Juan 15

Suxi pokaiti sai ïgai ïr ïmo uba uxiaradï gï dukami dai sai buaboitudadami ïr maamaradï gï dukami

1 Gokiïrï Suxi oi aatagidï daidi itïtïdai go mamaatïrdamigadï,

—Gin aaduñi, gïn aagidamu aanï ïmo maaxidaragai aatagi. Daiñi, aanï ïr ïpïan dukami ïmo uba uxiaradï bamioma kïïgadukïdï ix makïdï buaboikïdï gamaakai gubukarhigai go ux maamaradï. Mai tipu ïmai gin ïpïamaaxkami. Dai Diuxi gin Oga ïr nukadakami gï dukami ïxikami. 2Guikomai ïgai bïïxi go uba maamaradï ix makïdï mai ibhiatai dai kïïga buanai ïgai go maamara ix makïdï gia ibhiatai dai bhai buayi sai bamioma kïïga ibhiatana. 3Dai aapimï gin mamaatïrdamiga ïr ïpïan dukami uba maamaradï ix makïdï ka kïïga bhai duñixikami bii kaïkatai aapimï gin ñoki. 4Kaxi an gïn aagidi sai aanï ïr go uba uxiaradï gï dukami ix makïdï kïïga gamaakai gubukarhigai maamaradï. Dai aapimï ïr go uba maamaradï gï dukami kaxkïdï abïr kïïga saïkan dukai óídaka gin abhana nai aanï kïïga saïkami bimu aapimï gïn abhana ïpï— itïtïdai. —Daiñi, ïmo ux maamaradï mai ïïgi ibhiatai ix mai saïkagi uxiaradï. Pomaaxi aapimï ïpï. Mai bhaiga aapimï ix ibuadagi tomarhi ïmo ixtumaxi ix makïdï bhai ïrhidi Diuxi ix mai saïkagi aapimï gin abhana.

5Buaboi tudu sai aanï ïr go uba uxiaradï gï dukami dai aapimï ïr go maamaradï gï dukami. Bïïxkatai aapimï ix makïdï gin bïpïnaka dai kïïga saïkan dukai oidakagi gin abhana buimu gubukarhigai dai aapimïkïdï ïpïduñimu ixtumaxi bhai ïrhidi Diuxi. Aapimï ïr go uba maamaradï gï dukami tudu dai go bhai ïrhiaradï Diuxi ix makïdï bhai gï buadamu aapimïkïdï ïr gï ibhiadï dukai. Gobai itïiya ïrhidi sai aapimïkïdï iduñimu Diuxi naana maaxi ixtumaxi bhai ïrhidi ïgai. Dïï gia maiti ixtutuidikïi aapimï ix ibuadagi tomarhi ïmo ixtumaxi ix makïdï bhai ïrhidi Diuxi ix mai saïkan dukai óídakagi aapimï gin abhana— itïtïdai. 6—Xorai ïïkobai dakagi aanïañdïrï mos ïr ïmo ux maamaradï guikomidikami gï dukami. Gobai gï daitudaiña dai mos gakïrïi dai gokiïrï gï ïmpaidi gobai dai taiyïrï gï surhigai dai gï mïmïidi. 7Dïï gia ix kïïga saïkan dukai oidakagi aapimï gin abhana dai ix gin ñoki gïn abhana biyagi mos apia buaboidaitai aapimï, aidï gia tañimu aapimï Diuxi ixtumaxi ipïrhiadagi aapimï bai ïgai gïn maakimu. 8Dai odami potïimu saidi ïr gïdukami Diuxi nïiditai ixtumaxi iduñimu Diuxi aapimïkïdï. Gobai ix makïdï iduñimu Diuxi aapimïkïdï ïr gïn ibhiadï gï dukami ka agai. Dai gokïdï odami maatï nïijadamu sai aapimï buaboikïdï ïr aanï gin mamaatïrdamiga nïiditai ix tuma duñimu Diuxi aapimïkïdï— itïtïdai.

9—Gin aaduñi, gïn oigïdai aanï ïpïan dukai ix gin oigïdai gin Oga aanï. Kaxkïdï abïr gin ïïgiditai óídaka maatïkatai sai gïn oigïdai aanï. 10Ix gin ïïgiada aapimï aidï gia kïïga maatï taatamu aapimï xïï kïïga gïn oigïdai aanï aapimï. Aanï podukai oidaga ïpï Diuxi gin Oga ïmadï di. Aanï bïïxi aïkatïrï ïïgidiña gin Oga dai kïïga maatï taatakana ix ïgai gin oigïdai ïpï. 11Gobai tudu ïr gin bhai ïrhiaraga dai gïn aagidi aanï idi ñoki ipïrhiditai ix bïïxi gïn ibhïdagakïdï taatagi aapimï go baaxi gïdukami bhai ïrhiaragai ix makïdï bia aanï— itïtïdai Suxi.

Gï agai ix go mamaatïrdamigadï Suxi gïn oigïadagi aipakoga

12Dai Suxi oi aatagidï go mamaatïrdamigadï ïmadï daidi itïtïdai,

—Aanï gïn tïanïi sai gïn oigïada aapimï aipakoga ïpïandukai ix aanï gïn oigïdai— itïtïdai. 13—Gïn aagidamu aanï ïmo maaxidaragai ix kïïga maatïkagi aapimï xïï kïïga gïn oigïdai aanï. Daiñi, ix ïmo odami maatïkagi sai ïmo aduñdï ix makïdï kïïga ïïmadai ïgai gï muatuda agai dai potïdagi ïgai go ix makïdï gamua agai —Aanï abïr gin mua bhaiyoma ix gobai— tïi ïgai. Ix pobuadagi aidï gia gï maatï sai kïïga oigïdai ïgai aduñdï. Mai tipu ixdukatai kïïgioma oigïdada ïgai tudu. 14Dai aapimï ix apia ibuadagi aapimï ixtumaxi gïn tïañiagi aanï aidï gia maaxitudamu aapimï xi ïr gin aaduñi aapimï ix makïdï aanï kïïga ïmadai— itïtïdai.

15—Gin aaduñi— itïtïdai. —Ka mai pipioñi gïn aagai aanï. Daiñi, go ga amu bhaitoma mai aagidiña pipioñigadï ix tuma tïtïitoi ïgai dai ix tuma bïïtarï ka agai aaduindadï ix makïdï ibuayi ïgai. Dïï aapimï mai ïpïan dukamikana pipioñi. Kïïga gïn aagidiña aanï ix tuma tïtïitoi aanï dai ix tuma bïïtarï ka agai gin aaduindaga. Kïïga gïn aagidiña aanï di. Gïn aagidiña aanï go ñoki ix makïdï Diuxi gin maa gïn bïïtarï tudu. Dai kaxkïdï xibi gin aaduñi gïn aagai aanï kïïga gïn ïïmadatai— itïtïdai.

16—Gin aaduñi, mai xu ipïldakai aapimï ïr gin mamaatïrdamiga aapimï. Aanï ïgai dai ïkobai gïn bubaitu bhaiyoma dai gïn darai sai aapimïkïdï ibuadagi Diuxi naana maaxi ix tumaxi ix makïdï bhai ïrhidi ïgai dai ix makïdï bïïxkïrï bïïtarï kabaka agai. Kaxkïdï gïn maakimu Diuxi bïïxi ix tumaxi tanïdagi aapimï gin mamaatïrdamikatai aapimï. 17Gin mamaatïrdamiga aapimï tudu dai gïn tïanïi aanï sai gïn oigïdada aapimï aipakoga— itïtïdai.

Go óídakami ix makïdï go ïï odami tïgibudadï adaimïi kïïdada agai go buaboitudadami

18-19Dai oi Suxi go aatagi daidi itïtïdai mamaatïrdamigadï,

—Gin aaduñi, ipïrhidi aanï ix maatïka aapimï sai gïn kïïdada agai go gaa odami ix makïdï adaimïi ïïgi tïgibudadï. Daiñi, ix ïr aaduñdïkamudai aapimï ïgai ix makïdï adaimïi ïïgi tïgibudadï aidï gia gïn oigïadamudai ïgai. Dïï gia aapimï maiti ïr aaduñdï ïgai. Aanï ka ïkobai gïn bubaitu go gaa saagidañdïrï ix kaxkïdï gïn kïïdai ïgai. Dai xïxkadï gïn kïïdadagi ïgai abïr gïn tïtïgitoda sai aanï ïr gïn tïanïdamiga dai aanï kaxi gin kïïdaiña ïgai ïïki abhiadïrï. 20Dai gïn tïgitobïrai ïpï go ñoki ix makïdï gïn aagidi aanï ïkioma. Gïn aagidi aanï sai

—Ïmo gapioñi xadïrï bamioma namïakana ix bhai tïanïdamigadï— gïn tïtïdai aanï.

Daiñi, aanï ïr gïn tïanïdamiga tudu dai odami kabami soi gin buididiña ¿Kaxkïdï dukatai mai soi buididiña ïgai aapimï ïpï gin mamaatïrdamikatai aapimï? Go bamioma muidukïdï soi gïn buidadamu tudu dïï gia go odami ix makïdï ïïgidi gin ñoki kïïga ïïgiada agai aapimï gïn ñoki ïpï. 21Dai go gaa ix makïdï ïïgi tïgibudadï adaimïi gïn kïïdada agai gin urabakatai aapimï. Mai maatï ïgai Diuxi ix makïdï gin otoi bhaigobai kaxkïdï gïn kïïdada agai ïgai— itïtïdai.

22—Daiñi go gaa odami mai ïïgidi gin ñoki ix kaxkïdï mai bhaiga ïgai ix potïdagi Diuxi sai maiti ïr duñidï ix soimaaxi ibuayi. Ïïgi aanï aiturhi gin ñoki tudu dïï modukai maiti ipïrhi ïgai ix ïïgiadagi kaxkïdï mai bia ïgai ix dukatai ñokiadagi dai potïiyagi sai maiti ïr duñidï ix soimaaxi ibuayi. 23-24Dai ix mai nïijadamudai odami ibuadatai aanï naana maaxi aaduindagai ix makïdï ïïgi Diuxi ibuayi dai ix makïdï mai tipu ïmai xorai ibuadagi, aidï gia bhagakamudai ïgai ix potïiyagi sai maiti gï agaitadai ïïgiadagi gin ñoki. Dïï ka tïï ïgai go maaxidaragai ix makïdï ibuayi aanï dai kaïkana gin ñoki ïpï ïmadï ñokidï Diuxi gin oga. Kaxkïdï ïïgi ïr duñidï sai soimaaxi idui ïgai gin kïïdaitai dai kïïdaitai gin Oga ïpï. Gin kïïdai ïgai tudu dai xorai gin kïïdai kïïdadan buayi Diuxi gin oga ïpï. 25Dai gin kïïdai ïgai sai po duna ixdukatai ojixi Diuxi ñokidïrï. Ami ikaiti sai,

Mos ïgikïdï gin kïïdada agai óídakami, ikaiti go ojai.

Ïïgi ïr duñidï odami tudu ix maiti gin ïïgidi ïgai— itïtïdai Suxi.

Suxi aagidi mamaatïrdamigadï sai otosa agai Diuxi Ibhïadï sai soiñana

26Daiñi— itïtïdai Suxi. —Gokiïrioma dibiagai ïgai ix makïdï Ga Soikïdami tïgidu. Aanï otosamu ïgai mïkadïrï xako daja Diuxi gïr Oga. Ïgai ïr Diuxi Ibhïgadïkamu dai ïgai gamamaatïtulda agai ixtumaxi ïr buaboi. Ïgai maakimu ñoki go óídakami gin aagaitai aanï. 27Dai aapimï gin mamaatïrdamiga gï aagai ix gamamaakada ñoki gin aagaitai ïpï. Gin ïmadï ajiopaiña aapimï aidï abhiadïrï ix tukamïrï gin aaga aanï gin aaduindaga kaxkïdï gï aagai ix gamamaakada aapimï ñoki ïpï— itïtïdai Suxi go mamaatïrdamigadï.

Currently Selected:

Juan 15: NTP

Highlight

Copy