Rɔmɛri̧ 4

Gala láɓulaw a Abaraham

1A̧hí̧ ná e sanáké ɓay a zîi a manárí̧ Abaraham lé? A̧hí̧ ké ziŋ ka ŋgboro a ŋgɛ́rɛ a hay mûn lé? 2Gáŋvbôn mí kó Abaraham ɓá njuku a ndáráké ka ŋgboro a péna a mɛ̌y, e hí̧ Abaraham ŋgboro si kɔ́ŋɛ́. Dáy a mbɛl a Gáŋvbôn, zi tí nǎŋ nyá. 3Ɓayhí̧lé Mbété a Gáŋvbôn sa ɓá: «Abaraham láɓulaw hí̧ Gáŋvbôn, dáy Gáŋvbôn ɓá nɛ́ tɛ̧́ njuku a ndáráké, ka ŋgboro láɓulaw a mɛ̌.» 4Njuku ka niŋ pénay, ké ziŋ kpáʼandɔ̂ʼɔ péna a mɛ̌, kpáʼandɔ̂ʼɔké zi tí ɓá hɛ̧hí̧na ɓǎŋ nyá, ɓá rɔ́na a mɛ̌. 5Dáy, njuku ka zi niŋ péna nyá, ka a láɓulaw hí̧ njuku ka kó ɓéké njuku ɓá njuku a ndárákéy, láɓulaw a mɛ̌ ɓá nɛ́ tɛ̧́ njuku a ndáráké. 6Nǎŋnɔ́ pé Davít saɓay a béla a njuku ka Gáŋvbôn kó nɛ́, ɓá njuku a ndáráké, táŋ kó péna niŋa a mɛ̌:

7«Béla hí̧ njukuri, ka Gáŋvbôn vbá̧buma ɓékéhɛ̧ a kuriri,

ka ɓéké a kuriri ziŋ túra tooy!

8Béla hí̧ njuku ka Gáŋmbây, zi kɛrɛ ɓéké a mɛ̌ mbaay!»

9Dáy, béláké ɔ ɓá ɓala Juyífri mbêw yáŋ, malé ɓá ɓala njuku a fékéri kɔ́ lé? Katína, rú tí sa a gelé ɓá: «Gáŋvbôn kó Abaraham ɓá njuku a ndáráké, ka ŋgboro a láɓulaw a mɛ̌.» 10Dáy a sêe sí̧rá̧ hɛ̧ké niŋ lé? A fal ka Abaraham ndá ganzá malé ɗambɛl lé? Tí ɓá a fal yá, ɗambɛl rá̧ pé ké ndá ganzá! 11Abaraham ndá ganzá a fal, ɓá báŋa ŋgána: Ŋgána ka tɔ́ʼɔ ɓá Gáŋvbôn kó nɛ́ ɓá njuku a ndáráké ka ŋgboro a láɓulaw a mɛ̌, a tu ɓá, sêeké nɔ́ ké zi ndá ganzá yá ɓáy. Nǎŋnɔ́, Abaraham tɛ̧́ bâa a njukuri too ka láɓulaw táŋ ndá ganzá, ka Gáŋvbôn kó kuriri kɔ́ ɓá njuku a ndárákéri. 12Abaraham kaw ɓá bâa a njukuri ka ndá ganzá kɔ́, zi ɓay a sa ɓá, zi tí ɓá njukuri ka ri mûn a kuriri ɓay tûl ndá ganzá a kuriri mbɛ́ŋ nyá, dáy ɓá njukuri kɔ́ ka tɔ́ŋ gala láɓulaw a bâa a manárí̧ Abaraham, ka tí erú ɗambɛl rá̧ ka a ndá ganzáy.

Hí̧nzáʼa a Gáŋvbôn a njuku nyá ka ŋgboro a láɓulaw

13Gáŋvbôn tí hí̧nzáʼa hí̧ Abaraham rá̧ gun ɓiléri ɓá, kú e ziŋ tísiri. Dáy, hí̧nzáʼaké niŋ tí ɓá ɓay hɛ̧ ka Abaraham tɔ́ŋ sáŋna nyá, dáy ɓá ɓay hɛ̧ ka, Gáŋvbôn kó nɛ́ ɓá njuku a ndáráké ka ŋgboro a láɓulaw a mɛ̌y. 14Mí ɓá njukuri ka tɔ́ŋ sáŋna mbɛ́ŋ, pé e ziŋ hɛ̧ri̧ ka Gáŋvbôn hí̧nzáʼa ɓayké lé, láɓulaw zi tí ka nɛ́rɛ̧ nyá, nǎŋnɔ́ kɔ́, hí̧nzáʼa a Gáŋvbôn e ná ɓá hɛ̧ a baaké. 15Katína lé, sáŋna ɗí hɛ́rɛ a Gáŋvbôn, ɓayhí̧lé sáŋna mí zi tí yáy, many sáŋna zi tí ná nyá. 16Ɓaykénɔ́ pé hí̧nzáʼa a Gáŋvbôn ew ɓá tûl láɓulaw mbɛ́ŋ rá̧ ké ná ɓá béla ka njuku ziŋ baa, ka e ka nɛ́rɛ̧ hí̧ gun ɓil a Abarahamri̧ too. Tí ɓá ɓay a njukuri ka tɔ́ŋ sáŋna mbɛ́ŋ nyá, dáy ɓá ɓay a njukuri too, ka láɓulaw ɓá báŋa Abaraham, ka ɓá bâa manárí̧ tooy, 17ɓá báŋké ka Mbété sa ɓá: «Mi ɓá mɔ tɛ̧́ zîi a njukuri ɓá ŋgɛ̧́náké.» Abaraham, ɓá bâa manárí̧ a mbɛl a Gáŋvbôn, a ké láɓulaw hí̧ nɛ́y. Gáŋvbôn, ka hí̧ ndísɛ̌ʼɛ hí̧ hûlri, ka ɗí hɛ̧ri̧ ka zi tí bɔʼɔ mbêw yáy, ɓá kú tɛ̧́. 18Abaraham láɓulaw, a ɓá kɛrɛ a mɛ̌ too kɔ̧ tûl a Gáŋvbôn. Dáy, ɓá kɛrɛké ná ɓá báŋa hɛ̧ a baaké, nǎŋnɔ́ ké tɛ̧́ zîi a njukuri ɓá ŋgɛ̧́náké, ɓá báŋké ka Gáŋvbôn sa hí̧ nɛ́ ɓá: « Nǎŋnɔ́ pé gun zîi a mɔ̌ri̧ e ŋgɛ̧́nay.» 19Abaraham zaa ké niŋ mbimbɔ̂m ísɔ́t mbêw, a ɓilké nɔ́ too, láɓulaw a mɛ̌ zi ta̧ yá. Abaraham tu ɓá mûn nɛ́ zi tí ka ŋgɛ́rɛ mbá, rá̧ Sára ɓá mâatu 20A nɔ́ too, Abaraham zi pɔŋ láɓulaw yá, a zi many hí̧nzáʼa a Gáŋvbôn ka hí̧ nɛ́ nyá, ké ziŋ ŋgɛ́rɛ a ɓil láɓulaw a mɛ̌, ka hí̧ ɗéla hí̧ Gáŋvbôn. 21Abaraham, tu ɓá táŋáké ɓá Gáŋvbôn e ka kpɔ́ŋa niŋ hɛ̧ a ké hí̧nzáʼa ɓayké. 22Ɓaykénɔ́, pé kú saɓay a Abaraham ɓá, ɓay tûl láɓulaw a mɛ̌, «Gáŋvbôn kó nɛ́ ɓá njuku a ndáráké.» 23Dáy, zi tí ɓá ɓay a mɛ̌ mbɛ́ŋ, pé kú ɗé ka̧n ɓil Mbété sa ɓá: «Gáŋvbôn kó nɛ́ ɓá njuku a ndáráké» yá. 24Kú ɗé ɓay a manárí̧ kɔ́, ka e tɛ̧́ njuku a ndáráké ka ŋgboro a láɓulaw hí̧ Gáŋvbôn, ka toma Zezú Gáŋmbây a manárí̧ a ɓil a hûlri. 25Kú ɓá Zezú ziŋ hûl, ɓay tûl ɓéké a manárí̧, dáy Gáŋvbôn toma nɛ́ a ɓil a hûlri, ɓay a ɓá nárí̧ tɛ̧́ njuku a ndárákéri.

Currently Selected:

Rɔmɛri̧ 4: pnz

Highlight

Copy