Hechos 1

Diuxi baidaja go Suxi tïbagiamu

1Bhaiga gin aduñi Teofilo. Baasïkioma gï otoxi aanï ïmo ojai dai gï aagidi bïïxi ixtumaxi ibuadana go Suxi aidïxi aimïraiña oidigi daama dai gï aagidi ïpï ixtumaxi maatïtuldiña ïgai odami. Gï aagiditadai aanï ixdukatai pogïdui abhiadïrï xi go Suxi gï aaga idui aaduindadï dai 2asta xuduku gï baidakatu ïgai tïbagiamu. Go Suxi maa ñoki ojotosadï mai kia imïkai tïbagiamu. Diuxi Ibhïadï gubukadadïkïdï maa ïgai ñoki dai aagidi ixdukatai duñagi. Go ojotosadï Suxi ïgai ix makïdï ïko bubaitu ïgai baasïkioñdïrï. 3Gï aagidi aanï ïpï ixdukatai pogïdui xi soimaaxi taata Suxi dai muu dai ïpamu duakatu daidi bhodïrï ojotosadï buitapi kïkiba. Dai naana dukai gï mamaaxidi ïgai ix ka duakatu ïpï. Gokobhai tasai aitu ïgai didibiditai ojotosadï dai aagidiña ïgai ix dukatai tïanïi Diuxi.

4Dai ïmo imidagai gïn ïmpaiditadai ojotosadï Suxi dai ïgai aagidi sai mai iimïna Jerusalenañdïrï dai bhaiyoma potïtïdai,

—Nïnïrabïrai aapimï asta xïïxkadï dibiagi Diuxi Ibhïadï ix dukatai gïn aagidi Diuxi gin oga ïïki. Kïï maatï aapimï xi aanï gïn aagidi ïpï xi dibiagai ïgai. 5Daiñi, go Juan gïn bapakoi sudagikïdï dïï xibi aanï aagai sai ïpï chïki tasaikïdï bapakoñikamu aapimï Diuxi Ibhïadïkïdï— itïtïdai go Suxi.

6Dai bhodïrï aidïxi gïn ïmpaidakatadai ïgai Olibo gidiïrï taidi go ojotoxikami itïtïdai go Suxi,

—Gïr Nukadakami, ¿Xibi pïx gïr maaki agai ïmai Rey ix dukai biakana aatïmï ïïki bai ïpamu namïakagi gïr gobiernoga tanai Israelïrï?— itïtïdai go ojotoxikami. 7Taidi go Suxi itïtïdai,

—Ïïgi Diuxi gin oga ïgai dai aagai xïïxkadï iduñagi aaduindadï. Aapimï maiti ïr gïn bïïtarï ix maatïkagi xïïxkadï pobïduñagi gobai— itïtïdai. 8—Dïï gia xïïxkadï aiyagi Diuxi Ibhïadï gïn abhana aidï bhïimu aapimï gubukarhigadï ïgai dai odami buitapi aituldamu aapimï ñoki gin bïïtarï. Jerusalenïrï aituldamu aapimï gin ñoki ïmadï xako Judeana tïgidu oidigi ïmadï maigobai xako Samariana tïgidu oidigi dai asta mïkaxi oidigi ugidïrï ukami aituldamu aapimï ñoki gin bïïtarï— itïtïdai go Suxi.

9Dai mos potïi Suxi bai gï baidakatu ïgai tïbagiamu. Dai go ojotoxikami kia tïïgigimi xi ïmo ikomai iiña go Suxi dai ka mai tïï ïgai. 10Kia tïbagiamu tïïgigimi ïgai baidi todian dukai gïn sonoana gukiba goka kïkïïrhi tooto yukusukami. Kia tïsadimitadai go Suxi aidï. Daidi ikaiti go tooto yukusukami,

11—Aapimï kïkïïrhi Galileana oidakami, ¿Tui mïxi mos gukakatai tïbagiamu nïayi? Daiñi, ïgai baa Suxi ix makïdï tïsai aapimï gïn saagidañdïrï ïpamu dibimu podukai ixdukatai tïï aapimï ix jii— itïtïdai ïgai.

Maatia bhïiyi sïïrhikamigadï Udaxi ix duu ojixi Salmo librogadïrï

12Dai bhodïrï iji go ojotoxikami ami gidiañdïrï gamo Jerusalenamu. Olibo tïgidu ïgai gidi dai kïï miadïrï kïïka ïgai Jerusalen, parï ïmo kilometro ïxi. 13Daidi ka aïkai Jerusalenïrï tïtïsai ïgai ïmo gokoadaamarhikamiïrï baaki. Ami kiiyïrï gïn urhiñatadai ïgai muidutai. Darakatadai go Piduru ïmadï Jakobo dai Juan ïmadï Andïrïxi dai Pirhi dai Tomás dai Bartolomé dai Mataibo ïmadï Jakobo Alfeo maradï ïmadï Ximuñi ix makïdï politiko aagaiña odami ïmadï Udaxi ix makïdï ïr maradï Jakobo. 14Bïïxkatai ïgai mos apia daanïiña Diuxi bïïx tasai. Suxi susukurhidï ïmadï ïmpaidiña ïgai dai Maria, Suxi dïïdï ïmadï dai jaa oki ïmadï ïpï dai gadaanïiña ïgai Diuxi. Dai mos ïmo tïgibudagai biakana ïgai.

15Daidi ïmo imidagai gïn ïmpaidakai ïmo ciento dan ïmo kobhai buaboitudadami bai go Piduru gasaagida kïkiba. Daidi go Piduru potïtïdai,

16—Gin aaduñi, ¿Mai ix gï agaitadai xi buaboi busiagi ix makïdï oja Dabidkaru ïïki aagaitai go Udaxi? Daiñi, Diuxi Ibhïadï tïgibudadïkïdï oja Dabid ïïki. Dai xibi ka buaboi busai gobai. Go Udaxi ïgai dai gatïïgi go Suxi xi gï bhïitu ïgai. 17Dai go Udaxi gïr aduñikatadai dai biakatadai sïïrhikami gïr ïmadï bïïxi— itïtïdai Piduru.

Potïtïdai ïgai go buaboitudadami ix makïdï gïn ïmpaidakatadai.

18Daidi go Udaxi gasabïrhi ïmo dïbïrai maitïkidïkïdï soimaaxi idunakai ïgai. Dai ami yaa ïgai dai tapai bokadï dai bubuakai ijidï. 19Dai kajiomakai go Jerusalenïrï oidakami ix dukatai pogïduitadai bai Ïrakïrï tïïtï go dïbïrai xako muu Udaxi. 20Daidi go Piduru apia aatagidimi go buaboitudadami daidi aagidi sai Diuxi ñokidïrï ïkiaxdïrï ojixikatadai gobai ix makïdï daibusaitadai go Udaxikïdï. Daidi Piduru itïtïdai aidï,

—¿Mai ix poduu ojixi Diuxi nïidadï ïïki? Ami ïmo Diuxi nïidadï ikaiti,

Sai ïïgi biïna baakidï. Bai mai tipukana xorai ami oidakagi.

Dai sai ïmai bhïimu sïïrhikamigadï, po tudu ikaiti go nïidagai— itïtïdai Piduru.

21-22Dai kia aatagaitadai ïgai go buaboitudadami ix makïdï gïn ïmpagi ami daidi itïtïdai ïpï,

—Ka mai tipu go Udaxi xibi kaxkïdï gï agadamu xi gaagagi aatïmï ïmai xorai gïr soiña aatagiadagi odami ix ka duakatu go Suxi— itïtïdai Piduru. —Gï agadamu xi ïr ïmadutaikagi go ix makïdï gïr ïmadï ajiopaitadai aidï abhiadïrï xi go Juankaru bakoi go Suxi dai asta xuduku Diuxi baidaja gïr Nukadakami tïbagiamu— itïtïdai.

23Daidi go buaboitudadami idui ixdukatai agaitadai go Piduru dai ïko bubaitu goka kïkïïrhi. Ïmoko Jose Barabas tïgidu dai Justo aagaiña odami. Dai go gïmai Maatia tïgidu. 24Bhodïrï go buaboitudadami gadaanïi Diuxi daidi itïtïdai,

—Aapi gïr Nukadakami, kïïga nïidi aapi bïïxi odami iibhïadï. Gïr tïïgidañi makïdï idi bïï gokatai kïkïïrhi ïko busaitu aapi 25baidi bhïna ïgai go sïïrhikami ix makïdï biakatadai go Udaxikaru dai ka dagito. Dagito ïgai sïïrhikamigadï dai ka jii xako gï agaitadai ka arhiï soimaaxi idunakai— ikaiti ïgai gadaanïitai.

26Daidi gatïtïbi ïgai ïmo bolado dukai dai nïida agai xorai bhïiyi agai go sïïrhikami dai Maatia ayi gobai. Dai aidï abhiadïrï bïïna bii ïgai go bhaibuxtama dan ïmoko ojotosadï Suxi.

Currently Selected:

Hechos 1: NTP

Highlight

Copy