Exodo 3

1Aidïpïrï go Moises nukadakana Reuél sosoigadï kañiru. Go Reuél gokadu tïtiaradï. Reuél tïgidu ïgai dai Jetero tïgidu ïpï. Ïgai gamamaakaiña ñoki Madianïrï óídakami xi kïï buaboitudagi ïgai. Ïmo imidagai Moises saadatai imïi kañiñiru oidigamu daidi ayi uruñi utapako ïmo tubidaki Horeb tïgidukïdï xako didibai Diuxi. 2Ami tubidakïrï tïï Moises ïmo táí arhi uxi maamarañdïrï daja. Táí ïrana dakatadai Gïr Nukadakami tïañikarudï dïï mos go Moises mai máí. Dai pobïrhi ïgai,

—Tuixi bhobai daja go táí dai go uxi mai mïïjï— gï ïrhidi ïgai. 3—Mïï nïidamu aanï ix tuma bia go uxi dai mai mïïjï— gï ïrhidi ïgai dai ka gamo dui.

4Daidi Gïr Nukadakami nïidi xi miadïrïioma aijimi daidi tïtïdai,

—Moises— itïtïdai Diuxi.

—Tami an daja— ikaiti Moises.

5—Xadutudikami idi dïbïrai xako kïïka aapi. Maiti miadïrï kïïkada dai maigobai daasa gï sususaka— itïtïdai Diuxi. 6—Aanï ïr Diuxi ix makïdï gin buaboitudaiña gï piipixara ïki. Ix makïdï buaboitudaiña Abraam ïmadï Isaak dai Jakobo ïïki tudu— itïtïdai Diuxi.

Daidi go Moises ïbhïimi xi nïijadagi Diuxi daidi gï iña buibasodï. 7Daidi Gïr Nukadakami apia ñokidimi daidi itïtïdai,

—Kïï maatï nïidi aanï xïïxi soi dukai óídaga gin aaduñi Ejiptuïrï. Kaïkana aanï xïïxi aijiïgïiña ïgai xudu soi buadagi tïtïanïdamigadï. Daidi kïï maatï aanï xïïxi bia ïgai soi ïrhiaragai abhana— ikaiti. 8—Kaxkïdï tïbai aanï tïbagiañdïrï daidi kïïgakïrï bubaida iñagai xi ka mai soi buadagi go Ejiptuïrï óídakami. Ayimu ixtuigako baidamu aanï gin aaduñi abhiadïrï Ejiptuañdïrï. Daidi baidakamu aanï xako gïïgïr kaatï dïdïbïrai dai kïkïïgadukami. Xako óídaga go Kananeos agaikïdï óídakami ïmadï go Hititas dai Amoreos dai Fereseos dai Hebeos dai Jebuseos— itïtïdai Diuxi Moises. 9—Kaïkana aanï xïïxi aijiïgïiña go Israelitas. Dai bïïxi maatï nïidi aanï xïïxi soi buayi go Ejipituana óídakami. 10Xibi aanï gï otosa iñagai xi mïï aatagada aapi buidïrï go Rey amïï Ejipituana xi dagitona ïgai go Israelitas bai bubuakïna ïgai abhiadïrï daidi bhodïrï bubaidamu aapi go Israelitas— itïtïdai Diuxi.

11Daidi Moises itïtïdai aidï,

—Tuma sïïrhikami biakami aanï xi mïï buidïrï kïïkadagi dai atagiada go gïï Rey Ejiptuïrï daidi bubiadagi gin aaduñi abhiadïrï— itïtïdai Moises.

12Daidi Diuxi itïtïdai,

—Gï ïmadï daakamu aanï. Daiñi, ayimu ixtuigako gin xadutuadamu aapi tami idi tubidakïrï ïmadï gï aaduñi ka bubuakïkai aapimï Ejiptuañdïrï. Aidï gia maatïkamu aapi xi aanï ïgai daidi gï otoi— itïtïdai.

13Dïï mos go Moises itïtïdai go Nukadakami,

—Xadïrï gin buaboidana gin aaduñi xi aapi gin otoi ix makïdï ïkioma gïr piipixaraga buaboitudaiña. Xorai ïgai daidi gin otoi gin tïkakamu ïrhi aanï ïgai. Aidï gia dukatai tïda iñagai aidï aanï xi tïgidu aapi— ikaiti Moises.

14—Gï aagidamu aanï ix tïgidu aanï— itïtïdai Diuxi. —Aanï Aanï tïgidukami aanï. Tïdamu aapi go Israelitas sai Aanï Aanï tïgidu ix makïdï gï otoi— itïtïdai Diuxi go Moises.

15Bhodïrï itïtïdai Diuxi Moises,

—Aagidamu aapi go Israelitas sai aanï ïgai dai gï otoi ix makïdï buaboitudaiña gïn aaduñi ïïki. Ix makïdï buaboitudaiña go Abraam dai Isaak dai Jakobo tudu. Podukai tïdamu aapi go Israelitas. Aanï Aanï tïgidu aanï tomax tuigako dai podukai in aagamu bïïxi óídakami xïïki óídaka agai oidigi dama— itïtïdai Diuxi.

16Daidi Diuxi Gïr Nukadakami kia aatagaimi ïmadï Moises daidi itïtïdai,

—Ïmpaidamu aapi go Israelitas bhaitï gukakamigadï aïkai aapi Ejipituana daidi aagidamu aapi xi gï buidïrï maaxitu aanï ix makïdï gïn piipixara buaboitudaiña ïïki. Ix makïdï Abraam dai Isaak dai Jakobo buaboitudaiña tudu. Aagidamu aapi xi gï buidïrï gin maaxitu aanï dai xi aanï gï aagidi xi nïidi aanï xïï soi dukai gïn aaduintuldimi go Ejiptuïrï óídakami— tïdamu aapi go Israelitas bhaitï gukamigadï. 17—Daidi aagidamu aapi go Israelitas sai aanï gï aagidi sai kïïgakïrï gïn bubaida iñagai abhiadïrï Ejiptuañdïrï sai podukai go Ejiptuïrï óídakami ka mai soi buadana. Daidi aagidañi sai gïn baidaja iñagai gamo xako óídaga go Kananeos dai go Hititas dai Amoreos dai Fereseos dai Hebeos dai Jebuseos. Gamo gïn baidaja iñagai xako gïïpiga dïbïrai dai kïïgadu bïïxi. Potïdamu aapi go Israelitas— itïtïdai Diuxi Moises. 18—Go bhaitï gukakamigadï Israelitas gï ïïgida kaimu. Dai bhodïrï oidamu aapi go bhaitï gukakami daidi mïï Ejiptuïrï Rey buidïrï kïkibamu aapi dai atagidamu.

Daidi tïdamu aapi go Rey sai,

—Diuxi Gïr Nukadakami ix makïdï aatïmï Israelitas buaboitudai ïgai daidi gïr buidïrï gï maaxitu dai gïr aagidi sai mïï oidigana daaxida aatïmï buxtaki. Ïgai gin otoi naidi gï tanïna aanï oigaragai xi dagitoagi aapi gin aaduñi xi baidakagi aanï baika tasai imidagai oidigamu. Mïï koditulda ïragai aatïmï buxtaki Diuxi Gïr Nukadakami. Potïdamu aapi go Rey— itïtïdai Diuxi go Moises. 19—Dïï toma xïï kïï tanïi aapi oigaragai go Rey aanï kïï maatï xi ïgai maiti gïn dagito agai xi iimiagi abhiadïrï. Dïï aanï bui kïkibamu go Rey dai aidï gia gïn dagitomu ïgai. 20Kaxkïdï aanï tïïgidamu gin gubukarhiga xorai aanï. Otosamu aanï naana maaxi ïbhïidaragai buidïrï go Ejipituana óídakami. Aituldamu aanï gïgïbituldaradï xi podukai nïijadamu ïgai. Aidï gia go Rey dagitomu go Israelitas xi bubuakiagi abhiadïrï— itïtïdai Diuxi Moises.

21Dai potïtïdai ïgai ïpï sai,

—Xudu ka iimïda agadagi go Israelitas abhiadïrï naidi aanï maakia iñagai tïgibudagai go Ejipituana óídakami xi ïgai bïïxi bhai ïrhiaradïkïdï maakimu naana maaxi oidaragai go Israelitas. Podukai go Israelitas biakamu ixtukïdï óídakagi. 22Bïïxi go oki Israelitas agadamu xi tañiagi soiñi maaxi go Ejipituana óídakami. Dai tañiagi soiñi go xibhïadïrï oidakami ïpï. Agadamu xi gataañiagi ïgai oro dai plata dai yukuxi ïpï aadidaragai bïïtarï maamaradï. Daidi podukai bopoidamu ïgai buxtuidadï go Ejipituana óídakami— itïtïdai Diuxi Moises.

Currently Selected:

Exodo 3: NTP

Highlight

Copy