Juan 14

Suxi aagai ïmo abïnakidaragai mamaatïrdamigadï bïïtarï

1Dai Suxi itïtïdai go mamaatïrdamigadï,

—Gin aaduñi, maiti abïr buamï gïn ïrhiada tomarhi ïmo ixtumaxikïdï, ka kïïga buaboitudai aapimï Diuxi di. Dai aanï abïr kïïga gin buaboitudada ïpï. Aidï gia mai buamï gïn ïrhiadamu aapimï tomarhi ïmo ixtumaxikïdï. 2Daiñi, amïka gin Oga kiidïrï muidu tutukabi dai aanï mïïka bhai duñimu xakoga óídakagi aapimï. Maiti abïr buamï gïn ïrhiada tudu. Ix maiti ïr buaboikamudai gobai xadïrï gïn aagidamudai aanï. 3Daiñi kaxi an gïn aagidi sai bhai duñimu aanï xako óídakana aapimï amïka kaxkïdï gï maatï sai dibiamu aanï ïpamu gokiïrï dai gïn baidakamu ix amïka óídakana aapimï gin ïmadï. 4Dai aapimï kïïga maatï boi gamoko bïïxi— itïtïdai.

5Dai go Tomás itïtïdai,

—Gin Tïanïdamiga, ¡Tomarhi mai maatï aatïmï xako imi agai aapi! ¿Dukatai maatïkana aatïmï go boi?— itïtïdai.

6Daidi Suxi itïtïdai,

—Aanï tudu ïr go boi ixtukïdï ajïi odami xako daja Diuxi. Mosïkaxi aanïkïdï mamaatïrïi odami ixtumaxi ïr buaboi. Dai mosïkaxi aanïkïdï kïïgakïrï óídaga odami ïpï. Mai tipu xorai aiyagi mïïka xako daja Diuxi ix maiti gin buaboitudadagi ïgai. 7Gin aaduñi, aapimï kïïga gin maatï xorai aanï kaxkïdï kïïga maatïmu aapimï gin Oga ïpï. Dai xibi bhaitiakoga aapimï kïïga maatï gin Oga. ¡Ka nïidi aapimï di!— itïtïdai.

8Daidi Pirhi itïtïdai aidï,

—Gïr Nukadakami, mosïkaxi gobai gïr biïga, ix nïijada aatïmï gï Oga. Gïr tïïgidañi ix nïijada aatïmï kïïgakïrï— itïtïdai.

9Daidi Suxi potïtïdai,

—Aapi Pirhi, ¿Tui pïxi pokaiti sai gïn tïïgidana aanï gin Oga? ¿Mai ix ka tïbïpi gïn ïmadï dakana aanï? ¡Dai modukai mai kïïga gin máí aapi! Daiñi, xorai gin nïidi kaxi ïr nïijadami gin Oga ïpï mos gin nïiditai— itïtïdai. 10—¿Maiti pïx tudu buaboitudai aapi ix gïr bïnaka aanï ïmadï gin Oga? Aanï mai ïïgi gin tïgibudagakïdï ñokai tudu. Bhaiyoma Diuxi aanïkïdï ibuayi aaduindadï gin ïmadï dakatai ïgai— itïtïdai.

Dai bhodïrï Suxi maa ïmo ñoki go gaa mamaatïrdamigadï bïïtarï ïpï daidi potïtïdai,

11—Kïïga abïr gin buaboitudada aagaitai aanï sai aanï ïmadï gin Oga kïïga gïr bïpïnaka. Kïïga abïr buaboitudada gobai tudu. Dai ix mai kia buaboitudadagi aapimï kaïkatai gin ñoki abïr gia buaboitudada nïiditai ix tuma buayi aanï— itïtïdai.

12—Kïïga abïr gïn tïgito kaïka idi ñoki. Daiñi, aapimï ix makïdï gin buaboitudai ibuadamu ï galbaaxi aaduindagai ix makïdï aanï ibuayi dai asta ibuadamu gïgïrdukamioma aaduindagai ix aanï. Aanï imimu mïïka xako daja gin Oga dai aïkai aanï amïka aidï gia aapimï ix makïdï gin buaboitudai buimu gubukarhigai daidi ibuadamu gïgïrdukamioma aaduindagai ix bhai ix makïdï aanï ibuayi. 13Aidïpïrï iduñimu aanï bïïxi aïkatai ix tumaxi gin tañiagi aapimï gin mamaatïrdamikatai aapimï. Dai podukai nïijadamu odami xïïxi ïr gïdukami gin Oga ibuadatai aanï ix tumaxi gin tañiagi aapimï. 14Gin mamaatïrdamiga aapimï tudu ix kaxkïdï iduñimu aanï tomax tumaxi gin tañiagi aapimï— itïtïdai.

Suxi aagidi mamaatïrdamigadï sai otosa agai Diuxi Ibhïgadï

15Dai Suxi apia oi go aatagi go mamaatïrdamigadï ïmadï dai potïtïdai,

—Gin aaduñi, gin oigïdabïrai dai aidï gia gin ïïgiadamu aapimï bïïxi aïkatïrï kïïga gin oigïdaitai. 16Dai aanï daañimu gin Oga ix ïgai gïn otosdamu ïmai soikïdami ix makïdï gïn ïmadï dakamu bïïxkïrï bïïtarï— itïtïdai. 17—Ïgai ïr Diuxi Ibhïgadï dai ïr gamaatïturhiadami ixtumaxi ïr buaboi. Dïï gia go gaa óídakami ix makïdï adaimïi mosïkaxi odami tïgibudadï mai bhaiga ix ïïgiadagi Diuxi Ibhïgadï. Ïgai mai buaboitudai Diuxi Ibhïgadï mai maatïkatai xorai ïgai dai mai maatïkatai ïpï ix dukatai aatabuayi ïgai. Dïï aapimï gia kïïga maatï Diuxi Ibhïadï gïn ïmadï dajatai ïgai. Gïn ïmadï daja ïgai tudu dai gokiïrioma gïn ïrana oidaka agai ïgai ïpï— itïtïdai.

18-19—Gin aaduñi, ïpï chïki tasaikïdï mukimu aanï. Aidï gia go gaa óídakami ka maiti gin nïijadamu. Dïï aapimï gia gin nïijadamu ïpamu kaxkïdï tudu dibiamu aanï ïpamu gin duakatukai dai gïn urabamu. Gïn maakimu aanï ïïgi gin gubukarhiga gin duakatukai xi aidï gia buaboikïdï duduakakami bimu aapimï ïpï. Mukimu aanï tudu dai bhodïrï gin duakatudamu dai imimu tami oidigi daamaiñdïrï dïï mai ïïgi gïn biamu aanï. Gïn otosdamu aanï Diuxi Ibhïadï sai gïn ïmadï dakana. 20Gïn maakimu aanï gubukarhigai tudu sai kïïga duduakakagi aapimï dai aidï gia maatïkamu aapimï ix gïr bïïna daraka aanï ïmadï gin Oga dai maatïkamu aapimï ïpï sai aanï ïmadï aapimï kïïga bïïna daraka ïpï— itïtïdai.

21—Gin aaduñi, gï agai odami ix kïïga gin ïïgiadagi. Podukai maaxitudamu ïgai ix gin oigïdai dai aidï gia aanï ïmadï gïn gin Oga oigïdadamu ïgai ïpï dai aanï kïïga tïtïgidamu ix tuiga aanï ipïrhiditai ix kïïga gin maatïkagi ïgai— itïtïdai.

22Dai ami dajatadai ïmo kïïrhi Udaxi tïgidukami, dïï ïgai maiti ïr go Udaxi Iskariote tïgidukïdï. Ïgai ïr ïmai. Dai itïtïdai ïgai go Suxi,

—Gin Tïanïdamiga, ¿Tui pïxi mosïkaxi aatïmï gïr tïtïgida agai ix tuiga aapi dai bïïxi go gaa maigobai gia cho?— itïtïdai.

23-24Dai Suxi itïtïdai,

—Daiñi, gï agai ix gin oigïdadagi odami xi kaxkïdï gin ïïgiada ïpï. Ïma dukai mai tïtïgidiña aanï ix tuiga aanï. Kïïga gï maatï tudu sai gin ïïgiadamu go odami ix makïdï kïïgakïrï gin oigïdai tudu. Dai kaxkïdï oigïadamu gin Oga ïgai dai aanï ïmadï gin Oga ayimu ïgai ïmadï dai kïïga gïr urabakan dukai óídakamu ïgai ïmadï.

Daiñi, aagaiña aanï mosïkaxi ixtumaxi gin tïjai Diuxi. Mai ïïgi gin tïgibudagakïdï ñokai aanï tudu. Dïï tomax dukai go odami ix makïdï maiti gin oigïdai mai ïïgidiña gin ñoki. Kaxkïdï mai tïtïgida iñagai ix tuiga aanï ïpï— itïtïdai.

25—Daiñi, gïn aagidimi aanï gobai xibi kia gïn ïmadï dakatai aanï. 26Dïï gokiïrioma ka maiti gïn maakimu aanï ñoki podukai. Bhaiyoma Diuxi gin Oga otosamu Ibhïgadï sai gïn soiñana gin bïïtarï ka imïkai aanï. Dai ïgai gïn maatïtuldamu bïïxi aïkatai ix tumaxi gï aagai ix maatïkagi aapimï dai gïn tïgitotuldamu bïïxi ixtumaxi gïn aagidiña aanï— itïtïdai Suxi.

Suxi gïr maakai ïmo ibhïxtaragai

27Dai Suxi oi go aatagi daidi potïtïdai go mamaatïrdamigadï,

—Gin aaduñi, imimu aanï tabhiadïrï dïï gïn bidamu aanï ïmo ibhïxtaragai gïn ibhïdaga bïïtarï. Kaxkïdï maiti abïr buamï gïn ïrhiada imïkai aanï dai abïr mai duduadikuda ïpï. Go ibhïxtaragai ix makïdï gïn maakai aanï mai ïpïamaaxi ix makïdï gaagai odami oiditai ïïgi tïgibudadï. 28Kaxi gïn aagidi aanï sai imimu aanï tabhiadïrï dïï gia gokiïrioma dibiamu aanï ïpamu ix dukai gïn aagidi aanï— itïtïdai.

—Imimu aanï amïka xako daja gin Oga ix makïdï gïïpi bamioma ïr gïdukami ix aanï. Dai kaxkïdï ix kïïgakïrï gin oigïdai aapimï kïïga bhai gïn ïrhiadamu aapimï maatïkatai sai aanï ïmadï dakamu ïgai. 29Ka ïkiaxdïrï gïn aagidi aanï tudu sai imia iñagai dai ïmadï daka iñagai gin Oga sai podukai xïïxkadï imiagi aanï kïïga buaboitudana aapimï gïn tïgitokai ixtumaxi gïn aagidi aanï xibi.

30Ka mai xii tïbïpi aatagadamu aanï gïn ïmadï xibi tudu. Ka karhioga dibia go Diabora ix makïdï gatïanïi tami oidigi daama. Ïgai mai bia gubukarhigai ix gin tïanïdagi 31kaxkïdï tomaxi gin tïanïda ïrhiada ïgai iduñimu aanï bïïxi aïkatai ixtumaxi gin tïjai gin Oga sai podukai maatïkana bïïxi óídakami sai aanï kïïga oigïdai gin Oga— itïtïdai.

Daidi bhodïrï Suxi itïtïdai mamaatïrdamigadï,

—Timïda tudu tabhiadïrï— itïtïdai.

Currently Selected:

Juan 14: NTP

Highlight

Copy