Exodo 2

1Aidïpïrï oidakatadai ïmo kïïrhi ix makïdï ïr pipiixaradï Lebikaru. Go Lebi ïr maradïkatadai Jakobo. Dai go kïïrhi pipiixaradï Lebi ïma bii ïmo oki ix makïdï ïr pipiixaradï Lebi ïpï. 2Go oki maarai ïmo arhi gïrhi dai nïidi ïgai arhi gïrhi xi kïï tiodi dai ïxto nukada baika masadai. 3Bhodïrï ka maiti ixtui ix dukatai ïxtoagi maradï bamioma. Dai bhïiyi ïmo asarai gïï basoi duñixikami. Dai bhodïrï kïï bhai dui saidakamikïdï xi mai baakïna sudagi. Dai ami asarai ïrana dáí maradï. Bhodïrï gïï basoi saagida ïxto gïï aki Nilo ugidana. 4Dai no baaxi mianai ïxi bii ïmo arhi oki xïgidï go xïïñi dai nukada agai sa gï duna.

5Dai amipïrï dibia ïmo oki maradï go Rey dai gï baïtïbi agai ïmadï pipioñigadï. Go pipioñigadï mos ajiopai sudagi ugidana dai go maradï go Rey gï baïtïbïi. Gï baïtïbïi ïgai dai tïï go asarai xi basoi saagida daja.

Daidi itïtïdai ïgai pipioñigadï,

—Mïïka abïr gin bhïida go asarai— itïtïdai. 6Dai ka buapakai ïgai go asarai sai go maradï Rey kupioka dai tïï go arhi gïrhi xi suakimi dai soi gï ïrhi daidi ikaiti, —ïmo Israelita maradï ïrhi aanï idi— ikaiti.

7Daidi xïgidï go arhi gïrhi kaï go oki ix kaiti. Daidi itïtïdai,

—Agaipïxi xi gï gaagida aanï ïmo oki Israelita xorai xiitudagi go arhi xïïñi— itïtïdai.

8—Ïjï kïïgadu— ikaiti go oki. Daidi go arhi oki mïï buapi dïïdï go arhi xïïñi. 9Daidi maradï go Rey itïtïdai go oki aidï —Gï maakimu aanï idi arhi gïrhi paidi xiituda aapi naidi aanï gï aa namïidamu gï aaduindaga— itïtïdai.

Daidi go dïïdï go arhi gïrhi bhïkai daidi xiitu. 10Bhodïrï ka xiitukai tïïgi ïgai ïpamu go gïï Rey maradï. Dai ïgai ïïgi maradï dukai nïidi dai Moises tïïtï. Daidi ikaiti,

—Sudagiañdïrï busaitu aanï kaxkïdï Moises tïïtï aanï— ikaiti go Rey maradï.

11Dai go Moises go Rey kiidïrï gïï dïï bïïxkïrï go Israelitas ïgai daidi kïïgakïrï ïr aaduñdï ïgai.

Dai ïmo imidagai ka kïïrhitukai Moises, amïï dibiji ïgai aaduñdï. Dibiji ïgai go Israelitas tudu. Dai nïidi ïgai xi Ejipituana óídakami gubudakïdï aaduinturhi aaduñdï. Daidi nïidi ïpï ïmo Ejipituana oidakami xi gïbaitadai ïmo Israelita. 12Aipako nïnïaba Moises dai mai tïï tomarhi ïmadutai xorai nïïjadagi xi bhodïrï mua ïgai go Ejipituana oidakami dai no baaxi yaasa. 13Xadiko amïï gapaxa ïgai ïpamu. Dai nïidi xi gïn kokodai goka kïkïïrhi Israelitas.

Daidi itïtïdai ïgai go ix makïdï soi buididi go gïmai,

—Tuipïxi gïbai gï aduñi. Ïgai ïr Israelita ïpï di— itïtïdai.

14Daidi go gïitapadami itïtïdai,

—Borai gï dáí aapi ïmo gïï gubukadagai biakami pïxi kaiti daidi tïanïdami dukai ïpï. Gin mua pïx agai ïpï ïpïan dukai go ix makïdï mua aapi go Ejipituana oidakami— itïtïdai.

Daidi go Moises gï ïrhidi,

—Kaxi bïïxkatai go óídakami máí sai mua aanï go Ejipituana oidakami— gï ïrhidi Moises dai duadimuka.

15-16Dai máí go gïï Rey sai go Moises mua ïmo Ejipituana oidakami daidi gatïjai muaragai. Daidi go Moises daibuna mïï mïkaxi xako Madianïrï tïgidu oidigi dai amïï oidatu.

Ami Madianïrï oidakatadai ïmo gubukadagai biakami Reuél tïgidukami. Ïgai kïï buaboitudai dai soikïiña aaduñdï sai buaboidana ïpï. Kubarakami maamara ïgai oki. Ïmo imidagai utudan ayitadai go Moises Madianïrï dai ami poso abhana daiba. Daidi ami dada Reuél maamaradï dai oida agai sudagi ogadï sosoigadï kañiru. 17Daidi ami dïgabusai jaa paxtuturu dai adaji ïgai Reuél maamaradï. Dïï go Moises baa go oki bïïtarï dai sobhi go paxtuturu dai báí sudagi dai oi Reuél sosoigadï.

18Bhodïrï ka kiiyïrï aïkai go aarhi oki ogadï itïtïdai,

—¿Tuixi mosïï otoma dada aapimï?— itïtïdai.

19—Kïïga gïr soi ïmo kïïrhi Ejiptuañdïrï oidakami— itïtïdai aarhi oki. —Sobhi ïgai go gaa paxtuturu daidi oi ïgai sudagi gïr sosoiga— itïtïdai aarhi oki.

20Daidi Reuél itïtïdai go aarhi oki,

—Bako daja ix makïdï gïn soi. Maiti agai xi mos bia aapimï ïgai. Miadïi abïr daasa dai bhida— itïtïdai.

21Daidi aagidi ïgai go Moises saidi ami gï urhiñana dai go Moises bhai aa daidi ami gï urhi. Daidi go Reuél maa ïmoko maradï ix makïdï Sefora tïgidu dai go Moises ka ïma bii.

22Go Sefora marai ïmo arhi gïrhi. Daidi kaiti Moises,

—Aanï ïr xibhïadïrï oidakami kaxkïdï Gerson dasamu aanï tïtiaradï gin maara— ikaiti. Dai ka poduu dáí ïgai.

23Bhodïrï tïbïpikïdï muu go Ejiptuïrï Rey. Dai óídakami apia gubudakïdï tïanïi aaduindagai go Israelitas. Xi go Israelitas soi taadakana dai aijiïgïiña. Daidi Diuxi kaï. 24-25Ïkioma Diuxi kaxi aagiditadai piipixarakarudï go Israelitas sai maaki agai dïbïrai xako óídakagi ïgai. Abraam dai Isaak dai Jakobo tïtïgidu piipixarakarudï go Israelitas. Dai xibi Diuxi tïgito nïidi soi ïrhiaradï go Israelitas Ejipituana darajatai. Dai tïgito ix tïtïdai ïgai piipixarakarudï ïïki dai ka soiña agai ix dukai aagai ïgai dai bubaida agai abhiadïrï.

Currently Selected:

Exodo 2: NTP

Highlight

Copy