Luk 4

Sata̧n lé Zezú

(Mat 4:1-11; Mrk 1:12-13)

1A fal nyá batêm a Zezú, ké regí a mbii Jurdɛ́ŋ mbá ka Têm Pukí, dáy Têm Pukí ɓá nɛ́ sé ɓil lawkɔ́r. 2Sata̧n gé lé nɛ́ nâm bonɛŋ, a ɓil nâmké nɔ́ too, ké zi lâʼa hɛ̧ nyá. Gelka nâmké gí ɔ dáy, ké tí lá nzala. 3Dáy, Sata̧n sa hí̧ nɛ́: «Mɔ̌, mí ɓá Gun a Gáŋvbôn lé, mɔ́ sa hí̧ saw nɛ́, ké fere tɛ̧́ biré!» 4Zezú fere a sa hí̧ nɛ́: «Mbété a Gáŋvbôn sa: Njuku tí káwa ɓay tûl lâʼa mbɛ́ŋ nyá.» 5Sata̧n ɓá nɛ́ sé gel a gáŋaké, a gé tɔ́ʼɔ nɛ́ tísiri too, 6a sa hí̧ nɛ́: «Mi e hí̧ mɔ́ kpɔ́ŋa, rá̧ mbây a tísiri nɛ́ too, ɓayhí̧lé hɛ̧ nɔ́rí̧ too, kú hí̧ mí, dáy mi e hí̧ njuku ka mi ziy. 7Mɔ̌ mí huku mbɛl ní, hɛ̧ nɔ́rí̧ too, mi e ɓá hí̧ mɔ́.» 8Zezú fere a sa: «Mbété a Gáŋvbôn sa ɓá: Mɔ́ huku mbɛl a Gáŋmbây, Gáŋvbôn a mɔ̌, a mɔ́ hɔ̧́ ɓá mɛ̌ mbɛ́ŋ.»

9Falké, Sata̧n ɗá Zezú sé Zerúzalɛ̂m, a gé ɓá nɛ́ ew tûl vûn a Gáŋvbôn, a sa hí̧ nɛ́: «Mɔ̌ mí ɓá Gun a Gáŋvbôn lé, mɔ́ zɔ sé tísiri, 10ɓayhí̧lé Mbété a Gáŋvbôn sa ɓá:

“Gáŋvbôn e hí̧nzáʼa hí̧ aŋnze a mɛ̌ri̧, ɓá kú koro mɔ́.”

11Kú e mbí mɔ́ ka̧n ɓil ndɔ̂ʼɔ a kuriri, ɓay a bɔʼɔ ké zi ná si hɛ̧.»

12Zezú fere a sa hí̧ nɛ́: «Mbété a Gáŋvbôn sa kɔ́ ɓá: Mɔ́ zi ná lé Gáŋmbây, Gáŋvbôn a mɔ̌.»

13Gelka Sata̧n ɔrɔ lé Zezú ka ŋgboro a hɛ̧ri̧ ɓórí ɓórí too dáy, ké pɔŋ nɛ́ a kála, a kaw zoko nâm a féké.

Zezú tí péna a mɛ̌ a Galilê

(Mat 4:12-17; Mrk 1:14-15)

14Dáy Zezú regí Galilê, mbá ka kpɔ́ŋa a Têm Pukí, kú saɓay a mɛ̌ ma ɓil kaw too. 15Ké tɔ́ʼɔhɛ̧ dát a ɓil vûn mára̧ a Juyífri, njukuri ɓá ŋgɛ̧́náké kaw saɓay a mɛ̌.

Kú sáŋ Zezú ka Nazarɛ́t

(Mat 13:53-58; Mrk 6:1-6)

16Zezú resé Nazarɛ́t, pû a ké hɔ̧́ karúy, sêe ɔʼɔ a Juyífri ka̧, ké sé vûn gɔ́ŋ Gáŋvbôn ɓá báŋké a ké niŋ dát. Ké uru ɓay a kɛ̧́ Mbété a Gáŋvbôn. 17Dáy kú mbí kúna mbété a porofɛ́t Ezayí hí̧ nɛ́, ké sɛl, dáy a ziŋ gel a mbété a sa:

18Têm a Gáŋmbây e kuu mǐ,

ké ten mí, ɓay a mí gí tɔ́ʼɔ Bélaɓay a Gáŋvbôn hí̧ fóyári.

Ké pé mí, ɓay a mí gí sa Bélaɓay ten njukuri ka e a ɓil vûn sɛl,

ɓay a mí ŋgburu nûn a râ̧wri̧,

a mí nyá tûl a njukuri a kú ɓá kuriri tɔ́ʼɔsêe,

19a mí sa hí̧ njukuri, mbimbɔ̂m ka Gáŋvbôn e tɔ́ʼɔ béla a mɛ̌.

20Falké, Zezú ka mbétéké, a rerú hí̧ njukupéna, a rekaw a siri. Njukuri too ka e a ɓil vûnké, ɛ̧rɛ̧ nɛ́ mbɛ̧̂. 21Dáy, Zezú sa hí̧ kuriri: «Ɓay a ka ɗé ka̧n ɓil mbété nɛ́ ka mi kɛ̧́ a sénɛ́y, ka i lá nɛ́y, pénáké niŋ dá.» 22Njukuri too lá, a ɗél ɓayké, a kaw yér sé tûl béla ɓay ka tɛ̧́ a nzɛ́ʼɛ, a kú sa: «Tí ɓá gun a Jozɛf pɛ̧́nɛ́ nyá lé?» 23Zezú fere a sa hí̧ kuriri: Katína, i rekɛ̧́ galaɓayri hí̧ mí ɓá: «Njuku ŋgɛ́rɛ záŋmá, mɔ́ ŋgɛ́rɛ mûn nɔ́ ka mûn nɔ́.» I resa hí̧ mí kɔ́ ɓá: «Rú lá hɛ̧, ka mɔ́ niŋ ka Kapɛrnahûm too, mɔ́ niŋ a ŋgɛŋnɛ́ a pû a mɔ̌ rá̧.» 24Dáy Zezú resa ɓáy ɓá: «Katína, mi sa hí̧ wǎyri ɓá: Porofɛ́t a há̧na a kú nyá nɛ́ ɓá béláké, ka tísiri a mɛ̌ zi tí yá. 25Dáy mi sa hí̧ wǎyri gbátɓay, wûnysêeri ɓá ŋgɛ̧́náké e ka Izirayɛ́l a ɓil káwa a porofɛ́t Eli, gelka mbɔ̂m zi tɔ́ yá mbimbɔ̂m sáy a fêw zêey, nzala ŋgbá tísiri too. 26Dáy, Gáŋvbôn zi pé Eli sé gel a wûnysêe a há̧na mbêw ka Izirayɛ́l yá, ɓá gel a wûnysêe a há̧na ka Sarɛpta, a ɓil kaw a Sidɔ̂ŋ sá̧. 27A ɓil káwa a porofɛ́t Elizé kɔ́, njuku ndɛ́ɓɛri ŋgɛ̧́ mambá ka tísiri a Izirayɛ́l, dáy ké zi ŋgɛ́rɛ njuku a há̧na mbêw a bazeŋ a kuriri yá, ɓá Náamân njuku ka tísiri a Sírí sá̧.»

28Njukuri too a ɓil vûn mára̧, ɗí hɛ́rɛ sé tûl ɓay nɔ́ ka Zezú sáy. 29Kú uru too, a ŋgbá nɛ́, a kɔʼɔ nɛ́ tɛ̧́ ɓil pû, a ɓá nɛ́ sé tûl kɔ̂l ka pû kuriri Nazarɛ́t erúy, ɓay a kú sɔʼɔrɔ nɛ́ lé ɓil ŋgêŋ. 30Dáy Zezú ré ɔ̧́ a bazeŋ a kuriri, a kála.

Zezú ŋgɛ́rɛ njuku têm ɓéké

(Mrk 1:21-28)

31Zezú ɗere sé Kapɛrnahûm gáŋ pû a há̧na ka tísiri a Galilê, a gé tɔ́ʼɔhɛ̧ hí̧ njukuri a sêe ɔʼɔ. 32Njukuri too kaw yér, ɓay tûl tɔ́ʼɔɓay a mɛ̌, ɓayhí̧lé ɓayké mɛ̌ e ka kpɔ́ŋa mambá. 33Dáy, a ɓil vûn mára̧ a Juyífri nɔ́, njuku a há̧na erú, e ka têm ɓéké ka mûn nɛ́, ké vbá̧nzáʼa ɓá gbénáké a sa: 34«Aa! Zezú gun Nazarɛ́t, a̧hí̧ mɔ zi ziŋ rú lé? Mɔ gí gbɛʼɛrɛ rú lé? Mi tu mɔ́ ɓá béláké: Mɔ ɓá njuku ka gí a gel a Gáŋvbôn.» 35Zezú pom têm ɓéké a sa: «Mɔ́ tu nzáʼa, a mɔ́ tɛ̧́ ka mûn a njuku nɛ́!» Têm ɓéké, mbí njuku ráy vbú siri a mbɛl a njukuri too, a tɛ̧́ ka mûn nɛ́, táŋ niŋ nɛ́ ɓékéhɛ̧. 36Njukuri too kaw yér, a vbí há̧narí̧ a bazeŋ a kuriri a sa: «Mára̧ ɓay a sí̧ pɔ̧́nɔ́ lé? Njuku nɛ́ pom têm ɓéké ka kpɔ́ŋa lé, ké lá nzɛ́ʼɛ a tɛ̧́!» 37Nǎŋnɔ́, ɓay a Zezú magél too, a ɓil kawké.

Zezú ŋgɛ́rɛ njuku záŋmári̧ ɓá ŋgɛ̧́náké

(Mat 8:14-17; Mrk 1:29-34)

38Zezú uru a ɓil vûn mára̧ a Juyífri, a sé ɓil hɛlɛ a Simɔŋ. Máfáy a Simɔŋ erú ka záŋmá pélé. Dáy, kú vú hí̧ Zezú ɓá ké ŋgɛ́rɛ nɛ́. 39Nǎŋnɔ́, ké gé ɗíŋ tûlé, a saɓay ɓá ŋgɛ́rɛ́ké hí̧ záŋmá, dáy záŋmáké tɛ̧́ ka mûn nɛ́, núnmbɛ̧́nɛ́ a goló, máfáy a Simɔŋ uru a ɓá hɛ̧sɔ̧́na hí̧ kuriri.

40Gelka sêe kaw ríŋa, njukuri too ka erú ka njuku záŋmári̧ a gel a kuriri, mára̧ záŋmá a sí̧ lé too, a kú ɓá kuriri gí gel a Zezú. Ké ɓá ndɔ̂ʼɔ kɔ̧ tûl a kuriri mbêw mbêw too a ŋgɛ́rɛ kuriri. 41Têm ɓékéri kɔ́, tɛ̧́ ka mûn a njuku záŋmá a fékéri ɓá ŋgɛ̧́náké, ka vbá̧nzáʼa a sa: «Mɔ́ ɓá Gun a Gáŋvbôn!» Dáy Zezú pom kuriri ka ŋgɛ́rɛ, a de kuriri saɓay, ɓayhí̧lé kú tu ɓá, ké kaw ɓá Kiris.

Zezú tɔ́ʼɔhɛ̧ a vûn mára̧ a Juyífri

(Mrk 1:35-39)

42Gelka gel táŋ dáy, Zezú tɛ̧́ a ɓil pû sé kaw ka̧ny pû hɛʼɛ. Njukuri ɓá ŋgɛ̧́náké ɛ́ nɛ́, a gé ziŋ nɛ́, a zi ɓay a gé de nɛ́ kaw, ɓay a ké zi ná kála. 43Dáy, Zezú sa hí̧ kuriri: «Belɓá mi sé tɔ́ʼɔ Bélaɓay a Pû Mbây a Gáŋvbôn, a pû a fékéri kɔ́, ɓayké nɔ́, pé Gáŋvbôn pé mí gíy.» 44Nǎŋnɔ́, ké sé tɔ́ʼɔ Bélaɓay lá vûn mára̧ a Juyífri ka e a tísiri a Judé.

Currently Selected:

Luk 4: pnz

Highlight

Copy