Juan 16

Suxi aagidi mamaatïrdamigadï sai ka imïda agai tïbagiamu

1Daidi Suxi oi aatagidï mamaatïrdamigadï ïmadï daidi itïtïdai,

—Gin aaduñi, gïn aagidi aanï xibi ïkiaxdïrï ix tuma daibuña agai sai gokiïrï mai gajiadïrï biana aapimï gïn buaboidaraga. 2Daiñi, gokiïrï go gaa judidiu ix makïdï mai buaboitudai gïn daidamu ix bapakïda aapimï kikiupaigadïrï. Dai asta gïn kodada agai pobïn ïrhiditai sai ibuayi Diuxi aaduindadï gïn kodatai. 3Mai maatï ïgai Diuxi gïr Oga dai tomarhi mai maatï xorai aanï ïpï kaxkïdï soi gïn buidada agai ïgai podukai. 4Xibi gïn aagidi aanï gobai bai xudu taatagi aapimï go soi ïrhiaragai gïn tïgitomu aapimï ix ka ïkiaxdïrï gïn aagidi aanï ix tumaxi daibuña agai. Maiti ipïrhidi aanï ix gajiadïrï biagi aapimï gïn buaboidaraga kaxkïdï gïn aagidi aanï— itïtïdai.

—Gin aaduñi, baasïkioma aidïxi utudama gin uraba aapimï maiti gïn aagidi aanï ix tumaxi daibuña agai kïïga maatïkatai sai gïn ïmadï daja iñagaitadai ïpï chïki tasai kia. 5Dïï xibi ka karhioga imïda iñagai amïka xako daja Diuxi gin Oga ix makïdï bhaigobai gin otoi dai gï agaitadai ix gin tïkakagi aapimï sa xako imia iñagai dïï tomarhi ïmadutai aapimï maiti gin tïkakai. 6Utudan máí aapimï ix ka karhioga imia iñagai gïn aagidakai aanï kaxkïdï soi gïn ïrhidi dai mai tïgito ix gin tïkakagi as xako imia iñagai. 7Dïï mai tipu soi ïrhiaragai dai bhaiyoma aanï aagai sai xioma ïr kïïga aapimï gïn bïïtarï ix imïdagi aanï. Gï agai tudu ix imïdagi aanï sai bhodïrï mïkadïrï otosda aanï Diuxi Ibhïadï ix makïdï Soikïdami tïgidu sai gïn ïmadï dakana. Gï agai tudu ix imïdagi aanï. Ïma dukai mai dibiamu Diuxi Ibhïadï gïn abhana— itïtïdai.

8—Dai dibiakai Diuxi Ibhïgadï ïgai maatïtuldamu go gaa óídakami baika ixtumaxi. Maatïtuldamu ïgai óídakami sai kïïga maatïkana xorai ïr soimaaxi buadami dai xorai kïï buañixi ibhïadï dai xorai biaka agai gïgïbidaragai. 9Gïn aagidamu aanï ix maaxi gobai. Daiñi, Diuxi Ibhïgadï maatïtulda agai óídakami saidi ïr soimaaxi buadami ïgai maiti gin buaboitudaitai. 10Dai maatïtuldamu ïpï ix kïïga buañixi gin ibhïdaga ix kaxkïdï bhaiga aanï ix imiagi amïka xako daja gin Oga. Dai ka imïkai aanï ka maiti gin tïïgimu aapimï ïpamu. 11Dai Diuxi Ibhïgadï maatïtulda agai óídakami ïpï sai Diuxi maakia agai gïgïbidaragai bïïxi soimaaxi buadami. Ka aagai Diuxi ix gïgïbitulda agai go Diabora ix makïdï gatïanïi tami oidigi daama tudu. Dai kaxkïdï gï maatï sai Diuxi gïgïbitulda agai bïïxi soimaaxi buadami ïpï oiditai ïgai go Diabora— itïtïdai.

12Daidi Suxi oi aatagidï daidi itïtïdai,

—Naana maaxi bamioma gïn aagida in ïrhidi dïï xibi mai bhaiga aapimï ix maatï kajiagi kia. 13Dïï gia dibiakai Diuxi Ibhïgadï aidï gia gïn soikïdamu ïgai ix maatïkagi bïïxi ix tumaxi ïr buaboi. Ïgai tudu ïr mamaatïtuldiadami ix tumaxi ïr buaboi. Dai mai xu ïïgi tïgibudadïkïdï ñokai ïgai tudu. Bhaiyoma mosïkaxi ixtumaxi kaïkagi ïgai gin Ogañdïrï gobai gïn aagidamu ïgai. Dai gïn aagidamu ïgai ix tumaxi daibuña agai gokiïrioma. 14Gïn tïtïgida agai ïgai xïïxi ïr gïdukami aanï gïn mamaatïturhitai bïïxi ix tumaxi aagidagi aanï. 15Daiñi, bia aanï bïïxi aïkatai ix tumaxi biakagi gin Oga dai asta tïgibudadï bia aanï ïpï. Kaxkïdï po gïn tïtïdai aanï sai aanï ïgai dai aagidamu Diuxi Ibhïgadï ixtumaxi gïn maatïtuldana bai ïgai gïn aituldamu ï galbaaxi aatagi ix makïdï aagidamu aanï— itïtïdai.

Suxi ka ïkiaxdïrï aagidi mamaatïrdamigadï sai muki agai dai sai gokiïrï ïpamu duakaltuda agai

16Daidi Suxi itïtïdai go mamaatïrdami aidï,

—Xibi abhiadïrï ïpï chïki tasaikïdï imimu aanï tabhiadïrï ix ka maiti gin nïijadamu aapimï. Dïï gia otoma gin tïïgimu aapimï ïpamu gokiïrï— itïtïdai.

17-18Daidi potïkai Suxi go mamaatïrdamigadï aipako gïn tïkakaimitadai daidi ikaitimi,

—¿Ix tuma aagadankaiti gobai po gïr tïdakai?— ikaiti. —¿Ix tuixi pokaiti gobai saidi imi agai xako daja Ogadï? Aatïmï mai maatï kaï aatagidï— ikaiti.

19Daidi Suxi máí sai go gaa tïkaka ïrhiditadai ix tïiya ïrhidi aatagidï daidi itïtïdai,

—¿Gïn tïkakaimi mïxi aipakoga ix tuixi pobïntïtïdai aanï sai —Ïpï chïki tasaikïdï ka maiti gin nïijadamu aapimï. Dïï gokiïrï gia otoma gin tïïgimu aapimï ïpamu?— itïtïdai. 20Kïïga abïr gïn tïgito kaïka idi ñoki tudu. Daiñi, aapimï soi gïn ïrhiadamu dai suanïdamu imïkai aanï dïï go gaa ix makïdï adaimïi ïïgi tïgibudadï gia bhai gïn ïjïldamu. Mosïkaxi tukamïrï gia kabami soi gïn ïrhiadamu aapimï dïï gokiïrï gia gïn ayimu bhai ïrhiaragai. 21Bhaiton ïpïan taadakamu aapimï ïmo oki xudu buapa agadagi ïmo aarhi odami. Ïmo oki xudu buapa agadagi ïmo arhi xïïñi soi taadakana tukamïrï. Dïï gokiïrï ka maigobai imïiña soi ïrhiaradï dai kïïga bhai ïrhidiña ka buapakai go arhi odami. 22Pomaaxi aapimïkïdï ïpï. Xibi soi gïn ïrhidi aapimï maatïkatai ix imi agai aanï, dïï gia gokiïrï gïn tïïgimu aanï ïpamu dai aidï gia bhai gïn ïrhiadamu aapimï. Dai mai tipukamu xorai gïn bopoidagi gïn bhai ïrhiaraga aidï. 23Gïn tïïgimu aanï ïpamu tudu dai aidï gia ka maiti gin tïkakamu aapimï tomarhi ïmo ixtumaxi bamioma— itïtïdai.

—Gin aaduñi, kïïga abïr gïn tïgito kaïka idi ñoki. Daiñi, gïn maakai aanï sïïrhikami ix aatagada aapimï gin Oga ïmadï gin mamaatïrdamikatai aapimï. Kaxkïdï ix tanïdagi aapimï ix tumaxi gïn maakimu ïgai mïx tumaxi tanïdagi. 24Dai xibi ukami mai kia gatáí aapimï tomarhi ïmo ixtumaxi aagaitai ix ïr gin mamaatïrdamiga aapimï. Tanïdabïrai tudu bai kïïga bhai gïn ïrhidiña biakatai ix tumaxi gataanïdagi aapimï— itïtïdai.

25Dai Suxi oi aatagidï daidi itïtïdai go mamaatïrdamigadï,

—Gin aaduñi, baasïki abhiadïrï gïn aatagidiña aanï maaxidaragaikïdï dïï ka karhioga ayi ix kïï sïïrhi gïn aatagiadagi aanï aagaitai gin Oga sai kïïga maatïkana aapimï ïgai. 26Aidï gia ka maiti gï aagadamu ix ñokiada aanï gïn bïïtarï xïxkadï aitulda ïrhiada aapimï ïmo ñoki gin Oga. Kaxkïdï tudu ïïgi biakamu aapimï oigaragai ix aatagada ïgai ïmadï gin mamaatïrdamikatai aapimï— itïtïdai.

27—Daiñi, aapimï kïïga gin oigïdai dai kïïga buaboitudai sai aanï Diuxi gin Ogañdïrï dibia, kaxkïdï gïn oigïdai gin Oga. 28Buaboi tudu sai Diuxi gin Ogañdïrï dibia aanï tami oidigi daama. Dai xibi otoma imimu aanï tabhiadïrï dai noragimu amïka xako daja ïgai— itïtïdai.

29Daidi go mamaatïrdamigadï itïtïdai aidï,

—Xibi gia kïï sïïrhi ñokai aapi dai ka mai xu maaxidaragaikïdï dukai ñokai— itïtïdai. 30—Xibi ka máí aatïmï sai aapi bïïxi aïkatai maatï. Aapi kïï maatï ix tuma tïtïitoiña odami dai kïï maatï ix tumaxi gatïkaka agadagi mai kia gatïkakai ïgai. Kaxkïdï gï buaboitudai aatïmï ix Diuxiañdïrï dibia aapi— itïtïdai.

31Daidi Suxi itïtïdai,

—¿Buaboi ix tudu ix buaboitudai aapimï xibi? 32Daiñi, ka karhioga ayi ix aipako bopia aapimï gin dagitokai. Dïgabuna bopoimu aapimï ïïgi gïn kiikiamu dai ïïgi gin biamu aapimï. Dïï tomax dukai mai ïïgi bimu aanï. Gin ïmadï daja gin Oga di— itïtïdai. 33—Gïn aagidi aanï idi aatagi sai kïïga bhai gïn ïrhidiña aapimï gin bïïna darakatai aapimï. Daiñi, tami idi oidigi daama taatamu aapimï naana maaxi soi ïrhiaragai soi gïn buididitai jaa. Dïï maiti abïr gïn dagitoka ix gïn maitagi go soi ïrhiaragai. Kaxkïdï tudu kaxi gamaitï aanï buidïrï bïïxi ix tumaxi oidaga tami oidigi daama— itïtïdai.

Currently Selected:

Juan 16: NTP

Highlight

Copy