Ifa 2

Azugə zayn zayn zaʼa igun ba Kristo

1amaʼazənə aney pentakos zaʼa, ba jum mbənə u beni Kristo fere asin feyn. 2U sə ŋu zən, aghəy moʼ saʼa kum azobo nə afirm kaka mə chigə. Yə sugi ungɨŋ na ujum zənə mbə́ mə́ chomo ungɨŋ. 3Anigə mbə́ zən aghəy moʼ a chomo ni ineme uwəd yə saŋa iŋu chomo igun wa feyn feyn akaʼa úŋwən. 4Azugə zayn zayn sugi ungɨŋ uma ujum u ti ni nay akə inayn isoʼ anji zənə Azugə wu naʼa ika abú úŋwən.

5Akə amaʼa wu, ba Jû nu u beni Nwiye mə Yerusanem. Mbə noʼ ungɨŋ ubey ujum mbənə umə ungɨŋ isəg. 6Amaʼazənə mbə́ zəw ijoʼo wu, unóŋ ba wu ŋu fere. Mbə́ yere damugə wa feyn feyn akaʼa úŋwən zəw umugə ba mbənə u beni Kristo mə́ nay akə inayn uma. 7Anó wu chigə úŋwən anigə u biri kwi, “Aka ba mbənə u mə́ nay ney u ujum amə ba Galeli? 8A si chigə ngiya nu wa feyn feyn akaʼa inja mə zəw úŋwən u nay akə inayn ma? 9Mba mə ba mba noʼo Patiya, Mediya foro Elam; mba mə ba Mesopotamiya, Judeya foro Kapadosiya, mba mə ba Pontus foro Esiya, 10mba mə ba Frigiya foro Pamfiliya, Ijip foro ungɨŋ uba ubey mbənə umə Libiya iyad Syrene umba moʼ mba noʼo Arom. 11Mba mə ba Jû foro ba mbənə u beŋe fiŋ uma ibeni anó Nwiye ba Jû. Umba moʼ mə ba Krete foro Araibiya anigə uma ujum mba yə zəw umugə umə ghayn uyere unó mbənə Nwiye aghəy. Umbə ghayn akə ita inayn abey.” 12Anó zəŋ chigə úŋwən ubuwə anigə ni bə biri akaʼa ma kwi, “Aton akə anó zəŋ amə kwi ngiya?” 13Umugə mbə́ mə́ biri nigə, u moʼ ni baʼara ba mbənə u beni Kristo ghayn kwi, “Mbə si nugə unoʼ ibigə.”

Pita nay abú unóŋ ba wu

14Pita noʼ təm atey nə ba tom wu ighum cho feyn ti ni nay akə igəg kaka ghayn kwi, “Ba judeya nə ba ujum mbənə umə chomo Yerusanem mbən zəw atoʼo aton akə anó zəŋ inen. 15Cha ba mbəŋ di si nugə ma unoʼ ibigə anji zənə mbən mə kono; Amə bugə ma unyama bəw afəfəb. 16Wa ukən Nwiye Joel yə ghayn da anó zəŋ kwi,

17‘Nwiye ghayn kwi, Amaʼazənə isəg mə sə ŋu nwi,

Ayi cha inyi Azugə igun ba ujum.

Umbən buŋ anóm nə buŋ ayey umbi ghayn uŋu ukən,

Igwaʼ anóm yi zən ukaŋ,

Injəm yi chigə anóm mbənə u si nun.

18Aŋ, ungɨŋ unəy wu,

Ayi cha inyi Azugə igun umbəŋ ba faʼa anóm nə ayey

Anigə umbi ghayn uŋu ukən.

19A yi aghəy u yere unó azobo

I aghəy unwini unó igun isey.

Mbən yi zən anəm izən uwəd nibi zən indiʼ. 20Nyama chugi yi beŋe fed, uməg yi beŋe sə baŋa nə anəm ki aney zənə Asɨyisəg mi wene izaʼa nu amə aney kyay nu a chigə uney ujum.

21Wa moʼ ŋunə umi tiya ukum Asɨyisəg uney wu u yi du angəʼ.’

22Ba Izre, mbən zəw inayn zəŋ Yeso wa Nazared amə wa ŋunə Nwiye choʼo. Nwiye chigə anjim ma ighəy uyere unó, ighəy unó kyayn kyayn nibi aghəy unwini unó injən akaʼa anji zənə umbən amboŋ mbən kyay. 23Nwiye si kyay, Anigə yə kaʼa kwi umbi ibiya Yeso wu inaʼ inen anigə ba mbənə umə aghəy unó iboŋ umbi kom uŋwən azad abaʼaray izwere.#Mat 27.35; Mak 15.24; Luk 23.33; Jon 19.18 24Anigə Nwiye yi zəmə uŋwən ighəy kwi ka iwu mə ma nə ika igun ma damugə cha iwu mə́ ma nə ika igun ma.#Mat 28.5, 6; Mak 16.6; Luk 24.5 25Ufon Dafid ghayn da uŋwən kwi,

A yə zən Asɨyisəg inyi figi ighari ujum;

Uyi akə inyi aba bugə jigi, boʼo cha anó moʼ mi naʼa ma ingəʼ iniŋ.

26Anigə iwuʼi sugi ungɨŋ inyi fiŋ, A yə inayn nə iwuʼi.

Anigə inyi nyə̂ inyo yə nəmə ughəy chuŋ mbənə Nwiye kaʼa.

27Damugə cha umi sayn ma inyi awu ungɨŋ isey,

Kə isayn kwi ungwə wa zayn zayn figə.

28Ngwə si ghəy kwi a kyay iji ijəg itəni.

Ngwə si ghəy inyi fiŋ sugi nə iwuʼi numugə ngwə chomo aboʼo inyi.”

29“Umbəŋ unya, ayə ghayn asiʼ inen kwi mbən kyay kwi ungwa mbaʼ imbey ufon Dafid ku utwayn uŋwən. Atəw isəy ma yə akəŋ iŋu pey akə̂choŋ. 30Umugə uŋwən mə́ wa ukən Nwiye, ikyay kwi Nwiye si meʼe ma abú uŋwən kwi u yi siy wa akə aghaŋ ma kwi u jəg atən ufon ma. 31Umugə yə zən anó zənə amə ŋú zaʼa, Dafid ghayn damugə wa ŋunə Nwiye zoʼo mi zəmə iwu, Yə nibi ghayn kwi, cha Nwiye mi waʼa ma uŋwən ungɨŋ isey foro kwi cha nyə̂ inyo ma mi neʼe figi ma. 32Nwiye si zəmə Yeso ŋunə anigə umba ujum mə uzənə akə anó wu. 33Nwiye si num uŋwən azobo u ŋu chomo aba bugə jəgi ma, yə si num Azugə zayn zayn zənə mbaʼ ma si kaʼa kwi iyi naʼ. Ghəy zənə mbən mə zən nə zəw amə Azugə zayn zayn wu nu u cha igun ina. 34Akama Dafid yə ŋu azobo anigə yə ghayn kwi,

‘Asɨyisəg ghayn abú uŋu Asɨyisəg kwi

Chomo akə inyi aba abugə jəgi

35Pey aney zənə ami zi umbə ba bana

Itə inya aghəw.’”

36“Anigə ba Izre ujum u kyay kwaʼa asiʼ kwi Nwiye ghəy Yeso ŋunə mbə komo azad baʼara Akə Asɨyisəg foro kwi uŋwən amə wa ŋunə Nwiye zoʼo.”

37Amaʼazənə ba wu zəw anó zəŋ, yə bira fiŋ uma anigə mbə́ biri abú pita foro abú ba tom umbi kwi, “Unya anóm mba ghini ngiya?” 38Pita ywiri abú úŋwən kwi, “Wa feyn feyn injən akaʼa waʼ unó iboŋ ma i num une akə ukum Yeso Kristo boʼo Nwiye mi nyaba umbən unó iboŋ. Mbən bə aghəy nigə, mbən yi mə nə uneʼe nu amə Azugə zayn zayn. 39Anó zənə Nwiye kaʼa amə inen, ayə nibi abú umbən buŋ foro abú ba mbənə umə agha sá, anigə amə ba ujum mbənə Asɨyisəg ungwa Nwiye tiya kwi u zaʼa abú uŋwən.”

40Pita ghayn inayn chini nanaʼ abú úŋwən chede úŋwən ghayn kwi, “Mbən chi itən inyo ungɨŋ ingəʼ zənə imi inyi igun ba mbənə umə́ aghəy unó iboŋ.” 41Ba mbənə mbə́ zəw inayn zəŋ ibeni mbə́ num une. Ba mbənə mbə́ bumə ba Kristo aney wu mə ŋuw ka ichuʼ ita. 42Mbə́ zi atəw akə unó mbənə ba tom Kristo mə itey. Mbə́ mə́ bumə ijəgə nibə bumə ichaʼara Nwiye.

Inji zənə ba mbənə bə́ beni Kristo mə chomo

43Nwiye mə aghəy uyere unó foro unwini unó nanaʼ anjim ba tom Kristo wu. Zigə aghəy igərə ibiya wa feyn feyn. 44Ba ujum mbənə mbə́ beni Kristo mə chomo aba akə anó feyn sə bira u aghəy ma aba akə iji feyn. #Ifa 4.32-35 45Mbə́ mə́ fənə usin isey ma nə u aghəy mbənə mbə́ mə́ abú úŋwən iŋu ghaba ukab wu abú ba ujum anji zənə wa feyn feyn mə kaba. 46Uney ujum, mbə́ mə́ ŋuw fere ambəŋ Nwiye. Mbə́ mə́ bɨʼere ingəŋ ungɨŋ na uma iŋuw fere jəgə ni iwuʼi foro nə fiŋ chuŋ, 47Mbə́ mə́ yere Nwiye, ba ujum wuʼ úŋwən. Asɨyisəg mə zwey unun ma unəy ujum nə ba mbənə u duw angəʼ.

Currently Selected:

Ifa 2: NGI

Highlight

Copy