Juan 13

Suxi bapakoi mamaatïrdamigadï ïïkasodï

1Dai bhodïrï ka karhioga ayitadai go Kïïgakïrï Bubaidaragai Bagimi dai kïïga maatïkatadai Suxi sai ka miadaimitadai ix imiagi ïgai tami oidigi damaiñdïrï dai aiyagi xako daja Ogadï. Dai kïïga oigïdaitadai ïgai mamaatïrdamigadï dai xibi iduña agai ïmo maaxidaragai ix maatïka gobai xïï kïïga oigïdai.

2Dai aidï urunoko gakuadatadai ïgai go Daibuñigïrï kuadagadï. Dai ami dajatadai go Udaxi Iskariote ix makïdï ïr maradïkatadai ïmo kïïrhi Ximuñi tïgidukami. Dai aidïxi ami dibia ïgai go diabora ka abïnakiditadai sai gatïïgidana ïgai go Suxi. 3Dïï Suxi idui ïmo maaxidaragai mai kia gï tïïgidakai ïgai. Kïïga maatïkatadai Suxi sai Diuxi gïr Oga ka maatadai gubukadagai sai tïanïna bïïxi aïkatai ix tumaxi oidaga. Dai kïïga maatïkatadai ïpï sai Diuxiañdïrï dibiatadai ïgai dai ix ka ïpamu imi agaitadai ïgai ïmadï. 4Dïï mai kia imïkai gatïïgida agai mamaatïrdamigadï xïï kïïga oigïdai dai kïkiba ami mesa buidïrï xako gakuadatadai ïgai dai bhodïrï upai baasaradï ix dukai ibuayi ïmo gapioñi xudu gaatabuada agadagi. Dai bhïiyi ïgai ïmo toaya dai puranadïrï buu ïmo giburai dukai. 5Dai ïmo bandejïrï tua sudagi dai gï aaga bapakoi ïïkasodï mamaatïrdamigadï dai go toayakïdï gakigi. Pomaaxi dui ïgai ïmo maaxidaragai dukai sai maatïkana mamaatïrdamigadï sai gï agai ix pipioñi dukai gaatabuadagi ïgai dai gïn soikïdagi aipakoga gïn oigïdaitai.

6Dïï gia aidïxi bakuanada agaitadai ïïkasodï Piduru baidi go Piduru itïtïdai,

—¿Gin Tïanïdamiga, aanï ïpï ix gin bakuanada agai gin ïïkaso?— itïtïdai.

7Dai Suxi itïtïdai,

—Xibi mai maatï aapi ix tuixi pomaaxi ibuayi aanï dïï gokiïrioma gia maatïmu aapi— itïtïdai Suxi.

8Daidi go Piduru itïtïdai,

—¡Cho gin Tïanïdamiga! ¡Aapi gïïpi bamioma ïr namïakami xi aanï di! Maiti gï agai pïxi aapi gin bakuanada gin ïïkaso— itïtïdai.

Daidi Suxi itïtïdai,

—Ix maiti gin dagito aapi ix bakuanagi aanï gï ïïkaso mai biakamu aapi urabaragai gin ïmadï— itïtïdai.

9Daidi go Piduru kïïga biaka ïrhiditadai urabaragai Suxi ïmadï daidi itïtïdai,

—Aidï gia gin bakuandañi kïïga dai mai xu mosïkaxi gin ïïkaso bakuanada. Bakuanañi gin noonobi ïmadï gin moo ïpï. Gia kïïga gï uraba iñïrhidi aanï. Kaxkïdï ix gï agadagi ix gin buakuanadagi aanï dai bhïiyagi go urabaragai gï ïmadï aidï gia kïïga gin bakuanada sai mai ïïko biiyagi aanï aapiañdïrï— itïtïdai.

10Dai Suxi itïtïdai,

—Daiñi, aapi Piduru ïmadï go gaa gin mamaatïrdamiga ka kïï buañixi gïn ibhïdaga. Ïpïan dukami aapimï ïmo odami ix makïdï ka kïïga gï baïtï dai ka maiti gï agai ïgai ix gï bakuanadagi tukugadï ka kïï buañixikatai. Mosïkaxi ïïkasodï gia tukuraga aimïraitai ïgai dai gobai gia gï agai ix bakuandagi kia. Aapimï kïï buañixi gïn ibhïdagakïdï tudu dïï gia bïïxkïrï oidaga ïmoko gïn saagida ix makïdï mai buañixi— itïtïdai.

11Kïïga maatïkatadai Suxi sai ami saagida oidakatadai ïmoko ix makïdï gatïïgida agaitadai. Dai kïïga maatï xorai ïgai ïpï ix kaxkïdï mai buañixikami aagai.

12Daidi ïpamu gï ayi Suxi gï basaraga dai ïpamu mesa buidïrï daiba. Daidi itïtïdai ïgai mamaatïrdamigadï,

—¿Maatï mïxi ix tuixi bakoi aanï gïn ïïkaso?— itïtïdai. 13—Gïn aagidamu aanï. Daiñi, aapimï gïn Mamaatïtuldiadamiga gin aagai dai gïn Tïanïdamiga dai kïï aagai aapimï. 14Buaboi tudu ix aanï ïr gïn Tïanïdamiga dai ïr gïn Mamaatïtuldiadamiga ïpï. Dïï bïïxkïrï ïmo gïn pioñi dukai gaatadui aanï xibiki dai bapakoi gïn ïïkaso. Kaxkïdï aapimï ïpï gï agai ix pipioñi dukai gaatabuadagi gïn soikïitai aipakoga— itïtïdai.

15—Gin aaduñi, gabapakoi aanï gïn ïïkaso ïmo maatïtuldaragai dukai saidi ibuada aapimï ix dukai aanï ibuayi ïpï. 16Daiñi, kïïga maatï aapimï sai ïmo gapioñi mai bamioma namïga ix bhai tïanïdamigadï dai ïmo otoxikami mai bamioma namïga ix bhai ix makïdï gaotoi ïpï. Aanï ïr gïn tïanïdamiga tudu dai gïn otosdamiga dai bïïxkïrï gïn pioñi dukai gaatadui aanï gïn soikïitai xibiki kaxkïdï gï aagai ix mai gïgïrdukïdï gïn ïrhiadagi ïïgi aapimï dai bhaiyoma ix gapipioñi dukai gïn ïrhiada dai kïïga gïn soikïda aipakoga. 17Kïïga maatï aapimï ix ïr buaboi go ñoki ix makïdï gïn aagidi aanï aagaitai sai gï agai ix pipioñi dukai gaatabuadagi aapimï gïn soikïitai aipakoga. Kïïga abïr ïïgiada go ñoki tudu sai kïïga bhai gïn ïrhiditai óídakana aapimï— itïtïdai.

Suxi ïkiaxdïrï aagidi mamaatïrdamigadï sai Udaxi ïgai ix makïdï gatïïgida agaitadai

18Dai bhodïrï Suxi oi gï aatagi daidi ikaiti,

—Gin aaduñi, aanï kïï maatï ix tutuiga aapimï ix makïdï ïko bubaitu aanï dai maatï aanï sai go bamioma muidukïdï aapimï kïïga buimu ïmo bhai ïrhiaragai dïï gia oidaga ïmoko gïn saagida ix makïdï mai bhïiyi agai go bhai ïrhiaragai. Daiñi, Diuxi ojadïrï ikaiti sai,

—Gin bui gïi ïmoko gin aaduñi ix makïdï gin ïmadï gakuadatadai— ikaiti go ojai.

Dai buaboi busaimu gobai— itïtïdai. 19—Xibi mai kia pobïdunakai gobai gïn aagidi aanï sai ïmoko gin bui gïxi agai bai xuduku poduñagi gobai sai aapimï gin buaboitudaiña ix aanï ïr go Ga Tïanïdami— itïtïdai Suxi.

20—Kïïga abïr gïn tïgito kaïka idi ñoki— itïtïdai. —Daiñi, aapimï ïr aanï gin otosa ix kaxkïdï xorai bhai ïrhiarakïdï gïn miadïgiadagi aanï gin miadïgiadan buayi ïpï. Dai podukai ïpï aanï ïr Diuxi otosadï ix kaxkïdï xorai gin miadïgiadagi ïr ïpïan dukami ix miadïgi ïgai Diuxi. Kaxkïdï tudu Diuxi ïgai dai gin otoi— itïtïdai.

21Mos potïi Suxi dai bhodïrï kabami soi gï ïrhi dai aagidi go mamaatïrdamigadï daidi potïtïdai,

—Kïïga abïr gïn tïgito kaïka idi ñoki. Daiñi, ïmoko aapimï gin tïïgida agai saidi gin bhïna go gin buidïrï bïïtïkamiga— itïtïdai Suxi.

22Daidi go mamaatïrdamigadï mai tïtïgaitadai ixtumaxi gïn tïïtïitoagi dai aipako gïn nïnïidi mai maatïkatai xorai aagai go Suxi sai gatïïgida agai. 23Dai go ix makïdï kïïga oigïdai Suxi ami sonoana dakatadai mesa buidïrï. 24Baidi Ximuñi Piduru xixigidi daidi itïtïdai,

—Tïkakañi go Suxi sa xorai gatïïgida agai— itïtïdai ïgai.

25Baidi go ix makïdï kïïga oigïdai Suxi miadïrï tïkakai go Suxi daidi itïtïdai,

—¿Borai ïgai daidi gatïïgida agai?— itïtïdai.

26Daidi Suxi itïtïdai,

—Badaida iñagai lïïchi pan go asokorhiïrï dai xorai maaki aanï ïgiaba ix makïdï gin tïïgida agai— itïtïdai.

Daidi Suxi badaitu lïïchi pan dai maa go Udaxi ix makïdï ïr maradï Ximuñi Iskariote. 27Daidi mos bhïkai Udaxi go pan sai go Diabora baa tïgibudadïrï dai gatïanïitadai. Dai Suxi itïtïdai aidï,

—Otoma iduñi tuduidï pïx tumaxi iduña agadagi— itïtïdai.

28Dïï tomarhi ïmadutai go mesa buidïrï darakïdï mai máí ix tuixi potïtïdaitadai Suxi. 29Ïïmoko pobïnïrhiditadai sai aagiditadai Suxi go Udaxi ix sabïdana ixtumaxi go bagimi bïïtarï ix ïpï sai maakana soiñi go soititigami. Go Udaxi nukadatadai go mamaatïrdami tuminxigadï kaxkïdï pobïn ïrhidi ïgai dïï maiti ïr buaboi. 30Dai ka bhïkai Udaxi go pan sai otoma jii abhiadïrï. Dai aidï ka tukamukatadai oidigi.

Suxi aagidi mamaatïrdamigadï sai gïn oigïdaiña

31Dai ka imïkai go Udaxi sai Suxi potïtïdai go gaa mamaatïrdamigadï,

—Gin aaduñi, ipïrhidi aanï ix odami maatïkagi xïïxi ïr gïdukami Diuxi. Dai ïgai ipïrhidi ix gï maatïkagi xïïxi ïr gïdukami aanï ïpï. Daiñi, aanï ïr ix makïdï kïïgakïrï odami busai. Dai xibi ka ayi ix daibuñagi ïmo ixtumaxi aanïkïdï ix ïgaikïdï maatïkamu odami xïïxi ïr gïdukami aanï. Dai odami sïïrhikïdï gïdukami dukai nïijadamu Diuxi ïpï nïiditai gobai ix makïdï daibuña agai aanïkïdï. 32Xibi otoma tudu gatïtïïgiada agai Diuxi ix ïr gïdukami aanï ibuadatai aanï ïmo gïdukami aaduindagai. Dai gokïdï nïijadamu odami xïïxi ïr gïdukami Diuxi ïpï— itïtïdai.

33—Aapimï ïr miadïrï gin aaduñi dai kïïga gïn oigïdai aanï— itïtïdai. —Xibi ka mai xii tïbïpi dakamu aanï gïn ïmadï kia. Dai gokiïrï ka imïkai aanï aapimï gin gaagadamu dai maiti gin tïigimu— itïtïdai. —Potïtïdai aanï go judidiu ïpï ïkioma. Dai xibi gia ka aijimi ix imïdagi aanï dai aapimï maiti ixtutiadamu ix gin oidagi. 34Kaxkïdï xibi mai kia imïkai gïn bitulda iñagai ïmo utudui sïïrhikami ix makïdï gï agai ix ïïgiada aapimï. Daiñi, gïn tïanïi aanï mïsai gïn oigïdaiña aipakoga ïpïan dukai ix gïn oigïdaiña aanï. 35Podukai odami gïn tïgito nïijadamu ix gïn oigïdai aapimï ïpïan dukai ix aanï gïn oigïdaiña dai maatïkamu ïgai sai kïïgakïrï ïr gin mamaatïrdamiga aapimï— itïtïdai.

Suxi ïkiaxdïrï aagai sai go Piduru mai maaxi aagamu ix maatï

36Daidi go Ximuñi Piduru itïtïdai aidï,

—Gin Tïanïdamiga, ¿Pako imi agai?— itïtïdai.

Dai Suxi potïtïdai aidï,

—Mai bhaigakamu aapi ix gin oidagi xibi. Dïï gokiïrioma gia gin oidamu aapi— itïtïdai.

37Daidi Piduru itïtïdai,

—Gin Tïanïdamiga, ¿Tuixidï mai bhaiga aanï ix gï oidagi xibi? Ka kïïga gin bhai gin duu aanï tomaxi gin muatu aanï gï oiditai— itïtïdai.

38Dai Suxi itïtïdai aidï,

—Kïïga maatï aanï sai mai bhai gï duu aapi ix gï muatudagi gin bïïtarï— itïtïdai. —Daiñi, bhaiyoma, aanï aagai sai mai kia kukujukai baikojo go takuku potïi agai aapi pïsai maiti gin maatï— itïtïdai.

Currently Selected:

Juan 13: NTP

Highlight

Copy