Jon 21

Yeso tey inyo ma abú mbə məŋə-anó sambigə

1Amaʼazənə unəy moʼ si chigə, Yeso tey inyo abú mbə məŋə-anó iyad anim zənə amə Tiberiyas. Yə tey akə inji zəŋ: 2Sayimon Pita nə Tomas, nu umə nibi tiya akə ŋwə̂ Nwiye foro Natanel nu yə noʼo Kana a Galeli, buŋ Zebedi nə mbə məŋə-anó Yeso chini mə asin feyn. 3#Luk 5.5Sayimon Pita ghayn abú úŋwən kwi, “Ayə ŋuw ibiya su.”

Mbə ghayn abú uŋwən kwi, “Mba yi ŋu nə ngwə.” Anigə úŋwən uma jum du ŋu nyi ungɨŋ abaŋ ugwi ni maʼa umbujaŋ ma. Asɨmə cha mbə ibiya uma aghəy moʼ afəb awu.

4Afəfəb təŋ, Yeso təm iyad anim wu, asɨmə cha mbə məŋə-anó wu di kyay uma kwi amə uŋwən. 5Yə́ biri abú úŋwən kwi, “Umbəŋ uzi, mbən si ibiya aghəy moʼ?”

Mbə́ ywiri kwi, “Indəʼ.”

6 # Luk 5.6 Yeso ghayn abú úŋwən kwi, “Mbən maʼa umbən umbujaŋ aba abugə jəgi mbən yi ibiya aghəy moʼ.” Mbə́ maʼ umbujaŋ uma ibiya su nanaʼ. Amə cha inji abú úŋwən ighəw umbujaŋ wu icha ungɨŋ abaŋ ugwi damugə isu mə kaŋa naʼa.

7Aməŋə-anó ŋunə Yeso wuʼi ghayn abú Pita kwi, “Amə Asɨyisəg.” Amaʼazənə Pita zəw kwi amə Asɨyisəg, yə zi ndwi ma dwen ungɨŋ ugwi iŋu boʼo Yeso. Yə́ chi ndwi ma damugə yə ŋu faʼ. 8Mbə məŋə-anó mbi wene zaʼa ungɨŋ abaŋ ugwi. Mbə́ mə́ yeŋ yə ghəw umbujaŋ uma nu su sugi ungɨŋ damugə cha gha di sá iŋu iyad anim. Agha mə aba ka umeta ukɨ feyn. 9Amaʼazənə mbə du asaŋ, mbə zən uwəd awu nə su igun uwəd wu, mbə nibi zən ingəŋ.

10Yeso ghayn abú uŋwən kwi, “Mbən zaʼa nə su moʼ tənə mbən chene ibiya.”

11Sayimon Pita ŋu nyi ungɨŋ abaŋ ugwi wu ighəw umbujaŋ asaŋ. Su kyayn sugi ungɨŋ. Isu wu mə ŋuw ka ukɨ feyn nə ighumi tɨŋ cho ta. Ka di ma kwi isu wu mə naʼa, cha umbujaŋ wu di pəŋe. 12Yeso ghayn abú úŋwən kwi, “Mbən zaʼa sobo amira.” Cha wa moʼ akaʼa mbə məŋə-anó wu nu yə yimə fiŋ biri abú uŋwən kwi, “Ngwə mə ngwa?” Damugə úŋwən uma jum kyay kwi amə Asɨyisəg.

13Yeso ŋu num ingəŋ wu nə su wu naʼ abú úŋwən.

14Zəŋ amə ighari iŋu pey akə ita nu Yeso du ifigi mbə məŋə-anó ma amaʼazənə Nwiye zəmə uŋwən.

Yeso biri inayn abú Pita

15Amaʼazənə mbə́ si jəg, Yeso biri abú Pita kwi, “Sayimon, ngwə ŋwə̂ Jon, ngwə wuʼe aŋu chigə ba umbi?”

Pita ywiri abú uŋwən kwi, “Aŋ Asɨyisəg, ngwə kyay kwi mə wuʼe yə.”

Yeso ghayn abú uŋwən kwi, “Jəyi umbi buŋ injəg.”

16Yeso gha biri abú uŋwən akə ighari iŋu pey akə ibigə kwi, “Sayimon ungwə ŋwə̂ Jon, ngwə wuʼe aŋu?”

Pita ywiri abú uŋwən kwi, “Aŋ Asɨyisəg ngwə kyay kwi mə wuʼe yə.”

Yeso ghayn abú uŋwən kwi, “Tana ni nəmə itəŋ injəg.”

17Yeso gha biri abú uŋwən akə ighari iŋu pey akə ita kwi, “Sayimon ŋwə̂ Jon, ngwə wuʼe aŋu?”

Pita kənə damugə Yeso biri abú uŋwən akə ighari nu iŋu pey akə ita kwi, “Ngwə wuʼe aŋu?” Anigə yə ywiri kwi, “Asɨyisəg ngwə kyay unó jum. Ngwə kyay kwi mə wuʼe ayə.”

Yeso ghayn abú uŋwən kwi, “Tana nəmə itiŋ injəg. 18Ayə ghayn asiʼ inigə kwi amaʼazənə ngwə mə ingwaʼ wa, ngwə mə tana inyo ŋu ayə asin zənə ngwə wuʼe iŋu awu. Asɨmə akinine ŋunə ngwə si nun, ngwə yi sa injə abugə wa chini zi ndwi nigə, num ayə ŋu asin zənə cha ngwə di iwuʼ iŋu awu.” 19Yeso ghayn anó zəŋ itey ukudu iwu ŋunə Pita mi ku boʼo iwumini Nwiye. Amaʼazənə Yeso ghayn ney, Yə ghayn abú iŋwən kwi, “Niŋe inyi injim!”

20 # Jon 13.25 Pita gha ma izən a məŋə-anó ywi ŋunə Yeso wuʼi mə ŋuw aboʼo uŋwən. A məŋə-anó wu amə ŋunə yə chomo iyad Yeso amaʼazənə mbə́ mə́ jəgə anigə ibiri abú uŋwən kwi, “Asɨyisəg amə ngwa mə ŋu fənə ayə?” 21Amaʼazənə Pita zən uŋwən, ubiri abú Yeso kwi, “Asɨyisəg amə́ anom ŋunə?”

22Yeso ywiri abú uŋwən kwi, “A bə kaba kwi u chomo ikay pey amaʼazənə ami wene izaʼa, zigə amə ney ayə akə ingiya? Niŋe inyi injim!” 23Inayn zənə Yeso ghayn saŋa akaʼa ba mbənə mbə́ beni aboʼo Yeso kwi cha aməŋə-anó wu mi noʼo iku. Asɨmə cha Yeso di ghayn ma kwi cha umi noʼo iku. Yə ghayn amə kwi, “Abə kaba kwi u chomo ikay pey anəy zənə ami wene izaʼa zigə mə ney ayə akə ingiya?”

24Amə aməŋə-anó wu yə ghayn unó mbəŋ. Amə uŋwən yə́ nibi ŋwaʼanayn asəy. Mba kyay kwi unó mbənə yə ghayn amə unó asiʼ.

25Unó nanaʼ chini mbə awu nu Yeso aghəy. Adi mə kwi mbə ŋwaʼanayn unó wu jum asəy, nji mə kono kwi cha asəg jum di koʼ amə aghəy i yimə uŋwaʼanayn mbənə umi ŋwaʼanayn unó mbəŋ ungɨŋ.

Currently Selected:

Jon 21: NGI

Highlight

Copy