Matəw 14

Inji zənə Jon ŋunə yə mə naʼa une kuw

1Akə amaʼazənə Yeso mə Kapenahom, Herod ŋunə yə mə́ tumə abey Galile zəw anó da uŋwən. 2Amaʼazənə yə zəw nigə, yə ghayn abú ba faʼa ma kwi, “Wa ŋunə amə Jon ŋunə yə́ mə́ naʼa une u si zəmə, amə aton zənə umə nə ikay ighəy uyere unó.” 3#Luk 3.19, 20Herod ghayn ney damugə yə si ghayn u ibiya Jon ŋu zi andəŋ da Herodiyas nu amə uyey unya anóm ma anigə Herod chi inam aghəy ma. 4Jon mə kaŋa ghayn abú Herod kwi, “Cha adi kəʼərə kwi ngwə nam Herodiyas.” 5Anigə, Herod mə kaba izwere Jon, asɨmə yə́ mə́ goro ma ba damugə ba beni kwi Jon amə wa ukən Nwiye.

6Aney zənə Herod mə kaʼa ubu ma, ukwere Herodiyas bin ifigi ba jum mbənə Herod kaʼa, anigə yə ghəy fiŋ Herod boŋ azəd. 7Anigə yə́ məʼe ma ikaʼ akwere wu kwi, iyi na ghəy moʼ zənə u mi biri. 8Ingo ma aghəy uŋwən ghayn abú Herod kwi, “Ayə kaba kwi ngwə naʼa atəw Jon ŋunə u mə naʼa une iniŋ igun abaʼa akaŋ.” 9Amaʼazənə ufon wu zəw anó zəŋ, yə kaŋa kənə. Asɨmə umugə yə́ si meʼe ma ifigi ba mbənə mbə́ mə́ awu, yə́ ghayn kwi u naʼa atəw wu abú uŋwən. 10Anigə yə cha ba kwi u ŋuw isəg atəw Jon ana indəŋ. 11Mbə́ num atəw wu zaʼa igun abaʼaray akaŋ inaʼ abú ŋwə̂ ayey wu, yə num ŋu naʼ abú ingo ma. 12Amaʼazənə mbə́ məŋə-anó Jon zəw anó zəŋ, mbə́ ŋu num atin inyo ma ŋu twayn. Mbə́ twayn nigə iŋu ghayn anó wu abú Yeso.

Yeso jəy ba ichuʼ itɨŋ

13Amaʼazənə Yeso zəw anó zənə mbə́ ghayn da Jon, yə noʼ asin wu ungɨŋ abaŋ ugwi ma zeʼe iŋu asin zənə amə cha ba awu. Amaʼazənə akama ba wu zəw kwi yə si noʼ asin wu, mbə́ noʼ ungɨŋ usin ma iniŋe anjim ma ughəw. 14Amaʼazənə Yeso du ungɨŋ abaŋ ugwi wu iŋu asaŋ, yə zən akama ba. Akənə sugi ungɨŋ fiŋ ma da ba wu. Anigə yə zwey u mbənə mbə́ mə́ isɨgə.

15Amaʼazənə utuʼ udi mə sə zaʼa, mbə́ məŋə-anó ma ŋu pey yi ghayn abú uŋwən kwi, “injəʼ yə sə chigə anigə cha ba moʼ mə chomo akəŋ. Anigə ghayn abə akama ba zəŋ ani ŋuw boʼo iŋu zon aghəy jəgi ungɨŋ usin mbənə umə́ iyad iyad.”

16Yeso ywiri kwi, “Cha aton abú úŋwən imə ŋuw. Mbən naʼa aghəy moʼ abú úŋwən u jəg.”

17Mbə́ ywiri kwi, “Aba ubimi ingəŋ itɨŋ nə su bigə imə ina.”

18Yeso ghayn abú úŋwən kwi, “Mbən num zaʼa inaʼ iniŋ akəŋ.” 19Yə num nigə ighayn abú akama ba wu kwi u chomo igun ufəʼ. Amaʼazənə mbə́ chomo, yə num ubimi ingəŋ itɨŋ nə su bigə wu ney azobo inaʼ yə beni ayə abú Nwiye anigə ibɨʼiri inaʼ abú mbə́ məŋə-anó ma kwi ughaba abú akama ba wu. 20Amaʼazənə mbə́ ghaba nigə, úŋwən uma ujum jəg ikod. Mbə məŋə-anó fere ikəg tənə tə́ buʼi, tə́ sugi ungɨŋ usəŋ ighum cho bigə. 21Anom mbənə mbə́ jəgə mə ŋuw ka ichuʼ itɨŋ. Cha mbə di taŋa uma mbə ayey foro buŋ kuŋe.

Yeso yeŋ igun animini

22Amaʼazənə mbə si jəgə imara, Yeso ghayn abú mbə́ məŋə-anó ma kwi u nyi abaŋ ugwi ni ŋuw imbey anjin animini zi, uŋwən naʼana abú akama ba wu cha ŋuw. 23Amaʼazənə yə si cha ba wu ŋu, yə koʼ iŋu ma ambəŋ igun ugum i chaʼara Nwiye. Asə anjaʼ, yə mə awu ma zeʼe. 24Anigə abaŋ ugwi wu si nyi ŋuw agha sá ungɨŋ ugwi imbaŋ ugwi mə aghəy abaŋ ugwi wu ni bine damugə afim mə tine úŋwən aba ifigi.

25Amaʼazənə isəg mə sə baʼa ikyiʼi, Yeso mə iyeŋ igun animini iŋu kuw úŋwən. 26Amaʼazənə mbə məŋə-anó wu zən uŋwən umə yeŋ igun animini wu, mbə bó ighayn kwi, “Amə uzəg afəb” mbə god ikyay.

27Yeso ghayn abú úŋwən aba ighara wu kwi, “Mbən yimə fiŋ, mbən mə goro ngwən amə umugə.”

28Amaʼazənə yə ghayn nigə, Pita ghayn abú uŋwən kwi, “Asɨyisəg abə mə ngwə, ghayn kwi a yeŋ igun animini izaʼa njigə.”

29Yeso ghayn kwi, “Zaʼa!” Anigə Pita du ungɨŋ abaŋ ugwi ni yeŋ igun animini ŋuw aboʼo Yeso. 30Asɨmə amaʼazənə yə zən afim wu, anəm sey fiŋ ma anigə u ti ni fwayn nyi ŋuw ungɨŋ animini wu. Anigə yə kyay ghayn kwi, “Asɨyisəg chiyə aŋu angəʼ!”

31Aba ighari wu, Yeso sa abugə ma yimi uŋwən, i ghayn abú uŋwən kwi, “Ngwə məŋərə ayə da ngiya? Inji beni fiŋ yə kweʼe.”

32Amaʼazənə mbə nyi ungɨŋ abaŋ ugwi, afim wu sobo. 33Ba mbənə mbə́ mə́ ungɨŋ abaŋ ugwi wu wumini uŋwən ghayn kwi, “Akə asiʼ ngwə mə Ŋwə̂ Nwiye.”

Yeso zwey ba sɨgə á Genesaret

34Amaʼazənə Yeso nə mbə məŋə-anó ma kwene animini wu, mbə ŋu təm á Genesaret. 35Amaʼazənə Ba mbənə umə ungɨŋ asin awu zən uŋwən ikyay, mbə cha ukən ungɨŋ usin ujum mbənə umə́ iyad iyad. Anigə ba num ba isɨgə ma ujum ŋu abú Yeso. 36Mbə boʼo ubugə abú uŋwən kwi, u sayn ba isɨgə wu bira kaba iyad akə ndwi ma. Ba ujum mbənə mbə́ bira, inyo ma boro.

Currently Selected:

Matəw 14: NGI

Highlight

Copy