Rɔmɛri̧ 7

Njuku a Kirisri zi tí bɔʼɔ sáŋna mbaa

1Nyîn nírí̧, i zi tu ɓá, mi kaw saɓay hí̧ wǎyri, wǎyri njukuri ka tu sáŋnay nyá lé? Ɓá kpɔ́ŋa a Sáŋna e ka tûl a njuku dát, a ké mí kaw ka nûn nyá lé? 2Ɓá báŋké kɔ́, wûnynjuku ka nyá wɔ̧rɔ̧́, sáŋna ŋgá̧ nɛ́ kuu wɔ̧rɔ̧́ a mɛ̌, nâm too ka wɔ̧rɔ̧́ a mɛ̌ kaw ka nûn ɓáy. Dáy, nâm ka wɔ̧rɔ̧́ a mɛ̌ mí ziŋ hûl dáy, sáŋna ka ŋgá̧ nɛ́ kuu wɔ̧rɔ̧́ a mɛ̌, sɛl dá. 3Zi ɓay a sa ɓá, ka wɔ̧rɔ̧́ a mɛ̌ pa̧n ka nûn ɓáy, ké tɛ̧́ rá̧ a nyá wɔ̧rɔ̧́ a féké lé, ké niŋ dala. Dáy, wɔ̧rɔ̧́ a mɛ̌, mí ziŋ hûl, sáŋna ka ŋgá̧ nɛ́ kuu wɔ̧rɔ̧́ a mɛ̌ zi tí ka tûlé mbaa, ké mí zi nyá wɔ̧rɔ̧́ a féké, ké nyá, a goló ké zi niŋ dala yá. 4Ná ɓá mbêwké hí̧ wǎyri kɔ́ nyîn nírí̧, i ziŋ hûl a ɓil mára̧ a wǎyri mbêw kuu mûn a Kiris ka tûl dii vbatay, ɓay hɛ̧ ka kó sáŋnay, ɓay i kaw a ŋgɛŋnɛ́ ɓá ɓala a njuku a féké, zi ɓay a sa ɓá, njuku ka uru ka hûl, Zezú Kiris, rá̧ ná ma niŋ péna a béláké ka ri Gáŋvbôn. 5Ɓayhí̧lé, gelka ná kaw ka ŋgboro a hay mûn ɓáy, zi hɛ̧ a belyáké ka sáŋna ɓá ka̧n law a manárí̧, kaw niŋ péna a ɓil mûn a manárí̧, ɓay a hí̧ léna, ka ɓá nárí̧ sé hûl. 6Dáy, ná ziŋ tɛ̧́na a ɓil sáŋna dá, ɓayhí̧lé ná ziŋ hûl ɓay tûl a sáŋna nɔ́ ka ŋgbá nárí̧ ɓá koyri dá. Ŋgɛŋnɛ́ ná ziŋ ŋgboro a ŋgɛŋké ɓay a niŋ péna hí̧ Gáŋvbôn, ka bɔʼɔ kpɔ́ŋa a Têm Pukí, a tí ɓá, ka bɔʼɔ kpɔ́ŋa a sáŋna a ɗénáké mbaa.

Nɛ́rɛ̧ a sáŋna ɓá hí̧ lé?

7A̧hí̧ ná e sanáké lé? Ɓá sáŋna ɓá ɓéké lé? Bɔʼɔ mbêw yá! Ka ŋgboro a sáŋna, pé mi tu ɓéké. Ɓayhí̧lé, mi zi tu ɓá, ɓá law ka̧n tûl hɛ̧, zi belyá, ka sáŋna mí zi sa ɓá: «Mɔ́ zi ná ɓá law ka̧n tûl hɛ̧ nyáy!» 8Nǎŋnɔ́, ɓéké ziŋ ŋgboro ka sáŋna hí̧ nɛ́y, ɓay a ké ɓá ka̧n law ní, ŋgboro ɓá law ka̧n tûl hɛ̧ too. Ɓayhí̧lé, sáŋna mí zi tí yáy, ɓéké ɓá hɛ̧ ka hú dáy. 9Í̧ŋásá̧, ka sáŋna zi tí yá ɓáy, mi kaw ka ndísɛ̌ʼɛ. Dáy gelka sáŋna gíy, ɓéké retoma ka hûl, 10mǐ, mi rezíŋ hûl. Nǎŋnɔ́ a kó ná mǐ, sáŋna ka e ɓá njuku sé káwa a ndísɛ̌ʼɛ, reɓá njuku sé hûl. 11Ɓayhí̧lé, ɓéké ziŋ ŋgboro a rɔ́ʼɔ mí, ka ŋgboro a sáŋna, dáy ka ŋgboro a sáŋnaké, ké hí̧ mí hûl.

12Nǎŋnɔ́ sáŋna ɓá hɛ̧ a táŋáké, nzáʼapéna too ɓá táŋáké, ndáráké, a belbéla. 13Dáy, hɛ̧ ka belbélay, retɛ̧ hɛ̧ ka e hí̧ hûl hí̧ mí lé? Bɔʼɔ mbêw yá! Ɓá ɓéké, ɓay a ké tɔ́ʼɔ káwa ɓéké a mɛ̌, pé a hí̧ mí hûl ka ŋgboro a hɛ̧ a béláké. Nǎŋnɔ́, ka ŋgboro a nzáʼapéna, ɓéké tɔ́ʼɔ mûn nɛ́ a ɓil ŋgɛ́rɛ ɓéké a mɛ̌ too.

Ɓéké ndé tûl a njuku a tísiriri

14Katína, ná tu ɓá sáŋna gí ka ŋgboro a Têm Pukí, dáy mǐ, mi kaw ɓá njuku ka e a ɓil hay mûn, a kú zé ɓá koy hí̧ ɓéké. 15Mi zi tu hɛ̧ ka mi kaw niŋáké yá. Ɓayhí̧lé, mi zi niŋ hɛ̧ ka mi zi ɓay a niŋáké yá, mi niŋ ɓá hɛ̧ ka mi zi yáy. 16Dáy mǐ, mí niŋ ɓá hɛ̧ ka mi zi yáy, mi tu a goló ɓá sáŋna ɓá béla hɛ̧. 17Dáy, tɔ́ʼɔ ɓá tí ɓá mǐ, pé niŋ nǎŋ nyá, ɓá ɓéké, ka e ka mûn ní. 18Ɓayhí̧lé, mi tu ɓá bélahɛ̧ zi kaw gí ní nyá, zi ɓay sa ɓá, a ɓil hay mûn ní. Katína, mi e ka zína niŋ bélahɛ̧, dáy ŋgɛ́rɛ niŋáké zi tí hí̧ mí nyá. 19Ɓayhí̧lé, mi zi niŋ bélahɛ̧ ka mi zi yá, ɓá ɓékéhɛ̧, ka mi zi yáy, pé mi niŋ. 20Mǐ, mí niŋ hɛ̧ ka mi zi yáy, tɔ́ʼɔ ɓá, tí ɓá mǐ pé niŋ hɛ̧ké mbaa, ɓá ɓéké ka e a ɓil hay mûn ní.

21Nǎŋnɔ́ mi ziŋ sáŋna nɛ́ ka sa ɓá: Gelka mi zi ɓay a niŋ bélahɛ̧y, mi kó ɓá hɛ̧ belyáké, pé mi kaw niŋáké. 22A ɓil law ní, mi e ka mûnrína sé tûl sáŋna a Gáŋvbôn. 23Dáy, mi ziŋ a mûn ní, sáŋna a féké ɓáy, ka kaw rúbére kuu sáŋna a Gáŋvbôn ka mi ziy. Sáŋnaké reɓá mí kaw ɓá koy a sáŋna a ɓéké, ka e ka mûn ní. 24Lelêe ka ná hí̧ mí! A gé, e ten mi a ɓil mûn nɛ́ ka ɓá mi gé ɓá hûl lé? 25Dáy ɗéla ké hí̧ Gáŋvbôn, ka ŋgboro a Zezú Kiris Gáŋmbây a manárí̧!

Nǎŋnɔ́ dáy, ka ŋgboro zína a mǐ, mi kaw ɓá koy a sáŋna a Gáŋvbôn, dáy, ka ŋgboro a hay mûn, mi kaw ɓá koy a sáŋna a ɓéké.

Currently Selected:

Rɔmɛri̧ 7: pnz

Highlight

Copy