Matəw 15

Inji unó umbaʼ imbey

1Ba Farasay moʼ foro mbə́ taʼa ba akə unoʼo noʼo Yerusanem ŋu abú Yeso anigə ibiri abú uŋwən kwi, 2“Aton zənə umbə məŋə-anó kə wumine uma nji unoʼ tənə umbaʼ imbey naʼa abú úŋwən amə da ngiya? Cha umə səw ubugə akə nji zənə ikoʼoro ki jəg anjizənə unoʼo tey!”

3Yeso ywiri abú úŋwən kwi, “Aton zənə mbən ton ikɨy Nwiye si num amə itən nji unó amə da ngiya? 4Damugə Nwiye ghayn kwi, ‘Wumini ungwə mbaʼ Nə ungwə ingo,’ anigə ‘Wa ŋunə u zi indon atəw mbaʼ ma kə atəw ingo ma umbi zwere uŋwən.’ 5Asɨmə mbən yə taʼa ba kwi, wa mbə mə́ nə ghəy moʼ nu amə ghəy uywere mbaʼ ma kə ingo ma awu, anigə u ghayn kwi, ‘Ghəy zəŋ amə iyi Nwiye’ 6Cha úŋwən mi wumine ma mbaʼ uma, akə nji zəŋ, mbən sayn ikɨy Nwiye da inum itən nji unó.” 7U mbən ba figə unó! Wa ukən Azaya ghayn asiʼ amaʼazənə yə ghayn anó da ŋwən kwi,

8“Nwiye ghayn kwi ‘Ba mbəŋ mbə wumini aŋu akə uchəw uma,

Asɨmə fiŋ uma tə agha sa iniŋ.

9Cha aton abú úŋwən imə wumine aŋu,

damugə umbə taʼa amə unoʼo ba ni kwi amə umbəŋ unoʼo.’”

Ughəy mbənə amə aghəy kwi ka wa zayn ma

10Yeso tiya akama ba zənə yə mə́ awu u ŋu abú uŋwən, anigə u ighayn abú úŋwən kwi, “Mbən zəw umbən utəw zayn. 11Akama aghəy zənə amə nyi uchəw wa amə aghəy kwi ka wa zayn ma, asɨmə amə anó zənə amə duw chəw wa nu amə ghey kwi ka wa wu zayn ma.”

12Mbə́ məŋə-anó Yeso ŋu abú uŋwən pey yi ghayn abú uŋwən kwi, “Ngwə kyayn kwi ba Farasay sey itəm akə anó zənə ngwə ghayn?”

13Yeso ywiri kwi, “Aghəy feyn feyn zənə uŋu Mbaʼ anəŋ azobo ki kono ma umbi choʼ akə ighaŋ. 14#Luk 6.39Imə tumə ayə inyo da úŋwən! Úŋwən mə ifəg nu umə itey inji abú ifəg chini. Ufəg mbə sə itey inji abú ifəg chini, úŋwən uma ujum umbi fwayn ungɨŋ ubəg.”

15Pita ghayn abú Yeso kwi, “Saʼara inayn zəŋ iduw zayn ina.”

16Yeso biri abú úŋwən kwi, “Cha umbən utəw di si zayn uma? 17Mbən ki kyay ngwən kwi ghəy zənə amə nyi uchəw wa ayə ŋuw ungɨŋ ibum ma anigə du ungɨŋ inyo ma? 18#Mat 12.34Asɨmə unó mbənə umə duw uchəw wa umbə noʼo ungɨŋ fiŋ anigə amə unó wu umi aghəy cha wa wu mi zayn. 19Damugə ungɨŋ fiŋ wa, amə awu ikono iboŋ imə noʼo ighəy kwi u zwere wa, ineŋe uyey kə unom wa chini, imə jəgə isəg, iji, ifigə uno, foro anó ni mə chiŋe ikum ba. 20Amə unó mbəŋ umə aghəy kwi ka wa zayn ma. Asɨmə ijəg nu cha ngwə səw ayə umbə ubugə numugə umə ghayn kwi ngwə aghəy nigə, cha izi zəŋ mə aghəy ma kwi ka wa zayn ma.”

Anó da ibeni fiŋ ayey moʼ

21amaʼazənə Yeso noʼo Galeli, yə ŋuw aba abey Tyre nə Sidon. 22Ayey kana moʼ mə chomo aba abey wu anigə u ŋu abú Yeso. Ayey wu pey boʼo abú uŋwən idey kwi, “Asɨyisəg ŋwə̂ Dafid ngwə kənə akə aŋu! Azugə iboŋ yə inyo uŋu ukwere, uyə zəw angəʼ azəd.”

23Asɨmə cha Yeso ywiri ma anó moʼ abú uŋwən. Mbə məŋə-anó Yeso ŋu abú uŋwən pey yi ghayn kwi, “Fuw uŋwən, uyə yeŋ ita injim yə joʼo azəd.”

24Yeso ywiri kwi, “Nwiye cha aŋu aba abú ba Izre mbənə uchomo ni injəg tənə inimi.”

25Ayey wu ŋu gow ughəw ma ghayn kwi, “Masa, ywere aŋu.”

26Yeso ywiri kwi, “Cha a di boŋ kwi u num aghəy jəgi buŋ maʼ abú ibəw.”

27Ayey wu ywiri kwi, “Masa, amə asiʼ, asɨmə ibəw tə jəgə kaba ikəg tənə u mə fwayn igun agayi umbaʼ uma.”

28Yeso ywiri abú ayey wu kwi, “Ngwə mə ayey nu ibeni fiŋ ka! Anó zənə ngwə mə kaba umbi aghəy inigə.” Aba ghara wu isɨgə ŋwə̂ ma boro.

Yeso zwey ba nanaʼ

29Yeso noʼo asin wu iyeŋ iyad animini Galeli. Yə koʼ iŋu igun ugum pey yi chomo asəy. 30Amaʼazənə yə mə awu, akama ba num iguni ba, ifəg u buʼiri ba, ba cha umə inayn, ni ba isɨgə chini nanaʼ ŋu abú uŋwən pey yi niŋe úŋwən iyad ughəw uma. Anigə yə zwey úŋwən. 31Ba mə məŋənə uma Amaʼazənə mbə́ zən ba mbənə cha mbə́ mə́ inayn u mə inayn, ubuʼuri ba u yeŋ, iguni ba noʼ təm, ifəg u zən usin, anigə úŋwən yere Nwiye ba Izre.

Yeso jəy ba achuʼ ikugə

32Yeso tiya mbə məŋə-anó ma kwi u zaʼa anigə ighayn abú úŋwən kwi, “A yə kənə akə ba mbəŋ damugə mbə́ si chomo nə umugə akə unəy ta anigə cha aghəy moʼ abú úŋwən ijəg. Cha amə kaba icha aŋu úŋwən uŋuw nu cha a naʼa aŋu aghəy moʼ abú úŋwən kwi ujəg. Damugə ighari moʼ inəg yi ghəy úŋwən anji umugə umə ŋuw unuʼ.”

33Mbə məŋə-anó wu biri kwi, “Mba ni num ingəŋ awayn akə asin zeʼe zəŋ nu imi koʼ abú ba mbəŋ ujum?”

34Yeso biri abú úŋwən kwi, “Amə ubimi ingəŋ səʼe umə inen?”

Mbə ywiri kwi, “Ba wu nə ubimi ingəŋ isambigə nə buŋ mbin su moʼ.”

35Yeso ghayn abú akama ba wu kwi uchomo asey. 36Anigə yə nu ubimi ingəŋ wu isambigə nə su wu, naʼa yə beni ayə abú Nwiye, bɨʼiri inaʼ abú mbə məŋə-anó ma, anigə mbə məŋə-anó ma num inaʼ abú akama ba zənə yə mə wu. 37Úŋwən uma ujum jəg ikod. Mbə məŋə-anó were ikəg tənə tə buʼe isugi ungɨŋ usaŋ isambigə. 38Unun ba ŋunə yə jəgi amə anóm ichuʼ ikugə, cha mbə di taŋ uma ayey foro buŋ. 39Amaʼazənə Yeso si cha akama ba wu aŋu, úŋwən nyi ukuʼ ugwi iŋu aba abey Magadan.

Currently Selected:

Matəw 15: NGI

Highlight

Copy