Ifa 1

1Wa kyayn Tiyofilus, ungɨŋ inyi aŋwaʼanayn imbey zənə mə́ ŋwaʼanayn, mə́ ŋwaʼanayn da unó ujum mbənə Yeso aghəy foro da unó mbənə wə́ mə́ itey inoʼ Amaʼazənə yə ti afaʼa ma #Luk 1.1-4 2iŋu pey aney zənə Nwiye num uŋwən azobo. Ki yə sə ŋuw azobo, yə chigə anjim ika Azugə zayn zayn inaʼ ukɨy abú ba tom mbənə yə́ si choʼo. 3Amaʼazənə yə́ si zəw ingəʼ iku, ighəy zəmə, yə tey inyo ma abú úŋwən akə inji nanaʼ da úŋwən kyay kwi i yə yi ika. Yə́ mə́ duw ifigi uma iŋu pey akə unəy ighumi kyugə. Umugə yə́ mə́ duw nigə, yə́ mə́ ghayn anó da anó ufon Nwiye abú úŋwən. 4Amaʼazənə yə́ mə́ aboʼo úŋwən, yə́ chere úŋwən kwi, “Ka mbən noʼo ngwen Yerusanem anigə mbən chomo aba awu ni nəmə uneʼe ŋunə mə́ ghayn inen da úŋwən. Amə uneʼe ŋunə uŋu mbaʼ kaʼ kwi iyi naʼ inen. #Luk 24.49 5Jon mə́ naʼa une asɨmə ungɨŋ buŋ unəy moʼ Nwiye yi naʼa Azugə zayn zayn inen.”

Yeso ŋu azobo

6 # Mat 3.11; Mak 1.8; Luk 3.16; Jon 1.33 Amaʼazənə Yeso ŋu fere asin feyn nə ba tom, mbə́ biri abú uŋwən kwi, “Asɨyisəg, ngwə mə ŋu num anó ufon ba Izre abú ba Roman igha inaʼ abú uŋwən akinine?”

7Yə ywiri abú úŋwən kwi, “Akaʼa ma injən asin ikyay aney kə amaʼ wu mbaʼ si sey amaʼ wu akə ika ma. 8Asəmə mbən yi mə ni ika Amaʼazənə Azugə zayn zayn mi inyi ungɨŋ inen. Anigə mbən yi sə iyeŋ yə ghayn anó da aŋu ungɨŋ Yerusanem, ingɨŋ usin ujum mbəŋə umə Judeya foro ungɨŋ usin ujum mbənə umə Samariya. Umbi ghayn ney iŋu pey akə inwi isəg.” #Mat 28.19; Mak 16.15; Luk 24.47, 48 9Amaʼazənə yə si ghayn ney, umugə mbə niŋi aghɨ inyo ma Nwiye num uŋwən azobo anigə ipaʼ kən úŋwən kwi ka uzən ma uŋwən.#Mak 16.19; Luk 24.50, 51

10Umugə mbə niŋi aghɨ ni iney mugə umə ŋuw azobo, u sə ŋu zən, anóm ubigə moʼ nu u zi ndwi fəw u təm iyad uma. 11Mbə anóm wu ghayn kwi, “Anom Galeli, mbən təm akəŋ ni ney azobo da ngiya? Yeso ŋunə Nwiye numi injən akaʼa ni ŋuw azobo yi gha wene izaʼa aba anji zənə mbən zən uŋwən umə iŋuw.”

Mbə́ choʼo Matiyas kwi unum asin Judas

12Ba-tom wu noʼ igun Ugum Olif gha wene iŋu Yerusanem gha nu wa mi yeŋ ka kiloməta feyn 13Amaʼazənə mbə́ pey Yerusanem, mbə́ koʼ iŋu inyi atəw na neŋ zənə mbə́ mə́ chomo ungɨŋ mbə́ mə́ Pita, Jon, Jems, Andrew, Filip, Tomas, Batoloməw, Matəw, Jems nu amə ŋwə̂ Alfayus, Sayimon nu yə wuʼ aku foro Judas nu amə ŋwə̂ Jems. #Mat 10.2-4; Mak 3.16-19; Luk 6.14-16 14Úŋwen uma ujum mə ka bomə ichaʼara Nwiye nə fiŋ feyn. Mbə́ mə́ bumə ni mbə ayey foro ingwo mbi Yeso foro inya anóm ma.

15Ungɨŋ unəy wu, Pita noʼ təm atey akaʼa ba mbənə u beni Kristo nu mbə fere asin feyn ka ukɨ feyn nə ighumi bigə. Yə təm nigə ighayn abú úŋwən kwi, 16“Umbuŋ unya, inay Nwiye zənə Azugə zayn zayn aghəy ufon Dafid ghayn iyi du akə asiʼ da Judas ŋunə yə́ tey inji abú ba mbənə mbə́ ibiya Yeso. 17Judas mə wa moʼ akaʼa inja. Yeso choʼo uŋwən kwi uni faʼa afaʼa zənə mba mə faʼa.”

18(Judas zon asin akə ukab ŋunə mbə́ choʼ uŋwən awu akə anó iboŋ ma zənə yə́ faʼa. Yə gow asey izum atəw, ibum ma toʼo u aghəy ungɨŋ ibum ma ujum du isəg. #Mat 27.3-8 19Ba ujum mbənə mbə́ mə́ chomo Yerusanem zəw anó wu. Anigə mbə́ mə́ tiya asin wu akə inay ma akə Akeldama aton amə kwi, Asin Anəm). 20“Mbə uŋwaʼanayn ungɨŋ aŋwaʼanayn Sâm kwi,

‘I na ma chomo ika

Ka wa moʼ chomo ma ungɨŋ’

foro kwi,

‘Wa chini num asin

Afaʼa ma.’”

21“Anigə yə kəʼ kwi mba choʼ anóm moʼ akaʼa inja ŋunə yə mə nə umba akə umaʼ ujum zənə Asɨyisəg Yeso mə iyeŋ nə umba,#Mat 3.16; Mak 1.9; Luk 3.21; Mak 16.19; Luk 24.51 22i ti akə Jon ŋunə yə́ mə́ naʼa une iŋu pey akə aney zənə Nwiye num Yeso akaʼa inja. Anom moʼ akaʼa úŋwən yi bumə ngwa mba ni yeŋ yə ghayn umugə Asɨyisəg si zəmə.”

23Anigə mbə́ naʼ ikum anóm ubigə, u yi imbey amə́ Josef nu mbə́ mə́ itiya uŋwən akə Barsabas nu ukum ma chini mə́ Justus, uŋunə yə niŋi akuŋ amə Matiyas. 24Amaʼazənə mbə naʼ nigə, mbə́ chaʼara Nwiye ghayn kwi, “Asɨyisəg ngwə kyay fiŋ ba ujum tey anóm moʼ akaʼa anóm mbəŋ ubigə u ŋunə ngwə choʼo 25u ni faʼa afaʼa ba tom asin Judas numugə u sayn ma afaʼa iŋu asin zənə a kəʼərə abú uŋwən.” 26Umugə mbə́ chaʼara nigə, mbə́ maʼ ibid ichi Matiyas. Anigə mbə́ zwey uŋwən aboʼo ba tom mbi ighum cho feyn.

Currently Selected:

Ifa 1: NGI

Highlight

Copy