Mataibo 10
10
Suxi maa aaduindagai go bhaibuxtama dan goka ojotosadï
1Dai bhodïrï bai Suxi bhaibuxtama dan goka mamaatïrdamigadï daidi dada ïgai xako dajatadai Suxi. Dai maa Suxi gubukarhigai ïgai sai bubaidana ïgai tïtïañikarudï go diabora odamiañdïrï dai sai duduadana ïgai bïïxi kokokoñiadï toma maaxkami kokodagai bipiakami ïgai.
2Tami aagai ix tïtïgidu go ojotosadï Suxi. Ïmoko Ximuñi tïgidu. Ïgai ïr ix makïdï Piduru tïïtï Suxi gokiïrï. Dai ïmai otosadï Suxi Andïrïxi tïgidu. Ïgai ïr sukurhidï go Ximuñi Piduru. Dai ïpï goka ix makïdï Santiago dai Juan tïtïgidu. Ïgai ïr maamaradï go Sebedeo. 3Dai ïmai otosadï Suxi Pirhi tïgidu, dai ïmai Bartolomé, dai ïmai Tomás, dai ïmai Mataibo. Go Mataibo ïr taanïdamikatadai kuota. Dai ïmai Jakobo tïgidu. Ïgai ïr Alfeo maradï. Dai ïmai Tadeo tïgidu. 4Dai ïmai Ximuñi tïgidu. Ïgai ïr ïmai Ximuñi ix makïdï politiko aagaiña odami. Dai ïpï ïmai Udaxi Iskariote tïgidu. Ïgai ïr ix makïdï gatïïgi go Suxi go buidïrï bïïtïkamigadï gokiïrï.
5Ïko bubaitu Suxi bhaibuxtama dan goka mamaatïrdamigadï tudu. Dai bhodïrï maa ïgai ñoki dai aagidi ix dukatai ibuada ïgai aaduindadï dai maigobai aipakoga otoi. Daidi potïtïdai,
—Maiti abïr imi kiikidïrï gobai ix makïdï maiti ïr judidiu. Dai maiti abïr daibiada go gïgïr kiiki Samariana ïpï— itïtïdai. 6—Iimibïrai kiikidïrï gïr aaduñi judidiu ix makïdï óídaga tami Israelïrï bhaiyoma. Ïgai tudu ix makïdï ka dagito Diuxi dai mos ïr kuga imiadï kañiñiru dukai— itïtïdai.
7—Iimibïrai dai aagida go óídakami sai ka miadimi ix kïïgakïrï gatïanïdagi Diuxi tudu— itïtïdai. 8—Dai nobai iimïitai abïr duduadada ix makïdï kokokoñikagi dai duduakatudabïrai ix makïdï koiñikagi ïpï. Duduadiabïrai ix makïdï biakagi go ogidïrï kokodagai go lepra tïgidukami tudu dai bubaidabïrai go tïtïañikarudï go diabora óídakamiañdïrï ïpï— itïtïdai.
Daidi Suxi potïtïdai ïgai ïpï sai,
—Maiti gïn táí aanï toma lïïchi gïn maakakai aanï gubukarhigai ix soikïdagi aapimï óídakami. Dai kaxkïdï maiti abïr tanïda aapimï ïpï soikïitai aapimï go óídakami— itïtïdai.
9—Maiti abïr bhïkai tuminxi go imidagai bïïtarï— itïtïdai. 10—Dai maiti abïr bhïkai gïn morarhiga ïpï tomarhi jaa yukuxi go imidagai bïïtarï tomarhi sususaka tomarhi gïn gigiika. Apia dukai abïr imi tudu gokïdï ix makïdï gïn aadatika aapimï. Aapimï ïr aatabuadami dai bia aapimï oigaragai xi óídakami gïn maakadagi ixtukïdï óídakagi aapimï— itïtïdai.
Daidi Suxi apia oidi aatagi ïmadï go mamaatïrdamigadï daidi potïtïdai ïpï,
11—Xïïxkadï no xibhïkai ajiagi aapimï ïmo arhi kiikiïrï abïr gaagada xakoga bhai aagadagi óídakami xi ami gïn urhiñagi aapimï bai ami abïr gïn urhiña ïgai ïmadï asta xïïxkadï ka iimi agadagi aapimï abhiadïrï go kiikiañdïrï. 12Dai xïxkadï bapakiagi aapimï ïmo kiiyïrï dai ami bii agadagi, abïr potïda go óídakami ami sai,
—Diuxi soiñana sai ibhïxtakan dukai óídakagi ïgai—.
Podukai abïr aagaida ïmo bhai ïrhiaragai ñoki go óídakami bïïtarï tudu. 13Dai ix kïïga gïn miadïgiadagi ïgai aidï gia Diuxi kïïga soikïdamu go óídakami ami kiiyïrï. Dïï gia ix mai kïïga gïn miadïgiadagi ïgai aidï gia ka maiti ibuadamu soiñi go ñoki ix makïdï aagiditadai aapimï ïgai— itïtïdai. 14—Dai xakoga ajiagi aapimï xi ïr mos arhi ïmo kiiyïrï xi ïr mui kiiki saagida ïpï, ix maiti gïn miadïgidagi óídakami ami, aidï gia abïr iimi abhiadïrï. Daidi ka imïkai aapimï abïr gigida gïn ïïkaso saidi gïn ïïkasoañdïrï maigobai gïsïna go dïbïradï go kiiki. Podukai maaxitudamu aapimï sai ka dagito aapimï go óídakami ami mai kïï ibuadatai ïgai.
15Daiñi, aanï aagai sai ayimu ixtuigako Diuxi aagada agai ix tuma gïgïbidaragai biaka agai bïïxi soimaaxi ibuadami. Dai amaxi go óídakami ix makïdï maiti ipïrhi xi gïn miadïgidagi bamioma soimaaxi taata agai gïgïbidaragai xi bhai go óídakami Sodomïrï dai Gomorïrï ix makïdï kabami soimaaxi idui ïïki— itïtïdai Suxi go mamaatïrdamigadï.
Suxi potïtïdai mamaatïrdamigadï saidi go óídakami kabami soimaaxi buidada agai
16Dai apia oi Suxi aatagidï daidi potïtïdai,
—Gïn otosamu aanï maigobai go óídakami saagida— itïtïdai. —Dai gï aagadamu xi kïïga gïn nukadakagi aapimï. Go óídakami omarhigaka agai gïn bïïtarï tudu ïpïan ïxi oomarhigaka agai ïgai sïsïïyi buidïrï kañiñiru. Ipïrhiadamu ïgai xi soi gïn buidadagi tudu. Dai kaxkïdï gï agadamu xi kïïga gïn tïgitokagi ixdukatai gïn nukadakagi aapimï. Gï agadamu tudu sai kïïga buañixikami óídakagi aapimï sai mai tïïgiagi jaa ixtukïdï gïpiïrï gïn bupadagi— itïtïdai.
17—Kïïga abïr gïn nukadaka tudu. Go óídakami baan gïn tutusamu dudunukamigadïrï go judidiu bai ïgai kikiupaigadïrï gïn bapasamu dai gïn gïgïbitudamu ikixanaikïdï. 18Baan gïn tutusamu go óídakami go gïgïr tïtïanïdami buidïrï tudu, dukami gïgïr Reyes buidïrï. Po gïn duñimu ïgai gin buaboitudaitai aapimï. Dai podukai biakamu aapimï oigaragai xi ñokadagi gin bïïtarï mui tïtïanïdami buitapi. Buitapi go judidiu tïtïanïdamigadï tudu dai saagida ix makïdï maiti ïr judidiu ïpï— itïtïdai.
19-20—Dïï gia xïxkadï baan gïn tutusagi óídakami ami go tïtïanïdami buitapi maiti abïr buamï gïn ïrhiada ix tïdagi aapimï. Go Ibhïadï Diuxi gïr Oga gïn maakimu tïgibudagai ixdukatai itïdagi ïgai aidï— itïtïdai Suxi go mamaatïrdamigadï.
21Dai apia oi Suxi aatagidï daidi potïtïdai ïgai go mamaatïrdamigadï,
—Daiñi, ayimu ixtuigako go óídakami baan tutusada agai ïïgi susukurhidï ïmadï xixïgidï dudunukamiana maiti ipïrhiditai xi gin buaboitudagi aaduñdï— itïtïdai Suxi. —Amaxi ïïmo gaojoga baan tutusada agai maamaradï dudunukamiana ïpï. Dai ïïmo aarhi bui surhigi agai dïïdïdï ïpï dai asta tañimu kodaragai maiti ipïrhiditai ïgai sai gin oijadagi aaduñdï. 22Bïïxi óídakami gïn kïïdada agai gin urabakatai aapimï tudu. Dïï gia aanï agai sai xorai gï kabakadagi go soi ïrhiaragai buidïrï dai kïïga gin buaboitudadagi asta xïxkadï ukami oidakagi ïgai tami oidigi daama, ïgai gia kïïgakïrï bubuaki agai— itïtïdai Suxi.
23—Gïn aagidamu aanï ix dukatai ibuadagi xïïxkadï soi gïn buidadagi óídakami. Daiñi, xïïxkadï aituldagi aapimï ñoki no xibhïkai ïmo kiikiïrï gin aagaitai aanï dai xi ami óídakami soi gïn buidadagi gin buaboitudaitai aapimï aidï gia iimibïrai abhiadïrï dai ïmai kiikiïrï abïr aitulda gin ñoki. Mai kia bïïxi kiikiïrï nato aituldamu aapimï gin ñoki tami Israelïrï xi ka dibimu aanï ïpamu tudu. Ka podukai aagai aanï ix makïdï ïr Diuxi otosadï dai ïmo kïïrhi busai tudu— itïtïdai Suxi.
24—Daiñi, kïïga maatiga maaxi sai ïmo gapioñiga xadïrï bamioma gatïanïiña xi bhai amudï. Dai ïmo mamaatïrdami maiti gï agai xi po gï ïrhiada sai bamioma namïga xi bhai ix makïdï gatïtïïgidi ñoki ïpï. ¿Mai ix ïr buaboi? 25Dai aanï ïr gïn tïanïdamiga dai ïr gïn tïtïgiadami ñoki ïpï. Kaxkïdï gï agai xi ipïrhiadagi aapimï xi gin ïpïan tutiakagi aapimï dai taatagi ixtumaxi taatamaiña aanï. Daiñi, kïïga maatï aapimï sai gin kïdaiña óídakami dai asta Beelsebú gin aagaiña ïgai. Diabora gin aagaiña ïgai tudu gin kïdaitai. Kaxkïdï kïïga gï maatï sai asta bamioma gïn kïïdadamu ïgai aapimï gin aaduñikatai aapimï. Soimaaxi ñoki gïn aagidamu ïgai ïpï gin mamaatïrdamigakatai aapimï tudu— itïtïdai.
26-27—Dïï gia maiti abïr duduadikuda tomaxi soi gïn buidadagi ïgai. Gï agai bhaiyoma sai mai duduadikuitai aagada aapimï gin ñoki óídakami buitapi. Bïïxi gobai ix makïdï ïxtotai dukai gïn aagidi aanï xako mai kaïkagi go gaa óídakami gobai gï agai xi gïgïr ñokaitai aagada aapimï xako bïïxi kaïkagi go óídakami. Ayimu ixtuigako bïïxi gï maaxitudamu ix makïdï ïxtoki xibi tudu— itïtïdai.
28—Gin aaduñi— itïtïdai. —Odami ixtutuidi xi mosïkaxi muagi gïn tukuga dïï gia gïn ibhïdaga maiti ixtutuidi ïgai ix muagi. Kaxkïdï maiti gï agai xi ïbhiadagi aapimï. Gï agai bhaiyoma xi ïbhiadagi aapimï Diuxi. Ïgai gia kïïga ixtutuidi xi xia duadiagi odami tukugadï ïmadï modukai ibhïgadï daitudakai ïgai go ibhïadï go gïï taiyïrï. Pokaxi gubuka ïgai tudu— itïtïdai.
29—Kïïga gubuka Diuxi tudu ïgai aba ix makïdï gïn nukadai. Daiñi, ¿mai ix bamioma namïga aapimï xi bhai go ujurugi? Goka aarhi ujurugi mos arhi ïmo pixu namïga tudu. Dïï gia tomaxi mai namïga ïgai bïïxkïrï xadïrï mukuna ïmo urugi ix Diuxi mai dagitoagi. Kïïga nukadai ïgai tudu. 30Dai aapimï gïïpi bamioma namïga xi bhai go aarhi ujurugi. Daiñi, kïïga maatï ïgai asta xïïkidu gïn kuupa mos ïï kïïga gïn nukadatai ïgai. 31Kaxkïdï maiti abïr duduadikuda ixtumaxi gïn buidadagi óídakami. Gïïpi bamioma namïga aapimï xi bhai go ujurugi tudu— itïtïdai.
32—Kïïga maatï aapimï sai Diuxi gïn nukadai tudu dai kaxkïdï gï agai sai mai duduadikuitai aagada aapimï óídakami buitapi sai gin urabaka aapimï. Ayimu ixtuigako aagada agai Diuxi gin Oga xorai biaka agai gïgïbidaragai dai xorai mai biaka agai tudu. Dai aidïpïrï aagidamu aanï gin Oga xorai ïgai daidi ïr gin aaduñi. Aagidamu aanï sai xorai maaxiko aagaiña saidi gin buaboitudai saidi ïgai ïr gin aaduñi tudu. 33Dïï gia aagidamu aanï sai maiti ïr gin aaduñi ïgai ix makïdï maiti ipïrhi xi maaxiko aagadagi saidi gin buaboitudai— itïtïdai.
34Dai oi Suxi go aatagi daidi potïtïdai ïgai go odami,
—Maiti gï agai sai po gïn ïrhiadagi aapimï sai xioma óídaka agai odami aanïkïdï. Cho. Gïn bupui surhigimu go óídakami aanïkïdï bhaiyoma dai asta gïn kodadamu aipakoga aanïkïdï— itïtïdai.
35—Daiñi, aanïkïdï mui kïkïïrhi bui surhigi agai ojogadï aanïkïdï gin urabakatai ojogadï. Dai mui oki bui surhigi agai dïïdï aanïkïdï ïpï. Dai jaa oki bui surhigi agai tumudï ïpï. 36Gï agai tudu sai maatïkagi aapimï sai muidutai ïïgi gïn aaduñi gïn bui surhigi agai gin urabakatai aapimï— itïtïdai. 37—Muidutai gïn aaduñi bhakoikamu gin buaboitudatai aapimï tudu. Dai aanï aagai sai xorai gin dagitoagi ipïrhiditai sai mai bhakoikagi dïïdïdï, ïgai ka maiti ïr ajïakami xi gin urabakagi. Dai podukai ïpï xorai gin dagitoagi ipïrhiditai sai maamaradï mai bhakoikagi, ïgai ka maiti ïr ajïakami xi gin urabakagi ïpï— itïtïdai.
38—Daiñi, kïïga maatï aapimï ix tuma bïïtarï go kukuruxi, sai ami xixixai óídakami go soimaaxi ibuadami dai naana dukai soimaaxi buididiña ïgai ami kukuruxiana. Podukai aapimï ïpï gï agai xi bhai gïn dukagi ix soimaaxi taatagi xïxkadï soimaaxi ibuadami dukai gïn nïijadagi óídakami gin urabakatai aapimï. Ix mai bhai gïn dukagi aapimï xi soimaaxi taatagi podukai gin oiditai aidï gia maiti ïr gïn ajïakami aapimï xi gin urabakagi— itïtïdai. 39—Xorai ïïgi gï nukada ïrhiadagi buamï ïrhiditai ïïgi bïïtarï, ïgai gia mai kïïgakïrï óídaka agai— itïtïdai. —Dïï gia xorai mai buamï ïrhiadagi ïïgi bïïtarï dai bhaiyoma gin oidiña tomaxi gï muatu ïgai gin oiditai, ïgai gia kïïgakïrï óídaka agai— itïtïdai.
40Dai apia oidi Suxi aatagidï daidi potïtïdai ïgai go odami ami,
—Daiñi— itïtïdai. —Aapimï ïr gin mamaatïrdamiga. Dai aanï aagai sai xi odami no xibhïkai kïïga ïïgida kaïkagi aapimï gïn ñoki gobai itïiya ïrhidi sai kaxi ïr ïïgiadami ïgai aanï gin ñoki ïpï. Dai podukai ïpï aanï ïr otosadï Diuxi. Dai kaxkïdï xorai ïïgida kaïkagi gin ñoki ïgai kaxi ïr ïïgiadami Diuxi ñokidï ïpï. Diuxi otosadï aanï kaxkïdï— itïtïdai.
41—Gin aaduñi, kïï maatï aapimï sai Diuxi mamaakai maitïki go ñiñokituldiadamigadï. Dai xi ïïgiadagi aapimï ñokidï ïmo ñokituldiadamigadï Diuxi maatïkatai sai Diuxi bïïtarï ñokai ïgai aidï gia aapimï ïpï buimu maitïki ïpï ïpïan dukai ïgai. Dai pomaaxi ïpï xïïxkadï ïïgiadagi aapimï ïmo buaboitudadami maatïkatai sai kïïga buañixi ibhïadï. Ix ïïgiadagi aapimï ïgai aidï gia buimu aapimï maitïki ïpïan dukai ïgai ïpï. 42Dai xi maakiagi aapimï ïmo oidaragai ïmadutai gin mamaatïrdamiga aidï gia bhïimu aapimï ïmo maitïki ïpï tomaxi mai xii namïakagi go oidaragai ix makïdï maakiagi aapimï. Tomaxi mosïkaxi ïmo baso sudagi óídagi aapimï tudu. Bïïxkïrï buimu aapimï gïn maitïkiga. Gin maamara dukai nïidi aanï gin mamaatïrdamiga kaxkïdï— itïtïdai Suxi.
Currently Selected:
Mataibo 10: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
