Luk 18

Inayn maʼa da ayey uti nə asob usaʼa

1Yeso ghayn inayn maʼa abú mbə məŋə-anó ma itey abú úŋwən kwi uni chaʼara Nwiye ka umə ibo ma. 2Wə ghayn abú úŋwən kwi, “Asob usaʼa moʼ mə ungɨŋ abey moʼ nu cha yə mə goro ma Nwiye kə iwumini wa moʼ. 3Ayey uti moʼ mə ungɨŋ abey wu nu yə mə iŋuw abú uŋwən pey yi ghayn kwi ywere aŋu isaʼ uŋu saʼa nə uŋu wa abana. 4Asob usaʼa wu ton iywere ayey wu akə amaʼ sa. Anigə yə nwi ghayn ungɨŋ fiŋ ma kwi, ‘ka nə cha amə goro Nwiye kə wumine ba, 5anigə da ingəʼ zənə ayey uti ŋunə umə zaʼa naʼa iniŋ, ayi saʼ usaʼa ma nji cha umi beni kwi a zwere anji zənə umə duw zaʼa.’” 6Asɨyisəg ghayn kwi, “Mbən zəw anó zənə asob usaʼa iboŋ wu ghayn, 7Asob usaʼa iboŋ wu bə ghayn nigə nji Nwiye waʼa ki saʼa ma usaʼa inaʼ abú ba ma mbənə umə dey abú uŋwən? Umi num amaʼ ki si ywere uŋwən? 8Ayə ghayn inen kwi, uyi yabi saʼa inaʼ abú úŋwən anigə aney zənə Ŋwə̂ Wa mi zaʼa u waʼa mi zən umugə ba ungɨŋ isəg zi fiŋ inyo ma?”

Inayn maʼa da wa Farasay nə wa ŋunə yə́ mə́ fere ukab tag

9Yeso nibi ghayn inayn maʼa zəŋ abú ba moʼ mbənə umə iney kwi, umbə aghəy anó nu akəʼə anigə sə iney ba mbi nə u aghəy ibuw. 10“Wə ghayn kwi anóm bigə moʼ koʼ ŋú ungɨŋ imbəŋ Nwiye iŋu chaʼara Nwiye. Wa feyn amə wa Farasay, ufeyn amə wa yə́ mə́ fere ukab tag. 11Umugə mbə́ ŋú nigə, wa Farasay wu təm atey ma zeʼe ighayn kwi, ‘Nwiye mə na uyaka inigə damugə cha amə aghəy aŋu ni ba mbənə umə numə u aghəy abú ba akə ikay, cha amə aghəy aŋu unó mbənə uki koro ma kə cha amə niŋe aŋu uyey wa chini kə mə aŋu ni wa uwi aba zi ŋunə umə fere ukab tag. 12Ayə jiyə injəy ighari bigə igun ika anigə ighaba u ghəy mbənə umə iniŋ akə uba ighum i naʼ aba feyn inigə.’ 13Anigə afere ukab tag wu təm agha sa, cha yə di beʼere ma atəw ma aneŋ azobo. Wə niŋe ubugə ma afiŋ ma ighayn kwi, ‘Nwiye kənə akə aŋu wa unó iboŋ!’” 14#Mat 23.12; Luk 14.11A yə ghayn asiʼ inen kwi, “Amaʼazənə a fere ukab tag wu wene ŋu unuʼ, yə aghəy anó nu akəʼərə ifigi Nwiye chigə ma akə wa Farasay wu. Mbən kyay kwi wa ŋunə umə beʼere inyo Nwiye yi swiʼiri uŋwən asey anigə wa ŋunə umə swiʼiri inyo ma asey Nwiye yi beʼere uŋwən.”

Yeso zi aborobod igun buŋ kuŋe

(Mat 19.13-15; Mak 10.13-16)

15Ba moʼ num buŋ kuŋe ŋú abú Yeso kwi u bira uŋwən. Amaʼazənə mbə məŋə-anó ma zənə ney, mbə nya ba wu. 16Anigə Yeso tiya buŋ a wu ighayn abú mbə́ məŋə-anó ma kwi, “Mbən sayn buŋ kuŋe mbigə u zaʼa iniŋ mbən kən ngwen úŋwən damugə amə ba mbənə umə nə úŋwən umi jəg anó ufon Nwiye. 17Ayə ghayn asiʼ inen! Cha ma wa moʼ ŋunə uki beni ma anó fon Nwiye ni ŋwə̂ kuŋe umi nyi ma ungɨŋ anó fon wu.”

Inayn maʼa da wa ŋunə umə nə imbon

(Mat 19.16-30; Mak 10.17-31)

18Anom kyayn moʼ abú ba Jû biri abú Yeso kwi, “Ataʼa ba chuŋ ami aghəy ngiya kwi jəgə itəni zənə cha imi noʼo imey?” 19Yeso ywiri abú uŋwən kwi, “Ngwə tiya aŋu kwi wa chuŋ da ngiya? Cha wa moʼ awu amə wa chuŋ chigə akə Nwiye ma zeʼe. 20Ngwə kyay ikɨy tənə ighayn kwi, ‘iniŋe ayə uyey wa chini, i zwere yə wa i ji yə izi yə usaʼa ibuw atəw wa wumini ungwə mbaʼ nə ungwə ingwo.’” 21Anom wu ghayn kwi, “Ayə isiy ikɨy təŋ ujum iti amaʼazənə mə́ mə ŋwə̂ kuŋe.” 22Amaʼazənə Yeso zəw anó zəŋ yə ghayn abú uŋwən kwi, “Ano feyn yə bugə awu ni ngwə mi aghəy. Fənə u aghəy mbənə umə inigə inaʼ ukab wu abú ba kwaŋ anigə ngwə yi mə wa imbon aney azobo. Ngwə bə aghəy nigə, ngwə zaʼa iniŋe inyi injim.” 23Amaʼazənə anóm wu zəw anó zəŋ, yə kənə azəd damugə yə mə nə imbon nanaʼ.

24Yeso zən kwi yə kənə anigə ighayn abú uŋwən kwi, “Ayə ika abú ba imbon inyi ungɨŋ anó ufon Nwiye! 25Ayə zaba abú kamel ichigə ubəg isaʼ chigə ma akə mugə wa imbon mi inyi ungɨŋ anó ufon Nwiye.”

26Ba mbənə mbə zəw anó wu biri kwi, “Abə mə́ nigə inji amə ngwa umi du angəʼ?”

27Yeso ywiri kwi, “Anó zənə achigə ba cha ami chigə ma Nwiye.”

28Pita ghayn kwi, “Zən mba sayn ita inuʼ iniŋe injə injim.”

29Yeso ghayn abú uŋwən kwi, “Aŋ, ayə ghayn asiʼ inen kwi, cha wa moʼ awu nu u sayn unuʼ kə uyey kə unya anóm kə mbaʼ kə buŋ da anó ufon Nwiye 30nu cha umi mə nə u aghəy nanaʼ akə amaʼ zəŋ ni itəni zənə cha imi imey akə ama zənə ami zaʼa.”

Yeso ghayn iŋú pey akə ighari ta da iwu ma

(Mat 20.17-19; Mak 10.32-34)

31Yeso num mə məŋə-anó ma ighum cho bigə iyad ighayn abú úŋwən kwi, “Mbən zən mba yə́ koʼo iŋuw a Yerusanem anigə unó ujum mbənə ba ukən Nwiye ŋwaʼanayn da Ŋwə̂ Wa umbi du akə asiʼ. 32Umbi yimi uŋwən i naʼ abú ba mbənə akaʼa ma ba Jû, umbi chiʼ uŋwən, jəmə uŋwən chad amira inyo ma. 33Umbi som uŋwən izwere uŋwən asɨmə asə akə uney uta yi zəmə.”

34Mbə məŋə-anó zəw unó mbəŋ anigə cha utəw ma di zayn. Nwiye noy aton akə inayn zəŋ abú úŋwən. Cha mbə di kyay uma anó zənə yə mə ghayn.

Yeso zwey ufəg ni yə mə biyə u aghəy

(Mat 20.29-34; Mak 10.46-52)

35Amaʼazənə Yeso nə mbə məŋə-anó ma mə sə tinə iyad Jeriko, ufəg moʼ nu amə anóm chomo iyad inji ni biyə u aghəy. 36Amaʼazənə yə zəw ikwiy ba mə chigə, u biri kwi, “Amə anó ngiya?”

37Mbə́ ghayn abú uŋwən kwi, “Amə Yeso wa Nazared umə chigə.”

38Amaʼazənə ufəg wu zəw nigə, u kyay akə ikay ghayn kwi, “Yeso ŋwə̂ Dafid kənə akə aŋu!”

39Ba mbənə mbə́ chigə imbey nya uŋwən kwi u chuʼi izi anigə yə mə bə kyayn ghayn kwi, “Ŋyə̂ Dafid kənə akə aŋu.”

40Yeso təm ighayn kwi u num ufəg wu zaʼa na abú uŋwən. Amaʼazənə yə si tinə izaʼa iyad, Yeso ghayn abú uŋwən kwi, 41“Ngwə mə kaba kwi aghəy anó ngiya inigə?” Wa wu ywiri kwi, “Asɨyisəg aghəy kwi a zən usin.” 42Yeso ghayn abú uŋwən kwi, “Anigə ti ni zən usin! Inji ibeni fiŋ aghəy yə ngwə boro.” 43Aba ighari awu, wa wu ti ni zən usin. Anigə yə noʼ inigə anjim Yeso ni yeŋ yə yere Nwiye. Ba ujum mbənə mbə́ zən anó wu, mbə́ yere Nwiye.

Currently Selected:

Luk 18: NGI

Highlight

Copy