Mak 2

Yeso aghəy abúʼiri wa noʼ tem

(Mat 9.1-8; Luk 5.17-26)

1Amaʼazənə uney moʼ si chigə, Yeso gha ŋu Kapenawum, ba zəw kwi yə si gha zaʼa unuʼ. 2Ba zaʼa isugi akə nji zənə amə chama ubəg kaba isəg. Anigə yə mə ighayn inayn Nwiye abú úŋwən. 3Anom ikyugə moʼ beʼe abúʼiri wa iŋu abú uŋwən. 4Ba mə naʼa akə nji zənə amə cha inji abú úŋwən ichigə anigə mbə toʼo ubəg idəm na aba asin zənə Yeso mə akuŋ. Anigə iswiʼiri abúʼiri wa wu igun ukoʼ ŋunə yə mə neŋe igun. 5Amaʼazənə Yeso zən umugə mbə mə nə ibeni fiŋ abú uŋwən, yə ghayn abú abúʼiri wa wu kwi “ŋwə̂ mə nyaba umbə unó iboŋ.”

6Mbə ataʼa ba akə unoʼo moʼ mə awu mbə́ chomo, uni kono ungɨŋ fiŋ uma kwi, 7“Anom uŋunə umə inayn ney da ngiya? U yə jimə Nwiye! Amə ngwa amə aghəy u nyaba unó iboŋ wa ichigə akə Nwiye ma zeʼe!”

8Aba ighara wu, Yeso kyay anó zənə mbə́ mə́ kono ungɨŋ fiŋ ma anigə u biri abú úŋwən kwi, “Mbən mə kono ukudu unó ŋunə ungɨŋ itən fiŋ da ngiya?” 9Amə zəŋ amə zaba, “Ighayn abú abúʼiri wa kwi mə nyaba umbə unó iboŋ kə ighayn kwi noʼo itəm atey inum ungwə ukoʼ iyeŋ? 10Akinine ayə tey inen kwi Ŋwə̂ Wa yə nə ikay akə igun isəg i nyaba unó iboŋ.” Amaʼazənə yə ghayn nigə, yə ghayn abú abúʼiri wa wu kwi 11“Ayə ghayn inigə, noʼo atey inum ungwə ukoʼ iŋu unuʼ!” 12wa wu noʼ itəm atey inum ukoʼ ma idu isəg ifigi ba ujum. Anó wu chigə úŋwən ba mbənə mbə́ mə́ awu anigə mbə yere Nwiye ghayn kwi “Chama mba di si noʼo zən ngwa ukudu unó ŋunə!”

Yeso tiya Levi

(Mat 9.9-13; Luk 5.27-32)

13Yeso gha ŋu iyad animini Galeli. Ikwiy ba ŋu ikuw uŋwən awu anigə uti ni taʼa úŋwən. 14Umugə yə mə iyeŋ ŋuw, yə zən Levi ŋwə̂ Afiyus nu yə chomo ungɨŋ na zənə mbə́ mə́ num ə ukab tag. Yeso ghayn abú uŋwən kwi, “Niŋe inyi jim.” Aba ighara wu Levi noʼ iniŋe anjim ma.

15Amaʼazənə yə chomo imə jəgə ungɨŋ na Levi ni mbə məŋə-anó ma, foro mbə fere ukab tag nə ba unó iboŋ nə ba chini nu mbə niŋe anjim ma. 16Amaʼazənə mbə́ taʼa ba akə unoʼo nə mbə Farasay zən umugə Yeso mə jəgə ni ba unó iboŋ foro ni ba mbənə umə fere tag, anigə mbə biri abú mbə məŋə-anó ma kwi, “Aton zənə Yeso mə jəgə nə mbə fere tag foro nə ba unó iboŋ amə da ngiya?”

17Amaʼazənə Yeso zəw anó zəŋ, yə ghayn abú úŋwən kwi, “Chama wa ŋunə umə ikay umə kaba wa ifuʼ amə ba mbənə umə sɨgə. Cha adi zaʼa aŋu itiya ba mbənə ukəʼərə mə zaʼa itiya amə ba mbənə umə aghəy unó iboŋ.”

Ibiri da anó ijiyə injey

(Mat 9.14-17; Luk 5.33-39)

18Mbə məŋə-anó Jon ŋunə yə mə naʼa une ni ba Farasay mə́ ijiyə injəy, anigə ba moʼ ŋu ibiri abú Yeso kwi, “Aton zənə mbə məŋə-anó Jon nə mbə Farasay mə ijiyə injey chama umə məŋə-anó mə ijiyə uma amə da ngiya?”

19Yeso ywiri abú úŋwən kwi, “Mbən mə kaba kwi ba mbənə u tiya úŋwən akə inəma uchomo injəy nu unóm ugən mə nə úŋwən? Cha umi chomo injəy ighari umə bugə nə úŋwən. 20Asɨmə aney yi zaʼa nu umi num anóm ugən wu akaʼa uma aney wu yi bə kəʼə umbi ijiyə injey.”

21“Cha wa moʼ mə num ma aba ndwi fey ikən ubəg akə anun ndwi maʼa ubə ghəy nigə, aba ndwi fey wu ayi ighəy ndwi wu mara pəŋe ighəy ubəg wu mara kuwəy. 22Kə cha wa moʼ umə num ma unoʼ uzuw izi akə anun cha nu utana akə igob nyə̂, umbə aghəy nigə unoʼ wu umbi toʼo icha wu anigə u yi isam unoʼ ni icha yə kəʼ izi unoʼ uzuw amə ungɨŋ icha ifey.”

Ibiri da aney aku ba Jû

(Mat 12.1-8; Luk 6.1-5)

23Aney aku ba Jû moʼ, Yeso nə mbə məŋə-anó ma mə chigə ungɨŋ imbayn ukudu ikwi moʼ umə tiya akə wheat. Umugə mbə mə iyeŋ ŋuw, mbə məŋə-anó ma mə pa ikwi moʼ. 24Mbə Farasay biri abú Yeso kwi, “Aton zənə umbə məŋə-anó mə aghəy anó ni cha umba unoʼo mə tey ma kwi uni aghəy aney aku amə da ngiya?”

25Yeso ywiri kwi “Cha mbən di si foŋo ngwen anó zənə Dafid aghəy nə ba mbənə mbə́ mə́ nə uŋwən Amaʼazənə mbə mə́ zaŋa injey mə kaba aghəy ijəgə? 26Amaʼazənə Abiathar mə atəw ambəŋ Nwiye, Dafid ŋu inyi ungɨŋ na Nwiye anigə ijəg ingəŋ zənə mbə́ siy akə aghəy ifa abú Nwiye inaʼ imoʼ abú ba mbənə mbə mə́ nə uŋwən nu noʼo mə tey kwi aba ba mbənə umə faʼa ambəŋ Nwiye umə jəgə ingəŋ wu.”

27Anigə Yeso ghayn abú úŋwən kwi, “Nwiye sɨy aney aku amə da ba chama yə di sɨy ba amə da aney aku.” 28Anigə Ŋwə̂ Wa yə́ nə ikay ighəy anó zənə u wuʼi kaba aney aku.

Currently Selected:

Mak 2: NGI

Highlight

Copy