Juan 21

Gï maaxitu Suxi kubarakami mamaatïrdamigadï buitapi

1Dai gokiïrï ïmo imidagai ïpamu gï maaxitu go Suxi mamaatïrdamigadï buitapi go gïï sudagi ugidïrï xako Tiberias tïgidu. Gïn aagidamu aanï ix dukatai gï maaxitu go Suxi. 2Ami darajatadai go Ximuñi Piduru ïmadï Tomás, ix makïdï kuatai aagaiña odami, ïmadï Natanael go Kanañdïrï oidakami. Dai ami darajatadai maamaradï Zebedeo ïpï ïmadï jaa goka mamaatïrdamigadï.

3Dai mai kia gï maaxitu go Suxi bai go Ximuñi Piduru potïtïdai go gaa,

—Aanï mïï bubaida iñagai batopa— itïtïdai.

Dai go gaa itïtïdai,

—Ïjï, gï oidamu aatïmï— itïtïdai.

Dai iji ïgai dai tïtïsai ïmo barkoïrï dïï tomaxi ïmo tukagi gïn aaga ïgai tomarhi ïmo batopa mai busaitu.

4Dai bhodïrï ka maaxikai oidigi tïï ïgai go Suxi ix ami sudagi ugidïrï kïïka dïï mai máí ïgai. 5Daidi Suxi ami sudagi ugidïañdïrï ñokidi daidi itïtïdai,

—¿Tïï mïxi batopa?— itïtïdai.

—Cho— itïtïdai go ix makïdï barkoïrï iimïitadai.

6Daidi go Suxi itïtïdai,

—Daitudabïrai gïn rediga sïïrhixapadïrï go barko ix podukai gia bubaidamu aapimï— itïtïdai Suxi.

Daidi podui go barkoïrï iimïikïdï. Daitu ïgai gïn rediga dai xibi gia mui bui ïgai batopa dai ka maiti ixtui ix dukatai busaidagi mos ïï muidukatai.

7Daidi go mamaatïrdamigadï ix makïdï go Suxi sïïrhikïdï oigïdai potïtïdai go Piduru,

—Gobai ïr Gïr Nukadakami— itïtïdai.

Dai go Piduru gaataduña agaitai ka upaitadai baasaradï. Dai mos máí ïgai sai go ix makïdï sudagi ugidïrï kïakatadai ïr Gïr Nukadakami dai otoma gï aayi gï basaraga ïpamu dai sudaïrï baa dai ajiagai ugidïrï xako kïakatadai Suxi. 8Dai go gaa mamaatïrdamigadï go barkoañdïrï tïbaimukai go rede kïï sudakami batopa dai ayi sudagi ugidïrï ïpï. Mai xii mïkaxi iimïitadai ïgai sudagi ugidïañdïrï aidï, parï ïmo cien metros. 9Dai mos tïapanakai ïgai barkoañdïrï sai tïï ïgai tutuparhi mïïkami dai ami daama kaatïkatadai ïmo batopa dai bïïtïkatadai chïki pan ïpï.

10Daidi go Suxi potïtïdai,

—Bhaigobai abïr buapa chïki go batopa ix makïdï bubaitu aapimï— itïtïdai.

11Dai bhodïrï go Ximuñi Piduru tïsai barkoana dai tïbaimïkatai busaitu go rede maigo sudagi ugidïamakoga dai dïbïrai gakikïrï dáí. Dai go rediga sïïrhikïdï kabami bïïtïkatadai biakatai ïmo ciento dan gokobhai dan bhaibuxtama dan baika batopa kïïga gïgïrdukami. Baidi go rede bïïxkïrï mai ïkïitadai.

12Daidi go Suxi itïtïdai go mamaatïrdamigadï,

—Gimibïrai daidi gauga— itïtïdai.

Dai go mamaatïrdamigadï tomarhi ïmadutai maiti ipïrhi ix tïkakagi xorai ïgai kïïga maatïkatai saidi ïr go Suxi. 13Daidi go Suxi baan kïkiba ami taikobai dai bui go pan ïmadï batopa gaikami dai takogi go mamaatïrdamigadï sai ugana. 14Dai gokïdï kaxi ïr baikakokatadai ix gï maaxitu go Suxi mamaatïrdamigadï buitapi aidïxi abhiadïrï xi gï duakatu.

Abïnakidi Suxi go Piduru sai mai dagitokatai urabana

15Dai ka ugakai go mamaatïrdamigadï sai go Suxi itïtïdai go Ximuñi Piduru,

—Aapi Ximuñi, aapi ix makïdï ïr Juan maradï ¿Bamioma pïx gin oigïdai ix bhai go gaa?— itïtïdai.

Daidi go Piduru itïtïdai,

—Ïjï, gin Tïanïdamiga. Kïïga maatï aapi ix aanï gï oigïdai— itïtïdai.

Daidi go Suxi itïtïdai aidï,

—Kïïga saadaka gin sosoiga miruxi tudu— itïtïdai.

16Dai bhodïrï Suxi ïpïpï itïtïdai,

—Aapi Ximuñi, ix makïdï ïr Juan maradï ¿Gin oigïdai pïxi?— itïtïdai.

Daidi go Piduru itïtïdai,

—Ïjï gin Tïanïdamiga. Kïïga maatï aapi in xi aanï gï oigïdai— itïtïdai.

Daidi go Suxi itïtïdai,

—Nukadañi gin sosoiga kañiru— itïtïdai.

17Dai bhodïrï ïpamu potïtïdai ïgai,

—Aapi Ximuñi ix makïdï ïr Juan maradï ¿Gin oigïdai pïxi?— itïtïdai.

Baikojo podukai tïkakai go Suxi go Piduru dai kaxkïdï soi gï ïrhi go Piduru daidi itïtïdai ïgai go Suxi,

—Aapi gin Tïanïdamiga kïï maatï bïïxi aïkatai. Dai kïïga maatï aapi ix aanï gï oigïdai— itïtïdai.

Daidi go Suxi itïtïdai,

—Kïïga saadaka gin sosoiga kañiru— itïtïdai.

18—Kïïga gï tïgito kaïka idi ñoki. Daiñi, ïkioma aidïxi bamioma ïr gïrhikatadai aapi ïïgi gï aadaiña gï yukuxi dai aimïraiña ïïgi pïx xako bhai ïrhidiña. Dïï gia xïïxkadï ka kïrhimumu aapi sïïrhiñdamu aapi gï ïïka bai jaa gï burhimu dai gï baidakamu xako mai imia ïrhidi aapi— itïtïdai.

19Potïtïdai Suxi aagiditai ixdukatai gï agaitadai ix mukiagi go Piduru. Dai podukai mukukai go Piduru sai maaxituda agai xïïxi ïr gïdukami Diuxi.

Dai bhodïrï Suxi itïtïdai,

—Gï agai tudu ix apia gin urabakagi aapi— itïtïdai.

20Dai Piduru aa nïnïaba dai tïï ix mïkadïrï imïitadai go ix makïdï kïïga oigïdai Suxi. Ïgai tudu ïr ïgai ix makïdï miadïrï ñokiditadai go Suxi aidï tukarï ix gï tïïgituda agaitadai ïgai. Ïgai ïgai dai gatïkakatadai sa xorai ïgai daidi gatïïgida agaitadai. 21Daidi go Piduru mos tïï go ix makïdï oiditadai daidi potïtïdai go Suxi,

—¿Dai gobio xïï gï duñimu?— itïtïdai.

22Daidi go Suxi itïtïdai,

—Ix ipïrhiadagi aanï ix kia oidakagi gobai asta xïïxkadï ïpamu dibia aanï, gokïdï maiti gï agai ix buamï ïrhiada aapi. Aapi mos sai gin urabaka— itïtïdai.

23Dai kaxkïdï odami pokaitiña gokiïrï sai gobai ix makïdï oigïdai Suxi mai muki agaitadai. Dïï mos gobai maiti ïr buaboi. Go Suxi mai potïtïdai sai mai muki agai ïgai. Bhaiyoma Suxi mos potïtïdaitadai,

—Xi ipïrhiada aanï ix kia oidakagi gobai asta xïïxkadï ïpamu dibia aanï, gokïdï maiti gï agai ix buamï ïrhiada aapi— itïtïdaitadai Suxi.

Go Juan oja mosïkaxi ixtumaxi nïidi ix kaxkïdï gï maatï saidi ïr buaboi ojadï

24Aanï tudu ix makïdï ibuayi idi ojai ïr go mamaatïrdamigadï Suxi ix makïdï kïïga oigïdaitadai ïgai. Idi libroïrï oja aanï mosïkaxi ix tumaxi nïidi aanï kaxkïdï kïïga gï maatï saidi ïr buaboi idi ojai. 25Mosïkaxi chïki ixtumaxi ix makïdï idui Suxi oja aanï tudu. Dai naana maaxi bamioma idui ïgai ïpï. Ix gï ojamudai bïïxi ix tumaxi idui ïgai ka mai aiyimudai tami oidigi daama mosïïki libro ix makïdï gï sudadamudai ïrhi aanï. Dai gobai ïr bïïxi ix makïdï oja aanï aagaitai Suxi Kristo. Mosïkaxi.

Currently Selected:

Juan 21: NTP

Highlight

Copy