Ifa 11

Pita toʼoro anó zənə yə ghəy

1Ba-tom Kristo nə ba mbənə mbə́ mə́ á Judeya nu ubeni Kristo zəw kwi ba mbənə akaʼa ma ba Jû mbə beni inayn Nwiye. 2Anigə amaʼazənə Pita koʼ iŋú a Yerusanem ba Jû mbənə mbə́ mə́ kaba kwi uney ikad ba mbənə akaʼa ma ba Jû ghama uŋwən 3ghayn kwi, “Ngwə ŋú ana ba mbənə akaʼa ma ba Jû ijəgə nə úŋwən.”

4Pita ti ni toʼoro unó mbənə mbə́ chigi abú úŋwən umugənə mbə́ duw. 5Yə́ ghayn kwi, “Amaʼazənə mə́ mə chaʼara Nwiye Ajopa ukaŋ zaʼa inəŋ ajəm. Mə zən aghəy moʼ nə amə swiʼi azobo chomo ni aba ndwi kyayn nu mbə mə swiʼiri akə iyad ma kyugə swiʼiri zaʼa iyad ineŋ” 6mə ney ungɨŋ anji chuŋ anigə izən nyə̂ tənə imə chomo unuʼ, nyə̂ tənə imə́ chomo ambayn nyə̂ tənə imə yeŋ ibum nə inen. 7Anigə mə zəw igəg moʼ ghayn iniŋ kwi, “Pita noʼo izwere ikad.”

8Anigə mə ywiri kwi, “Indəʼ, akə ma nigə Asɨyisəg cha ghəy moʼ ni aki zayn ma kə ghəy nə cha ba mə koro ma di si inyi ma uŋu uchəw 9Igəg wu inayn azobo iŋú pey akə ighari ibigə kwi, ‘Itiya ayə ghəy ni Nwiye si ghəy azayn kwi cha adi zayn.’” 10Anó zəŋ ghəy iŋú pey akə ighari ita anigə mbə gha ghow ghəy wu ujum inum azobo. 11Aba ighari wu anom uta mbə cha iniŋ nu mbə noʼo Kayisariya zaʼa pey ana zənə mə́ mə chomo awu 12Azugə zayn zayn ghayn iniŋ kwi i ton ayə ŋú nu úŋwən unya anom ifəw mbəŋ ŋú nə umugə kasireya anigə mba ŋú inyi ungɨŋ na koninus. 13Anom wu ghayn umugə yə́ zən angəd nu u təm ungɨŋ na ma ighayn abú uŋwən kwi, “Cha ba moʼ Ajopa ú ŋuw num Sayimon ŋunə umə tiya akə Pita zaʼa nə uŋwən. 14Uŋwen yi ghayn ukən moʼ inen ni umi ghəy kwi ungwə ni ba jum ungɨŋ injə na mi du angəʼ.” 15Ama zənə mə ti imə inayn Azugə zayn zayn zaʼa igun uma aba umugə yə́ zaʼa igun na amaʼa Pentakos. 16#Ifa 1.5Anigə mə kono inayn Asɨyisəg umugə yə ghayn kwi, “Jon yə naʼa amə uney anigə Nwiye yi naʼa amə Azugə zayn zayn inen.” 17Anigə Nwiye bə́ naʼ uneʼe wu abú úŋwən ichiŋ ichiŋ umugə yə naʼa ina amaʼazənə mba beni Asɨyisəg Yeso Kristo, umugə mə ngwa iton anó zənə Nwiye mə kaba ighəy? 18Amaʼazənə mbə́ zəw anó zəŋ mbə kəbərə uchəw ma anigə mbə́ iyere Nwiye ighayn kwi, “Anigə Nwiye si naʼ apan abú ba mbənə akaʼa ma ba Jû kwi kyay ma Nwiye kwi u beŋe fiŋ ma ijəg itəni.”

Inji zənə Ufere ba Kristo ti Antiyok

19 # Ifa 8.1-4 Amaʼazənə mbə zwere Stifin, ba ti ni nwini inya ghəw ba mbənə mbə́ beni Kristo. Anigə, ba mbənə mbə́ beni Kristo saŋa iŋú pey Fonesiya, Sayipro for Antiyok. Amaʼazənə mbə́ mə iyeŋ ŋúw, mbə́ mə yə́ ghayn inayn Nwiye aba abú ba Jû 20Anigə ba chini ni mbə́ beni Kristo nu mbə noʼo Sayipro foro Sirin ŋúw Antiyok sə ghayn ukən uchuŋ da Asɨyisəg Yeso abú ba mbənə akaʼa ma ba Jû. 21Ika Asɨyisəg mə igun ma ighəy akama ba kyayn beni anó zənə mbə́ mə́ ghayn anigə izi fiŋ ma igun Asɨyisəg.

22Ufere ba Kristo ŋunə yə mə Yerusanem zəw anó wu anigə mbə tom Banabas kwi u ŋúw Antiyok. 23Amaʼazənə yə́ ŋú pey yi zən umugə Nwiye ghəy ichuŋ abú ba wu, yə wuʼi ma ighayn abú úŋwən uma ujum kwi u tem ikay akə anó Nwiye sə faʼa abú Asɨyisəg ni fiŋ ma ujum. 24Banabas mə́ wa chuŋ Azugə zayn zayn sugi ungɨŋ uŋwən yə mə nibi ni ibene fiŋ kaka. Umugə yə mə ghayn inayn Nwiye, yə ghəy ba nanaʼ beŋe fiŋ uma iŋú abú Asɨyisəg.

25Anigə Banabas noʼ iŋúw Tasus iŋu kaba Saul 26amaʼazənə yə́ zən uŋwən, yə num uŋwən iŋúw Antiyok akə utuʼ feyn feyn úŋwən uma bigə bumə ba mbənə mbə bene Kristo i taʼa akama ba kyayn. Amə Antiyok ni mbə ti imə tiya ba mbənə u beni Kristo kwi amə ba Kristo.

27Akaʼa maʼa wu, ba ukən Nwiye moʼ noʼo a Yerusanem swiʼi ŋuw Antiyok 28#Ifa 21.10Azugə zayn zayn ghəy kwi wa feyn akaʼa úŋwən nu ukum ma mə Agabús noʼ təm atey ghayn kwi ajəgə kaka yi nyi ungɨŋ isəg ujum. (Anó zəŋ ghəy amaʼazənə Kladiyus mə́ ufon kyayn a Rom). 29Anigə mbə məŋə-anó mbənə mbə́ mə́ Antiyok beni kwi wa feyn feyn akaʼa uma cha ghəy zənə umi cha da iwere unya mbənə umə chomo Judeya. 30Mbə́ ghəy anó zəŋ anigə itom Banabas nə Saul kwi uŋuw na ukab uŋunə mbə fere abú utəw abú ba Kristo mbənə umə Judeya.

Currently Selected:

Ifa 11: NGI

Highlight

Copy