Rɔmɛri̧ 6

Hûl ɓay a ɓéké dáy káwa a ndísɛ̌ʼɛ ɓay a Kiris

1A̧hí̧ ná e sanáké a ŋgɛŋnɛ́ lé? Ná e kaw ɓil ɓéké dát, rá̧ béla a Gáŋvbôn ké hɔ̧́ sé mbɛl lé? 2Bɔʼɔ mbêw yá! Manárí̧, ná ziŋ hûl ɓay a ɓéké dá, e ná a̧ní rá̧, ná e kaw ɓil ɓéké ɓáy lé? 3I zi tu ɓá, manárí̧ too ka nyá batêm ɓay a kaw mbêw kuu Zezú Kiris, zi tɔ́ʼɔ ɓá ná nyá batêm, a ɓil hú mbêw kuu mɛ̌ nyá lé? 4Nǎŋnɔ́, ka ŋgboro a batêmké nɔ́, kú goro manárí̧ mbêw kuu Zezú. Dáy, ɓá báŋké a kú toma Kiris ka hûl ka ŋgboro kpɔ́ŋa a hɔ̧́na a Gáŋvbôn, manárí̧ kɔ́, ná ziŋ káwa a ndísɛ̌ʼɛ a ŋgɛŋké.

5Katína, manárí̧ mí e mbêw kuu mɛ̌ a ɓil hûl, ka ɛ́ŋ hûl a mɛ̌y, nǎŋnɔ́ kɔ́, ná e mbêw kuu mɛ̌ a ɓil toma hûl ka ɛ́ŋ toma a mɛ̌y. 6Ná tu ɓá ŋgɛŋnɛ́, káwa njuku a tâ̧wké a manárí̧, ziŋ hûl kuu Kiris ka tûl dii vbatay dá, ɓay mûn ɓéké a manárí̧, ké gbɛʼɛrɛ ɓay a ná zi ná kaw ɓá koy a ɓéké ɓáy. 7Ɓayhí̧lé, njuku ka hú dáy, tɛ̧́ a ɓil ɓéké dá. 8Manárí̧, mí hú kuu Kiris, ná tu ɓá, ná e ziŋ káwa a ndísɛ̌ʼɛ kɔ́ kuu mɛ̌. 9Ná tu ɓá, Kiris ka toma a hûl dáy, zi ma húna mbaa, ɓayhí̧lé hûl zi tí ka kpɔ́ŋa ɓáy sé tûlé mbaa. 10Kiris ziŋ hûl bɔʼɔ mbêw wɔm, ɓay a hɛ̧ ka kó ɓéké. Dáy a ŋgɛŋnɛ́, a ké e ka ndísɛ̌ʼɛ, ké kaw ɓá ɓay a Gáŋvbôn. 11Nǎŋnɔ́ wǎyri kɔ́, i kó mûn a wǎyri, ɓá i hú dá, ɓay a hɛ̧ ka kó ɓéké, a i kó mûn a wǎyri ɓá, i kaw ka ndísɛ̌ʼɛ ɓay a Gáŋvbôn, ka ŋgboro a káwa mbêw a wǎyri kuu Zezú Kiris.

12Ɓéké, ké ná e ka kpɔ́ŋa sé tûl mûn a wǎyri ka hú ɓay a mɛ̌ dáy, a i ná lá nɛ́ a tɔ́ŋ hɛ̧ a ké ziy ɓáy. 13Nǎŋnɔ́, í zi ná mbí gel a há̧na ka mûn a wǎyri hí̧ ɓéké, ɓá báŋa hɛ̧ péna a ɓékéhɛ̧. Dáy, i ɓá mûn a wǎyri hí̧ Gáŋvbôn, ɓá báŋa njukuri ka regí ka hûl, ka e ka ndísɛ̌ʼɛ. Í mbí mûn wǎyri, a niŋ péna hí̧ Gáŋvbôn, ɓá báŋa hɛ̧ péna a hɛ̧ a ndáráké. 14Katína, ɓéké zi tí ka kpɔ́ŋa sé tûl a wǎyri mbaa, ɓayhí̧lé, i zi tí ka bɔʼɔ a sáŋna mbaa, i e ka bɔʼɔ béla a Gáŋvbôn.

Niŋ péna a ndáráké

15Dáy zi ɓay a sa ɓá hí̧ lé? Zi ɓay a sa ɓá, ná tɔ́ŋ niŋ ɓéké, ɓay ka ná zi tí ka bɔʼɔ sáŋna mbaay, ka e ka bɔʼɔ béla a Gáŋvbôn a ŋgɛŋnɛ́ lé? Bɔʼɔ mbêw yá! 16I tu ɓá táŋáké ɓá, Wǎyri mí mbí mûn a wǎyri too, ɓay a niŋ péna hí̧ njuku, ɓá báŋa koy, a lá nɛ́y, i tɛ̧́ koy a bákáwa nɔ́ ka i lá nɛ́. Ké zi lé ɓá ɓéké, ka ɓá njuku sé hûl, malé lá nzáʼa a Gáŋvbôn, ka ɓá njuku sé káwa a ndáráké. 17Dáy, awá hí̧ Gáŋvbôn, wǎyri ka í̧ŋásá̧ i kaw ɓá koy a ɓéké, dáy a ŋgɛŋnɛ́, i lá a law a wǎyri too sé tûl mára̧ hɛ̧tɔ́ʼɔ a mbêwké, ka i ziŋ. 18Kú lú wǎyri a ɓil koy a ɓéké, nǎŋnɔ́ í retɛ̧ koy péna a ndáráké. 19Mi saɓay nɛ́ ɓá báŋa sána njukuri, ɓayhí̧lé, law a wǎyri kpú mambá a ɓil láɓay. Í̧ŋásá̧, i mbí mûn a wǎyri too, kaw ɓá koy a ɓéké rá̧ hɛ̧ a belyáké, ka hí̧ kpútûl hí̧ njukuri kuu Gáŋvbôn. Ɓá mbêwké pí ŋgɛŋnɛ́, í mbí mûn a wǎyri too ɓá koy, a i niŋ hɛ̧ a ndáráké, ɓay a ziŋ káwa a táŋáké.

20Ɓayhí̧lé gelka, i kaw ɓá koy a ɓéké ɓáy, law a wǎyri zi tí ka tûl niŋ hɛ̧ a ndáráké yá. 21Dáy, a̧hí̧ i ziŋ ɓá nɛ́rɛ̧ a ɓil niŋ hɛ̧ké, ka ná ɓá hɛ̧ sɔ̧rɔ̧ hí̧ wǎyri a ŋgɛŋnɛ́ lé? Ɓayhí̧lé kɔ́rɔ́ a hɛ̧kéri too, ɓá hûl. 22Dáy a ŋgɛŋnɛ́, i tɛ̧́ a ɓil ɓéké dá, a retɛ̧ koy a Gáŋvbôn. Nǎŋnɔ́, hɛ̧ ka i ziŋ ɓá lénáké, ɓá káwa a táŋáké, a kɔ́rɔ́ké, ɓá káwa a ndísɛ̌ʼɛ dát. 23Ɓayhí̧lé kpáʼandɔ̂ʼɔ péna a ɓéké, ɓá hûl, dáy hɛ̧hí̧na baa a Gáŋvbôn, ɓá káwa a ndísɛ̌ʼɛ dát ka ŋgboro a Zezú Kiris, Gáŋmbây a manárí̧.

Currently Selected:

Rɔmɛri̧ 6: pnz

Highlight

Copy