Hechos 2

Diuxi Ibhïadï ayi buaboitudadami abhana

1Bhodïrï ka aïkai go gïï tasai xadutudikïdï Pentekostes tïgidukïdï bai gïn ïmpagi bïïxi go buaboitudadami ïmo kiiyïrï. 2Taidi todian dukai gïï kaidatu tïbagiañdïrï ïpïan kaiti xudu kabami ïbïradagi dai bïïxkatai kaï ix makïdï ami darakatadai. 3Daidi gï maaxitu ïmo ixtumaxi tai maaxkami dai gï takogi gobai dai aipako daama daraiba ix makïdï ami daraja. 4Tai ïmo tïgibudagai bipiatu go buaboitudadami ïmadï Diuxi Ibhïadï. Dai Diuxi Ibhïadï ñokiturhimi bai bïïxkatai ñiño ïïmo ñoki ix makïdï mai maatïkatadai ïgai.

5Aidïpïrï ami Jerusalenana dadatadai mui judidiu kïïga xadutuadami Diuxi. Bïïxi aipadïrï jaa oidigiañdïrï oidakami ïgai. 6Dai kaïkai ïgai ixtumaxi gamo kaititadai gïn ïmpagi muidutai ami xako darajatadai go buaboitudadami. Dai mui naana maaxi ñokadami ïgai ix makïdï ami gïn ïmpagi aidï. Dai bïïxkatai ïgai ka mai tïï ix tumaxi gïn tïtïïgitoagi kaïkatai xi ïïgi gïn ñokikïdï ñokaitadai go buaboitudadami. Bïïxkatai ïïgi gïn ñoki kaïkatadai tomaxi naana maaxi ñokadami ïgai. 7Daidi ikaitimi ïgai,

—Mai ajïi gïr tïgibudaga xi maatiagi ixdukatai ïpïbuimi gobai. ¿Maiti ix ïr Galileïrï oidakami gobai dai pomaaxi ñokai? 8¿Dukatai aatïmï kaï ïïgi gïr ñoki tudu? 9Bïïxi aipadïrï óídakami aatïmï di. Ïïmadutai aatïmï ïr Partiañdïrï oidakami, dai jaa Medañdïrï, dai jaa Elamañdïrï, dai Mesapotamiañdïrï, dai Judeañdïrï, dai Kapidosiañdïrï, dai Pontoañdïrï, dai Asiañdïrï, 10dai Frijiañdïrï, dai Panfiliañdïrï, dai Ejiptuañdïrï, dai no xibhïadïrï miadïrï Cireniañdïrï. Ïïmadutai aatïmï Romañdïrï dada ïpï ix makïdï gïr dïïdï ïr judidiu ïmadï modukai ix makïdï mos bhïiyi buaboidaradï judidiu ïpï. 11Ïïmadutai aatïmï ïr Kretañdïrï oidakami ïpï ïmadï Arabiañdïrï. Naana maaxi ñokadami aatïmï tudu dïï bïïxkïrï ïïgi gïr ñokikïdï kaï aatïmï ix aagai ïgai naana maaxi aaduindadï Diuxi ix makïdï ïïgi Diuxi ixtutuidikïi xi buadagi— ikaiti go judidiu ix makïdï ami dada.

12Dai mai tïtïgaitadai ïgai ixdukatai gïn tïtïgitoagi daidi ikaitiña,

—¿Dukatai gïr ïpïamaaxi ñokai gobai?— ikaitiña. —Mai ajïi gïr tïgibudaga xi maatiagi ixdukatai pomaaxi ñokai gobai— ikaitiña.

13Dai jaa mos parunai daidi ikaitiña,

—Arhiï nabaakoñi gobai ïrhi aanï kaxkïdï pomaaxi ñokai— ikaitiña.

Piduru maa ñoki go odami

14Bhodïrï kïïkiba go Piduru ïmadï go bhaibuxtama dan ïmoko ojotosadï Suxi daidi go Piduru gïgïrï ño daidi ikaiti,

—Kaïkabïrai gin aaduñi, aapimï Judidiu tudu, ïmadï bïïxkatai aapimï Jerusalenïrï oidakami. Kïïga abïr kaïka gin ñoki. 15Maiti abïr pobïnïrhiada xi ïr nabaakoidadï idi kïkïïrhi. Kia ïr ïïki kiamoko di. Dai tomarhi mai yïïyi ïgai.

16Cho daiñi, idi ix makïdï nïidi aapimï xibi bhaiyoma ïr ïgai ix makïdï aagai go Joelkaru ïïki. Go Joelkaru ïr ñokituldiadamigadїkatadai Diuxi tudu. Dai Diuxi ïkiaxdïrï aagidi ïgai ixtumaxi daibuña agai xibi. Daidi Diuxi potïtïdai go Joel sai,

17 Karhioga ugitïkai oidigi dibiamu gin Ibhïdaga dai ïmadï daakamu bïïxi odami oidigi daama óídakami.

Dai amaxi gïn maamara maaxi aagadamu gin ñoki.

Dai gin Ibhïdaga soikïdamu utu iimïdami kïkïïrhi xi ïgai tïïgimu mui naana maaxi tïïtïki dukai.

Dai podukai ïpï kïkïrhiodami ïpï biakamu naana maaxi tïïtïki.

18 Aidïpïrï maakimu aanï gin Ibhïdaga go ix makïdï gin ïïgiadagi kïkïïrhi saagida oki baidi ïmadï daakana ïgai.

Bai ïgai maaxi agadamu gin ñoki.

19 Dai tïkabi tïbagiana ïmadï tami dumarhi dïbïrapi iduñimu aanï naana maaxi ixtumaxi ix makïdï ïïgi bhaiga aanï xi duñagi. Dai odami tïïgimu gïïpi ïrai dai táí ïmadï kubhuxi.

20 Aidïpïrï gï tukamuga ka agai go tasai. Dai masadai ïrai maaxkamu bïgikatai.

Dai gokiïrï ayimu ixtuigako dibiagai go Nukadakami. Gobai gia ïr ïmo gïï tasïrï ka agai.

21 Aidïpïrï kïïgakïrï bubuakimu bïïxi go ix makïdï gin daanïdagi, ikaiti Diuxi gamaakaitai ïgai ñoki go Joelkaru ïïki.

22Bhodïrï Piduru oi aatagidï daidi ikaiti,

—Kaïkabïrai aapimï Israelïrï oidakami. Kïï maatï aapimï sai Diuxi maa gubukadagai Suxi go Nasaretañdïrï oidakami. Kaxkïdï kïïga maatiga maaxi xi ïgai ïr Diuxi otosadïkatadai. Go Suxi idui naana maaxi maaxidaragai aapimï gïn buitapi ix makïdï ïïgi Diuxi ixtutuidi xi buadagi di. Dai aapimï ïr nïijadami gobai. 23Dïï bïïxkïrï aapimï bhïiyi go Suxi dai kïkïïrhi mai xadutuadami Diuxi buitapi kïi aapimï dai gatïjai sai kuruxiana xixana. Podukai gatïjai aapimï muaragai go Suxi. Diuxi ka ïkiaxdïrï maatïkatadai xi pomaaxi pogïduña agaitadai. Ka pomaaxi gï tïgito ïgai ïïki abhiadïrï sai podukai ïpïduna aidï. 24Dai Diuxi ïpamu duakaturhi go Suxi mukukai ïgai. Go mukigami maiti ixtui xi sobhidagi ix duaka Suxi.

25Go Dabidkaru oja ïïki dai aagaiña go Suxi ïpï. Ïgai ikaiti sai,

Bïïxkïrï nïidiña aanï Gïr Nukadakami xi gin ïmadï daja gin sïïrhixapadïrï.

Gin nukadai ïgai xi tomarhi ïmadutai mai soimaaxi gin buidadagi.

26 Kaxkïdï arhiï bhai gin ïrhidi aanï dai aagai aanï ansai bhai gin ïrhidi.

Kaxkïdï tomaxi gï aagadagi ix taata aanï go mukigami aanï xioma nïnïraka ixtumaxi daibuñagi gokiïrï.

27 Aapi Diuxi mai biamu gin ibhïdaga jaa koidadï saagida. Dai maiti dagito agai ix xatuidagi gin tukuga. Aanï ïr gï otosa ix makïdï ïko bubaitu aapi kaxkïdï.

28 Gin tïïgi aapi boi xako aimïradagi aanï dai kïïgakïrï oidakagi. Dai mukukai aanï kïï bhai gin ïrhiadamu gï ïmadï dakatai, pobai tudu ikaiti go Dabid ïïki— itïi go Piduru.

29Bhodïrï apia ga maamakai go Piduru dai ikaiti,

—Gin aaduñi, gin oigïdabïrai dai kïï sïïrhi gïn atagidamu aanï. Daiñi, kïïga maatï aapimï ix ïïki muu go kïrhiodami Dabidkaru dai kia maaxi xako gï yaasatu. 30Ïki aidïxi mai kia mutadai go Dabidkaru ïgai maaxi aagaiña Diuxi ñokidï dai ïkiaxdïrï agaitadai ixtuma daibuña agaitadai xibi. Diuxi ïkiaxdïrï aagidi go Dabid sai dasa agaitadai ïmo pipiixaradï sai bhïna Dabid sïïrhikamigadï dai sai tïanïna ïmo Rey dukai. 31Kaxkïdï go Dabid kïï maatïkatadai ix tuma daibuña agaitadai ïgaikïdï ix makïdï ïr Diuxi Otosadï gïr Bhaitï Kïakami. Ïkiaxdïrï agaitadai ïgai sai duaka agaitadai dai ibhïadï mai bii agaitadai koidadï saagida dai tomarhi tukugadï mai xatuidi agai.

32Go Suxi tudu aba ïgai ix makïdï Diuxi duakaturhi. Aatïmï ïr nïijadami di. 33Diuxi baidaja go Suxi tïbagiamu sai sonoana daakana dai maa ïmo gïïdukami sïïrhikami. Dai Diuxi maa ïïgi ibhïadï go Suxi ix dukatai aagiditadai ïgai. Dai xibi Suxi gïr maa Diuxi Ibhïadï ïpï dai ix makïdï nïidi aapimï dai kaï xibi abïr ïgai duñidï. 34Daiñi, go Dabid mai tïsai podukai tïbagiamu. Ïgai bhaiyoma idui ïmo ojai ix makïdï ikaiti,

Diuxi atagidi gin Nukadakami daidi itïtïdai, —Dakañi gin sïïrhixapadïrï 35asta xïïxkadï bhai dui aanï sai ka maiti ixtutiadagi gï sasayu, ikaiti ojadï Dabid— itïtïdai go Piruru gamakaitai ñoki go odami.

36Dai apia gamamaakai ñoki go Piduru daidi ikaiti,

—Kaïkabïrai bïïxkatai aapimï judidiu. Gï aagai mïx kïï maatïkagi sai ï galbaaxi Suxi ix makïdï xixa aapimï kuruxiana ïr Diuxi Otosadï Gïr Bhaitï Kïakamiga. Ïgai tudu ïr gatïanïdamika agai oidigi daama— itïtïdai Piduru.

37Dai kabami soi gïn ïjïrhidi odami maatïkatai sai buaboi aagai go Piduru. Daidi go odami ïïgi gïn tïkakaitadai aipakoga daidi ikaitimi,

—Gïr aaduñi, ¿Dukatai duna aatïmï xibi?— ikaitimi.

38Dai go Piduru potïtïdai aidï,

—Gï agai sai ïma dukai gïn tïtïgitoda aapimï bïïxkatai dai gï agai xi gïn bapakonada sïïrhikamigadïkïdï Suxi Kristo sai oigïlda gïn nïijadana Diuxi— itïtïdai. —Aidï gia Diuxi otosamu Ibhïadï sai gïn ïmadï daakana— itïtïdai. 39—Idi ñoki ïr aapimï gïn bïïtarï ïmadï gïn maamara bïïtarï dai jaa bïïtarï ïpï ix makïdï mïkaxi daraja dai ïmadï bïïxkatai ix makïdï Diuxi Gïr Nukadakami baida ïrhiada— ikaiti Piduru.

40Bhai tïbïpi gamaa Piduru ñoki dai daañimi ïgai go odami daidi ikaitimi,

—Ïïgida abïr kaïka idi ñoki dai kïïgakïrï bubuaki dai mai taata gïgïbidaragai ïmadï idi óídakami soimaaxi buadami— ikaiti Piduru.

41Dai bïïxkatai go ix makïdï buaboida kaï Piduru ñokidï gïn bapakoi. Dai aidï tasïrï parï baika mirhi odami uraba go buaboitudadami.

Go buaboitudadami kïïga biakana urabaragai

42Dai bïïxkatai kïï kaïkana aatagidï go bhaibuxtama dan goka ojotosadï Suxi. Dai ïmo tïgibudagai biakana ïgai dai daanïiña ïgai Diuxi gïn ïmpaiditai. Daidi ïmapi gakuadana ïpï. 43Dai Diuxi soikïiña go ojotosadï Suxi bai ïgai ibuadana naana maaxi ix makïdï ïïgi Diuxi ixtutuidi xi buadagi. Dai odami bïïxkatai ka mos duduadimukan taadakana nïiditai. 44Bïïxkatai go ix makïdï buaboidaitadai kïïga gïn urabakatadai. Dai mai ïïgi bïïtarï biakana ïgai buxtuidadï, 45dai bhaiyoma gaagaraiña ïgai buxtuidadï daidi soikïiña go ix makïdï bamioma tïgitokana bai podukai bïïxkatai biakana ixtukïdï oidakagi. 46Dai bïïx tasai gïn ïmpaidiña ïgai go gïï kiupiïrï Jerusalenïrï. Ïmapi gakuadana ïgai kiikiïrï dai bïïxi gïn bhai ïrhiarakïdï gabhibhidiña ïgai bïïxi go aadudï dai 47aatagaiña xïïxi kïï tuiga Diuxi. Bïïxi odami kïïgakïrï nïidiña go buaboitudadami aidï. Dai Diuxi maa tïgibudagai odami sai bïïx tasai jaa odami buaboitudaimi dai bhodïrï urabaiña ïgai go gaa ix makïdï ïr buaboitudadami ïpï.

Currently Selected:

Hechos 2: NTP

Highlight

Copy