Lukas 8

Ŋgwazah macəpa Yesu

1Ava dəɓa ana Yesu ke də pe berne hay va wunam hay ka ta bəzad Labara mambəla ana, da yaŋ Meŋgə bay ta Zlavay. Ndah masasəraka jene tata kuraw dapa yaŋ ana ecew ac da vara vaw, 2ac ava ŋgwazah dərziya masa ke mbesec damkwaw dapa yaŋ teceŋ va ŋgwazah mekele masa aŋga te mbəleceŋ dapa mehecey. Ŋgwaza hay ana sə, ac Maaray da Magədala, ŋgwaz masa Yesu ta mbasan mesfen hay maləza tasəla dapa yaŋ tata, 3Zeyan ŋgwaz ta Kuza, nda mapana ndey fa ndah maŋga mezlər ta Herawt, Suzan va ŋgwazah mekele majəna Yesu va ndah masasəraka jene tata eve zleley teceŋ.

Ma maɗəva da yaŋ hulefey

(Mat 13.1-23; Mar 4.1-20)

4Ndana hay gaa ac ke dek dapa berne hay mekele mekele kad vara Yesu. Masa ndana hay gaa maɓəca da cak tata sə, Yesu ke gweɗec ava ma maɗəva, gege: 5«Ndana ɓa ke də ley ka ta kwakwac hulefey. Dapa masa a kwakwaciya sə, hulef dərziya ec ke kwi a ma te cəvey. Ndana hay ac ka mbərasla avəda, ɗiyak hay ac ka paliya avəda. 6Hulef dərziya ec ke kwi kad fa ɗəsa, ec ke pəcekey, ec ke gəley, ec ke kuleceŋ zef, afa meteleŋ dapa slam ana aabay. 7Hulef dərziya ec ke kwi kad pa mətak hay. Ec ke pəcek dapa mətak ana hay may, amaa ec ke gəl aabay, afa mətak ana hay ece ŋgeŋgəɗececeŋ. 8Dərziya hay ec ke kwi kad pa wuyak mambəla ana, hulefey ana ke pəcey, ke heyek wudiya ana hay gaa, ke ŋgə temere.» Ava dəɓa ana, Yesu e gweɗec ava gədaŋ, gege: «Daha nda masa aŋga ava zləmay ɓa sə, da cəna mambəla ana.»

Megweɗ ava ma maɗəva sə, mafay te mey?

(Mat 13.10-13; Mar 4.10-12)

9Ndah masasəraka jene sə, ac ka nəkafa ma da yaŋ ma maɗəva masa aŋga te gweɗekey. 10Ke gweɗ, gege: «Kad akwar sə, cəv mava ta masən jə maraɓa ta Wunam ta bay ta Zlavay, amaa kad ndah dərziya sə, say ava ma hay maɗəva, ara nesey ece pə ndey, amaa aca wala ndey bay, aca cak zləmay, amaa aca cəna bay.»

Mapan ma da yaŋ ma maɗəva eve hulefey

11Yesu gege: «Mawala ma maɗəva sə, a wal megweɗ ara nesey. Hulef sə, ma ta Zlavay. 12Ndah dərziya, ac ara ma te cəv masa hulef te kwi kad pa. Aca cəna ma ta Zlavay, amaa bay ta haalay, maslagəra ta Zlavay, e dek a həla ma ana avəda dapa rav teceŋ, afa ac ta kəs ma ana, ac ta mbəlata. 13Ndah mekele ac ara slam ɗəsa. Aca cəna ma ta Zlavay, aca kəsiya eve mewesley, amaa ma ta Zlavay ana e gel dapa rav tec fəma fəma aabay, aca kəsiya sə, ta manjah kusetke war. Ara nesey, pas masa jə mambəla ana aabay, ke dek ke te fəceceŋ sə, aca gərda ma ana. 14Hulef masa e kezl pa mətak sə, aŋga ara ndah mekele macəna ma ta Zlavay, amaa aca gərda ma ana dapa walaŋ, afa mawulak yaŋ tec mapa da yaŋ jene hay mekele mekele, da yaŋ zleley va mambivaw ta vavara. Ara nesey, aca ŋgat mesesel aabay. 15Hulef masa e kezl pa slam mambəla ana sə, ŋgesey ndah macəna ma ana dapa rav teceŋ mambəla ana, aca ŋgə mezlər ava aŋga ara Zlav ta waya, aca sləkaɗ pe leŋgesl teceŋ. Ara nesey, ece dey fəma fəma eve meheyek wudiya ana hay mabay.»

Slam mawaɗa kad kwa waawa

(Mar 4.21-25)

16«Daha ndana ka gəɗa kwakwaw fa petərla sə, a varkwaɗ pa maŋgam daha aabay, a paɗ dara kelvek ta manahay sə, aabay, amaa a lawaɗ fa slam te ndey, afa ndah mesehw kad hwaɗ ta way ana sə, aca ra wala ndey. 17Jene hay fakwanay maraɓa sə, ac te təhekec kad avəda. Jene hay masa ndana hay aca səniya bay sə, ac ta səna avəda. Asaya, jeŋ ana hay ac ta ŋguzdakata pa slam mawaɗa. 18Mep leŋgesl, afa akwar da cak zləmay mambəla ana. Daha nda masa ka kəs ma ta Zlavay sə, Zlav a ta jəniya ta makəs ma ana mafəna ana saya. Amaa nda masa ka kəs ma ana aabay sə, kwa daha ma ana kusetke dapa leŋgesl tata ɓa sə, Zlav a ta kəsan avəda fakwanay.»

Mamaŋ va malamaŋ hay te Yesu metehwe ana

(Mat 12.46-50; Mar 3.31-35)

19Pas ɓa mamaŋ te Yesu va malamaŋ hay, ec ke dek kad vara vaw, amaa ac ka ŋgat mahusa vara vaw sə, aabay afa ndana hay elehey. 20Ac ka gwaɗa Yesu, gege: «Ac mmakw va malamakw hay da vəda, aca yahakaa.» 21Yesu ke gweɗec fakwanay, gege: «Mma va malama hay sə, ndah macəka zləmay fa ma ta Zlavay, maŋgana mezlər ava ma ana.»

Yesu a zlac bərgadaŋ

(Mat 8.23-27; Mar 4.35-41)

22Pas mekele ɓa saya, Yesu va ndah masasəraka jene tata ec ke tep pa kaslkaslah, gege: «Mazlaŋgakwa kad a ma te təker jaka luwa leŋgeɗey.» Ec ke zleŋgey. 23Dapa masa ece dey sə, Yesu aŋga dapa manjawaŋ. Faŋga faŋga ana, bərgadaŋ mazlakava ana ke ŋgey da yaŋ təker mazlakava ana. Kaslkaslah sə, yam ka nəhata pa weh, rav ke təɗeceŋ, afa ac ta zay. 24Dapa ŋgesey ana, ndah masasəraka jene ac ka ŋgucafa vaw Yesu ka ta pərkiya, gege: «Bay Mazlakava, Bay Mazlakava, anda zakwa.» Yesu ke zleftek, ka payafa bərgadaŋ va yam masa e deŋgwefey sə, ava gədaŋ. Bərgadaŋ va yam sə, ec ke njehec teete, jene a ɓəla vaw ɓasabay. 25Yesu ke gweɗec ndah masasəraka jene tata ana, gege: «Makəsparav takwar sə, kəla?»

Amaa ndah masasəraka jene tata sə, ac ka ŋgə zidaw, ec ke rəzl mabay, ac ka sasak ma dapa taɓa tec, gege: «Nda ana nesey sə, aŋga wa masa kwa bərgadaŋ, kwa yam, e gweɗeceŋ, aca cənan ma?»

Yesu a mbas mesfen maləza dapa ndana

(Mat 8.28-34; Mar 5.1-20)

26Ava dəɓa ana, Yesu va ndah masasəraka jene tata ac ka husa pa vavara ta Geraza hay masa da ma te təker mazlakava jaka luwa te Gelile.

27Dapa masa Yesu e bəreŋgə kad fa vara sə, ndana ɓa dapa pe berne ana faŋga ac ka cə yaŋ ava aŋga. Nda ana sə, aŋga ava damkwaw hay dapa yaŋ mabay. Manjah gaa ka pə rəkwat fa vaw aabay. Nda ana sə, a njah da wunam aabay, amaa dapa jav hay. 28Masa a wala Yesu sə, kwerjejekw! E kekəred fəma tata, a cə lalaw ava gədaŋ, gege: «Ka wal fiyey mey, Yesu Wut ta Zlav da Wudam? Ya cə kaa mbahw, ke te ŋgediyey marga bay!» 29Nda ana, e gweɗ ara nesey sə, afa Yesu ke gweɗec kad damkwaw hay sə, aca ra daɓa kad a vəda. Damkwaw hay sə, ac ka ŋgada hahar cəɗem cəɗem. Ndah tata ac a jawan sek hay va ha hay ava jajarɓay, afa da njah da wunam, amaa nda ana, ke ŋgə gədaŋ, ka ŋgəla jajarɓay ana avəda. Damkwaw hay sə, ac ka hwadaɗ kad e ley. 30Yesu ka nəkafa, gege: «Mezel takaa mey?» Ka vahan, gege: «Mezeley aɗaw sə, “Miya”» E gweɗ ara nesey sə, afa damkwaw hay gaa dapa yaŋ tata ɓa, 31ac ka ŋgana mbahw Yesu, afa de hwedec pe veɗ mekweleleŋ ana bay.

32Dapa slam ana faŋga sə, bakw te vetem hay ɓa, ece ɓəcec fa ŋguɗa. Damkwaw hay sə, ac ka bərakw Yesu de vec cəv ece re sehw pe vetem ana hay. Yesu ke vec cəvey. 33Ara nesey, damkwaw hay dapa nda sə, ac ka hwayata kad a vəda, ec ke sehw pe vetem hay. Vetem ana hay fakwanay werleleh! Ac ka vəna yaŋ, ac ka hway ava gədaŋ, kad pe gweeleŋ hay, ec ke tetelemec da ma ta mazaŋgalaŋ kad pe təker mazlakava, ec ke bezlec fakwanay.

34Masa ndah maɓəca vetem ana aca wala jə masa e ŋgə ara nesey sə, ac mahway ke te ŋguzdecen labara ana kad ndah dapa berne va gəva hay masa zef faŋga. 35Ndana hay ec ke hwekey ka ta wuzaɗ jə masa e ŋgey. Aca husa a cak te Yesu, aca ŋgatafa nda masa damkwaw hay dapa yaŋ tata, ac ke hweyec kad a vəda sə, aŋga manjaha da cak te Yesu. Aŋga ava rəkwat fa vaw, aŋga werwer cay. Ndah sə, ac ka ŋgə zidaw mabay.

36Ndah mawala jeŋ ana hay fakwanay sə, ec ke kərecen maɗay ana kad ndah mehwek dapa berne ka ta wuzaɗ jə masa e ŋgey da yaŋ membəlek ta nda ava damkwaw dapa yaŋ. 37Ara nesey, ndah dapa vavara ta Geraza ac ka ŋgana mbahw kad Yesu da daɓa dapa vavara teceŋ, afa labara ana ke ŋgec zidaw mabay.

Dapa ŋgesey ana, Yesu ke tep pa kaslkaslah, ka vahata. 38Amaa wagaa a ta daɓa sə, nda masa aŋga ta mbasan damkwaw hay dapa yaŋ tata sə, ka ŋgana mbahw a da vana cəvey aca ra njah ava aŋga. Yesu ka vana cəv aabay, amaa ka vahda, ka gwaɗa, gege: 39«Daɗ kad a wunam, te kərecen maɗay ana da yaŋ jə masa Zlav ta ŋgakan fakwanay kad ndana hay.» Nda sə, ka data kad a wunam, ka bəzad jə masa Yesu ta ŋgana sə, kad ndana hay fakwanay dapa berne ana.

Yesu a mbəl ŋgwaz magəja bembez va dəm ta Jayrus

(Mat 9.18-26; Mar 5.21-43)

40Ndana hay gaa ac ka ɓal Yesu jaka ma te təker mazlakava te Gelile. Dapa mevehek tata kad vereceŋ, ndah ana ac ka kəsaw eve mewesley. 41Ndana ɓa mezel Jayrus. Aŋga bay ta way ta macə mbahw te Zuwef hay faŋga. Ke təɗ kad fe sek te Yesu, ka ŋgana mbahw e de də kad way tata, 42afa daŋgwaya malay amta ɓa aŋga gwabay mbala a ta məcay. Dəm ana sə, aŋga ava mavay mbala kuraw dapa yaŋ ana ecew.

Dapa masa Yesu e də kad way ta Jayrus ana sə, ndana hay aca ŋgaŋgəɗaciya. 43Dapa taɓa ta ndah ana faŋga, ŋgwaz ɓa aŋga eve mehecey ta magajə bembez. Mehecey ana ka ŋgada hahar mavay kuraw dapa yaŋ ana ecew. Ŋgwaz ana ka ndəvda zleley tata hay fakwanay kad daɓtar hay, amaa ac ka zlafa mambəliya aabay. 44Ŋgwaz ana ka ŋgucafa vaw Yesu jaka ava dəɓa, ka pafa ha ma ta rəkwat tata. Faŋga faŋga ana, bembez sə, ka həla ma.

45Dapa ŋgesey ana, Yesu ke nəkefec ndah da cak tata, gege: «Mepefiyey ha wa?» Kwa waawa, ka vahan, gege: «Yey bay! Yey bay!» Dapa ŋgesey ana, Piyer ka gwaɗa, gege: «Nda masasəraka nda, ndana hay fakwanay matulaka da cak takaa, aca ŋgaŋgəɗacakaa, ka gwaɗa mepefiyey ha wa sə, a ŋgana gwagumaw?» 46Yesu ka vahan, gege: «Ndana ke pefiyey ha ɓa, afa ya ka cəna gədaŋ te mambəl ndana dapa yey ke dek kad a vəda.» 47Ŋgwaz sə, ka wala anjəkar Yesu ka səna avəda, ka zlafa maraɓda yaŋ tata ɓasabay. Ke dey kad vara vaw, ke kekesley, afa zidaw ka kəɗa. Ke kekəred fəma te Yesu. Ka ŋguzda ma ana kad ndana hay fakwanay masa a pafa ha rəkwat te Yesu sə, mafay te mey? Asaya, ka ŋguzda masa gədaŋ te Yesu ta mbəliya faŋga faŋga ana sə, gwagumaw? 48Ava dəɓa ana, Yesu ka gwaɗa, gege: «Dəm aɗaw, makəsparav takaa ka mbəlakaa cay, daɗ dapa metehey.»

49Wagaa Yesu a ta ndəvda ma ana kad ŋgwaz sə, maslaŋ ɓa, ke dek da way ta Jayrus, mesnendə te Zuwef hay dapa Way ta macə mbahw te Zuwef hay, ka gwaɗa, gege: «Jayrus, daŋgwayak sə, ka məcata. Ka yiva nda masasəraka nda sabay.» 50Anjəkar Yesu ka cəna ma ana, ka gwaɗa Jayrus, gege: «Təhaza rav takaa, ke ŋgə zidaw bay. Kəs ma aɗaw war, daŋgwayak ana a ta mbəlata.»

51Mahusa te Yesu a way ta Jayrus, ke və cəv te mesehw kad way ava ndah mekele aabay. E sehw kad way ana sə, ava Piyer, Zaŋ, Zak. Asaya, papaŋ va mamaŋ te dem ana. 52Ndana hay faŋga fakwanay ac ka kuɗa, ac ka cə lalaw mafay te dem ana. Amaa Yesu gege: «Akwa kuɗa bay, dem ana, a njawaŋ bəna ka məc aabay.» 53Ndana hay ac ka sasarafa Yesu, afa aca səniya sə, dem ana ka məcata.

54Yesu ka ŋgucafa vaw dem ana, ka təhazaw pa ha, ka gwaɗa ava gədaŋ, gege: «Dəna, zleftek!» 55Mesfen tata ka vahakata, ke zleftek faŋga faŋga ana. Yesu ke gweɗec papaŋ va mamaŋ sə, gege: «Mavana jə ta manday.» 56Papaŋ va mamaŋ te dem ana ac ke rəzlec mabay, amaa Yesu ke kəteceŋ, gege: «Akwar te ŋguzdecen ma ana nesey kad ndana bay.»

Currently Selected:

Lukas 8: CUVnt

Highlight

Copy