Ifa 10

Konenius tom ba kwi uŋuw tiya Pita

1Anom moʼ mə Kayisariya nu ukum ma mə Konenius. Uŋwen mə atəw abú ukɨ usogwi moʼ umə tiya akə usogwi Itali. 2Yə zi fiŋ ma inyo Nwiye. Yə mə wumine Nwiye nə unebey ma ujum. Yə́ mə́ kaŋa naʼa u aghəy abú ba ukwaŋ. Yə́ mə́ chara Nwiye akə umaʼ ujum 3Amə akə nyama ta angom aney moʼ nu ukaŋ chigə uŋwən kwi, yə zən angəd Nwiye nu u zaʼa abú uŋwən ighayn kwi, “Konenius.”

4Konenius niŋi aghɨ inyo angəd wu ni igərə ibiri kwi, “Masaʼ, amə anó ngiya” Angəd wu ywiri kwi, “Nwiye yə wuʼe ma akə injə chaʼara nə inji zənə ngwə mə fiʼe ubugə abú ba ukaŋ, anigə u yi zəw injə achaʼara. 5Aba akinine, tom wa moʼ á Jopa kwi u ŋuw tiya anóm moʼ nu ukum ma mə́ Sayimon nu umə́ nibə tiya uŋwən kwi Pita. 6U yə́ chomo nə Sayimon nu umə tana gôb nyə̂. Ina Sayimon wu yə iyad iba.” 7Amaʼazənə angəd wu ghayn abú uŋwən si noʼ iŋuw ma, Koninius tiya ba faʼa ma ubigə nibi tiya sogwi moʼ akaʼa usogwi mbənə umə́ faʼa inyi ma. Sogwi wu zi fiŋ ma inyo Nwiye. 8Yə́ ghayn unó ujum mbənə mbə́ duw abú úŋwən anigə itom úŋwən á Jopa kwi u ŋuw tiya Pita izaʼa naʼ abú uŋwən.

9Aney kuŋ, Amaʼazənə mbə́ anóm wu mə́ ŋuw sə baʼa iŋu pey a Jopa, Pita koʼ iŋu idəm na iŋu chaʼara Nwiye. Amə kə nyama ighum cho bigə angom.#10.9 Idəm na uma mə ibara akə inji zənə ba mə koʼo ŋuw igun 10Injəy ti ni zaŋa abú uŋwən anigə u mbə́ kaba aghəy moʼ ijəg. Umugə mbə́ mə́ bugə itə́ u aghəy jəgi, ukaŋ mə chigə uŋwən. 11Yə zən azobo fiʼe, u zən aghəy moʼ nə aba ndwi kyayn a noʼo azobo mə swiʼi zaʼa imbey ma nu ú yimi akə ijugə ma kyugə ni swiʼi cha asey. 12Ikudi nyə̂ ujum mə awu ungɨŋ. Nyə̂ tənə imə́ iyeŋ akə ughəw kyugə, nyə̂ tənə imə iyeŋ ibum foro inen. 13Igəg moʼ ghayn abú uŋwən kwi, “Pita noʼ izwere ikad.”

14Asɨmə Pita ywiri kwi, “indəʼ aŋu Asɨyisəg cha a di si noʼ kəd aŋu ghəy moʼ zənə cha amə zayn ma kə nu cha ba mə koro.”

15Igəg wu gha ghayn abú uŋwən kwi, “i tiya ayə aghəy moʼ zənə Nwiye si aghəy á zayn kwi cha a di zayn.” 16Anó zəŋ aghəy ighari ita anigə mbə́ gha ighəw aba ndwi wu inum azobo.

17Umugə Pita mə bigə kono aton akə ukaŋ wu, anóm mbənə Konenius tomo zən na Sayimon anigə itəm uchəw ukam. 18Mbə́ mə́ tiya akə ikay biri kwi Sayimon ŋunə umə́ tiya akə Pita umə chomo akəŋ ə? 19Pita mə́ bugə kaba ikyay aton akə ukaŋ wu anigə Azugə zayn zayn ghayn abú uŋwən kwi, “ba uta moʼ umbə kaba yə.” 20Anigə noʼo atey swiʼi ŋu, tana inji inyo iŋu nə úŋwən iton ayə damugə amə umugə á tom úŋwən. 21Pita swiʼi ŋu zən mbə́ anóm wu, pey yi ghayn abú úŋwən kwi, “Amə wa ŋunə mbən mə kaba. Mbən zaʼa akəŋ da ngiya?”

22Mbə́ ywiri abú uŋwən kwi, “Konenius nu amə atəw abú usogwi ukɨ feyn tom ngwa inigə. Uŋwen yə ghəy unó nu ukəʼərə nibə wumine Nwiye. Ba Jû ujum mbə́ ghayn unó chuŋ da uŋwən.” Angəd Nwiye ghayn abú uŋwən kwi u tom ba inigə itiya yə ana ma izəw anó zənə ngwə mi ghayn abú uŋwən. 23Pita zəw nigə, itiya anóm wu kwi unyi zaʼa ungɨŋ na. Aney akuŋ, Pita noʼ iŋu nə úŋwən. Ba moʼ mbənə u beni Nwiye a Jopa nibi ŋu nə uŋwən. 24Aney akuŋ, úŋwən ŋu nyi á Kayisariya asin zənə Konenius mə nəmə uŋwən akuŋ nə uzi ma foro unebey ma nu yə tiya. 25Amaʼazənə Pita mə sə iŋu inyi ungɨŋ na, Konenius ŋu bomo uŋwən zum utəw nwi ifigi ma wumini uŋwən. 26Asəmə Pita ghəy uŋwən təm atey ighayn abú uŋwən kwi, “Təm atey amə wa inyoŋ atəw nyi mi ghari ni ungwə.” 27Umugə Pita mə inay abú Konenius, yə nyi ŋu ungɨŋ na. Anigə yə zən ba nanaʼ u bumə 28Yə ghayn abú úŋwən kwi, “Mbən kyay kwi cha umba unoʼo mə tey ma kwi wa Jû bumə ni wa ŋunə akə ma wa Jû kə iŋu ana ma kə kwi u aghəy anó moʼ nə uŋwən. Asəmə Nwiye si tey iniŋ kwi ka a tiya aŋu wa moʼ kwi cha udi zayn kə kwi cha ami jəg nu uŋwən. 29Anigə amaʼazənə ngwə́ cha ba tom iniŋ, cha mə di ton izaʼa. A si biri kwi ngwə cha ba kwi u tiya aŋu da ngiya?”

30Konenius ghayn kwi, “Amə akə ukudu maʼ ŋunə nu unəy si chigə uta, mə́ mə chaʼara Nwiye inyi na akə unyama ta, mə zən anóm moʼ nu uzi ndwi fuw u saʼa təm inyi ifigi.” 31U ghayn iniŋ kwi, “Konenius Nwiye si zəw injə chaʼara, yə nibi zən u aghəy mbənə ngwə mə naʼa abú ba ukwaŋ. 32Tom ba moʼ a Jopa kwi u ŋuw kaba Sayimon nu umə tiya akə Pita. U yə chomo ungɨŋ na Sayimon ŋunə umə tana gob, na ma yə iyad iba. 33Amaʼazənə mə zəw nigə, mə́ tom ba aba ighari awu kwi u zaʼa tiya ayə. Anigə boŋ umugə ngwə izaʼa. Akinine, mba yə akəŋ umba ujum ifigi Nwiye i zəw anó zənə Asɨyisəg ghayn inigə kwi ngwə ghayn ina.”

Anó zənə Pita ghayn abú úŋwən

34Anigə Pita ti ni nayn ighayn kwi, “Mə zən kwi cha Nwiye mə ghəy ma aghɨ. 35Asəmə u yə num ə ba ujum u mbənə umə wumine uŋwən ighəy unó mbənə u kəʼərə. 36Mbən kyay ukən ŋunə Nwiye tom abú ba Izre. Inayn wu mə ghayn ukən uchuŋ da aborobod zənə Nwiye mi chigə anjim Yeso Kristo naʼa ina. Yeso Kristo amə Asɨyisəg igun ba ujum. 37Mbən kyay anó kyayn zənə yə́ aghəy ungɨŋ Izre ujum. Anó wu ti á Galeli Amaʼazənə Jon ŋunə yə́ mə́ naʼa une ghayn kwi ba beŋe fiŋ uma inum une. 38Mbən kyay anó da Yeso wa Nazared ŋunə Nwiye naʼ a Azugə zayn zayn nə ika abú uŋwən. Mbən nibi kyay umugə yə ŋu usin ujum yeŋ yə aghəy ichuŋ abú ba nibi zwey ba ujum mbənə mbə́ mə ikɨy abugə Debere. Yə mə aghəy unó mbəŋ damugə Nwiye mə nə uŋwən. 39Mbá mə́ uzənə akə unó ujum mbənə yə́ aghəy ungɨŋ Izre foro ungɨŋ Yerusanem. Mbə kom uŋwən azad abaʼaray izwere. 40Asɨmə uney ŋu pey akə uta, Nwiye zəmə uŋwən ghəy u buw ba zən uŋwən. 41Akaʼa ma ba ujum mbə́ zən uŋwən. Yə duw ina umba mbənə Nwiye choʼo kwi mba mə́ uzənə akə unó ma. Mbá mə́ jəgə nibə nugə nə uŋwən Amaʼazənə yə zəmə. 42Yə ghayn ina kwi, mba ghayn inayn Nwiye abú ba. Ighəy kwi ba kyay kwi uŋwən mə wa ŋunə Nwiye choʼo ighəy kwi u yi saʼ ba mbənə umə ika nibi saʼ u mbənə u si ku. 43Ba ukən Nwiye ujum ghayn anó da uŋwən kwi Nwiye yi chigə anjim ma i waʼ unó iboŋ wa ŋunə u zi fiŋ inyo ma.”

Azugə zayn zayn nyi igun ba mbənə akaʼa ma ba Jû

44amaʼazənə Pita mə bugə inayn, Azugə zayn zayn zaʼa igun ba jum mbənə mbə́ mə́ zwaray inayn wu. 45Anó wu chigə ba Jû mbənə u beni Kristo nu mbə́ noʼo á Jopa izaʼa aboʼo Pita. Mbə yere damugə mbə́ zən kwi Nwiye nibi naʼa Azugə zayn zayn ni uneʼe abú ba mbə́ nə akaʼa ma ba Jû. 46Da mbə́ zəw úŋwən mə nay akə inayn abey chini mə yere Nwiye. Anigə Pita ghayn kwi, 47“Wa moʼ mə awu amə aghəy u ton kwi ka u naʼa uma une abú ba mbəŋ nu Azugə zayn zayn si inyi igun uma numugə yə nibi inyi igun ina?” 48Anigə yə́ ghayn kwi u naʼa une abú úŋwən akə ukum Yeso Kristo. Amaʼazənə mbə́ si num une, mbə ghayn abú Pita kwi u chomo nə úŋwən akə unəy moʼ.

Currently Selected:

Ifa 10: NGI

Highlight

Copy