Mataibo 21

Go odami bhai ïrhiarakïdï miadïgi go Suxi ïmo gïï dunukami dukai Jerusalenana

1Suxi ïmadï jaa odami ix makïdï oiditadai ka miadïrï iimïitadai Jerusalenana dai ayi ïgai go Olibo tïgidukïdï gidiana ix makïdï miadïrï bipiïyi go arhi kiiki Betpage tïgidukami. Dai abhiadïrï bhaitïki otoi Suxi goka mamaatïrdamigadï. 2Daidi potïtïdai ïgai,

—Iimibïrai mïïka go arhi kiikiïrï dai ami tïïgimu aapimï ïmo axñitu burhidikami ïmadï maradï. Bïrai upanda ïgai dai bhaigobai buapa— itïtïdai. 3—Dai xi ïmoko gïn tïkakagi ix tuixidï upasai aapimï gobai bïrai potïda sai gïn Tïanïdamiga tïgito bai otoma gin maakimu ïgai oigaragai— itïtïdai Suxi.

4Po gï idui gobai saidi pogïduna ix makïdï aagai Diuxi ñokituldiadamigadï ïïki. Aidï adukai oja ïgai,

5 Aagidabïrai go Jerusalenïrï óídakami sai ka bhodïrï iimïi Reygadï.

Kïï tuiga ïgai dai mai gïdukïdï gï ïrhidi.

Ïmo axñitu daama dai ïmadï ïmo axñitu maradï daama daitugai ïgai.

Po duu oja go ñokituldiadamigadï Diuxi ïïki.

6Daidi iji go mamaatïrdami dai bïïxi idui ix dukatai aagiditadai Suxi. 7Buapidi ïgai go axñitu ïmadï maradï. Dai bhodïrï go axñitu maradï daama darai ïgai baapasaradï dai ami daamioma daiba go Suxi.

8Dai kïïga mui odami ix makïdï darakatadai, ami boiyana ïrhi baapasaradï sai ami daama daibunana Suxi. Po dui go óídakami ïmo xadutudaragai dukai. Dai jaa ami ïrhi ux maamara ix makïdï guikoma ïgai saidi ami daama daibunana go Suxi. 9Mui óídakami bhaitï iimïitadai dai jaa mui oiditadai dai Suxi ïran ïxi imïitadai. Dai gïgïr iñakimi go óídakami bhai gïn ïrhiarakïdï daidi ikaitimi ïgai,

Sïïrhikïdï gï agai sai oigïda ñokada óídakami gobai bïïtarï. Gobai ïr go Pipiixaradï go Dabidkaru ix makïdï nïnïrakatadai aatïmï ïïki abhiadïrï tudu.

Ipïrhidi aatïmï sai Diuxi maakana bhai ïrhiaragai go otosadï ix makïdï bia ïmo sïïrhikami Diuxiamadïrï.

Agia gï agai sai kïïga oigïda ñokada óídakami gobai bïïtarï, ikaitimi go odami.

10Dai ka baakïkai Suxi Jerusalenïrï sai ka bïïxi xixorhi go óídakami dai ïïgi gïn tïkakaitadai aipakoga,

—¿Xorai gobai?— ikaititadai ïïmoko.

11Dai jaa ikaititadai,

—Gobai ïr go Suxi. Ïmo ñokituldiadamigadï Diuxi gobai. Nasaretañdïrï oidakami gobai ix makïdï Galilea munisipiïrï bipiïyi— ikaititadai ïgai.

Suxi bubaitu go gaagaradami go gïï kiupiañdïrï

12Dai baa Suxi go gïï kiupiïrï ix makïdï Jerusalenïrï kïïka dai aadaji ïgai go odami ix makïdï ami gaagarai dai gasapïdai naana maaxi ami kiupiïrï. Surhigan tïi ïgai memesagadï go ix makïdï kambhiandoi tuminxi dai daraikarudï ix makïdï gaagarai tutugu ïpï.

13Daidi potïtïdai ïgai,

—Diuxi ñokidïrï adukai ojixi— itïtïdai. —Ami ikaiti sai,

Diuxi kiidï ïr daanïdaragai bïïtarï. Dïï gia aapimï ïïxibogami kiidï dukai bia— itïtïdai.

14Dai bhodïrï mui odami mai nïadami dai ix makïdï mai bhaigakatadai imidagai mïï ayi xako dajatadai Suxi go gïï kiupiana baidi ïgai duduadi. 15Daidi go tïtïanïdamigadï go dadaxdadami ïmadï go tïtïïgiadami go sïïrhikami nïidi go xigiamaaxkami maaxidaragai ix makïdï ibuadana Suxi ix makïdï odami mai bhaiga xi ibuadagi. Dai kaï ïgai go aarhi ïpï ix makïdï gïgïr ñokaitadai daidi ikaititadai sai,

—Sïïrhikïdï gï agai sai oigïdatai ñokada óídakami Suxi bïïtarï. Gobai ïr go Pipiixaradï go Rey Dabidkaru ix makïdï nïnïrakatadai aatïmï ïïki abhiadïrï tudu— ikaititadai go aarhi.

Dai kaxkïdï go tïtïanïdamigadï go dadaxdadami ïmadï go tïtïïgiadami sïïrhikami bhakoi buidïrï Suxi. 16Daidi potïtïdai ïgai go Suxi,

—¿Maiti pïx kaï ix kaiti go aarhi? ¿Ix tuixi daadagitoi aapi sai podukai ñokada ïgai gï aagaitai aapi?— itïtïdai.

Dai Suxi potïtïdai,

—Ïjï kaï aanï. Dïï gia ¿Maiti mïx maatï ix kaiti Diuxi ñokidïrï xako ikaiti sai,

Diuxi bhai dui sai go aarhi ïmadï xixïñi kïïga ñokadagi Diuxi otosadï bïïtarï?

Po tudu ikaiti Diuxi ñokidï— itïtïdai Suxi.

17Dai bhodïrï busai ïgai abhai kiupiañdïrï dai ïpamu jii Betaniamu dai ami bii ïgai ïmo tukagi.

Suxi idui ïmo maaxidaragai dai gakixatu ïmo igoxi dïïdï

18Dai xadiko ka noragi agai Suxi Jerusalenamu ïpamu dai bhiugimutugai. 19Dai nobai boiyana imïitai tïï ïgai ïmo igoxi dïïdï dai miadïrï kïkiba ïgai nïida agaitai sa bhai ibhaidaga. Nïnïaban tïi ïgai dai go ïï aagadï biakatadai gobai. Mai tipukatadai ibhiadï. Dai Suxi ñokidi go igoxi dïïdï daidi potïtïdai,

—Ka mai ibhiatïdamu aapi xibi abhiadïrï bhaitiakoga— itïtïdai.

Dai mos potïi ïgai bai otoma gakixa go igoxi dïïdï.

20Dai go mamaatïrdamigadï Suxi nïidi ixtuma iduitadai ïgai dai mai tïtïïgaitadai ixtumaxi gïn tïtïgitoagi. Daidi potïtïdai ïgai go Suxi,

—¿Ix dukatai mos ïï otoma gakixa go igoxi dïïdï?— itïtïdai.

21Dai Suxi potïtïdai,

—Gin tïgito abïr kaï ixtumaxi gïn aagidamu aanï. Kïïga ïr buaboi gobai tudu. Daiñi, xi kïïga buaboitudagi aapimï aidï gia bhaigakamu aapimï xi ibuadagi ixdukai idui aanï go igoxi dïïdïkïdï ïpï. Dïï gia maiti gï agai sai po gïn ïrhiadagi sai mai kïïga maatï aapimï ix bhai ïr buaboi sai ixtutuidikïi Diuxi ix ibuadagi ixtumaxi tanïdagi aapimï. Ix kïïga buaboitudagi aapimï aidï gia asta bhaigakamu aapimï xi potïdagi ïmo tubidaki sai maigobai imïna dai sai go gïï sudagiïrï gïsïna tudu dai gobai gïn ïïgiadamu— itïtïdai. 22—Ix buaboidaitai daanïdagi aapimï Diuxi ïgai gïn maakimu ixtumaxi tanïdagi aapimï— itïtïdai Suxi.

Go dudunukami tïkakai go Suxi xorai maatadai sïïrhikamigadï

23Dai bhodïrï jii Suxi ïpamu gamo go gïï kiupiana Jerusalenïrï dai ami gamamaakaitadai ïgai aatagi. Dai ami dada chïki tïtïanïdamigadï go dadaxdadami ïmadï jaa bhaitï gukakamigadï go judidiu. Dai potïtïdai ïgai go Suxi,

—¿Baadïrï bhïiyi aapi sïïrhikami dai aadaji aapi go gaagaradami tami kiupiañdïrï takabo? ¿Borai gï aagidi pïsai pomaaxi iduna?— itïtïdai.

24-25Daidi go Suxi aadïrï gatïkakai,

—Gin aagidabïrai aapimï ¿Borai maa sïïrhikami go Juan saidi gabapakonana ïgai odami? ¿Diuxi xi maa sïïrhikami, ïmo odami ix maa xia?— itïtïdai. —Ix gin aagidagi aapimï aidï gia aanï gïn aagidamu ïpï xorai ïgai dai gï maa sïïrhikami sai ibuada aanï gin aaduindagai ïpï— itïtïdai Suxi.

Daidi go dudunukami aipako gïn aagidimi daidi ikaitimi,

—¿Dukatai duna aidï aatïmï?— ikaitimi. —Ix potïdagi aatïmï sai Diuxi otoi go Juan, go Suxi po gïr tïda antaada tïx tuixi aidï mai buaboitu aatïmï go Juan. 26Daidi ix potïdagi aatïmï sai ïmo odami otoi go Juan dai mai xu Diuxi maa sïïrhikami, aidï gia gï bui bhaakoika antaada go odami. Go odami kïï buaboitudai sai go Juan ïr ïmo ñokituldiadamigadï Diuxi di— Pokaititadai go dudunukami tudu mai maatïkatai ixdukatai aa noraidagi ñoki go Suxi. 27Daidi potïtïdai ïgai go Suxi,

—Bïï mai maatï aatïmï xorai otosadï go Juan— itïtïdai.

Dai Suxi potïtïdai aidï,

—Aidï gia tomarhi aanï maiti gïn aagidamu xajadïrï bhïiyi aanï gin sïïrhikamiga— itïtïdai.

28—Daiñi, gïn aagidamu aanï ïmo maaxidaragai aatagi dai gin aagidabïrai aapimï dudunukami ix ïrhidi aapimï gokïdï. Ïmo imidagai as oidakatadai ïmo kïïrhi dai mui ïïsï ïgai uba dïïdï. Dai maamarakatadai ïgai goka kïkïïrhi. Dai ïmo imidagai potïtïdai ïgai ïmo maradï,

—Mïïka gaataduñi go uba ïxikamiana— itïtïdai.

29Dai go maradï potïtïdai,

—Cho. Maiti an imi agai— itïtïdai.

Dïï gia bïïxkïrï ïma dukai gï tïgito go maradï gokiïrï dai bïïxkïrï jii dai gaataduñimu.

30Dai gokiïrï ogadï potïtïdai go gïmai maradï,

—Aapi ïpï, imiñi dai gaataduñi ïxikamiana— itïtïdai.

Daidi go maradï potïtïdai,

—Ïjï, imimu aanï— itïtïdai.

Dai bïïxkïrï mai jii tomax potïtïdai ïgai sai iimi agai— itïtïdai Suxi.

31Dai bhodïrï potïtïdai Suxi go dudunukami,

—¿Ix makïdï go bïï goka maamaradï kïïga ïïgidi ogadï?— itïtïdai.

Dai go dudunukami potïtïdai,

—Go ix makïdï ïpïgioma aagidi ïgai— itïtïdai.

Dai Suxi aagidi go dudunukami ix tïiya ïrhidi go maaxidaragai aatagi. Daidi potïtïdai ïgai,

—Aanï aagai sai kïïga ïr buaboi sai muidutai go odami ix makïdï bamioma soimaaxi ibuadami aagai aapimï biaka agai oigaragai ix urabagi Diuxi gatïanïitai ïgai dai aapimï gia cho. Asta go kïkïïrhimïrhiakami oki ïmadï go gataanïdami kuota uraba agai dai aapimï gia cho— itïtïdai. —Daiñi— itïtïdai. 32—Go Juan dibia dai gïn tïtïïgidi ix dukatai buañixikami óídakagi aapimï dïï aapimï mai buaboida kaï. Dïï gia muidutai go taanïdami kuota dai kïkïïrhimïrhiakami oki kïïga buaboida kaï. Dai tomaxi nïidi aapimï sai ïgai gia ka buaboida kaï modukai aapimï mai ïma dukai gïn tïtïgito dai maiti ipïrhi xi buaboitudagi— itïtïdai Suxi go dudunukami.

Suxi aagai ïpï ïmo maaxidaragai aatagi ix makïdï itïiya ïrhidi sai go dudunukamigadï go judidiu maiti ipïrhidi xi buaboitudagi ix go Suxi ïr otosadï Diuxi

33Daidi bhodïrï potïtïdai Suxi go dudunukami,

—Gïn tïgito abïr kaïka idi maaxidaragai aatagi ix makïdï gïn aagidamu aanï— itïtïdai. —Ïmo imidagai ïmo kïïrhi biakatadai ïmo dïbïrai dai ami ïi ïgai kïïga mui tutukami uba dai kïïga kuraratu ïgai. Dai bhodïrï idui ïgai ïmo gïï dagibuñakarui uba xako busaidagi baragadï. Dai kïi ïgai ïmo baaki kïïga tïkabakami ami ïpï sai abhiadïrï gï nukadana go ïxikami. Dai ka bhai gï dunakai gobai sai tajukamikïdï nukaturhi ïgai jaa odami dai bhodïrï mïkaxi jii.

34Dai ka aïkai yoobaragai sai otoi ïgai chïki pipioñi saidi mïï gataanïna xïïxi ajïakatadai go yoobaradï. 35Daidi mïï aïkai ïgai ïxikamiana sai go ix makïdï tajukamikïdï aatabuadatadai go ïxikami bhïiyi dai gïikarai ïgai ïmoko dai ïmai mua ïgai dai ïmai maikakarai ïgai ojodaikïdï. 36Xi kaxkïdï go tuidakami go ïxikami otoi ïpï jaa muiyoma pipioñi. Dïï gia go nunukadakami go ïxikami ïpïpï soi buididi ïpïan dukai ix makïdï tukamïrï dadatadai.

37Dai bhodïrï kugatïrï otoi go tuidakami go ïxikami ïïgi maradï,

—Gobai gia xadutuada antaada ïgai— as ïrhidi ïgai.

38Dïï gia aidïxi go nunukadakami go ïxikami tïï go maradï ix ka bhodïrï imïi saidi pobai gïn tïtïdai ïgai aipakoga,

—Gobai bïïtarï bii agai buxtuidadï ogadï— ikaiti. —Gï agai tïx muagi sai podukai aatïmï gïr bïïtarï biiyagi gobai— ikaiti. 39Dai bhïiyi ïgai dai maigo busaitu ïxikamiañdïrï dai mua—.

40Dai bhodïrï potïtïdai Suxi go dudunukami,

—¿Ix ïrhidi aapimï? ¿Xïïxkadï mïkaxdïrï dibiagi go tuidakami go ïxikami ix duñimu ïgai go ix makïdï tajukamikïdï aataduitadai?— itïtïdai.

41Dai go dudunukami potïtïdai,

—Kabami soimaaxi taatatuldamu dai kodamu ïgai go galtutiakïdï dai tajukamikïdï nukatuldamu ïgai go dïbïrai jaa ix makïdï gia maakadamu xïïxi ajïakagi ïgai— itïtïdai.

42Daidi Suxi potïtïdai,

—Pomaaxi aba. Dai kaxkïdï kïïga gï agai sai kïïga gïn tïgitokagi ix tïiya ïrhidi Diuxi ñokidïrï xako ikaiti saidi,

Diuxi otosadï Tïanïdami ïr ïmo kïïgadukami odai dukai dasaragai bïïtarï simientogadïrï ïmo baaki. Dai pipioñi pupuirugami kïïsa agai baaki dai maigobai daitu go odai mai kïïgadukami dukai nïiditai. Dïï gia Diuxi bhïiyi go galbaaxi odai dai dáí saidi ïr go odaikana ix makïdï bamioma gï agai go baaki bïïtarï.

Diuxi ïgai dai podukai gï tïgito sai pogïduna gobai go odaikïdï tudu dai aatïmï ïmo xigiamaaxkami aaduindagai dukai tïï ix makïdï idui Diuxi dasakai ïgai go odai

Podukai ojixi Diuxi ñokidïrï dai gï agai sai kïïga maatï kaïkagi aapimï ix tïiya ïrhidi gobai— itïtïdai Suxi.

43—Daiñi— itïtïdai. —Ka maiti ipïrhi aapimï xi buaboitudagi sai aanï ïr go otosadï Diuxi dai saidi aanï ïr gïn Tïanïdamiga. Dai kaxkïdï ka maiti gïn ajïga xi gïn tïanïdagi Diuxi. Dai bhaiyoma xibi jaa odami ayimu gobai. Dai ïgaikamu ix makïdï tïanïda agai Diuxi. Ïgai gia iduñimu ixtumaxi Diuxi ipïrhidi— itïtïdai.

44—Daiñi, Aanï ïr go odai duu ix makïdï aagai Diuxi ñokidïrï. Diuxi otosadï Tïanïdami aanï tudu. Dai xorai maiti gin buaboitudagi ïr ïpïan dukami xi utubagi ïgai go odiana xiïpï xi go odai gïxiagi daama. Dai ix makïdï utubagi ami xia gïn duñimu. Dïï gia xi go odai gïxiagi ïgai daama ïgai gia bïïxi naato boixa agai gobai— itïtïdai.

45Daidi bhakoi go tïtïanïdamigadï go dadaxdadami dai go fariseos kaïkatai aatagidï Suxi. Kïïga máí ïgai sai galtutiakami aagai Suxi ïgai aagaitai go ix makïdï tajukamikïdï nukadatadai ïxikami. Mai bhai ïrhi ïgai kaïkatai go aatagi tudu. 46Dai bhïiya ïrhiditadai ïgai go Suxi aidï dïï duadikoi ïgai ix iduñagi go odami. Go ix makïdï gabhïiya ïrhiditadai kïïga maatïkatadai sai go odami buaboitudaiña sai Suxi ïr ïmo ñokituldiadamigadï Diuxi tudu. Dai poïrhidi ïgai sai go odami bhakoika antaada ix soi buidadagi ïgai go Suxi. Kaxkïdï mai bhïiyi ïgai.

Currently Selected:

Mataibo 21: NTP

Highlight

Copy