Ifa 9

Nwiye beŋe fiŋ Sol

1Akaʼa maʼa wu Sol mə bə ŋuw imbey kaba kwi i zwere mbə məŋə-anó Asɨyisəg. Anigə yə ŋú izən atəw kyayn ambəŋ Nwiye 2Yə pey yi ghayn abú uŋwən kwi ŋwaʼanayn aŋwaʼanayn itoʼoro awu da ba mbənə u mə ungɨŋ na ibumi ba Jû zənə imə Damaskos, boʼo ubə zən ba moʼ awu ni úŋwən niŋe Anji tə́nə Asɨyisəg mə itey, anóm kə ayey u yi ibiya úŋwən kod num zaʼa Yerusanem. 3Amaʼazənə yə ŋúw sə ŋú pey iyad Damaskos u sə ŋú zən zayn zayn moʼ nu u duw azobo ŋwaʼ ighab uŋwən. 4Yə fwayn asey anigə izəw igəg moʼ ighayn abú uŋwən kwi, “Sol sol ngwə mə nwine iteŋ inya ughəw da ngiya?” 5Sol biri kwi Asɨyisəg ngwə mə ngwa? Igəg wu ywiri kwi amə umugə Yeso ŋunə ngwə mə nwine inya aghəw ma. 6Anigə noʼo iŋú ungɨŋ Damaskos. Ngwə bə pey awu wa moʼ yi ghayn anó zənə ngwə mi ighəy. 7Mbə anóm mbənə mbə́ mə́ yeŋ ni Sol təm unó mey uchəw ma. Mbə zəw igəg wu anigə cha mbə zən ma wa moʼ. 8Sol noʼo atey i fəʼi aghɨ ma cha yə zən ama usin anigə mbə yimi abugə ma uŋú inyi Damaskos. 9Yə fəgə akə uney ta. Cha yə di jəgə ma kə inugə ma aghəy moʼ akə uney wu. 10Akaʼa maʼa wu, anóm moʼ ni yə beni Kristo ni ukum ma mə Ananiyas mə chomo Damaskos yə́ zən ukaŋ ni Nwiye ghayn abú uŋwən kwi, “Ananiyas.” Yə ywiri kwi, “Asɨyisəg aney umugə uŋu.” 11Asɨyisəg ghayn abú uŋwən kwi, “Tana inyo iŋú akuw Judas anji zənə itəmi. Ngwə bə pey awu ngwə biri anóm moʼ ni unoʼo Tasus nu ukum ma mə sol. U yə chaʼara Nwiye” 12Yə zən anóm moʼ akə ukaŋ ni ukum ma mə Ananiyas ni u zaʼa inyi niŋe ubugə ma igun ma da umi ghə zən usin. 13Ananiyas ywiri kwi, “Asɨyisəg ba nanaʼ si ghayn ineŋ da anóm uŋu. Mbə si ghayn da mugə u si ighəy unó iboŋ nanaʼ abú ba mbənə u beni ayə a Yerusanem” 14Anigə yə num ika abú ba kyayn mbənə umə ambəŋ Nwiye izaʼa akə Damaskos da ibiya ba ujum mbənə umə wumine ayə. 15Anigə Asɨyisəg ghayn abú uŋwən kwi, “Ŋuw damugə mə si choʼ uŋwən kwi u yi faʼ ineŋ u yi saŋa aŋu ukum abú ba mbənə akaʼa ba Jû, abú ifon foro abú ba Izral” 16Ayi tey ingəʼ ujum zənə u mi zən da uŋu ukum abú uŋwən. 17Anigə Ananiyas ŋú inyi ungɨŋ na wu. Yi niŋe ubugə ma igun ma ghayn kwi uŋu unya anóm Sol, Asɨyisəg Yeso ŋunə yə buw inigə anji Amaʼazənə ngwə mə zaʼa akəŋ cha aŋu da ngwə mi gha zən usin anigə Azugə zayn zayn sugi ungɨŋ inji inyo. 18Aba ighara wu, aghəy moʼ uchomo ni ubaʼa su du aghɨ ma fwayn asey anigə Sol ti ni gha zən usin yə noʼ atey inum une. 19Amaʼazənə yə si jəg, inyo ma gha ika.

Sol ghayn inayn Nwiye a Damaskos

Sol chomo unəy nanaʼ ni ba mbənə u beni Kristo á Damaskos. 20Yə noʼ aba ighara wu iŋú inyi ungɨŋ ana ibumi ba Jû zənə yə́ mə́ awu ni ghayn inayn Nwiye kwi Yeso amə Ŋwə̂ Nwiye. 21Ba ujum mbənə mbə zəw anó zəŋ mə́ məŋərə uma anigə ibiri kwi, “Ka mə uŋwən ŋunə yə mə naʼa ingəʼ abú ba mbənə mbə́ mə́ tiya ukum ŋunə a Yerusanem? Aka yə zaʼa akəŋ da i ibiya ba mbənə umə wumini Yeso ikod úŋwən ni ba ndəŋ iŋú naʼ abú ba kyayn mbənə umə ambəŋ Nwiye?” 22Anigə Sol ŋú imbey imə ghayn inay Nwiye akə ika. Yə kabərə uchəw abú ba Jû mbənə mbə́ mə́ chomo Damaskos umugə uŋwən tey ungɨŋ Aŋwaʼanayn Nwiye kwi Yeso amə wa ŋunə Nwiye zoʼo. 23#2Ko 11.32, 33Amaʼazənə unəy nanaʼ si chigə, ba Jû tə́ únáŋ kwi u zwere uŋwən. 24Anigə mbə ji usɨ da únáŋ wu abú Sol. Ba Jû wu mə nəmə uŋwən uchəw ukam awu asin wu afəb ni ingwom da izwere uŋwən. 25Anigə ba mbənə mbə niŋe anjim Sol num uŋwən afəb swiʼiri uŋwən ungɨŋ asin wu akə ubɨg moʼ yə́ mə akə ukam wu da umi bugə.

Sol ŋúw Yerusanem

26Amaʼazənə Sol ŋúw Yerusanem yə kab kwi i bumə aboʼo mbə məŋə-anó, anigə úŋwən ma ujum mə goro ma uŋwən cha mbə di bene uma kwi uŋwən mə wa moʼ akaʼa ba mbənə u bene Kristo. 27Anigə Banabas num Sol u ŋú abú ba tom wu, pey itoʼoro umugə Sol zən Asɨyisəg anji, Asɨyisəg inayn abú uŋwən. Yə nibi toʼoro umugə Sol mə́ ghayn inay Nwiye á Damaskos akə ukum Yeso ni fiŋ kaka. 28Anigə Sol chomo aboʼo úŋwən iŋú usin mbənə mbə́ mə́ Yerusanem yeŋ yə ghayn inayn Nwiye akə ukum Asɨyisəg akə fiŋ ikaka. 29Yə mə ghayn anigə yə taŋa ni ba Jû mbənə mbə́ mə́ nay inayn Grik. Anigə mbə kab inji izwere uŋwən. 30Amaʼazənə unya anóm wu kyayn anó zəŋ mbə num uŋwən swiʼi ŋú Kayisareya anigə icha uŋwən Tasus 31Akaʼa maʼa wu, ufere ba Kristo ujum ŋunə yə́ mə́ Judiya nə u mbənə mbə mə Galeli foro u mbənə mbə mə́ Samariya chomo akə aborobod. Azugə zayn zayn aghəy unun ma ni kwey ŋuw imbey anigə mbə́ mə́ wumini Asɨyisəg.

Pita aghəy ayere anó á Lida foro á Jopa

32Umugə Pita mə yeŋ ungɨŋ usin mbigə ujum, yə swiʼi ŋú zən ba Nwiye mbənə mbə mə́ Lida 33Amaʼazənə yə pey awu, yə zən anóm moʼ ni ukum ma mə Aneyas. Anom wu mə abúʼiri wa. Amə cha nji abú uŋwən i noʼ igun ukon akə atuʼ ifeyn. 34Pita ghayn abú uŋwən kwi, “Aneyas Yeso Kristo si zwey ayə noʼo atey tana ungwə ukon Aneyas noʼ atey aba ighara wu.” 35Ba ujum mbənə mbə́ mə́ chomo Lida foro á Sharon zən uŋwən anigə ibeni Asɨyisəg 36Ayey moʼ nu yə beni Kristo mə chomo Jopa ukum ma mə Tabita. Ukum ma akə inay Grik mə Dokas. Akə amaʼ ma ujum yə mə aghəy unó chuŋ, yə mə iywere ba ukwaŋ. 37Amaʼa wu, Tabita mə sɨgə anigə iku. Mbə səw awu ma num ŋú cha ungɨŋ atəw na moʼ ana anəŋ. 38Lida mə iyad Jopa. Amaʼazənə ba mbənə mbə́ beni Kristo zəw kwi Pita yə Lida mbə cha unóm bigə kwi uŋuw boʼo ubugə abú Pita kwi “u yabi zaʼa Jopa.” 39Pita noʼ iŋú nu úŋwən. Amaʼazənə yə pey awu, mbə num uŋwən koʼ iŋú ungɨŋ atəw na aneŋ ayey uti ujum təm iyad ma idey itey ndwi maʼa ni ndwi chini tənə Dokas tana Amaʼazənə yə́ mə ikay. 40Pita cha úŋwən uma ujum isəg i zum utəw nwi asey i chaʼara Nwiye anigə u gha ma iney awu wu ighayn kwi, “Tabita noʼo atəy.” Tabita fəʼi aghɨ Amaʼazənə yə́ zən Pita yə noʼ ichomo. 41Pita yimə abugə ma iywere uŋwən kwi u təm atəy. Amaʼazənə yə aghəy nigə, yə tiya ba mbənə u beni Kristo ni mbə ayey uti wu itey Tabita nu umə ikay abú úŋwən. 42Ukən da anó zəŋ saŋa ungɨŋ Jopa ujum anigə ba nanaʼ beni Asɨyisəg 43Pita chomo Jopa akə amaʼa moʼ ni Sayimon ŋunə yə́ mə́ tana gob fənə.

Currently Selected:

Ifa 9: NGI

Highlight

Copy