Luk 19

Yeso nə Zakyus

1Yeso nyi mə chigə a Jeriko. 2Anom moʼ mə awu nu ukum ma mə Sachaeus. Wə mə wa nə imbon. 3Wə mə kaba nji i zən Yeso asɨmə yə mə wa tum anigə amə cha ma nji abú uŋwən izən damugə ba mbənə mbə́ mə́ yeŋ aboʼo Yeso mbə́ mə́ nanaʼ. 4Anigə yə noro iŋú imbey pey yi koʼo akə azad sikamo boʼo izən uŋwən. Damugə Yeso mə ŋu chigə akə inji wu. 5Amaʼazənə Yeso pey asin wu, yə ney aneŋ izən uŋwən. Wə ghayn abú uŋwən kwi, “Sachaeus yabi swiʼi damugə ayi chomo ungɨŋ injə na akə̂choŋ.”

6Sachaeus yabi swiʼi iŋú num uŋwən anji chuŋ. 7Ba ujum mbənə mbə́ zən anó zəŋ, zuʼe ghayn kwi, “u yə ŋuw aboʼo wa nu umə aghəy unó iboŋ!”

8Sachaeus təm atey ighayn abú Asɨyisəg kwi, “Masa zəw! Ayi naʼ aba akə u aghəy mbənə umə iniŋ abú ba ukwaŋ, mə bə si num aghəy wa moʼ, ayi naʼ achini abú uŋwən ighari kyugə.”

9Yeso ghayn abú uŋwən kwi, “Akə̂choŋ anó idu angəʼ zaʼa si zaʼa ungɨŋ na zəŋ damugə anóm uŋu amə aghaŋ unebey Abraham. 10#Mat 18.11Nyə̂ wa zaʼa ikab ba mbənə u nimi boʼo ichi úŋwən angəʼ.”

Inaynn maʼa da ukab gol

(Mat 25.14-30)

11Umugə ba mə zwaray anó zəŋ, Yeso ŋú imbey ighayn inayn maʼa abú úŋwən. Umugə mbə́ mə́ sə tinə ŋuw iyad Yerusanem yə ghayn ney damugə ba moʼ mə́ sə́ kono kwi anó ufon Nwiye si zaʼa abú úŋwən. 12Wə ghayn kwi, wa kyayn moʼ ŋú ungɨŋ abey moʼ agha sa kwi u zoʼ uŋwən akə ufon nu umi gha wene izaʼa unuʼ. 13Ki yə sə ŋú noʼ, yə tiya ba afaʼa ma ighum ighaba gol ighum ighum abú wa ufeyn ufeyn. Wə aghəy nigə ghayn abú úŋwən kwi, “Mbən ni aghəy iyuŋ ni ukab uŋu pey aney zənə ami wene zaʼa. 14Ba abey ma bana uŋwən anigə mbə́ cha ukən abú uŋwən kwi, ‘cha mba mə kaba ngwa kwi anóm uŋu mə́ ungwa ufon.’”

15“Amaʼazənə mbə́ si zoʼ uŋwən akə ufon, yə wene ŋú pey ighayn kwi u tiya ba faʼa mbənə yə́ naʼa ukab abú úŋwən. Wə tiya úŋwən ikyay injim zənə akə iyuŋ. 16U yi imbey ŋu pey yi ghayn kwi, ‘Masa, mə jəg injim gol chini ighum.’ 17Ufon wu ghayn abú uŋwən kwi, ‘ngwə aghəy anó chuŋ, ngwə mə wa faʼa chuŋ. Umugə ngwə faʼa nə fiŋ ujum iney ukab, ayi ghə kwi ngwə ni tumə ubey ighum.’ 18Uŋunə yə niŋe ŋú pey yi ghayn kwi, ‘Masa, mə jəg injim akə u gol chini itəŋ.’ 19Wə ghayn abú uŋwən kwi, ‘ngwə yi tumə usin itəŋ.’ 20Wa faʼa chini ŋú pey yi ghayn kwi, ‘Masa aney ungwə gol ŋunə ngwə naʼ iniŋ uŋu. Mə kod ungɨŋ aba ndwi ŋú noy. 21Mə́ mə goro aŋu yə damugə injə́ fiŋ yə ka. Ngwə yə numə ghəy zənə akama injigə, ngwə yə jaŋa ghəy zənə chama ngwə kono.’ 22Ufon wu ghayn abú uŋwən kwi, ‘Ayi num inayn zənə iduw ungwə uchəw isaʼa yə awu! Ngwə kyay kwi amə wa ni fiŋ mə ka, amə wa amə numə aghəy zənə akama inyi, ijaŋa aghəy zənə akama umugə kono. 23Anigə aton zənə ngwə ki num ayə uŋu ukab iŋú zi ana ukab amə da ngiya? Nji Amaʼazənə mə wene zaʼa, mə mi ŋú num uŋu ukab nə injim.’ 24Wə aghəy nigə ighayn abú ba mbənə mə́ təm awu iyad kwi, ‘Mbən num ukab wu i naʼ abú wa ŋunə u mə ni u gol ighum.’ 25U ghayn abú uŋwən kwi, ‘Masa, uŋwən yə nə u gol ighum!’ 26#Mat 13.12; Mak 4.25; Luk 8.18Ufon wu ywiri kwi, ‘A yə ghayn inen kwi, abú ba ujum mbənə u mə nə aghəy moʼ, u mbi naʼ u chini abú úŋwən anigə wa ŋunə cha nə aghəy moʼ, ka ba ŋwə̂ aghəy ŋunə umə abú uŋwən umbi num. 27#Mat 25.14-30Anigə abú u mbəŋ ba bana mbənə cha u mə kaba ma kwi a tumə úŋwən mbən num úŋwən zaʼa akəŋ i zwere úŋwən inyi ifigi.’”

Yeso nyi a Yerusanem ni ufon

(Mat 21.1-11; Mak 11.1-11; Jon 12.12-19)

28Amaʼazənə Yeso ghayn anó zəŋ, yə chigə imbey ki koʼo ŋuw a Yerusanem. 29Amaʼazənə yə pey iyad Betefage nə Betani nu amə iyad ugum olif, yə tom mbə məŋə-anó ma ubigə 30i ghayn abú úŋwən kwi, “Mbən ŋuw ungɨŋ abey zənə amə imbey inen. Umugə mbən mi mə nyi awu ungɨŋ abey, mbən yi zən ŋwə̂ jakas moʼ utiŋi nu cha wa moʼ di si noʼ ikoʼ igun. Mbən za num zaʼa akəŋ. 31Wa moʼ bə biri inen kwi mbən mə za jakas uyugə da ngiya? Mbən ghayn abú uŋwən kwi amə Asɨyisəg mə kaba jakas aŋu.”

32Ba mbənə yə tomo ŋú pey yi zən unó wu aba anji zənə yə ghayn abú úŋwən. 33Amaʼazənə mbə́ mə́ iza ŋwə̂ jakas wu, wa ŋunə amə jakas ma biri abú úŋwən kwi, “Mbən mə iza jakas uyugə da ngiya?”

34Mbə́ ywiri kwi, “Amə Asɨyisəg mə kaba.” 35Mbə́ ghayn nigə num ŋwə̂ jakas wu iŋú naʼ abú Yeso anigə mbə́ zere ndwi uma igun ŋwə̂ jakas wu. Mbə ywere Yeso ighəy u koʼ igun. 36Amaʼazənə yə́ mə́ ŋuw, ba mə zere ndwi ma igun inji.

37Amaʼazənə yə mə sə ŋú pey iyad Yerusanem, asin zənə umə swiʼe ugum olif, unóŋ mbə məŋə-anó ma mə anjim ma naʼa uyaka abú Nwiye sə yere uŋwən akə igəg kaka akə uyere unó mbənə úŋwən si zən. 38Mbə́ mə́ yere ghayn kwi, “Nwiye zi aborobod igun ufon ŋunə u zaʼa akə ukum Asɨyisəg! Aborobod yə azobo ba wumini Nwiye ŋunə umə azobo!”

39Ba Farasay moʼ mbənə mbə́ mə́ akaʼa unóŋ ba ghayn abú uŋwən kwi, “Ataʼa ba ghayn abú umbə məŋə-anó kwi uchuʼ izi!”

40Yeso ywiri abú úŋwən kwi, “Ayə ghayn inen kwi ba mbəŋ bi chuʼ izi, atey zəŋ yi mə kyay yere Nwiye.”

Yeso chwey isiy da Yerusanem

41amaʼazənə yə pey iyad Yerusanem, yə zən asin wu anigə ichwey isɨ da aŋwen, 42ghayn kwi, “Mbən di bi kyay akə̂choŋ aghəy zənə amə ghəy kwi ba chomo akə aborobod! Asɨmə akinine cha mbən mi zən. 43Amaʼ yi zaʼa nu u mbən ba bana umi zaʼa chim ukam ikad ngwən zi ugha anigə ikəbərə ngwən uba jum. 44Umbi saʼa u mbən ujum izwere u mbə́ ba ujum cha ma aghəy moʼ mi tənə. Cha kaba itey moʼ mi chomo nu uki saʼa ma. Unó mbəŋ ujum umbi məŋi damugə cha mbən di kyay gwen Amaʼazənə Nwiye mi zaʼa ichi gwen angəʼ.”

Yeso ŋu nyi ungɨŋ imbəŋ Nwiye

(Mat 21.12-17; Mak 11.15-19; Jon 2.13-22)

45Yeso ŋú nyi ungɨŋ imbəŋ Nwiye pey yi fuw ba mbənə mbə́ mə́ fənə u aghəy. 46Wə ghayn abú úŋwən kwi, “Ayə ungɨŋ aŋwaʼanayn kwi Nwiye ghayn kwi, ‘inyi imbəŋ ayi mə na ichaʼara Nwiye’ anigə mbən mbəŋ asə asin zənə iji mə zaʼa paʼa wu!” 47#Luk 21.37Yeso mə ataʼa ba ambəŋ Nwiye unəy ujum. Anigə ba kyayn ambəŋ Nwiye, mbə ataʼa ba akə unoʼo foro utəw abú ba Jû mə kaba inji izwere uŋwən. 48Anigə amə cha nji abú úŋwən izwere uŋwən damugə ba ujum mə kaba izəw unó ujum mbənə yə mə ghayn.

Currently Selected:

Luk 19: NGI

Highlight

Copy