Lukas 7

Makəsparav ta bay ta kafaraŋ hay

(Mat 8.5-13)

1Masa Yesu ka ndəvda megweɗ ma ana fakwanay kad miya, ke dey a Kafarnahum. 2A faŋga ana sə, mazlakava ta kafaraŋ hay temere da Rawma ɓa, aŋga ava madərlam ɓa masa a waya elehey. Madərlam ana sə, aŋga gwabay mbala a ta məcay. 3Masa mazlakava ta kafaraŋ hay ana a ta cəna ece gweɗ da yaŋ Yesu sə, ka zlar mesnendə te Zuwef hay dərziya dapa wunam ana faŋga kad vara Yesu, a wal aca ra ŋgana mbahw de dek mbəla madərlam tata ana avəda. 4Mahusa teceŋ kad vara Yesu, ac ka ŋgana mbahw mbahw, gege: «Da lada sə, ka jəna kafaraŋ ana, 5afa a walandakwa Zuwef elehey. Asaya, malamandaw Way ta macə mbahw sə, aŋga ana.» 6Yesu ke dey eve eceŋ fa slam ana. Masa mbala aŋga zef ava way ana, mazlakava ta kafaraŋ hay sə, a zlar guula tata hay ac da gwaɗa Yesu, gege: «Bay Mazlakava ka yiva vaw te medek kad way aɗaw bay, afa ya ka husa masa ke de sehwek a way aɗaw sə, aabay. 7Ya ka daɗ ava yaŋ taaɗaw aabay sə, mafay ana. Amaa gwaɗ ma pal amta, madərlam aɗaw ana a mbəlata. 8Yey ava yaŋ taaɗaw ana, mazlakava hay da yaŋ yey ɓa, kafaraŋ hay masa ya ŋgə bay da yaŋ eceŋ sə, aɓa may. Daha ye gweɗ kad nda amta, “daɗay” sə, e dey, daha ye gweɗ kad nda leŋgeɗey “dekey” sə, e dekey. Asaya, daha ye gweɗ kad madərlam aɗaw: “Ŋgə mezlər nesey sə, a ŋgiya.”»

9Masa Yesu a cəna ma ana ara nesey sə, ka wafa macəkuma bay, ke ŋgwedefec ma ndah macəpiya, gege: «Ya gwaɗakwar eve metehwe ana: “Kwa da vara ndah aɗaw Isreyel, ya ka ŋgat tərsam ta makəsparav ara nesey sə, aabay.”» 10Maslaŋ hay sə, ec ke vehec kad a wunam, mahusa teceŋ ac ta ŋgat madərlam sə, aŋga werwer cay.

Mepərekek ta wat ɓa dapa maməcay

11Ava dəɓa ana, Yesu va ndah masasəraka jene tata ec ke dey kad a gəva te Neyeŋ, ndana hay gaa ac ka cəpaw. 12Masa mbala ac te sehw kad pa wunam ana, ac ka cə yaŋ ava ndana hay gaa, ece zəɓek macəhwandə ta wat ɓa kad pa jəvay. Wat ana sə, wut ta ŋgwa macəhwandaw ɓa. Aŋga malay amta masa ŋgwa macəhwandaw ana te heyekey. Ndana hay gaa ece dey kad dara macəhwandaw ana. 13Dapa masa Bay Mazlakava Yesu a ta wala ŋgwaz ana sə, metekwen ka ŋgana fətiya mabay, ka gwaɗa, gege: «Təhaza rav, ka kuɗa bay!» 14Ava dəɓa te megweɗ tata ara nesey sə, ka ŋgucafa vaw caɓay masa macəhwandaw ana fətiya, rap! A pafa ha caɓay ana. Ndah mazəɓa macəhwandaw sə, ec ke zlececeŋ. Yesu ka gwaɗa macəhwandaw sə, gege: «Bigula! Ya ta gwaɗakaa, zleftek!» 15Macəhwandə sə, pərtakaɗ! E zleftek, ka njahata maanjahay, ke gweɗey. Yesu ka gwaɗa mamaŋ, gege: «Aha wudiyak!» 16Dapa ŋgesey ana, ndana hay fakwanay ac ka ŋgə zidaw, ac ka mbaɗ Zlavay eve megweɗ, gege: «Nda mehwedek ma mazlakava ke husek pa taɓa tandakwa ta pəsna, Zlav ke dekey ka ta wuzaɗ ndah tata!» 17Ndah dapa vavara te Zudey va wunam hay mekele da cakiya fakwanay, ac ka cəna jə masa Yesu ta ŋgiya.

Zaŋ Baatis a zlar ndana hay kad vara Yesu

(Mat 11.2-19)

18Ndah masasəraka jene ta Zaŋ ac ka kəran maɗay ana fakwanay kad nda mesesərekecen jene. Ac ka gwaɗa ndah masasəraka jene tata ecew, 19e zlerdec kad vara Bay Mazlakava ac da nəkafa, «Kaa sə, ka Kəristi nda masa e te dek sə, geyey, anda ɓal nda mekele?» 20Mahusa tec vara Yesu sə, ac ka gwaɗa, gege: «Zaŋ Baatis ka zlərakandaw kad varakaa, afa andaw da nəkafakaa, “Kaa sə, ka Kəristi nda masa e te dek sə, geyey, anda ɓal nda mekele?”»

21Ta pəsaŋga ana ŋgesey, Yesu aŋga dapa membəl ndah eve mehecey hay mabay. Ndah mahahalɓa hay, ndah eve mesfen hay maləza va mewunecen ndey ta mahazlaw hay. 22Ava dəɓa ana, ke vehecen ma ana kad maslaŋ hay masa Zaŋ Baatis te zlərekeceŋ sə, gege: «Madaɗay ma ta gwaɗa Zaŋ ana sə, jə masa akwar ka wala eve ndey takwar va masa akwar ka cəna ava zləmay takwar. Magwaɗa, təlam nesey sə, mahazlaw hay aca wala ndey, ndah mahahalɓa ece də ve sek teceŋ, meskwelme hay ec ke səɗeceŋ, madagazlam hay aca cəna zləmay, ndah maməca ac ka pərakata dapa maməcay, maslamarga hay ac ka cəna Labara mambəla ana. 23Mapəsma ɓa kad nda masa ka gərda mekəs ma aɗaw aabay.»

Matə yaw te Yesu da yaŋ Zaŋ Baatis

24Ava dəɓa ta masa maslaŋ hay ta Zaŋ Baatis ec ke deceŋ sə, Yesu ka zlar megweɗey da yaŋ Zaŋ ana kad miya da cak tata, gege: «Akwa də ke te wuzeɗek dapa səɓak sə, mey? Ɓəlev masa memeɗ ta gugəziya geyey? 25Naa akwa də ke te wuzeɗek sə, mey? Akwa welek sə, nda masa majasla ava rəkwat mambəla ana fa vaw geyey? Ndah majasla vaw ava rəkwat ta səlay va manjah dapa mambivaw sə, meŋgetec say fəma ta way ta bay hay. 26Naa akwa də ke te wuzeɗek sə, melemey? Nda mehwedek geyey?» Aŋga, ya gwaɗakwar, aŋga sə, ka fəna nda mehwedek ma gaa, 27afa Zaŋ ana sə, aŋga nda masa ma ta Zlav mavinda ke gweɗ da yaŋ ana, gege:

«Wala, ya zləraɗ maslaŋ aɗaw fəma takaa,

a da ləmadakaɗ cəv takaa fəma takaa.»

28Ya gwaɗakwar, ndana deveŋ ndah masa ece heyek da hwaɗ ta ŋgwaz dapa vavara nesey, a da fəna Zaŋ Baatis ana sə, aabay. Anjəkar nda mekusetke ana dapa Wunam ta bay ta Zlavay sə, aŋga mazlakava ka fəna.

29Ndana hay fakwan faŋga va ndah macəkala budaw macəna ma ta Zaŋ ana sə, ac ka səna meŋgə jene eve cəvey ta Zlavay, ac ka kəsaw Zaŋ de ŋgec beetem. 30Amaa Farisa hay va ndah mesesərekecen ma majawa kad ndana hay sə, ac ka kəs jə masa Zlav ta waya kad eceŋ sə, aabay. Afa aca gwam ke ŋgə beetem masa Zaŋ ta ŋgiya kad ndana hay sə, bay.

31Yesu ke gweɗ saya, gege: «Ya da cacal ndana hay təlam nesey sə, eve mey? Ac ara mey hay? 32Ac ara wudeh masa manjaha dapa slam ta maɓac vaw, aca ɓəsl ma, gege: “Andə ka fətakwar slərem, amaa akwar ke gərev aabay. Andə ka slakwar law hay ta makwaɗ macəhwandaw, amaa akwar ka kuɗa aabay”. 33Ya gwaɗakwar ara nesey sə, afa Zaŋ Baatis e dek sə, a ndə ɗaf aabay, a sə wuzam aabay, amaa akwa gwaɗa: “Leŋgesl ka nasata#Mat 11.18; Mar 3.21.”. 34Wut ta nda e dek sə, e ndə jene, e sə jene. Amaa akwa gwaɗa: “Mawala nda nesey, e dek sə, ka ta ndə jene hay va masə jene hay kad hwaɗ tata babəla. Asaya, aŋga guula ta ndah macəkala budaw va ndah maŋga mebər hay!” 35Amaa leŋgesl te meven jene hay ta Zlavay masəna avəda mambəla ana sə, jaka vara wudeh tata fakwanay makəsa leŋgesl ana.»

Yesu aŋga da way ta Simaŋw nda Farisa ana

36Farisa ana ɓa ka zala Yesu ka ta ndə ɗaf da way tata. Yesu ke də way ta nda ana, ka njahay, ka ndə ɗaf. 37Dapa wunam ana ŋgesey ŋgwaz ɓa, e ŋgə mebər elehey. A ta cəna Yesu aca ndə ɗaf da way ta nda Farisa sə, ke dey ava kwalaba te kekeŋ mezel albaatəra manəha weh ava mal te meŋgeŋgəzey. 38Ke kekəred zef a vara sek te Yesu, ka kuɗa. Makuɗa tata ana sə, ke tukwey kad fa sek te Yesu, ka təkwaɗaw ava ŋgwec ta yaŋ tata, ka humbat sek ana, ka təkwaɗafa mal te meŋgeŋgəzey sə, fətiya. 39Nda Farisa mazala Yesu kad way tata sə, ka wala ŋgwaz matəkwaɗa sek te Yesu ana, ka wulakaw, gege: «Daha nda ana aŋga nda mehwedek ma metehwe ana sə, efes a səna ŋgwaz magasa vaw fe sek tata na avəda, masa aŋga ŋgwaz maŋga mebər elehey.» 40Yesu ka kəs ma ka gwaɗa, gege: «Simaŋw, ya wal ma ta ŋguzda kaa jə amta ɓa.» Simaŋw sə, ka vahan, gege: «Gweɗey, nda masasəraka nda.» 41Yesu ka gwaɗa, gege: «Ndah ecew ɓa ac ka hal duwa da vara ndana ɓa. Nda amta ka hal yam ta səlay temere zlam, nda leŋgeɗey ka hal yam ta səlay kwakwar zlam 42Amaa ac cuweeney ac ka zlafa mapal duwa ana sə, ɓasabay. Ara nesey, nda mevec duwa sə, ke gərecen səlay ana, afa ac ka zlafa mapəliya aabay. Daha ara nesey, deveŋ eceŋ cuweeney sə, ma ta wal nda megərecen səlay ana ɗahw sə, wa?» 43Simaŋw sə, ka vahan, gege: «Ya wulakiya sə, ma ta waya ɗahw sə, nda masa duwa da yaŋ ana mabay.» Yesu ka gwaɗa, gege: «Aŋga, ma takaa təɗe.»

44Ava dəɓa ana, Yesu ke pə ndey kad fa ŋgwaz sə, ka gwaɗa Simaŋw sə, gege: «Ka wala ŋgwaz na geyey? Ye dek kad way takaa, ka ka viyey yam ka pan sek aɗaw aabay. Amaa aŋga sə, ka panawa sek aɗaw ava makuɗa tata, ka təkwaɗawa avəda ava ŋgwec ta yaŋ tata. 45Ye dek sə, kad way takaa, ka ka kəsiyey ava mahumbat vaw aabay, amaa aŋga sə, dəga mesehwek tata kad way takaa sə, ka gərda mahumbat sek aɗaw aabay. 46Ka ka təkweɗefiyey mal te meŋgeŋgəzey sə, fə yaŋ aɗaw aabay, amaa aŋga sə, ka təkwaɗawa sek ava mal ana. 47E weliyey elehey sə, afa aŋga eve mebər mabay, amaa mebərey ana hay mapəla avəda. Amaa nda masa a nək mepel mebər tata kusetke vara Zlavay sə, e ŋguzdek mawal vaw tata kusetke war.»

48Ava dəɓa ana, Yesu ka gwaɗa ŋgwaz ana, gege: «Mebər takaa hay mapəla avəda cay.» 49Ndah mandana ɗaf ava Yesu faŋga sə, ac ka sasak ma dapa taɓa tec, gege: «Nesey ana sə, ndana wa masa a pal mebər ta ndana hay?» 50Amaa Yesu ka gwaɗa ŋgwaz sə, gege: «Makəsparav takaa ka mbəlakaa avəda cay. Daɗ dapa metehey.»

Currently Selected:

Lukas 7: CUVnt

Highlight

Copy