Juan 17

Suxi daanïi Diuxi mamaatïrdamigadï bïïtarï

1Dai taiyakoga nïnïaba Suxi tïbagiamakoga ka kugaidakai aatagidï daidi itïtïdai ïgai Diuxi,

—Gin Oga, ka ayi ix tuigako soimaaxi taatagi aanï dai mukiagi— itïtïdai. —Gï maara aanï dai xibi ipïrhidi aanï ix gamaaxitudagi aapi odami buitapi xïïxi ïr gïdukami aanï mukukai aanï, nai aanï maaxituldagi xïïxi ïr gïdukami aapi ïpï. 2Aapi gin Oga gin maa sïïrhikami an sai tïanïna bïïxi oidigi daama óídakami. Dai gin maa aapi sïïrhikami ïpï sai gin gubukarhigakïdï kïïgakïrï óídakana bïïxkïrï bïïtarï bïïxi go óídakami ix makïdï gin maa aapi. 3Dai gï agai ix odami kïï gï maatïkagi. Kaxkïdï tudu mosïkaxi aapi ïgai dai buaboikïdï ïr Diuxi. Dai gï agai ix maatïkagi ïpï ix aanï ïr go Ga Tïanïdami ix makïdï aapi otoi tami oidigi daama. Ïma dukai xadïrï kïïgakïrï óídakana odami bïïxkïrï bïïtarï ix maiti gïr maatïkagi ïgai— itïtïdai.

4—Gin Oga, ka naato idui aanï bïïxi go aaduindagai ix makïdï gin tïjai aapi dai ibuadatai go aaduindagai gamamaaxidi aanï go óídakami buitapi xïïxi ïr gïdukami aapi. 5Xibi gin Oga, gin maaka ï galbaaxi sïïrhikami namïakami ix makïdï biakatadai aanï ïïki aidïxi gï ïmadï dakatadai aanï mai kia kïkibakai oidigi— itïtïdai Suxi.

6Daidi Suxi apia daañimi Diuxi daidi itïtïdai,

—Gin Oga, aapi ïkobai gin bubaiturhi gin mamaatïrdamiga go gaa óídakami saagidañdïrï. Kaxi ïr aapi gï tutuidagakatadai ïgai dai xibi gin maa aapi. Dai aanï gatïtïïgidi buitapi ïgai ix xïï kïï tuiga aapi bai podukai ïgai gï maatïkana. Dai kïïga ïïgidi ïgai gï ñoki. 7Xibi ka kïïga maatï gin mamaatïrdamiga sai aapi ïgai dai gin maa bïïxi aïkatai ix tumaxi bia aanï, asta gin aatagi bïïxi. 8Ga mamaatïturhiña aanï gin mamaatïrdamiga go baaxi maatïtuldaragai ix makïdï aapi gin aagidi tudu daidi kïïga ïïgida kaï ïgai. Ka máí ïgai ix aapi ïgai ix makïdï gin otoi mïkadïrï xako daja aapi. Ka kïïga buaboitudai ïgai gobai tudu— itïtïdai.

9—Gin Oga, gï daanïi aanï xibi, dïï mai xu go gaa óídakami bïïtarï ix makïdï mai buaboitudai. Gï daanïi aanï xibi mosïkaxi idi gin mamaatïrdamiga bïïtarï ix makïdï aapi gin maa. Gï daanïi aanï gobai bïïtarï aapi gï tuigakatai gobai. 10Gin Oga, aatïmï mai ïjïkobai bia gïr mamaatïrdamiga, aanï ïmadï aapi tudu, dai kaxkïdï bïïxi odami ix makïdï ïr aapi gï mamaatïrdamiga ïr aanï gin mamaatïrdamiga ïpï. Dai bïïxi ix makïdï ïr aanï gin mamaatïrdamiga ïr aapi gï mamaatïrdamiga ïpï. Dai go mamaatïrdami ix makïdï gin maa aapi, gobai gamaaxitudai xïïxi ïr gïdukami aanï— itïtïdai.

11—Gin oga, xibi otoma ka mai oidaka iñagai tanai oidigi daama. Kaxi ïr imïdami aanï amïka xako daja aapi kaxkïdï. Dïï gia gin mamaatïrdamiga ix makïdï aapi gin maa tanaxi bimu go gaa óídakami saagida ix makïdï ïr gï buidïrï bïïtïkami. Aapi gin Oga bïïxi adaama ïr xadutudikïdï kaxkïdï gï daanïi aanï pïsai nukadakana gin mamaatïrdamiga gï gubukarhigakïdï, go baaxi gubukarhigaikïdï tudu ix makïdï gin maa aapi. Soiñañi gin mamaatïrdamiga dai maaka ïmo kïïgadukami urabaragai saidi mos ïmo odami dukaikagi ïgai ïpïan dukai ix aanï ïmadï aapi mos ïr ïmo odami— itïtïdai.

12—Xibi ukami ïmadï dakana aanï gin mamaatïrdamiga ix makïdï gin maa aapi dai gï gubukarhigakïdï kïïga nukadakana aanï sai tomarhi ïmadutai ïgai mai kuga jii. Mos arhi ïmoko ix makïdï ka ojixitadai ïïki sai biakatadai ix mukiagi dai podukai taatagi gïgïbidaradï, ïgai gia kuga jii dïï go gaa gia cho— itïtïdai.

13—Aapi gin Oga— itïtïdai. —Aanï ka imïda iñagai mïïka xako daja aapi. Dai ka aagidi aanï gin mamaatïrdamiga idi aatagi sai ïgai kïïga biakana ï galbaaxi bhai ïrhiaragai ix makïdï bia aanï. 14Xibi kaxi gatïïgi aanï gï ñoki gin mamaatïrdamiga ix kaxkïdï go gaa kïïdai. Ka maiti ïr aaduñdï gobai go gaa xibi ix makïdï adaimïi ïïgi tïgibudadï kaxkïdï kïïdai go gaa. Xibi gin ïpïamaaxi gobai, aanï ïpï maiti ïr aaduñdï go gaa ix makïdï adaimïi ïïgi tïgibudadï— itïtïdai.

15-16—Gin Oga, gï daanïi aanï gobai bïïtarï ix makïdï gin ïpïamaaxi. Ix makïdï maiti ïr aduñdï go gaa ix makïdï adaimïi ïïgi tïgibudadï tudu. Gï daanïi aanï pïsai nukadakana ïgai sai mai soi buadana go diabora saagida oidakatai ïgai go gaa odami tami idi oidigi daama—.

17—Gin Oga— itïtïdai. —Aapi gï ñoki sïïrhikïdï ïr buaboi. Kaxkïdï gï daanïi aanï pïsai gï ñokikïdï maatïtuldana gin mamaatïrdamiga bai mosïkaxi aapi gï bïïtarïkana ïgai. 18Dai ix dukai gin otoi aapi tami óídakami saagida, podukai ïpï otosa iñagai gin mamaatïrdamiga sai iimïna óídakami saagida ïpï. 19Gin Oga, kaxi gin tïïgi aanï ïïgi ix ïr mosïkaxi aapi gï bïïtarïkana aanï sai podukai gin mamaatïrdamiga buaboikïdï ïr mosïkaxi aapi gï bïïtarïkana ïpï— itïtïdai Suxi Diuxi.

20Dai Suxi apia daañimi Diuxi daidi itïtïdai,

—Gin Oga, gï daanïi aanï idi bïïtarï ix makïdï gin urabaka xibi gin dai go gaa bïïtarï ïpï ix makïdï gokiïrioma gin buaboitudada agai kaïkai aatagidï idi. 21Gï daanïi aanï saidi mos ïmo tïgibudagai biakana ïgai bïïxkatai gïr bïïna darakatai. Saidi ïr ïmo odami gïn dukamikana ïgai ïmapi ïpïandukai ix mos ïmo odami gïr dukami aapi ïmadï aanï. Podukai go gaa oidakami buaboituda antaada ix aapi gin otoi nïiditai ix ïr ïmo odami gï dukami gin mamaatïrdamiga— itïtïdai

22—Gin Oga— itïtïdai. —Ix dukai aapi ïmo namïakami gin dáí, podukai aanï namïakami darai gin mamaatïrdamiga ïpï sai kabami namïakana ïgai gin ïmadï. Podukai darai aanï ïgai saidi mos ïmo odami gïn dukamikana gïr ïmadï. 23Xibi gin mamaatïrdamigaïrï oidaga aanï dai aapi gin Oga aanïrï oidaga. Buaboikïdï ïr mos ïmo odami aatïmï tudu. Dai go gaa odami nïijadamu sai aatïmï ïr ïmo odami. Nïijadamu ïgai dai maatïkamu sai aapi gin Oga gin otoi dai kïïga oigïdai gin mamaatïrdamiga. Maatïkamu ïgai sai ix xïïxi gin oigïdai aapi pokaxi oigïdai aapi gin mamaatïrdamiga ïpï— itïtïdai Suxi.

24—Gin Oga— itïtïdai. —Ipïrhidi aanï ix gin mamaatïrdamiga ix makïdï gin maa aapi gin ïmadï darakana tïbagiana bai podukai nïidiña ïgai xïïxi ïr gïdukami aanï. Aapi gin Oga ïgai dai gin dáí saidi ïr ïmo gïdukamikana aanï gin oigïdaitadai aapi ïïki abhiadïrï aidïxi mai kia tipukatadai oidigi— itïtïdai.

25—Aapi gin Oga kïï sïïrhi aatabuayi dai go odami ix makïdï adaimïi ïïgi tïgibudadï mai maatï ix tuiga aapi dïï aanï gia kïïga gï maatï. Dai gin mamaatïrdamiga kïïga maatï sai aapi gin otoi. 26Ga mamaaxidiña aanï gin mamaatïrdamiga buitapi ix tuiga aapi dai apia pobuadamu aanï xibi bhaitiakoga kia. Ga mamaatïtuldamu aanï ïgai ix tuiga aapi. Dai bhodïrï ka maatïkatai ïgai ix tuiga aapi aidï gia kïïga oigïdada agai ïgai go gaa óídakami. Oigïdadamu ïgai ïpïan dukai ix gin oigïdai aapi aanï. Dai podukai gaoigïdaitai ïgai ka oidakamu aanï ïgiïrï— itïtïdai Suxi daanïitai Diuxi go mamaatïrdamigadï bïïtarï.

Currently Selected:

Juan 17: NTP

Highlight

Copy