Rɔmɛri̧ 5

Káwa a vónáké kuu Gáŋvbôn

1Nǎŋnɔ́, ná ziŋ káwa a ndáráké a mbɛl a Gáŋvbôn ka ŋgboro a láɓulaw a manárí̧, dáy ŋgɛŋnɛ́, ná e ka káwa a vónáké kuu Gáŋvbôn ka ŋgboro a Zezú Kiris Gáŋmbây a manárí̧. 2Ka ŋgboro a Zezú, pé ná ziŋ ka ŋgboro a láɓulaw ri ɓil béla a Gáŋvbôn, ka ew dát, rá̧ hɛ̧ ka hí̧ nárí̧ lawrína ɓá, kɛrɛ ziŋ káwa a ɓil hɔ̧́na a Gáŋvbôn. 3Ndé a nɔ́ ɓáy ɓá, ná e ka mûnrína a ɓil tɔ́ʼɔsêe a manárí̧, ɓayhí̧lé, ná tu ɓá tɔ́ʼɔsêeké hí̧ ikilaw, 4ikilaw hí̧ ewá a kpúnáké a ɓil hɛ̧ lélaw, nǎŋnɔ́ ewá a kpúnáké a ɓil hɛ̧ lélaw, hí̧ mbílaw. 5Mbílawké, ma rɔ́ʼɔ nárí̧ nyá, ɓayhí̧lé Gáŋvbôn ɓá zína a mɛ̌ kɔ̧ ɓil law a manárí̧, ka ŋgboro a Têm Pukí a ké hí̧ nárí̧.

6Ɓayhí̧lé, ka ná zi tí ka ŋgɛ́rɛ ten tûl a manárí̧ ka mûn a manárí̧ yá ɓáy, Kiris, a ɓil nâm ka Gáŋvbôn ŋgá̧y, ziŋ hûl, ɓay tûl a ɓéké njukuri. 7Ŋgɛ́rɛ mambá, ɓay a njuku ké ziŋ hûl ɓay tûl a njuku a ndáráké, há̧na njuku e ziŋ hûl ɓay tûl a béla njuku. 8Dáy, Gáŋvbôn tɔ́ʼɔ a̧ní ké zi nárí̧, ka ná pa̧n ɓá ɓéké njukuri ɓáy, Zezú Kiris ziŋ hûl ɓay a manárí̧. 9Rá ma a ŋgɛŋnɛ́, ka ná ziŋ káwa a ndáráké ka ŋgboro a hɛ̧púna a mɛ̌ dáy, pé ké tí pɛ̧́ nárí̧ a ɓil hɛ́rɛ a Gáŋvbôn nyá lé? 10Ɓayhí̧lé ka ná kaw ɓá njuku ŋgá̧na a Gáŋvbôn ɓáy, ké ɓá láhá̧na gí bazeŋ a manárí̧, ka ŋgboro a hûl a gun a mɛ̌, rá ma ŋgɛŋnɛ́, ka láhá̧na erú kuu mɛ̌ dáy, pé ké tí pɛ̧́ nárí̧ ka ŋgboro a ndísɛ̌ʼɛ a gun a mɛ̌ nyáy lé? 11Zi ɔ ɓá a nɔ́ nyá, ná rí mûn a manárí̧ a mbɛl a Gáŋvbôn ɓay tûl a Gáŋmbây a manárí̧ Zezú Kiris, ka ɓay tûlé, ná ziŋ láhá̧na a ŋgɛŋnɛ́ kuu Gáŋvbôn.

Adam rá̧ Kiris

12Ɓaykénɔ́, ɓá báŋké ka, ka ŋgboro a njuku mbêw yáŋ, Adam, pé ɓéké rí tísiri dáy, ɓéké ɓá hûl gí tísiri. Nǎŋnɔ́, hûl ka̧ njukuri too, ɓayhí̧lé njukuri too niŋ ɓékéhɛ̧. 13Ɗambɛl rá̧ Gáŋvbôn ké hí̧ sáŋna mɛ̌ hí̧ Mɔyíze, ɓéké erú ka tísiri dá. Dáy, ka sáŋna zi tí yá ɓáy, Gáŋvbôn zi ɛ̧rɛ̧ ɓéké yá. 14A tu ɓá, tí a nâm a Adam gí ka̧ nâm a Mɔyízey, hûl erú, a kaw niŋ kpɔ́ŋa a mɛ̌ dá. Ké niŋ ziŋ njukuri, ka zi niŋ ɓéké ɓá báŋa Adam, ka many nzáʼa a Gáŋvbôn nyáy kɔ́.

Adam, kaw ɓá báŋa têm a njuku ka e gína a fal. 15Dáy, ɓékéhɛ̧ a Adam, ná zi ma ɓá lé mbɛ̧́nɛ́ ka nɛ́rɛ̧ kuu hɛ̧hí̧na baa a Gáŋvbôn nyá. Ɓayhí̧lé, mí ɓá ɓéké a njuku mbêw, pé njukuri ɓá ŋgɛ̧́náké ziŋ hûl, rá ma béla a Gáŋvbôn rá̧ hɛ̧hí̧na a béla ka gí ka ŋgboro a njuku mbêw, Zezú Kiris, pé tí wal ma tûl a njukuri tooy yáy lé? 16Hɛ̧hí̧na a Gáŋvbôn erú ka pénáké a mɛ̌ ɓórí, kuu ɓéké a njuku mbêw nɔ́ ka niŋ. Ɓayhí̧lé walɓay a ɓéké a njuku mbêw, ɓá ɓay ŋgbá njukuri too. Dáy a hɛ̧hí̧na baa a Gáŋvbôn, ka hí̧ a fal ka njukuri niŋ ɓéké ɓá ŋgɛ̧́náké dáy, ɓá njukuri tɛ̧́ njuku a ndárákéri. 17Katína, ka ŋgboro a ɓékéhɛ̧ a njuku mbêw, pé hûl ka̧ njukuri too, ɓay a mɛ̌ hɛʼɛ, rá ma njukuri ka nyá béla a ŋgɛ̧́náké a Gáŋvbôn rá̧ hɛ̧hí̧na, ka hí̧ káwa a ndáráké, tí kaw, a ná mbây ɓay tûl a Kiris hɛʼɛ yáy lé?

18Nǎŋnɔ́ dáy, ka ŋgboro a ɓéké a njuku mbêw, Adam ɓá walɓay a Gáŋvbôn ŋgbá njukuri too, ɓá mbêwké kɔ́, péna a ndáráké a njuku mbêw, Zezú Kiris, sɛl njukuri too a ɓil walɓay a Gáŋvbôn, a hí̧ kuriri káwa a ndísɛ̌ʼɛ. 19Ka ŋgboro a many nzáʼa a njuku mbêw, ɓá njukuri ɓá ŋgɛ̧́náké ri ɓil ɓéké, ɓá mbêwké kɔ́, ka ŋgboro a lá nzáʼa a njuku mbêw, ɓá njukuri ɓá ŋgɛ̧́náké tɛ̧́ njuku a ndárákéri a mbɛl a Gáŋvbôn.

20Sáŋna gí, dáy ɓékéhɛ̧ niŋ ɓá ŋgɛ̧́náké, nǎŋnɔ́ gel ka ɓékéhɛ̧ niŋ ɓá ŋgɛ̧́náké, béla a Gáŋvbôn gí ŋgɛ̧́ ndé tûlké. 21Nǎŋnɔ́, ɓá báŋké ka ɓéké tɔ́ʼɔ kpɔ́ŋa a mɛ̌ too, ka ŋgboro a hí̧ hûl, ɓá mbêwké kɔ́, béla a Gáŋvbôn tɔ́ʼɔ kpɔ́ŋa a mɛ̌ ka ŋgboro a ndáráké, ɓay a hí̧ nárí̧ káwa a ndísɛ̌ʼɛ dát, ka ŋgboro a Zezú Kiris, Gáŋmbây a manárí̧.

Currently Selected:

Rɔmɛri̧ 5: pnz

Highlight

Copy