Mak 1

Jon ŋunə yə mə́ naʼa une táná inji abú Yeso

(Mat 3.1-2; Luk 3.1-18; Jon 1.19-28)

1Zi zəŋ amə iti akə ukən uchuŋ da Yeso Kristo Ŋwə̂ Nwiye. 2Zəw! Wa ukən Nwiye Aziya si ŋwaʼanayn kwi,

“A yi cha uŋu wa tom imbey inigə kwi,

Utana inji inigə.”

3Wa moʼ wə kyay ambayn zomo ighayn kwi,

“Mbən tana inji abú Asɨyisəg,

‘Mbən tana izayi inji ma itəm!’”

4Anigə Jon ŋunə yə́ mə́ naʼa une ŋu ambayn zomo ni naʼa une nibi ghayn inayn Nwiye kwi ba waʼ unó iboŋ uma inum une boʼo Nwiye mi nyaba unó iboŋ uma. 5Ba mbənə mbə́ mə́ ungɨŋ aba abey Judeya foro nə ba jum mbənə mbə́ mə́ Yerusanem mbə́ du ŋu kuw Jon. Mbə́ beni unó iboŋ ma anigə wə́ naʼ une abú úŋwən ungɨŋ ugwi Jodan 6Jon zi ndwi tənə utana akə nyoŋ Kaməl, itiŋe utwi gob itin ma, anigə yə mə́ koro igweme iniya ijəw aka. 7Jon mə ghayn ukən Nwiye kwi, “Wa moʼ yə zaʼa inyi injim nu ukwey chigə aŋu cha adi koʼoro aŋu kaba iguni aŋu iza uniʼ utabay ma 8ayə́ naʼa amə une inen asɨmə u yi cha amə Azugə zayn zayn inen.”

Yeso num une satan kwaʼara uŋwən

(Mat 3.13–4.11; Luk 3.21, 22; 4.1-13)

9Aba amaʼ wu, Yeso noʼ aba abey Nazared a Galeli, iŋu abú Jon anigə Jon naʼa une abú uŋwən ungɨŋ ugwi Jodan 10aba amaʼazənə yə du ungɨŋ ugwi wu, yə zən azobo fiʼə anigə Azugə ni swiʼi izaʼa igun ma ni buŋ 11#Mat 3.17; 12.18; Mak 9.7; Luk 3.22igəg moʼ gham azobo ighayn kwi, “Ngwə mə uŋu ŋwə̂ nu a wuʼi kwaʼa azəd inyi fiŋ yə wuʼe ma nə ngwə.”

12Aba ighara wu Azugə num uŋwən iŋu ungɨŋ imbayn zomo. 13Wə chomo ungɨŋ imbayn zomo akə uney ighumi kyugə anigə satan ni kwaʼara uŋwən inyə̂ nya nya mə nibə awu ungɨŋ imbayn zomo asɨmə mbə angəd mə inaʼa ughəy mbənə yə mə kaba.

Yeso tiya anom ikyugə nu mbə́ mə́ ibiya su

(Mat 4.12-22; Luk 4.14, 15; 5.1-11)

14Amaʼazənə mbə si zi Jon andəŋ, Yeso ŋu a Galeli ni ghayn ukən uchuŋ da Nwiye. 15#Mat 3.2Wə mə́ ghayn kwi, “Amaʼ si koʼ anó ufon Nwiye si tinə mbən beŋe itən fiŋ ibeni ukən uchuŋ uŋu!”

16Amaʼazənə Yeso mə chigə iyad animini Galeli, yə zən anom ubigə nu umə ibiya su akə umbujaŋ, amə Sayimon nə unya anom ma Andrew. 17Yeso zən nigə ighayn abú úŋwən kwi, “Mbən niŋe inyi injim ayə tey mugə amə ghəy mbən ghəy kwi ba niŋe inyi jim.” 18Aba ighara wu, mbə́ noʼ isayn umbujaŋ uma iŋu aboʼo Yeso.

19Amaʼazənə yə nyaʼa iyeŋ iŋu imbey yə zən Jems nə unya anom ma Jon nu amə buŋ Zebedi mbə́ mə́ ungɨŋ abaŋ ugwi sə tana umbujaŋ ma. 20Amaʼazənə yə zən úŋwən nigə, yə tiya úŋwən. Mbə́ noʼ isayn mbaʼ ma Zebedi ungɨŋ abaŋ ugwi wu nə ba mbənə yə num kwi u zaʼa faʼ abú uŋwən. Mbə sayn nigə iŋu aboʼo Yeso.

Yeso chi Azugə iboŋ ungɨŋ anom moʼ

(Luk 4.31-37)

21Yeso nə mbə məŋə-anó ma ŋu a Kapenawum. Amaʼazənə aney aku ba Jû koʼo, yə ŋu inyi iti ni ataʼa ba ungɨŋ na ibumi ba Jû zənə yə́ mə́ awu 22#Mat 7.28, 29Ba mbənə mbə zəw unó wu, yere unó mbənə yə mə́ tey damugə cha yə mə́ tey ma numugə ba mbənə umə ataʼa ba akə unoʼo mə́ itey, asɨmə yə mə tey ni wa ŋunə umə ni ikay ighəy nigə, 23aba ighara wu anom moʼ nu Azugə iboŋ mə inyo ma yə mə awu ungɨŋ na ibumi ba Jû wu. 24Ukyay akə ikay ghayn kwi, “Yeso wa Nazared amə anó ngiya ngwə mə kaba nu umba, ngwə zaʼa iniy ngwa? Mə kaŋa kyayn wa ŋunə ngwə mə ŋwen ngwə mə wa Zayn Zayn Nwiye!”

25Yeso nya Azugə iboŋ wu ighayn kwi, “Chuʼ izey, duw ungɨŋ inyo ma!”

26Azugə iboŋ wu nyiʼiri wa wu akə ikay ikyayn idu ungɨŋ inyo ma. 27Ba jum mbənə mbə́ mə́ awu yere, iti ni biri abú wa feyn feyn kwi, “Zəŋ amə ngiya? Amə kudu inji fey imə ataʼa ba? Anom ŋunə uyə ni ikay inayn kaba abú uzugə iboŋ u zəw uŋwən.” 28Aba ighara wu, ukən da Yeso saŋa ungɨŋ usin ujum mbənə umə́ Galeli.

Yeso zwey ba nanaʼ

(Mat 8.14-17; Luk 4.38-41)

29Aba ighara wu, Yeso nə mbə məŋə-anó ma foro Jems ni Jon mbə du ungɨŋ ina ibumi ba Jû, iŋu ungɨŋ na zənə Sayimon nə Andrew mə chomo. 30Unyuŋ Sayimon mə igun ukon isɨgə ufə, amaʼazənə Yeso inyi ungɨŋ na awu, mbə́ ghayn abú uŋwən da isɨgə ma. 31Yeso ŋu iyad ma pey yi yimi abugə ma kwi u noʼo. Wə́ noʼ ichomo atey, ufə wu məy anigə yə noʼ inaʼa ughəy jəgi abú úŋwən.

32Akə injaʼ wu, amaʼazənə nyama chugi si ghaba, mbə́ num ba isɨgə ujum foro ni ba mbənə uzugə iboŋ mə ungɨŋ inyo ma iŋu abú Yeso. 33Ba jum ungɨŋ asin wu ŋu fere ifigi na wu 34Yeso zwey ba nanaʼ mbənə mbə́ mə́ nə ukudu isɨgə nanaʼ. Wə́ nibi chi uzugə iboŋ nanaʼ ungɨŋ inyo ba. Cha yə́ beni ma kwi uzugə iboŋ wu nayn damugə mbə kyay wa ŋunə amə uŋwən.

Yeso ghayn inayn Nwiye a Galeli

(Luk 4.42-44)

35Afəfəb nə imbiri aney kuŋ, Yeso du iŋu asin zənə amə cha ba awu. Wə ŋu awu iŋu ichaʼara Nwiye. 36Sayimon ni ba mbənə mbə́ mə́ nə uŋwən du iŋu kaba uŋwən. 37Amaʼazənə mbə zən uŋwən mbə ghayn abú uŋwən kwi, “ba jum mbə kaba yə.”

38Yeso ywiri abú úŋwən kwi, “Mba yi ŋu usin mbənə umə iyad iyad akəŋ da ami ghayn inayn Nwiye awu, a mə aton zənə mə zaʼa.” 39#Mat 4.23; 9.35Anigə yə yeŋ usin ujum ungɨŋ Galeli yə ghayn inayn Nwiye ungɨŋ na ibumi ba Jû nibi yə fuw uzugə iboŋ.

Yeso zwey wa nu yə mə nə akyuŋ

(Mat 8.1-4; Luk 5.12-16)

40Anom moʼ nu yə mə isɨgə akyuŋ ŋu abú Yeso pey yi boʼo ubugə abú uŋwən ighayn kwi, “Ngwə bə wuʼ ngwə ghəy inyi inyo zayn.”

41Yeso ney uŋwən ikənə anigə isa abugə ma ibira uŋwən ighayn abú uŋwən kwi, “Mə wuʼ ighəy nigə iji inyo zayn!” 42Aba ighara wu, akyuŋ wu məy.

43Yeso cha uŋwən kwi uŋuw anigə ichede uŋwən kwi, 44“Zəw! Ighayn yə anó zəŋ abú wa moʼ asɨmə ŋuw itey inji inyo abú wa faʼa ambəŋ Nwiye da ba kyay kwi ngwə si zayn. Anigə, naʼa aghəy ifa zənə mose ghayn.” 45Asɨmə anom wu mə iyeŋ yə saŋa anó wu usin ujum. Zəŋ ghəy kwi ka Yeso gha inyi ma asin chini asaŋ asaŋ. Anigə yə sə chomo amə usin mbənə cha ba awu. Ba mə́ noʼo usin ujum ŋuw kuw uŋwən akuŋ.

Currently Selected:

Mak 1: NGI

Highlight

Copy