Exodo 4

1Diuxi aagidi go Moises sai bubaidana ïgai go Israelitas Ejiptuañdïrï. Dïï mos go Moises itïtïdai Diuxi, —Xadïrï gin buaboitudaiña go Israelitas. Maiti gin ïïgiadamu ïgai ïrhi aanï. Bhaiyoma potïimu ïgai xi maiti ïr buaboi xi gin buidïrï gï maaxitu aapi Gïr Nukadakami— itïtïdai Moises.

2—Tumaxi gobai ix makïdï daagïi aapi gï ïkana— itïtïdai Gïr Nukadakami.

—Ïmo uxi. Uxiaradï paxturu— itïtïdai Moises.

3—Daitudañi dïbïrapi— itïtïdai Gïr Nukadakami.

Bhodïrï Moises daitu uxiaradï dïbïrapi tai go uxi ïmo kooyi gï nato gïsïkai dïbïrapi. Daidi maigobai mïï go Moises duadimukatai.

4Dïï mos Gïr Nukadakami itïtïdai,

—Bhajiana bhïiyi go kooyi— itïtïdai.

Daidi go Moises otoma bhajian bhïiyi go kooyi. Tai go kooyi uxi gï nato ïpamu.

5—Daiñi— itïtïdai Diuxi. —Pïx xudu aiyagi Ejipituana gï agadamu xi podukai dïbïrapi daituda aapi gï uxiaraga ïpamu bai kooyi gï naatomu gobai ïpamu. Aidï gia gï buaboitudamu go Israelitas xi gï buitapi gin maaxitu aanï ix makïdï Abraam dai Isaak dai Jakobo buaboitudaiña— itïtïdai Gïr Nukadakami.

6—Xibi gï taagiana gï basaraga ïrana baasa gï ïka— itïtïdai Gïr Nukadakami. Dai go Moises taagiïrï báí ïkadï dai ka busaidakai kabami toja. Sarabikan imïi kokodagai tojakami ix makïdï dubarhidai tukugadï odami.

7Bhodïrï Gïr Nukadakami itïtïdai,

—Baasañi ïpamu gï ïka gï taagiana— itïtïdai. Tai Moises báí ïpamu ïkadï. Podukai duadixikami busai ïkadï taagiañdïrï dai moduu duadixikami bii.

8Daidi Gïr Nukadakami itïtïdai,

—Xi go uxi ix makïdï kooyi gï naato, xi gokïdï maiti gï buaboitu ïgai aidï gia go kokodagaikïdï gï buaboitudamu ïgai xi aanï gï otoi— itïtïdai. 9—Xi modukai mai buaboitudagi ïgai aidï gia busaidamu aapi sudagi gïï Nilo akiañdïrï dai aaxtamu dïbïrapi xi go sudagi ïrai gï natomu. Aidï gia gï buaboitudamu ïgai xi aanï gï otoi— itïtïdai Gïr Nukadakami Moises.

10Dïï Moises itïtïdai,

—Gin oigïdañi Gïr Nukadakami, mai imiadan taadaga aanï— itïtïdai Moises. —Sasaimïrhiga aanï dai mai maatï aanï aatagi. Pomaaxi aanï arhidukatai abhiadïrï di— itïtïdai.

11—Daiñi aapi Moises— itïtïdai Gïr Nukadakami. —¿Mai ix kïï bhaiga aanï xi kïï bhai maaxkami dukai gï ñokituldagi?— itïtïdai. —¿Xi mai xu aanï ïgai daidi idui gï tïñi? Aanï ïgai dai ñokitudai odami dai mai ñokitudai ïpï. Dai aanï kakaitudai odami dai sordotudai ïpï. Dai aanï maakai nïadagadï dai mai nïadatudai ïpï. Aanï ïgai dai aagai xïï kïï ñokada agai odami— itïtïdai. 12—Mïradañi tudu naidi aanï gï maakana tïgibudagai dai ñoki ïpï paidi atagada— itïtïdai Gïr Nukadakami.

13Dïï mos go Moises apia maiti ipïrhidi. —Gin oigïdañi Gïr Nukadakami, otosañi ïmai— itïtïdai.

14Dai Gïr Nukadakami bhamu aidï buidïrï Moises daidi itïtïdai. —Gï sukurhi Aaron ïr pipiixaradï Lebi ïpï ïpïandukai aapi dai ïgai kïï saitudaga atagaragai. Xibhïadïrï imïi ïgai gï dibida agaitai. Bhai gï ïldamu ïgai gï tïïgakai— itïtïdai Gïr Nukadakami Moises.

15—Aagidamu aapi go Aaron bïïxi ix dukatai gï aagidamu aanï. Dai podukai atagamu ïgai amïï Ejiptuïrï naidi aanï gïn ïmadï dakamu dai gïn soiñamu. Aanï gïn aagidamu xi ixtumaxi atagadagi aapimï— itïtïdai. 16—Ipïrhidi aanï xi go Aaron ïgai dai atagiada go óídakami. Aanï gin bïïtarï ñokadamu aapi dai aagidamu go Aron ix kaiti aanï bai ïgai utioma aatagamu go óídakami— itïtïdai Gïr Nukadakami. 17—Bhïkañi gï uxiaraga. Ïgaikïdï duñimu aapi naana maaxi maaxidaragai maaxi— itïtïdai Gïr Nukadakami Moises.

18Bhodïrï ïpamu tïbai Moises tubidakiañdïrï xako tïïtadai ïgai táí dai xako aatagaitadai ïgai ïmadï Diuxi dai bhodïrï ïpamu ayi kiidïrï tubhadï. Reuél tïgidu tubhadï. Dai Jetero aagaiña odami ïpï. Gokadu tïtiaradï tudu. Daidi Moises itïtïdai aidï —Gï agai xi mïï nïida aanï gin aaduñi ïpamu Ejipituana. Maatïka in ïrhidi xi bhai kia daraja ïgai— itïtïdai.

—Ïjï mïïka nïida— itïtïdai Jetero.

19Bhodïrï mai kia imïkai Moises Madianañdïrï bai Gïr Nukadakami tïtïdai,

—Xibi ka bhaiga aapi xi imiagi Ejiptuamu ïpamu. Kaxi ti bïïxi koi ix makïdï gï mua ïrhiditadai tudu— itïtïdai.

20Bhodïrï Moises bhïkai uxiaradï, Diuxi tuidadï go uxi xibi, daidi ïmo axñitu dama dáí oñigadï ïmadï maradï dai baida ijii Ejiptuamu.

21Daidi Diuxi itïtïdai,

—Aapi Moises gï agai pïxi kïïga gï tïgito nïijadagi aïkai Ejipituana dai bïïxi ibuadagi go maaxidaragai go Rey buidïrï ix makïdï gï maa aanï gubukadagai pïx ibuadagi. Podukai gï maakimu go Rey oigaragai xi aatagada aapi buidïrï. Dïï mai dagitomu aanï go Rey xi ïma dukai bhïiyagi tïgibudagai bai ïgai mos apia mai ïïgidaraga ka agai. Tomaxi ibuada aapi naana maaxi maaxidaragai buidïrï ïgai, bïïxkïrï ïgai mai dagitomu go Israelitas xi iimiagi abhiadïrï. Kaxkïdï aanï kabami gïgïbituldamu ïgai— itïtïdai Diuxi.

22Bhodïrï Diuxi potïtïdai go Moises,

—Aagidañi aapi go Rey sai xïïxi oigïdai ïgai maradï gïdukïdioma po kaxi oigïdai aanï gin aaduñi go Israelitas agaikïdï. Gin maara aagai aanï go Israelitas— tïdamu aapi. 23—Tomaxi aanï aagidagi go Rey xi dagitona ïgai gin aaduñi xi iimiagi bïïxkïrï ïgai maiti ipïldamu. Kaxkïdï aapi Moises adukai tïdamu go Rey,

—Aapi Rey ka mai dagito aapi maradï Gïr Nukadakami sai imiagi dai mïï koditudagi buxtaki dai daxdagi. Kaxkïdï Gïr Nukadakami mua agai aapi gï maara gïdukïdioma tïdamu aapi. Podukai aituldamu aapi gin ñoki go Rey buidïrï— itïtïdai Gïr Nukadakami go Moises.

Potïtïdai Diuxi go Moises Ejiptuamajako imïdamikatai ïgai tudu.

24Dai bhodïrï boiyamu jii Moises ïmadï aduñdï dai maradï. Dai go Moises mai kia circuncidotadai maradï tukugadï aidï. Mai kia ikitïtadai lïïchi maradï ogidï uruxidï kugadïana tudu. Dai ayi ïgai xako gïn urhiña agaitadai ïmo tukagi dai ami ayi Diuxi go Moises buidïrï dai mua agaitadai mai kia circuncidadokatai tukugadï maradï. 25Dai aduñdï Moises Sefora tïgidukatadai. Dai bhïiyi ïgai ïmo odai kuxirui dai circuncido maradï. Dai bhamu go Sefora buidïrï go Moises maiti ipïldakai ïgai ix circuncidandoagi maradï. Dai daiturhi ïgai go arhi ogi ïkasoana Moises daidi itïtïdai,

—Kaxi gï sarabitu aapi ïrai— itïtïdai go Sefora bhamukatai.

26Dai gokïdï ka dagito Gïr Nukadakami go Moises dai ka mai mua nïiditai ix duñi Sefora maradï. Dai maa ïgai oigaragai xi oijada ïgai imidagai boiyamu.

27Daidi mai kia aïkai ïgai Ejipituana sai Gïr Nukadakami ñokidi sukurhidï Moises, Aaron tïgidukïdï. Ïgai gia Ejipituana dakatadai. Daidi Gïr Nukadakami itïtïdai,

—Imïdañi oidigamu. Amïï oidigamu ayimu aapi go Moises— itïtïdai.

Dai go Aaron jii dai amïï tubidakïrï Horeb tïgidukïdï xako ajïi Diuxi ami buidïrï ayi ïgai Moises. Dai biaturhi ïgai dai usupi. 28Daidi Moises aagidi Aaron bïïxi ixtumaxi tïjai Gïr Nukadakami xi tïdagi ïgai Ejiptuïrï óídakami amïï aïkai. Dai aagidi ïpï go ix makïdï Gïr Nukadakami tïjai xi buada ïgai.

29Bhodïrï mos aïkai Moises ïmadï Aaron Ejipituana idui ïgai ïmpaiñdaragai ïmadï go Israelitas bhaitï gukakamigadï. 30Daidi Aaron aagidi go bhaitï gukakami ix tïtïdai Diuxi go Moises. Daidi Moises óídakami buitapi idui ïpï go ix makïdï tïjai Diuxi. Dïbïrapi daitu ïgai uxiaradï xi kooyi gï nato gobai. Dai bhodïrï taagiïrï báí ïkadï xi kokotu gobai dai mos podukai idui ïgai bïïxi ixtuma tïjai Diuxi.

31Daidi go Israelitas kïïga buaboida kaï ñokidï Aaron ïmadï Moises. Kïïga maatï kaï ïgai xi Gïr Nukadakami tïgito nïiditadai go Ejipituana óídakami xïï kabami soi duiñturhimi ïgai go Israelitas. Dai maatï kaï ïgai ïpï sai Gïr Nukadakami soiña agai. Xi kaxkïdï kuiki ïgai dai xaduturhi ïgai Diuxi kïïga buaboitudaitai.

Currently Selected:

Exodo 4: NTP

Highlight

Copy