Jon 20

Yeso si zəmə

(Mat 28.1-8; Mak 16.1-8; Luk 24.1-12)

1Afəfəb anəy Sonde ni imbiri, Meri Magdalen ŋu atəw isəy zənə mbə́ zi Yeso awu. Yə́ pey yi zən kwi mbə si chi itəy zənə yə́ mə́ uchəw isəy wu. 2Anigə yə noro ŋu abú Sayimon Pita foro aməŋə-anó chini ŋunə Yeso wuʼi, Pey yi ghayn abú úŋwən kwi, “Mbə si chi awu Asɨyisəg ungɨŋ asəy wu. Cha mba kyay asin zənə u num uŋwən ŋu akuŋ!”

3Pita nə aməŋə-anó chini wu zəw nigə noro ŋu atəw isəy wu. 4Mbə mə noro uma ubigə, asɨmə aməŋə-anó chini wu nod chigə Pita dey pey awu atəw isəy. 5Yə pey yi guni ma ney ungɨŋ isəy wu zən aba ndwi linen zənə mbə́ fed Yeso awu, asɨmə cha yə nyi ma ungɨŋ. 6Sayimon Pita zaʼa anjim chigə ŋu nyi ungɨŋ isəy wu. Yə́ zən aba ndwi linen awu, 7nibi zən ndwi zənə mbə fed atəw Yeso awu. Cha ndwi wu fire uma aboʼo ndwi linen wu, asɨmə tə́ foyi uma chomo asin feyn. 8Aməŋə-anó chini wu nibi nyi ŋu ungɨŋ isəy wu pey yi zən, anigə beni kwi Yeso si zəmə. 9Cha utəw ma di si zayn da inayn Nwiye zənə ighayn kwi uyi zəmə. 10Mbə məŋə-anó wu zən anó wu nigə, wene ŋu asin zənə mbə́ mə́ chomo.

Yeso du ifigi Meri Magdalen

(Mat 28.9-10; Mak 16.9-11)

11Amaʼazənə mbə məŋə-anó wu si wene ŋu, Meri təm uchəw isəg wu ni idey. Umugə yə́ mə́ idey nigə, yə guni asəy ney ungɨŋ isəg wu. 12Yə ney nigə, izən mbə angəd ubigə nu u zi ndwi fuw. Mbə́ chomo asin zənə awu Yeso mə akuŋ. Ufeyn chomo asin zənə atəw ma mə akuŋ, ufeyn chomo asin zənə ughəw ma nə akuŋ. 13Mbə́ biri abú uŋwən kwi, “Ayey ngwə mə idey ingiya?”

Yə ywiri abú úŋwən kwi, “Mbə́ si chi awu uŋu Asɨyisəg anigə cha a kyay aŋu asin zənə unum uŋwən ŋu akuŋ.”

14Yə́ ghayn nigə gha ma zən Yeso nu u təm akuŋ, asɨmə cha yə kyay ma kwi amə Yeso. 15Yeso biri abú uŋwən kwi, “Ayey ngwə mə idey ingiya? Ngwə mə nibə kaba ngwa?”

Meri kono kwi amə wa ŋunə amə imbayn ma. Anigə, yə́ ghayn abú uŋwən kwi, “Masaʼ, abə mə kwi amə ngwə num awu ma ŋu, ghayn asin zənə ngwə sey akuŋ boʼo aŋu num uŋwən.”

16Yeso itiya uŋwən kwi, “Meri!”

Meri gha ma ney uŋwən ghayn akə inayn Hibru kwi, “Raboni” nu aton amə kwi “Ataʼa ba.”

17Yeso ghayn abú uŋwən kwi, “Tana yimə aŋu damugə cha adi si ŋu azobo abú uŋwən Mbaʼ, asɨmə ŋuw abú umbəŋ unya pey yi ghayn abú úŋwən kwi ayə wene ŋuw azobo abú uŋu Mbaʼ nu amə nibə Mbaʼ uma, nibə ŋuw abú uŋu Nwiye nu amə nibə Nwiye uma.”

18Meri Magdalen ŋu pey yi zən mbə məŋə-anó wu ghayn abú úŋwən kwi, “Mə si zən Asɨyisəg.” Yə́ nibi ghayn anó zənə Yeso ghayn abú uŋwən.

Yeso du ifigi mbə məŋə-anó ma

(Mat 28.16-20; Mak 16.14-18; Luk 24.36-49)

19Injaʼ si chig anəy Sonde wu, mbə məŋə-anó ŋu foro ungɨŋ na moʼ. Mbə si fən ubunuʼ, damugə mbə́ mə́ goro ba mbənə umə tana unó ungɨŋ abey ba Jû. Mbə́ zən Yeso saʼa du təm akaʼa uma ighayn abú úŋwən kwi, “Mbən chomo akə aborobod.” 20Amaʼazənə yə ghayn nigə, yə tey ubugə ma nibi tey aba bumi ma abú úŋwən. Amaʼazənə mbə məŋə-anó wu zən uŋwən, iwuʼi sugi ungɨŋ fiŋ uma. 21Yeso ghayn abú úŋwən kwi, “Mbən chomo akə aborobod. Anji zənə Mbaʼ tomo aŋu, mə si nibi tom gwən.” 22Amaʼazənə yə́ si ghayn anó zəŋ, yə́ fɨ azugə ma igun úŋwən ghayn abú úŋwən kwi, “Azugə zayn zayn zaʼa igun inen. 23#Mat 16.19; 18.18Mbən bə waʼ unó iboŋ wa moʼ, Nwiye yi nibi waʼ. Mbən bə ton iwaʼ, cha Nwiye mi nibi waʼ.”

Yeso du ifigi Tomas

24Amə cha Tomas aboʼo mbə məŋə-anó wu amaʼazənə Yeso tey inyo ma abú úŋwən. Uŋwən mə nibə wa feyn akaʼa mbə məŋə-anó wu ighum cho bugə. Mbə́ mə́ itiya uŋwən akə Didimus nu amə kwi ŋwə̂ Nwiye. 25Mbə́ məŋə-anó wu ghayn abú úŋwen kwi, “Mba si zən Asɨyisəg!”

Asɨmə yə́ ghayn abú úŋwən kwi, “Abə ki zən aŋu ibɨg unay mbənə ikəw zi inya ubugə ma, zi nyi itugi ungɨŋ ibɨg wu, nibi zi inyi abugə abúmi ma, cha ami beni.”

26Amaʼazənə ika si chigə, mbə məŋə-anó Yeso ŋu foro ungɨŋ na. Tomas mə aboʼo úŋwən. Mbə fən ubunuʼ, asɨmə Yeso du təm ifigi uma ghayn kwi, “Mbən chomo akə aborobod.” 27Amaʼazənə yə ghayn nigə, yə ghayn abú Tomas kwi, “Zi injə tugi akəŋ nibi ney umbəŋ ubugə, cha umba ubugə ibira inyi abúmi. Imə ibiyə ayə, beni!”

28Tomas ghayn abú uŋwən kwi, “Uŋu Asɨyisəg nə uŋu Nwiye!”

29Yeso ghayn abú uŋwən kwi, “Ngwə beni damugə ngwə zən aŋu? Nwiye zi aborobod igun ba mbənə u beni nu cha u zən aŋu!”

Aton zənə Jon ŋwaʼanayn aŋwaʼanayn zəŋ

30Yeso aghəy uyere unó nanaʼ akaʼa mbə məŋə-anó ma nu cha uŋwaʼanayn ungɨŋ aŋwaʼanayn zəŋ. 31Asɨmə mbə ŋwaʼanayn uyere unó moʼ boʼo mbən beni kwi Yeso mə wa ŋunə Nwiye zoʼo, mə Ŋwə̂ Nwiye foro kwi mbən bi beni uŋwən, mbən yi jəg itəni.

Currently Selected:

Jon 20: NGI

Highlight

Copy