Ifa 3

Pita nə Jon zwey abúʼere anóm moʼ

1Aney moʼ, Pita nə Jon mə koʼo iŋuw ambəŋ Nwiye akə nyama ta angom nu amə amaʼ ichaʼara Nwiye. 2Amaʼazənə mə́ si tine iyad imbəŋ Nwiye, ba moʼ beʼe anóm moʼ nu yə buʼere iti Amaʼazənə ingwo ma bə́ uŋwən. Mbə mə beʼe uŋwən unəy ujum ŋuw sey uchəw ucham ambəŋ Nwiye nu umə tiya uchəw ukam wu kwi chəw ukam chuŋ. Yə mə chomo awu uchəw ukam ibiyə ukab abú ba mbənə mbə́ mə́ nyi ungɨŋ imbəŋ Nwiye. 3Amaʼazənə yə́ zən Pita nə Jon umə sə baʼa imə inyi iŋuw imbəŋ Nwiye, Yə boʼo ubugə abú úŋwən kwi u naʼa ukab abú uŋwən. 4Mbə toŋ ighɨ inyo ma anigə Pita ghayn abú uŋwən kwi, “Ney ngwa!” 5Yə toŋ ighɨ inyo uma ni kono kwi umbi naʼa ukab abú uŋwən. 6Anigə Pita ghayn abú uŋwən kwi, “Cha ukab moʼ ina inaʼ inigə, asɨmə aghəy zənə amə ina mba yi naʼ inigə: Akə ukum Yeso Kristo wa Nazered noʼ atey iyeŋ.” 7Amaʼazənə yə ghayn nigə, yə yimi abugə jəgi ma i beʼere uŋwən atey. Aba ighari wu, ughəw wa wu nə ikyigi ughəw ma ka. 8Yə́ noʼ təm idwen iti ni iyeŋ nyi ŋu ambəŋ Nwiye aboʼo úŋwən. Yə́ mə́ yeŋ yə dwenə yere Nwiye. 9Amaʼazənə ba jum zən uŋwən umə́ yeŋ yə yere Nwiye, 10mbə kyay kwi amə anóm ŋunə umə ka chomo ibiyə ukab uchəw ukam ŋunə umə tiya akə uchəw ukam uchuŋ, anó wu chigə úŋwən anigə mbə́ yere anó zənə aghəy abú uŋwən.

Pita nay ungɨŋ imbəŋ Nwiye

11Umugə anóm wu niŋi anjim Pita nə Jon, anó wu chigə úŋwən anigə mbə́ nod ŋu fere iyad ma ambəŋ Nwiye aba abəŋe na zənə umə tiya kwi amə iyi Solomon. 12Amaʼazənə Pita zən nigə, yə ghayn abú ba wu kwi, “Mbən mə́ məŋəre ŋwen akə anó zəŋ da ngiya? Mbən mə niŋi ighɨ inyo na ni kwi amə akə inja ika kə akə inji zənə mba mə́ wumine Nwiye nu mba aghəy kwi wa ŋunə u yeŋ 13Nwiye Abraham, Nwiye Azik nə Nwiye Yakob, Nwiye umba mbaʼ imbey wumini wa faʼa ma Yeso. Uŋunə mbən yimi naʼ kwi uzwere. Mbən nibi ton uŋwən ifigi paled nu yə si num ungɨŋ fiŋ ma kwi iyi sayn uŋwən u ŋuw. 14Mbən ton wa zayn zayn nu u təm ikəʼərə ighayn kwi u naʼa wa ŋunə yə zwere wa inen.#Mat 27.15-23; Mak 15.6-14; Luk 23.13-23; Jon 19.12-15 15Mbən zwere wa ŋunə umə naʼa itəni anigə Nwiye zəmə uŋwən. Mba mə uzənə akə anó zəŋ.” 16Amə ibeni ungɨŋ Yeso ghəy kwi anóm ŋunə mbən zən nibi kyay aghəy kwi u ka. Amə ibeni zənə imə ina anjim ukum Yeso aghəy kwi anómŋunə uboro anji zənə umbən ujum mbən zən. 17“Umbuŋ unya, mə kyay kwi cha mbən di kyay ngwen anó zənə umbən nə umbə ba kyayn mə́ ighəy. 18Amə anó zənə Nwiye si chigə anjim ba ukən ma ujum ighayn kwi, wa ŋunə u zoʼo yi zəw ingəʼ anigə yə aghəy adu akə asiʼ akə nji zəŋ. 19Anigə mbən waʼ umbən unó iboŋ ŋu abú Nwiye da umi nyaba umbən unó iboŋ. 20Amaʼ yə zaʼa nu Asɨyisəg mi izuri itən fiŋ. Anigə u yi cha Yeso kwi uzaʼa inen nu amə wa ŋunə yə́ choʼo izoʼ. 21Yeso yi chomo azobo pey Amaʼazənə Nwiye mi tana unó ujum ami kəʼ. Anjizənə yə si kaʼa imbey anjim ba ukən ma. 22Mose ghayn kwi, Asɨyisəg Nwiye yi aghəy kwi wa ukən Nwiye duw injən akaʼa numugə yə aghəy ni umugə. Mbən zwaray unó ujum mbənə umi ghayn inen. 23U mbi chi ba ujum mbənə cha umi zəw ma anó zənə wa ukən Nwiye wu mi ghayn akaʼa ba ma. 24Ba ukən Nwiye ujum inoʼ akə Samwel iŋu pey akə u mbənə u zaʼa anjim si ghayn da uney wu. 25Mbən mə aghaŋ abú ba ukən Nwiye mbən nibi num usó fey ŋunə Nwiye sɨŋi nə mbaʼ imbey. Numugə yə ghayn abú Abraham kwi anjim injə aghaŋ a yi zi aborobod igun ba mbənə imə akə igun isəg u ujum. 26Amaʼazənə Nwiye choʼo wa faʼa ma, yə icha inen kwi u zi aborobod igun inen umugə u ghəy kwi wa feyn feyn injən akaʼa u waʼ inji iboŋ ma.”

Currently Selected:

Ifa 3: NGI

Highlight

Copy