Luk 20

Ibiri da wa ŋunə u naʼa ikay abú Yeso

(Mat 21.23-27; Mak 11.27-33)

1Aney moʼ Yeso mə ataʼa ba akə unó ungɨŋ imbəŋ Nwiye ni ghayn ukən uchuŋ, ba kyayn ambəŋ Nwiye nə ba mbənə mbə́ mə́ awu ungɨŋ mbə́ zaʼa 2ighayn abú uŋwən kwi, “ghayn ina amə ukudu ikay ngiya ngwə mə aghəy unó mbəŋ awu? Amə ngwa naʼa ikay wu inigə?” 3Yeso ywiri abú úŋwən kwi, “Ayə kaba biri ibiri moʼ inen. Mbən ghayn iniŋ, 4amə Nwiye yə naʼa ikay abú Jon imə naʼa une kə amə ba?” 5Mbə zəw nigə iti ni ijumə akaʼa ma kwi, “Mba ghayn kwi ngiya? Mba bə ghayn kwi, ‘Amə Nwiye’ nji u yi ghayn kwi ‘Mbə si ki beni ngwən Jon da ngiya?’ 6Mba bə ghayn kwi, ‘Amə ba’ nji ba mbəŋ ujum umbi tum ngwa akə atey damugə mbə beni kwi Jon amə́ wa ukən Nwiye.” 7Anigə mbə́ ywiri abú uŋwən kwi, “Cha mba kyay ngwa asin zənə yə́ num ikay ma akuŋ.” 8Anigə Yeso ghayn abú úŋwən kwi, “Cha ami ghayn aŋu wa ŋunə u naʼa ikay iniŋ kwi a aghəy unó mbəŋ.”

Inaynn maʼa da ba ni imbayn vine

(Mat 21.33-46; Mak 12.1-12)

9Anigə Yeso ghayn inayn maʼa zəŋ abú úŋwən kwi, wa moʼ kon imbayn vine anigə i naʼ imbayn vine wu abú ba moʼ kwi uni faʼa ungɨŋ. Wə na nigə i noʼ iŋu abey chini i chomo awu akə amaʼ sa. 10Amaʼazənə amaʼ kə ifere itɨŋi vine wu, yə́ cha wa faʼa ma abú ba mbənə mbə́ mə́ faʼa awu imbayn kwi u naʼa ama mə aba akə itɨŋ vine wu. Ba mbənə mbə́ mə́ faʼa ambayn wu som wa wu icha uŋwən abugə ka. 11Wa ŋunə amə imbayn ma cha wa faʼa u chini, ba wu som uŋwən inaʼ indere atəw abú uŋwən i cha uŋwən ubugə ka. 12Wa wu cha ba iŋu pey akə uta, mbə toʼ atəw abú uŋwən ibeʼe uŋwən imaʼ isəg. 13Wa akə imbayn wu ghayn kwi, “Ami yini ngiya? Ayə ŋu tom uŋu ŋwə̂ ŋunə a wuʼi azəd ighari moʼ umbi wumini uŋwən!” 14Amaʼazənə ba mbənə mbə́ mə́ faʼa awu imbayn zən ŋwə̂ wu, mbə́ ghayn akaʼa uma kwi, “Aney a jəgə iku ma ŋunə mba zwere uŋwən boʼo ughəy mbəŋ yi mə u mba!” 15Mbə́ ghayn nigə ichi uŋwən awu ungɨŋ imbayn iŋú zwere. Yeso ghayn nigə i biri abú úŋwən kwi, “Amə anó ngiya wa akə imbayn wu mi aghəy abú ba mbənə mbə́ mə́ faʼa ungɨŋ imbayn wu?” 16“U yə ŋú zwere ba mbənə mbə́ mə́ faʼa ungɨŋ imbayn wu ina imbayn wu abú ba chini. Amaʼazənə ba wu zəw anó wu, mbə́ ghayn kwi, ka Nwiye beni ma ukudu anó uŋu.”

17Anigə Yeso ney úŋwən ighayn kwi, “Aton akə inayn Nwiye zəŋ amə kwi ngiya?

‘Itey zənə mbə́ chimə inayn ton kwi cha idi boŋ

Wə beŋe akə itey ijugi na.’

18Ba ujum mbənə u gow igun itey wu iyi wa úŋwən akə uba anigə itey wu mbi fwayn igun wa moʼ, iyi woʼo uŋwən.”

Ibiri da anó ni naʼa ukab tag

(Mat 22.15-22; Mak 12.13-17)

19Mbə ataʼa ba akə unoʼo ni ba kyayn ambəŋ Nwiye kaba nji ibiya Yeso ighari wu damugə úŋwən kyay kwi mbə́ ghayn inayn maʼa zəŋ da úŋwən. Asɨmə mbə́ mə́ goro u ma ba mbənə mbə́ mə́ awu. 20Anigə mbə ti ni kaba kwi ŋwə̂ nji moʼ duw u ibiya uŋwən. Mbə́ kaba ba moʼ mbənə umi ŋú aghəy ni kwi úŋwən mə ba chuŋ. Umbi zaʼa biri ibiri abú Yeso ikaba nji ibiya uŋwən da u mi num uŋwən iŋú abú ba kyay akə unoʼo foro abú gobuna nu amə úŋwən umə ni ikay i saʼ uŋwən. 21Ba wu ŋú pey yi biri abú Yeso kwi, “Ataʼa unó mba kyay kwi unó mbənə ngwə mə ataʼa ba wu nə unó mbənə ngwə mə ghayn mbə kəʼ. Mba kyay kwi cha ngwə mə goro ayə wa moʼ anigə ngwə yə ataʼa ba amə akə unó asiʼ mbənə Nwiye mə kaba abú ba. 22Toʼo ina, ungwa noʼo mə tey kwi mba ki naʼa ukab tag kə ka mba mə naʼa ngwa?”

23Yeso kyayn uniy ma anigə ighayn abú úŋwən kwi, 24“Mbən tey ukab atəne moʼ iniŋ. Mbə́ tey abú uŋwən anigə u biri abú úŋwən kwi ifigi zəŋ nə ukum uŋu amə uyi ngiya?” Mbə ywiri kwi, “Amə iyi kayisa.”

25Yeso ghayn abú úŋwən kwi, “Anigə mbən naʼa u aghəy kayisa abú kayisa inaʼ u aghəy Nwiye abú Nwiye.”

26Anigə amə cha ma nji ibiya uŋwən akə anó moʼ ifigi ba anigə mbə chuʼ izi ni məŋərə uma akə iywiri inayn zənə yə ghayn.

Ibiri da anó ni zəmə iwu

(Mat 22.23-33; Mak 12.18-27)

27 # Ifa 23.8 Ba Sadusi mbənə umə ghayn kwi cha mi zəmə u moʼ akaʼa úŋwən ŋú abú Yeso pey yi ghayn kwi, 28“Ataʼa ba akə unoʼo, Mose ŋwaʼanayn noʼo uŋu ina kwi, ‘Unya anóm wa nu umə ni uyey mbi ku ni cha u di si ibə́ ma buŋ, unya anóm wa wu yi nam ayey uti wu ibə́ buŋ nə uŋwən nu ayi mə buŋ unya anóm ma ŋunə yə kuw.’ 29Akinine, unya anóm sambigə moʼ mə awu, uyi imbey nam uyey iku nu cha buŋ. 30Uyə akuŋ nam ayey wu, 31anigə unya anóm iŋu pey akə uta nam ayey wu. Mbə́ nam nigə iŋu pey akə unya anóm wu ujum sambigə u ku ni cha u bə́ ma buŋ. 32Ayey wu nwi iku. 33Aney zənə ba mi zəmə iwu ayey uŋu ayi mə uyey ngwa? Numugə unya anóm wu sambigə nam uŋwən.” 34Yeso ywiri abú úŋwən kwi, “Anom nə ayey akə amaʼ zəŋ umbə nama, 35Anigə cha ba mbənə umi ku gha zəmə ichomo akə amaʼ isəg zənə amə zaʼa umi nam kə icha buŋ ana inama. 36Cha umi gha ku damugə umbi chomo nə angəd, umbi mə buŋ Nwiye damugə usi zəmə iwu. 37Mose tey kwi ba mbi zəmə iwu ungɨŋ asin aŋwaʼanayn zənə a ghayn umugə aka mə́ ifə́ anigə yə tiya Asɨyisəg kwi, ‘Uŋu Nwiye Abraham, Nwiye Azik nə Nwiye Yakob.’ 38Cha uŋwən mə ma Nwiye uwu ba, uŋwən amə Nwiye ba mbənə umə ikay. Ba jum umbə ikay aboʼo uŋwən.” 39Mbə ataʼa ba akə unoʼo zəw anigə u moʼ ghayn kwi, “Ataʼa unó ngwə inayn anji chuŋ.” 40Amə cha wa moʼ ni fiŋ igha biri anó chini abú uŋwən.

Ibiri da wa ŋunə Nwiye zoʼo

(Mat 22.41-46; Mak 12.35-37)

41Yeso biri abú úŋwən kwi, “Mbən si ghayn kwi wa ŋunə Nwiye zoʼo akə ma wa aghaŋ unebey Dafid ngiya? 42Dafid ŋwaʼanayn ungɨŋ aŋwaʼanayn sam kwi,

‘Asɨyisəg ghayn abú uŋu Asɨyisəg kwi

Chomo akə inyi abugə jəgi

43Pey aney zənə ami zi umbə ba bana

Ubə uton aghəw.’

44Dafid mbə tiya uŋwən kwi Asɨyisəg umi si zaʼa iməŋi ŋwə̂ aghaŋ Dafid ngiya?”

Yeso para úŋwən da mbə ataʼa ba akə unoʼ

(Mat 23.1-36; Mak 12.38-40)

45Umugə ba ujum mə zəw, Yeso ghayn abú mbə məŋə-anó ma kwi, 46“Mbən num azom ni mbə ataʼa ba akə unoʼo, mbə wuʼ imə zi ndwi sa igha yeŋ usin ujum. Mbə wuʼ kwi ba ki chaʼara úŋwən nə iwumini ungɨŋ iyuŋ, mbə wuʼ ichomo utən imbey ungɨŋ na bomi ba izreal foro imə chomo usin ba kyayn ufere. 47U mbə wuʼe u ma izən ayey uti anigə i chi u ghəy mbənə umə ungɨŋ na ma. Umbə ghəy nigə, u sə chaʼara Nwiye akə agha sa Nwiye yi zi usaʼa uŋunə u chigə igun uma.”

Currently Selected:

Luk 20: NGI

Highlight

Copy