Mataibo 20
20
Suxi aagai ïmo maaxidaragai aagaitai aatabuadami ïmo ïxikamiana uba
1Dai oi Suxi go aatagi dai potïtïdai ïgai mamaatïrdamigadï,
—Gïn aagidamu aanï ïpï ïmo maaxidaragai aatagi sai maatïkana aapimï ix dukatai gatïanïi Diuxi. Idi ïr go maaxidaragai aatagi tudu. Ïmo imidagai as oidakatadai ïmo kïïrhi dai biakatadai ïgai ïxikami uba. Bhai mui tutukami uba gukatadai ami ïxikamiana tudu. Dai ïmo imidagai ïïki kiamoko jii ïgai dai nobai gaaga agai xorai aatabuadagi go ïxikamiana. 2Dai tïï ïgai chïki aatabuadami dai bhai dui ïgai ïmadï dai aagidi xïïxi aa namïida agai ïmo tasai aaduindagai bïïtarï. Dai bhodïrï otoi ïgai ïxikamiana saidi gamo aataduna ïgai.
3Dai laachkïdï, parï tuxtamïrï kiamoko, nobai kayana aimïraitadai go tuidakami go ïxikami dai nobai tïï jaa sai mos daraka. 4Daidi potïtïdai ïgai,
—Iimibïrai aapimï ïpï dai mïïka aatabuada ïmadï go gaa dai gïn aa namïidamu aanï ixtumaxi ïr sïïrhi gïn aaduindaga bïïtarï— itïtïdai.
Dai iji ïgai dai mïï gaatadui ïpï.
5Dai parï daan duku jii go tuidakami go ïxikami ïpamu dai maa aaduindagai ïpï jaa ix makïdï nobai darakatadai ïpï. Dai aagidi ïgai sai aa namïida agai xïïxi ïr sïïrhikami aaduindadï bïïtarï ïpï. Dai ïpïpï parï baikïrï podui ïgai ïpï. 6Dai ïpïpï parï taamïrï urunoko jii ïgai dai tïï ïpï jaa ix makïdï no darakatadai. Daidi potïtïdai,
—¿Ix tuixi mos daraka aapimï ïmo tasai?— itïtïdai.
7—Mai tipu xorai gïr maakiagi aaduindagai— itïtïdai go odami.
Daidi go kïïrhi potïtïdai,
—Aanï gia gïn maakimu aaduindagai— itïtïdai. —Iimibïrai dai soiña go gaa aatabuadami amïka gin ïxikamigana tudu dai gïn aa namïidamu aanï ixtumaxi ïr sïïrhikagi gïn aaduindaga bïïtarï— itïtïdai.
Daidi iji go odami dai gaatadui.
8Dai aidï urunoko go tuidakami go ïxikami báí ïmo pioñigadï ix makïdï nukadatadai go gaa pipioñi. Daidi potïtïdai ïgai,
—Baidañi go aatabuadami dai aa namïida— itïtïdai. —Ipïrhidi aanï sai ïpïgioma aa namïida aapi ix makïdï urunokioma aatadui dai asta kugatïrï aa namïida aapi ix makïdï ïpïgioma aatadui— itïtïdai.
9Dai dada go aatabuadami ix makïdï taamïrï urunoko gaataduitadai. Dai bïïxkatai buiyi ïmo tasai aaduindagai namïgadï ïïmoko. 10Dai gokiïrï dada go aatabuadami ix makïdï ïpïgioma gïn gaataduitadai. Dai pobïnïrhiditadai ïgai sai muiyoma buiyi agai tuminxi xi bhai ix makïdï urunokioma gaatadui. Dïï bïïxkïrï ïgai mos apia ïïki bui ïpï. 11Dai nïiditai ïgai xïïxi buiyi sai mai bhai ïrhi ïgai dai bui ño ïgai go tuidakami ïxikami 12daidi potïtïdai,
—Go gaa ix makïdï utudami taamïrï urunoko bapai mosïkaxi ïïmo hora aatadui dai bïïxkïrï ïpïan ïxi gïr aa namïki aapi. Maiti ïr sïïrhi gobai. Aatïmï gia ïmo tasai aatadui dai soimaaxi taata go toiñdagai— itïtïdai.
13Daidi go tuidakami go ïxikami aataga ïmadï ïmadutai go aatabuadami ix makïdï bui ñokaitadai daidi potïtïdai ïgai,
—Maiti aanï soimaaxi idui— itïtïdai. —Daiñi, ¿Mai ix bhai aa aapimï sai go kaaki tuminxikïdï gaataduña agaitadai ïmo tasai?— itïtïdai. 14—Ka bia aapi gï tuminxiga. Imïdañi tudu. Ïïgi aanï podukai ipïrhi xi ïpïan ïxi gïn aa namïidagi aapimï tomaxi go gaa kugatïrï bapai. 15Kïïga bia aanï sïïrhikami xi xia buadagi gin tuminxiga ïïgi ixdukatai ipïrhiadagi aanï tudu. Maiti gï agai xi ïgamukagi aapimï kïï buididitai aanï jaa— itïtïdai amudï.
16—Podukai aatabuayi Diuxi gatïanïitai ix dukai idui go amudï tudu— itïtïdai Suxi go mamaatïrdami. —Xïxkadï gatïanïdagi ïgai go odami ix makïdï bamioma tïtïanïdami gïn ïrhidiña mai tïanïda agai. Dai go odami ix makïdï mai tïtïanïdami gïn ïrhidiña ïgai gia ïr ix makïdï gatïanïda agai Diuxi bïïtarï— itïtïdai.
Dai podukai kugaitu ïgai aatagidï.
Ïpamu aagidi Suxi go mamaatïrdamigadï sai bia xi mukiagi dai sai ïpamu gï duakatudagi agai
17Dai ïmo imidagai Jerusalenamu imïitadai Suxi ïmadï jaa odami. Dai ïkobai aatagidi Suxi go bhaibuxtama dan goka mamaatïrdamigadï. Daidi potïtïdai ïgai,
18—Aanï ïr Diuxi otosadï ix makïdï ïmo kïïrhi busai. Dai gï agai sai maatïkagi aapimï sai amïka Jerusalenïrï xako iimi aragai aatïmï ami ïmoko gin tïïgida agai buitapi go tïtïanïdamigadï go dadaxdadami ïmadï go tïtïïgiadami go sïïrhikami. Dai ïgai gatïañi agai gin muaragai— itïtïdai. 19—Gin tïïgidamu ïgai go gupudagai bipiakami ix makïdï maiti ïr judidiu bai ïgai gin parunada agai dai gin gïikarsa agai dai ïmo kuruxiana gin xixa agai. Ami kuruxiana mukimu aanï. Dïï gia baika tasaikïdï duakatumu aanï ïpamu— itïtïdai.
Suxi aagai sai xorai oijadagi ïgai gï agai saidi ïr pipioñi dukamika ïgai go jaa bïïtarï
20Dai bhodïrï go oñigadï go Zebedeo ïmadï goka maamaradï mïï ayi buidïrï go Suxi dai kuiki buidïrï. Jakobo dai Juan tïtïgidu go maamaradï go oki. 21Dai Suxi potïtïdai,
—¿Tuma aagaimi aapimï?— itïtïdai.
Dai go oki potïtïdai,
—Ipïrhidi aanï sai maakana aapi oigaragai gin maamara saidi ïr gï sonoïrï gukakamikagi gobai xïxkadï ka bhïiyagi aapi gï sïïrhikamiga dai kaxi gatïanïdagi aapi. Ipïrhidi aanï sai gï sonoana daraibana ïgai bïï goka padïrï xakoga daibamu aapi gatïanïitai— itïtïdai.
22Dai Suxi potïtïdai go maamaradï go oki,
—Aapimï mai maatï ixtumaxi gin taanïi aapimï— itïtïdai. —Arhiï kabami soimaaxi taata iñagai aanï tudu. ¿Dai bhai ix ixtutuidïna aapimï xi gin ïpïan ïxi soimaaxi taatagi gin urabakatai aapimï?— itïtïdai.
—Ïjï kïïga ixtutuidikïi aatïmï— ikaiti go maamaradï go oki.
23—Buaboi tudu sai kabami soimaaxi taata agai aapimï gin ïpïan dukai— itïtïdai Suxi. —Dïï gia Diuxi gin Oga ïgai dai aagada agai xorai gin sonoïrï gukakamika agai xïïxkadï bhïiyagi aanï gin sïïrhikamiga. Ïgai ka bhai dui xako daraibamu ïgai gin sonoana bïï goka padïrï tudu. Dai maiti gin ajïga xi aagadagi aanï xorai daraibamu ami— itïtïdai.
24Dai go gaa bhaibuxtama mamaatïrdamigadï Suxi mai bhai ïrhi buidïrï go Jakobo dai Juan kaïkatai ix kaiti ïgai. 25Dai Suxi báí mamaatïrdamigadï daidi potïtïdai,
—Kïïga maatï aapimï sai go bhaitï gukakamigadï go óídakami ix makïdï maiti ïr judidiu pipioñigadï dukai nïidi ïgai óídakami. Kabami tïanïi ïgai tudu. 26-27Dïï gia aapimï maiti gï agai xi podukai ibuadagi. Aapimï ix makïdï ïr gabhaitïgukakami gï agai bhaiyoma xi pipioñi dukamikagi aapimï jaa bïïtarï. Dai mai xu xi kabami gatïanïda ïrhiadagi aapimï— itïtïdai. 28—Gï agai xi gin ïpïan buadagi aapimï tudu. Aanï dibia tami oidigi daama ïmo pioñi dukai dai ïïgi gin tïïgida iñagai saidi soi gin buidadagi daidi gin muagi gin buidïrï bïïtïkamiga. Mukimu aanï dai kïïgakïrï bubaidamu mui óídakami. Podukai dasamu aanï namïgadï ix makïdï buaturhi ïgai soimaaxi ibuadamikatai ïgai tudu. Ïmo pioñi dukai aanï óídakami bïïtarï tudu tomaxi aanï ïr go Diuxi otosadï ix makïdï ïmo kïïrhi busai dai kïïga bia aanï sïïrhikami ix kabami tïanïdagi óídakami— itïtïdai.
Suxi duadi goka kïkïïrhi mai nïadami
29Dai gokiïrï Suxi ïmadï mamaatïrdamigadï ka bhaitïki go Jerikoïrï iimïitadai dai jaa mui óídakami oiditadai. 30Dai ami boi ugidana darakatadai goka kïkïïrhi mai nïadami. Dai aidïxi kaï ïgai sai no boiyana daibuskimi Suxi sai gïïgïrï iñakidi. Daidi potïtïdai ïgai,
—Aapi Tïanïdami, aapi ix makïdï ïr Pipiixaradï go Dabidkaru, soi gïlda aatïmïkïdï daidi gïr soiña— itïtïdai.
31Daidi go gaa odami ix makïdï ami darakatadai gïgïr iñokidimi ï goka kïkïïrhi mai nïadami dai potïtïdai,
—Dodorhigibïrai dai maiti abïr ñokada— itïtïdai.
Dïï gia go mai nïñiadami apia bamioma iñakimi daidi ikaitimi,
—Aapi Tïanïdami ix makïdï ïr Pipiixaradï go Rey Dabidkaru, soi gïlda aatïmïkïdï dai gïr soiña— ikaitimi.
32Daidi kïkiba Suxi gïgïr ño daidi potïtïdai,
—¿Tumaxiïrï ipïrhidi aapimï xi gïn soiñagi aanï?— itïtïdai.
33Dai go kïkïïrhi potïtïdai,
—Gïr Nukadakami, ipïrhidi aatïmï xi gïr nïadatuda aapi— itïtïdai.
34Dai soi gïlda tïï Suxi go kïkïïrhi dai taata bupuidï dai bhobaxdïrï ka nïnïabatu ïgai bïï gokatai dai ïmodïrï oi ïgai go Suxi.
Currently Selected:
Mataibo 20: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
