Matəw 13

Inayn maʼa da wa mbayn

1Aba aney wu, Yeso du ungɨŋ na ŋu chomo iyad animini. 2#Luk 5.1-3Akama ba ŋu fere ikad uŋwən. Yə aghəy u nyi chomo ungɨŋ ukuʼ ugwi. Akama ba wu təm iyad animini. 3Yə ghayn unó nanaʼ abú úŋwən akə inayn maʼa kwi, “Anom moʼ nu umə faʼa ambayn du ŋu kon u aghəy ma. 4Umugə yə mə miyə itɨŋi wu, imoʼ fwayn igun akə inji zənə yə́ mə́ awu ambayn, anigə inen zaʼa biŋi kod. 5Imoʼ fwayn igun akwaʼ nu isey mə awu aba kere, iti wu yabi buwat damugə isəg mə zaba. 6Asɨmə amaʼazənə achugi zaʼa, yə zuʼ ughəy wu anigə tə́ zom damugə cha ighəŋ ma di nyi ŋu asey. 7Itɨŋi moʼ fwayn akaʼa injəŋ, injəŋ wu kwey ikod u ghəy wu. 8Imoʼ fwayn igun isey chuŋ. Tə́ kwey kuwə. Imoʼ kuwə itɨŋi ukɨ feyn, imoʼ kuwə itɨŋi ighumi fəw, imoʼ kuwə itɨŋi ighumi ta.” 9Yeso nwi ghayn kwi, “Wa ŋunə umə mə atoŋ, u zəw!”

Aton akə inayn maʼa wu

10Mbə məŋə-anó Yeso ŋu abú uŋwən pey yi biri kwi, “Aton zənə ngwə mə inayn abú ba akə inayn maʼa amə da ngiya?”

11Yeso ywiri abú úŋwən kwi, “Nwiye si naʼa iwe inen kwi mbən kyay unó mbənə yə noy da anó ufon azobo, asɨmə cha udi naʼa ma iwe wu abú úŋwən.” 12#Mat 25.29; Mak 4.25; Luk 8.18; 19.26Aton akə inayn maʼa zəŋ amə kwi, wa ŋunə umə nə aghəy moʼ, umbi naʼa achini abú uŋwən, anigə uyi mə nə u aghəy nanaʼ. Asɨmə wa ŋunə cha aghəy moʼ abú uŋwən, kaba ŋwə̂ aghəy ŋunə yə mə abú uŋwən umbi mara num. 13Aton zənə mə ghayn unó mbəŋ abú úŋwən akə inayn maʼa amə kwi,

Umbi ney anigə cha umi zən,

Umbi zwaray cha umi zəw, cha utəw ma mi zayn.

14Anó zənə wa ukən Nwiye Azaya ghayn du akə asiʼ abú úŋwən kwi,

“Umbi kaŋa zəw anigə cha utəw ma mi zayn,

Umbi kaŋa ney anigə cha umi zən.

15Damugə fiŋ ba mbəŋ si tu,

Mbə si zine utoŋ nibi ikəbərə aghɨ.

Nji mbə mi zən akə aghɨ, kə utoŋ ma zəw anó kə fiŋ ma kyay anó

Anigə iwene zaʼa iniŋ azwey úŋwən.

16 # Luk 10.23, 24 Asɨmə Nwiye zi aborobod igun inen damugə injən aghɨ yə zən usin umbən utoŋ mbə zəw anó. 17Ayə ghayn asiʼ inen kwi ba ukən Nwiye unanaʼ nu mbə́ mə́ aghəy unó ukoʼoro kaŋa kab izən unó mbənə mbən zən asɨmə cha mbə́ di zən. Mbə́ nibi kab izəw unó mbənə mbən zəw asɨmə cha mbə́ di zəw.”

Yeso toʼoro aton akə inayn maʼa da wa umbayn

18Yeso ŋu imbey ighayn abú mbə́ məŋə-anó ma kwi, “Mbən zəw aton akə inayn maʼa da wa mbayn. 19Ba mbənə umə zəw ukən da anó ufon azobo, anigə cha utəw ma zayn, mbə chomo ni itɨŋi tənə tə fwayn igun inji. Nigə wa iboŋ yə zaʼa fiy anó zənə mbə́ kono ungɨŋ fiŋ ma. 20Itɨŋi tənə tə fwayn igun akwaʼ chomo ni ba mbənə mbə zəw inayn Nwiye, aba ighara wu u num nə iwuʼi. 21Cha inayn wu nyi ma afiŋ uma anji chuŋ, anigə cha u chomo agha sa. Amaʼazənə ingəʼ zaʼa kə unwini inya ghəw ma da inayn wu, aba ighara wu uton inayn wu. 22Itɨŋi tənə tə fwayn akaʼa injəŋ chomo ni ba mbənə u zəw inayn Nwiye, anigə anó imə tumə inyo da u aghəy aki isəg foro da anó umə nə imbon zaʼa kod inayn wu. Anigə cha ukuwə ma itɨŋi. 23Itɨŋi tənə tə ifwayn igun isey chuŋ chomo ni ba mbənə u zəw inayn Nwiye, utəw ma zayn ukuwə itɨŋi. U moʼ kuwə itɨŋi ukɨ feyn, u moʼ kuwə itɨŋi ighumi fəw, u moʼ kuwə itɨŋi ighumi ta.”

Inayn maʼa da ufəʼ ungɨŋ mbayn

24Yeso ghayn inayn maʼa chini abú akama ba wu kwi, “Anó ufon azobo chomo ni wa ŋunə yə ŋu kono ikywi chuŋ ambayn ma. 25Asɨmə amaʼazənə ba mə bune, wa bana ma ŋu kon ufəʼ akaʼa ikywi wu ŋuw ma. 26Amaʼazənə ikywi wu kwey sə sweʼe isaŋ, ufəʼ wu buwat.”

27Anigə ba afaʼa wa mbayn wu ŋu abú uŋwən pey yi biri abú uŋwən kwi, “Masa, ka mba kono ikywi chuŋ ambayn ufəʼ si noʼo awayn?”

28Wa mbayn wu ywiri abú úŋwən kwi, “Amə wa abana aghəy anó zəŋ. Ba afaʼa wu biri abú uŋwən kwi, ‘Ngwə waʼa kaba kwi mba ŋuw choʼo ufəg wu?’”

29Yə ywiri kwi, “Ində! Damugə umugə mbən mi mə choʼo ufəʼ wu, ghara moʼ mbən yi choʼ ikywi moʼ aboʼ. 30Mbən sayn aghəy wu bumə ikwey pey Amaʼazənə umi mə jaŋa. Amaʼa wu, ayə ghayn abú ba mbənə umi mə jaŋa u dey choʼ ufəʼ wu ikod akə iboʼ ituŋ anigə ifere ikywi ŋu cha ungɨŋ ingən.”

Inayn maʼa da ŋwə̂ itɨŋi aghəy

31Yeso ghayn inayn maʼa chini abú úŋwən kwi, “Anó ufon azobo chomo ni ŋwə̂ utɨŋi aghəy nu wa num ŋu kon ungɨŋ mbayn. 32Kanə yə́ mə́ kweʼe chigə itɨŋi ti ujum, asɨmə amaʼazənə yə́ kwey, yə chigə uzad ujum. Anigə inen ŋu ni tana ikəŋ uma akə itab ma.”

Inayn maʼa da afuro

33Yeso ghayn inayn maʼa chini abú akama ba wu kwi, “Anó ufon azobo chomo ni afuro nu ayey num itobo ungɨŋ ŋwə̂ ingəŋ ungɨŋ akaŋ kyay pey Amaʼazənə yə fuw.”

34Yeso ghayn unó mbəŋ ujum abú akama ba wu akə inayn maʼa. Cha yə di ghayn ma anó moʼ abú úŋwən nu uki zi ma inayn maʼa awu. 35Yə aghəy ney da anó zənə wa ukən Nwiye ghayn a duw akə asiʼ kwi,

“A yi inayn abú úŋwən akə inayn maʼa,

ayi ghayn unó mbənə mbə́ noy iti Amaʼazənə Nwiye tana isəg.”

Aton akə inayn maʼa da ufəʼ ungɨŋ imbayn

36Yeso noʼ sayn akama ba wu nyi ŋu ungɨŋ na. Mbə məŋə-anó ma ŋu abú uŋwən pey yi ghayn kwi, “Toʼoro aton akə inayn maʼa da ufəʼ ungɨŋ mbayn ina.”

37Yeso ywiri kwi, “Wa ŋunə yə kono ikywi chuŋ amə Ŋwə̂ Wa. 38Mbayn amə isəg, anigə ikywi chuŋ wu amə ba mbənə umə ungɨŋ anó ufon azobo, ufəʼ amə ba wa iboŋ. 39Wa bana ŋunə yə kono ufəʼ wu amə debere. Amaʼ jaŋa amə amaʼazənə isəg mi nwi, ba mbənə umi jaŋa u ghəy wu amə mbə angəd.

40Umugə umi choʼ ufəʼ wu fere ŋu tuŋ ungɨŋ uwəd, amə nigə ami chomo amaʼazənə isəg mi nwi. 41Ŋwə̂ Wa yi cha mbə angəd ma u ŋu fere u aghəy ujum mbənə umə aghəy kwi ba ni aghəy unó iboŋ, nibi fere ba ujum mbənə umə aghəy unó iboŋ ichi ungɨŋ anó ufon ma, 42anigə umbi maʼ úŋwən ungɨŋ uwəd kaka nu amə asin zənə ba mi mə dey koro asoŋ. 43Anigə, ba mbənə umə aghəy unó mbənə u koʼoro umbi mə bigə ni nyamachugi ungɨŋ anó ufon Mbaʼ uma. Wa ŋunə umə nə atoŋ, u zəw.”

Inayn maʼa da aghəy aka nun nu u noy

44Yeso ghayn inayn maʼa chini abú akama ba wu kwi, “Anó ufon azobo yə nə aghəy aka nun nu wa moʼ noy ungɨŋ mbayn. Wa moʼ ŋu zən aghəy wu yə kəbəre. Iwuʼi sugi ungɨŋ fiŋ ma. Anigə ŋu fənə u aghəy ma ujum ŋu zon mbayn wu.

45Anó ufon azobo yə ni wa iyuŋ nu umə yeŋ yə kaba pel chuŋ. 46Amaʼazənə u zən pel moʼ nu u boŋo chigə, u ŋu fənə ughəy ma ujum ŋu zon pel wu.”

Inayn maʼa da umbujaŋ

47Yeso ghayn inayn maʼa chini abú akama ba wu kwi, “Anó ufon azobo chomo ni umbujaŋ nu mbə maʼa ungɨŋ animini ibiya ikudi su ujum. 48Amaʼazənə umbujaŋ wu si sugi, a maʼa su wu ghəw chi ungɨŋ ugwi. Chomo asey itere su chuŋ zi ungɨŋ usəŋ anigə waʼ itənə cha umə koro.” 49Amə nigə ami chomo aney zənə isəg mi nwi. Mbə angəd mbi zaʼa pey yi chi ba mbənə umə aghəy unó iboŋ akaʼa u mbənə umə aghəy unó chuŋ, 50anigə maʼa úŋwən ungɨŋ uwəd kaka nu amə asin ba mə dey koro asoŋ.

51Yeso biri abú úŋwən kwi, “Mbən si zəw unó mbəŋ ujum umbən utəw zayn?” Mbə ywiri kwi, “Aŋ.”

52Anigə Yeso ghayn abú úŋwən kwi, “Anigə amə kwi, mbə taʼa ba akə unoʼo ujum mbənə u si kweme anó da anó ufon azobo mbə chomo ni wa na ŋunə u chi u aghəy fey nibi chi unun u aghəy ungɨŋ ingən ma.”

Ba mbənə umə Nazared á ton Yeso

53amaʼazənə Yeso si ghayn inayn maʼa wu mara, yə noʼ asin wu. 54Amaʼazənə yə́ ŋu pey ungɨŋ abey ma, yə mə taʼa ba ungɨŋ na buni ba Jû anigə ba mbənə mbə́ zəw unó wu yere. Ibiri kwi, “Yə num ukudu iwe ŋunə nə ikay i aghəy uyere unó mbəŋ awayn? 55Ka uŋwən mə ajoŋ kapenta? Aka ukum ingo ma amə Meri? Aka unya anóm ma mə Jems, Josef, Sayimon foro Judas? 56Aka unya ayey ma ujum mbə akəŋ nə umba? Yə si num unó mbəŋ ujum awayn?” 57#Jon 4.44Mbə biri nigə iton uŋwən.

Asɨmə Yeso ghayn abú úŋwən kwi, “Ba mbə wumine wa ukən Nwiye usin ujum asɨmə cha umə wumine uŋwən ungɨŋ asin ma foro ungɨŋ unebey ma.” 58Cha yə aghəy ma ayere anó moʼ awu damugə amə cha ibeni fiŋ abú úŋwən.

Currently Selected:

Matəw 13: NGI

Highlight

Copy