Lukas 6

Yesu aŋga bay da yaŋ pas ta masasak vaw

(Mat 9.14-17; Mar 2.18-22)

1Pas ta masasak vaw, Yesu va ndah masasəraka jene tata ec ke dey jaka pa ley bəley. Ndah masasəraka jene tata sə, ac ka ŋgwah wudiya ana hay, ac ka gwaguha ava ha, ac ka ndaw. 2Mafay ana, Farisa hay dərziya ec ke gweɗ, gege: «Akwa ŋgə jə masa cəv mava ta maŋgiya pas ta masasak vaw aabay sə, mafay te mey?» 3Yesu ke vehecen, gege: «Akwar ka jaŋgaw masa Deevet ta ŋgiya dapa masa mayə a kəɗa, aŋga ava ndah tata masa ece ŋgə mezlər fa slam ana sə, aabay geyey? 4Naa Deevet a ŋgana gwagumaw, e sehw pə way ta kwakwas, a kəs peŋ masa mava kad Zlavay. A ndiya, e vec kad ndah tata masa ece ŋgə mezlər fa slam ana. Anjəkar peŋ ana ŋgesey sə, ma majawa ka və cəv kad ndana ta mandiya aabay, say kad ndaakwas hay babəla?» 5Yesu, ke gweɗec saya, gege: «Wut ta nda sə, aŋga bay ta pas ta masasak vaw.»

Yesu a ləmad ha ta ndana pas ta masasak vaw

(Mat 12.9-14; Mar 3.1-6)

6Dapa pas ta masasak vaw te Zuwef hay mekele saya, Yesu ke sehw pə Way ta macə mbahw te Zuwef hay, ke sesərekec ndana hay. Ndana da way ana ɓa, ha tata ta zam maməca. 7Ndah mesesərekecen ma majawa kad ndana hay va Farisa hay, ac ka pafa ndey Yesu eve leŋgesl eve leŋgesl, aca ra wala gəla a mbəl nda ana pas ta masasak vaw te Zuwef hay kwa! Afa aca yah cəv ta majawiya ava ma hay. 8Amaa Yesu, ka sən mawulak yaŋ tec avəda. Ka gwaɗa nda masa ha ta zam tata maməca sə, gege: «Zleftek, zlecey fana fəma ta ndana hay fakwanay.» Nda sə, ke zleftek, ke zlec fəma ta ndana hay faŋga. 9Ava dəɓa ana, Yesu gege: «Ya nəkafakwar daha cəv mava pas ta masasak vaw te meŋgə jə mambəla ana, daha aabay jə masa e teh bay, ta mambəl mesfen ta ndana, daha aabay maza ana avəda.» 10Ke njerefec amta amta fakwanay, ka gwaɗa nda sə, gege: «Baŋgaɗa ha takaa.» Nda sə, baŋgaɗ! A baŋgaɗa ha ana, ha sə, ka ləmadata pa slam ana. 11Mafay ana, ndah mesesərekecen ma majawa kad ndana hay va Farisa hay sə, ke zəmec fa rav mabay. Ac ka cə mamənak dapa taɓa tec, gege: «Ma da ŋgana nda Yesu ana sə, mey?»

Yesu pal maslaŋ tata hay kuraw dapa yaŋ ana ecew

(Mat 10.1-4; Mar 3.13-19)

12Dapa pas ana hay ŋgesey, Yesu ke dey fa ŋguɗa ka te cə mbahw. Faŋga sə, ka tavda slam dapa macə mbahw kad Zlavay. 13Metev ta slam pərek sə, ka zal ndah masasəraka jene tata kad cak tata. Ka pal ndana hay deveŋ eceŋ kuraw dapa yaŋ ana ecew, ke peɗec ka maslaŋ tata hay. 14E pelek ka maslaŋ tata hay sə, ac Simaŋw nda masa Yesu ka pafa mezel Piyer va malamaŋ Endəre, Zak va Zaŋ, Fəlep, Bartelemi, 15Mata, Tumas, Zak wut ta Alfey, Simaŋw nda ta wunam, 16Zud wut ta Zak va Zudas Iskariyawt nda ma ta vana Yesu pa ha ta maslagəra tata hay.

Mabəzad ma te Yesu va mambəl ndana hay

(Mat 4.23-25)

17Mebəreŋgek tata fa ŋguɗa eve eceŋ, ke zlec fa zaŋ ava miya ta ndah masasəraka jene tata. Miya ta ndana hay gaa ec ke ɓəleceŋ faŋga, ndah ana, ece dek dapa berne te Zudey, te Zeruzelem, da cak ta yam mafayakfayak ana te Tir va ta Sidaŋw. 18Ndah ana, ece dek sə, ka ta cak zləmay fe mesesərek te Yesu mayah membəl dapa mehecey teceŋ. Ndah masa ec eve mesfen hay maləza dapa yaŋ ec ke mbeseceŋ. 19Miya fakwanay ac ka yah cəvey ka ta pafa ha Yesu, afa gədaŋ tata te membəl ndana hay sə, ke dek kad a vəda.

Ndah masa ac dapa mewesley va dapa marga

(Mat 5.1-12)

20Ava dəɓa ta mambəl ndah gwabay sə, Yesu ke pefec ndey ndah masasəraka jene tata, gege:

«Mapəsma ɓa kad akwar maslamarga hay,

afa Wunam ta bay ta Zlavay sə, mapa kad akwar.

21Mapəsma ɓa kad akwar ndah masa may a kəɗakwar təlam nesey,

afa Zlav a ta mbənakwar.

Mapəsma ɓa kad akwar ndah makuɗa təlam nesey,

afa pas ana e te dekey akwar te seserey.

22Mapəsma ɓa kad akwar masa

ndana hay aca walakwar fe ndey bay,

aca ŋgwadafakwar dəɓa,

aca lafakwar.

Asaya, aca ŋgal dar fakwar,

mafay ta masa akwar ka kəs ma ta Wut ta nda.

23Dapa ŋgesey ana,

mewesley, mecəkweley,

afa Zlav a ta pəlakwaɗ meyəv takwar,

mazlakava ana da baymaləvaŋ.

Ara masa papaŋ ta papaŋ ta ndah ana hay ŋgesey,

ac ke ŋgedec hahar mabay,

kad ndah mehwedek ma zleezle.

24Amaa wabaw kad akwar ndah eve zleley,

afa akwar ka ŋgat mambivaw takwar təlam cay.

25Wabaw kad akwar, akwar

ndah masa mambəna kaf təlam nesey,

afa may a ta kəɗakwar.

Wabaw kad akwar, akwar

ndah meseser təlam nesey,

afa akwar ta njah dapa marga, akwar ta kuɗa.

26Wabaw kad akwar, akwar masa aca hahəmakwar, afa ara nesey papaŋ ta papaŋ tec hay zleezle ec ke hehəmec ndah mapana yaŋ tec ka ndah mehwedek ma!»

Mawal maslagəra hay

(Mat 5.38-48; 7.12a)

27Yesu ke gweɗec saya, gege: «Təlam nesey ya gwaɗakwar, akwar ndah macəka zləmay fa ma aɗaw, mawal maslagəra takwar hay, meŋgec jə mambəla ana kad ndah masa aca walakwar fe ndey bay. 28Mepəsefec ma ndah magwadarakwar, macə mbahw kad Zlavay mafay ta ndah maŋgadakwar hahar. 29Daha ndana ka kəɗakaa pa baazlam, ŋgwadan baazlam leŋgeɗey. Daha ndana ka kəsakaɗ dawrawal takaa avəda, gərda a da kəs rəkwat takaa da hwaɗiya ana saya. 30Kwa waawa masa ka nəkafakaa jene, vana. Daha ndana ka kəsakaɗ jene avəda sə, ka ta nəkafa a da vahakaɗ cama bay. 31Təlam nesey, meŋgec jə mambəla ana kad ndana hay, ara masa akwa wal ac da ŋgakwar may. 32Daha akwa wal sə, ndah masa aca walakwar babəla war sə, akwa wulakiya sə, Zlav a ta pəlakwaɗ meyəv takwar geyey? Ara nesey, kwa ndah maŋga mebər hay, ac ta wal sə, ndah masa ece welec may. 33Daha akwa ŋgə jə mambəla ana sə, kad ndah masa aca ŋgakwar jə mambəla ana babəla sə, ŋgesey, akwa wulakiya Zlav a ta pəlakwaɗ meyəv takwar geyey? Ara nesey, ndah maŋga mebər hay, aca ŋgiya ara aŋga ana may. 34Daha akwa və jene sə, kad ndah masa akwa wulakiya ac ta pəlakwaɗ avəda sə, ŋgesey akwa wulakiya Zlav a ta ŋgakwar jene mambəla ana mafay ana geyey? Ara aŋga ana, kwa ndah maŋga mebər hay, ac te və jene sə, kad ndah masa ac te vehecen avəda dapa taɓa tec may. 35Amaa mawal maslagəra takwar hay, meŋgec jə mambəla ana. Mevec jene ava mawulak yaŋ ta masa aca ra vahakwaɗ avəda bay, afa Zlav da Wudam aŋga nda mambəla ana kad vara ndah masa aca sən maŋgana wasay bay va kad vara ndah suwe.

Mevəley kad vara maslavda

(Mat 5.48; 7.1-12; 15.14; 10.24-25; 7.3-5)

36Meŋgə metekwen fa ndana hay, ara Zlav papaŋ tandakwa te ŋgə metekwen fa ndana hay fakwanay.»

37Yesu ke gweɗec saya, gege: «Akwar ta paɗ yaŋ takwar ta maz ndana hay dapa mebər teceŋ ara Zlav bay, mafay ana Zlav a ta zanakwar avəda dapa mebər takwar ara aŋga ana may. Akwar ta jaw ndana ava ma bay, afa Zlav a ta jawakwar may. Mepəlecen mebər ta ndana hay, ara nesey, Zlav a ta pəlakwaɗ mebər takwar may. 38Mevec jene kad ndana hay, Zlav da vakwar may. Ara megweɗey, Zlav a ta kuyakwar jene mabay pe jiibe ta rəkwat takwar mazlakava ana, a rəɗa, a jajəka kasl pe mezekey. Eve metehwe ana Zlav a ta ləvakwar jə masa a ta vakwar sə, ava daram masa akwa ləvec jene hay pa kad ndah mekele sə, may.» 39Ava dəɓa ana, Yesu ke gweɗec saya, ava ma maɗəva mekele, gege: «Mahazlaw a zlafa mapad ma ta mahazlaw caliya geyey? Daha ara nesey sə, ec cuweeney ece təɗec pe veɗ aabay geyey?» 40Nda masasəraka jene, a fəna nda masasərakan jene sə, aabay, amaa daha nda masasəraka jene ka səna jeŋ ana hay avəda fakwanay sə, a ta njah ara nda masasərakan jene. 41Yesu ke gweɗ ava ma maɗəva mekele saya, gege: «Ke pə ndey fa wut te kəzeŋ dapa ndey ta malamakw sə, anjəkar gada mazlakava ana dapa ndey takaa ɓa sə, ka wulak yaŋ da yaŋ ana aabay sə, gwagumaw? 42Ka gwaɗa malamakw, ɗagay ya kəsakaɗ wut te kəzeŋ dapa ndey takaa avəda, anjəkar gada mazlakava ana dapa ndey takaa ɓa sə, ka wala bay sə, a ŋgana gwagumaw? Kaa, nda maŋgwada nda ava ma, kəsa gada mazlakava ana dapa ndey takaa avəda ɗagay, ka da ŋgat mawala ndey ka ta kəs wut te kəzeŋ dapa ndey ta malamakw.»

Nda masasəraka jene metehwe ana

(Mat 7.16-20; 12.33-35)

43Yesu ke gweɗec saya, gege: «Eve metehwe ana wudez mambəla ana sə, e heyek wudiya ana hay mambəla ana bay sə, aabay. Ara aŋga ana wudez masa e ɓət meeɓətey sə, e heyek wudiya ana hay mambəla ana sə, aabay may. 44Ara megweɗey, eve metehwe ana, kwa wudez wula wula sə, e te sən sə, fa wudiya ana hay. Ndana a zlafa maŋgal ɗeskeɗ fa katav aabay, daha aabay maftay fa ndərem sə, aabay. 45Nda mambəla ana sə, e ŋguzdek jə maraɓa dapa rav tata mambəla ana, amaa nda suwe sə, e te ŋguzdek jeŋ masa e teh bay dapa rav tata. Eve metehwe ana, ɗaf ta ma ta ndana sə, e ŋguzdek sə, jeŋ masa maraɓa dapa rav tata.»

46Yesu ke gweɗec ndah masasəraka jene tata, gege: «Akwa zeliyey, “Bay Mazlakava, Bay Mazlakava” amaa akwa ŋgə mezlərey ana ara masa ya ta gwaɗakwar aabay sə, mafay te mey?

(Mat 7.24-27)

47Təlam nesey, ya ta ŋguzdakwaɗ kwa waawa masa ke dek kad vereyey, a cak zləmay fa ma aɗaw, ke ŋgə mezlər ava ma masa ya ta gwaɗa sə, aŋga ara wa? 48Aŋga ara nda malama way masa dar ta way ana matatəha mambəla ana mazləla kasl fa kərna. Meslək ta yam, kwa ka nəhata wayam wayam, ke vevek kasl dəɓa ta way, ka zlafa mambaɗ way ana aabay, afa sek ta way ana matatəha mambəla ana. 49Amaa nda macəka zləmay fa ma taaɗaw ke ŋgə mezlər ava ma ana masa a cəna aabay sə, aŋga ara nda malama way dapa ləhwaɓ ta wuyak masa sek ta way ana mazləla gaa aabay. Mevevek ta yam da wayam kasl dəɓa ta way, ka mbəɗa way ana avəda fakwanay.»

Currently Selected:

Lukas 6: CUVnt

Highlight

Copy