Mak 3

Yeso zwey anóm ni abugə ma ku

(Mat 12.9-14; Luk 6.6-11)

1Akə aney chini, Yeso wene iŋu inyi ungɨŋ ina ibumi ba Jû. Anom moʼ mə awu ni abugə ma si iku 2Ba moʼ mə́ awu ungɨŋ ni ney Yeso izən kwi u waʼa izwey anóm wu aney aku. Mbə́ mə́ iney nigə da izi usaʼa igun ma. 3Yeso ghayn abú anóm ŋunə abugə ma kuw kwi, “duw zaʼa imbey akəŋ” 4Amaʼazənə yə́ ghayn nigə, yə biri abú ba wu kwi, “Umba unoʼo mə tey kwi mba ighəy ichuŋ aney aku kə kwi mba aghəy ibɨy? Umə tey kwi mba zwey wa kə kwi uzwere wa? Ba wu chuʼ izi.” 5Yeso ney úŋwən ghaba isiy itəm. Wə aghəy nigə ighayn abú anóm wu kwi, “Sa injə abugə.” Wə sá anigə abugə ma aboroy. 6Ba Farasay mbənə mbə́ mə́ awu du aba ighara awu iŋu yimi ufere nə ba mbənə mbə́ mə́ aba Herod, anigə u tana umugə umi zwere Yeso.

Ikwiy ba niŋe anjim Yeso

7Yeso nə mbə́ məŋə-anó ma du iŋu iyad animini Galeli. Unóŋ ba ŋu aboʼo uŋwən. Ba wu noʼo Judeya, 8a Yerusanem, a Idumeya, usin mbənə umə anjen ugwi Jodan, foro ungɨŋ usin mbənə umə iyad Tayi foro Sidon. Ba mbəŋ ujum ŋu abú Yeso damugə mbə́ si zəw unó mbənə Yeso mə́ ighəy. 9#Mak 4.1; Luk 5.1-3Umugə ikwiy ba wu mə naʼa, Yeso ghayn abú mbə məŋə-anó ma kwi, u tana abaŋ ugwi abú uŋwən nji ba wu bi mə paʼa uŋwən. 10Wə si zwey ba nanaʼ anigə zigə ghəy kwi ba jum mbənə mbə́ mə́ sɨgə uni twiʼere ŋu da ibira uŋwən. 11Amaʼazənə ba mbənə uzugə iboŋ umə ungɨŋ inyo ma zən uŋwən, mbə́ gow asey ifigi ma ikyayn akə ikay ghayn kwi, “Ngwə mə Ŋwə̂ Nwiye!”

12Yeso chede Azugə iboŋ wu kwi ka u ghəy ma kwi ba kyay ma wa ŋunə amə uŋwən.

Yeso choʼ ba tom Kristo ighum cho bigə

(Mat 10.1-4; Luk 6.12-16)

13Amə akə amaʼa chini, Yeso koʼ iŋu igun ugum nə anóm mbənə yə kaba anigə yə num anóm wu iŋu nə úŋwən. 14Anigə, yə choʼo anóm ighum cho bigə akaʼa mbə́ anóm wu nu yə naʼ ukum abú úŋwən kwi ba tom Kristo, yə ghayn abú úŋwən kwi, mə choʼo ngwen kwi mbən mə nə umugə, a yi nibi cha ngwen isəg kwi mbən ŋu ni ghayn inayn Nwiye, 15anigə nibi naʼa ikay inen imə chiyə uzugə iboŋ. 16Ba-tom mbənə Yeso choʼo amə Sayimon ŋunə Yeso naʼa ukum chini abú uŋwən kwi Pita 17Jems nə unya anóm ma Jon nu amə buŋ Zebedi (Yeso naʼa ukum abú úŋwən kwi Bonerges, aton akə ukum wu amə kwi, buŋ mbənə umə kyay ni imbeŋ) 18Uchini amə́ Andrew nə Filip, Batoloməw, Mathew, Tomas, Jems ŋwə̂ Afiyus, foro nə Thaddaeus, Sayimon ŋunə yə mə kama foro nə 19Judas Iskariyod ŋunə yə fənə Yeso.

Ibiri da asin zənə ikay Yeso mə noʼo akuŋ

(Mat 12.22-32; Luk 11.14-23; 12.10)

20Yeso gha iŋu unuʼ. Anigə akama ba fere akə inji zənə amə cha kaba amaʼ abú Yeso nə mbə məŋə-anó ma ijəg. 21Amaʼazənə unebey Yeso zəw anó zəŋ, mbə́ ŋu ínum uŋwən damugə ba mə́ ghayn kwi yə si ibigə. 22#Mat 9.34; 10.25Mbə ataʼa ba akə unoʼo nu mbə swiʼi izaʼa a Yerusanem mə́ ghayn kwi ufon uzugə iboŋ yə ungɨŋ inyo ma. Amə ufon akə uzugə iboŋ wu mə naʼa ikay abú Yeso kwi uni chi uzugə iboŋ.

23Amaʼazənə mbə ghayn nigə, Yeso tiya úŋwən inayn abú úŋwən akə inayn maʼa kwi, “Ami ngiya amə aghəy satan agha fuw uzugə ma ungɨŋ ba? 24Abey moʼ abə ghaba akə uba ubigə sə zoŋo uma uma kyayn kwi abey wu ayi fwayn. 25Abə mə kwi unebey moʼ bə ghaba akə uba bigə sə zoŋo uma uma kyay kwi unebey wu uyi fwayn. 26Abə mə kwi anó fon satan abə́ ghaba akə uba bigə chama ami tiŋe anigə ayi fwayn bi si tənə nigə akə ighari feyn.”

27“Chama wa moʼ umi inyi ungɨŋ ina wa kaka inum ughəy ma. Ubə mi ghəy nigə, u yi dey kod wa wu ki feyn ughəy ma.”

28“Ayə ghayn inen akə asiʼ kwi Nwiye yi nyaba unó iboŋ ba foro nə ajimi zənə ba mə jimə Nwiye 29#Luk 12.10asɨmə wa ŋunə umə jimə Azugə zayn zayn cha Nwiye mi noʼo waʼ unó iboŋ ma damugə wa wu si aghəy anó iboŋ nu ami itəni akə ighari feyn.” 30Aton zənə Yeso mə ghayn unó mbəŋ amə kwi ba mə ghayn kwi, “uzugə iboŋ mbə inyo ma.”

Yeso ghayn wa ŋunə amə unya anóm ma nə ingwo ma

(Mat 12.46-50; Luk 8.19-21)

31Ingwo mbi Yeso foro nə inya anóm ma pey yi təm isəg anigə mbə cha wa kwi u tiya Yeso. 32Ikwiy ba zənə yə akad Yeso izi ugha ghayn abú Yeso kwi, “Ungwə ingwo nə umbə unya anóm mbə isəg kaba ayə.” 33Yeso biri abú úŋwən kwi, “Umbuŋ ingwo nə inya anóm amə mbi ngwa?” 34Amaʼazənə yə biri nigə, yə ney ba mbənə mbə́ chomo awu ighaba anigə ighayn abú úŋwən kwi, “Mbən aney, amə umbəŋ ingwo nə inya anóm umbəŋ! 35Wa ŋunə umə aghəy anó zənə Nwiye mə kaba amə uŋu unya anóm nə uŋu unya ayey foro nə uŋu ingwo.”

Currently Selected:

Mak 3: NGI

Highlight

Copy