïr mosïkaxi ikaitiada sai —Ïjï. Iduñimu aanï—. Dai ix maiti iduña agadagi aapimï aidï gia, —Cho. Maiti iduñimu aanï— abïr itïda mosïkaxi. Soimaaxi gobai tudu ix ïma maaxi aagadagi aapimï maaxituda ïrhiditai sai buaboikïdï iduña agai ixtumaxi— itïtïdai Suxi go odami.
38Dai oi Suxi aatagidï daidi potïtïdai ïgai go odami sai,
—Kïï maatï aapimï ïpï sai óídakami ïïki ikaitiña sai,
Ix ïmo odami soimaaxi iduiñtuldagi ïmai sai gï agai sai aadïrï soimaaxi iduiñdagi ïgai ïpï. Dukami xi ïmo odami busaidagi bujidï ïmai sai gï agai go gïmai busaidagi ïgai bujidï ïpï. Dai xi ïmo odami gï daitudagi taatamudï ïmai saidi gï agai xi go gïmai daitudagi taatamudï ï ïgai ïpï, ikaitiña óídakami ïïki.
39Dïï gia xibi aanï pokaiti sai, maiti gï agai xi bui gïgïsïdagi aapimï xorai soi gïn buidadagi. Aanï aagai sai bhaiyoma gï agai sai ix ïmo odami kapiñatugi gï kama, gï agai xi gï dagitoagi aapi xi ajadïrï gï kapiñtudagi ïpï— itïtïdai. 40—Dai xi ïmo oidakami pokaitadagi sai buaturhi aapi dai gï baan kïsagi ïgai dudunukamiana dai ami gï tañiagi ïgai gï baasaraga sai podukai bhai duna aapimï, abïr maaka. Dai daamioma abïr maaka gïn chamaraga ïpï tomaxi maiti gï tai gobai— itïtïdai.
41—Dai xi ïmo oidakami no xibhïkai gubuakïdï gï aagidagi sai ïmo kilometro soiña kusukagi aapi ïmo kusubi, abïr kïïgioma soikïda dai goka kilometro kusuka bhaiyoma— itïtïdai. 42—Dai óídadabïrai xorai gïn tañiagi ixtumaxi. Dai tañubidabïrai xorai gïn tañiagi ïpï— itïtïdai Suxi.
43Daidi ikaiti ïgai ïpï sai,
—Kïïga maatï aapimï saidi go ïïkidadï sïïrhikami ikaiti sai,
Kïïga abïr oigïdada gïn aaduñi, dai abïr kïïdada gïn buidïrï bïïtïkamiga, ikaiti go ïïkidadï sïïrhikami.
44Dïï gia xibi aanï aagai sai,
Kïïga abïr oigïdada gïn buidïrï bïïtïkamiga. Dai daanturhiadabïrai ïgai ix makïdï soi gïn buidadagi.
45Podukai maaxitudamu aapimï jaa buitapi sai buaboikïdï ïr maamaradï aapimï Diuxi gïn Oga ix makïdï tïbagiana daja. Ïgai gia kïïga buididi go buidïrï bïïtïkamigadï tudu. Ïpïan ïxi otosai ïgai tonorhi kïï tutiakami bïïtarï dai ix makïdï mai kïï tutiakami bïïtarï ïpï. Dai ïmadugan ïxi dukitudai ïgai go mai kïï tutiakami dai go kïï tutiakami ïpï— itïtïdai.
46—Gin aaduñi, ¿Ix oigïdadagi aapimï mosïkaxi go óídakami ix makïdï kïïga gïn oigïdai bhai ix buimu aapimï ïmo maitïki podukai ibuadatai? Xadïrï. Daiñi, go taanïdami kuota kabami ïr soimaaxi ibuadami dai asta ïgai oigïdai aaduñdï ix makïdï aadïrï oigïdai tudu. Dai aanï aagai sai aapimï gï agai sai oigïdada asta gïn buidïrï bïïtïkamiga— itïtïdai. 47—Dai ix mosïkaxi bïïtarï kïï tutiakagi aapimï gïn aaduñi ix makïdï kïïga gïn oigïdai dai mai oigïdada aapimï go gaa, aidï gia mai bamioma kïï tutuiga aapimï xi go ix makïdï mai buaboitudai Diuxi. Ïgai kïïga oigïdai aaduñdï ïpï tudu— itïtïdai.
48—Gin aaduñi— itïtïdai. —Gï agai sai kïïga ïpïan ïxi kïï tutiakagi aapimï Diuxi gïn Oga ix makïdï tïbagiana daja— itïtïdai.
Currently Selected:
Mataibo 5: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida