Lukas 5

Yesu a zal ndah masasəraka jene tata macaaca ana

(Mat 4.18-22; Mar 1.16-20)

1Pas mekele ɓa, Yesu aŋga da ma te təker mazlakava te Genezeret. Miya gaa maɓəca faŋga, ac ka ŋgucafa vaw ava maŋgaŋgəɗac vaw ka ta cak zləmay fəma ta Zlavay masa a bəzadiya. 2Kaslkaslah hay ecew faŋga ana da ma te təker mazlakava ana ɓa. Ndah dapa kaslkaslah ana sə, ac ke bəreŋgekeceŋ, aca pan səfa teceŋ. Yesu ke welec kaslkaslah ana hay. 3Ke tep pa kaslkaslah amta. Kaslkaslah ana sə, ta Simaŋw. Yesu ka ŋgana mbahw, a da zadaɗ kaslkaslah ana kad pa yam kusetke saya. Ava dəɓa ana ka njah pa, ke sesərekec miya hay. 4Masa ka ndəvda mesesərekec cay sə, ka gwaɗa Simaŋw, gege: «Zadaɗ kaslkaslah ana kad fəma pe dəlev ta yam va makazlaɗ səfa takwar pa yam ka ta təhaz kəlef.» 5Simaŋw ka vahan, gege: «Bay taciya, hwavavaɗ nesey, andaw dapa meyeh kəlef ana, ka məzandaw aabay, andə ka yəvata. Amaa mafay ta ma takaa, ya ta kazlaɗ səfa ana pa yam saya.»

6Ac ka kazlaɗ səfa tec hay sə, pa yam, faŋga faŋga ac ke həlek kəlef mabay. Mafay ana, səfa tec hay sə, ac ka zlar meŋgerey. 7Ec ke hebetec ha kad mandala tec hay dapa kaslkaslah leŋgeɗey, ece re dek jəneceŋ. Mandala tec hay sə, ec ke dekey, ac ka nəha kaslkaslah tec cuweeney. Kaslkaslah ana hay mbala ec te ndərmeɗ kad pa yam. 8Masa Simaŋw Piyer a wala ara nesey sə, ke kekəred fəma te Yesu, ka gwaɗa, gege: «Bay Mazlakava, ŋgəliyey vaw, afa ya nda te mebərey.» 9Simaŋw sə, zidaw ka ŋgana mabay, kwa mandala tata hay zidaw ke ŋgec may, mafay te kəlef hay mabay masa ec te həlekec dapa yam. 10Mandala hay ta Simaŋw ac Zak va Zaŋ, wudeh te Zebede, ac ka ŋgə zidaw saya may. Dapa ŋgesey ana, Yesu ka gwaɗa Simaŋw ana, gege: «Ke ŋgə zidaw bay, e zler dəga təlam nesey, ke te həlek sə, ndana hay.» 11Ac ka hwadaɗ kaslkaslah tec sə, kad rav ta zazay da ma te təker ana, ac ka gərda jene hay tec fakwanay faŋga, ac ka cəp Yesu.

Meseɗ ta nda meskwelme

(Mat 8.1-4; Mar 1.40-45)

12Masa Yesu aŋga dapa berne amta te berne ana hay sə, ndana ɓa dərŋga meskwelme fa vaw tata mabay. Nda ana ka wala Yesu, ke kekəred fəma tata dəŋgaɗ dac fa vara, ka ŋgana mbahw, gege: «Bay Mazlakava, daha ka waya, ka zlafa mesəɗiyey avəda.» 13Yesu ka talana ha, ka pafa ha, ka gwaɗa, gege: «Ya ka walaw, səɗaɗay.» Faŋga faŋga, meskwelme fa vaw sə, ɓasabay. 14Yesu ka kəta nda ana, ka gwaɗa, gege: «Ka ta ŋguzda ma da yaŋ jə masa ya ta ŋgakaa nesey kad ndana bay heley. Amaa daɗ vara ndaakwas, ta ŋguzdan vaw takaa, ava dəɓa ana, vana jə ta kwakwas ta mapan vaw takaa ara ma majawa ta Muyiz te gweɗey. Faŋga sə, ac ta ŋgat matə yaw da yaŋ kaa.» 15Ava aŋga ana fakwanay sə, ndana hay ec ke gweɗey da yaŋ Yesu fəma fəma. Miya hay gaa ac ka kwasa vaw ka ta cəkafa zləmay va mayah membəley dapa mehecey teceŋ. 16Tata sə, ka ŋgəla vaw ara teceɗem kad pə yaŋ ta səɓak ka ta cə mbahw.

Membəl ta nda mahahalɓa

(Mat 9.1-8; Mar 2.1-12)

17Pas amta ɓa, Yesu ka sasərak ndana hay dapa Way ta macə mbahw te Zuwef hay. Farisa hay va ndah mesesərekecen ma majawa kad ndana hay ac faŋga may. Ece dek da gəva hay mekele mekele de Gelile, de Zudey va dapa berne te Zeruzelem. Gədaŋ mazlakava ta Bay Mazlakava a ŋgə mezlərey ava aŋga ta mambəl ndana hay. 18Dapa ŋgesey ana, ndana hay ec ke zəɓek nda mahahalɓa ana ɓa manaha da yaŋ caɓay. Ac ka yah cəv te mesehw kad pə way masa Yesu aŋga dapa ava nda mahahalɓa sə, aca ra paɗ fəma tata. 19Amaa ac ka ŋgat mesehw pa aabay, afa miya elehey. Mafay ana, ec ke tepə a yaŋ way masa Yesu aŋga dapa, ac ka pəzakwa yaŋ ta way ana. Ac ka sahwaɗ nda mahahalɓa sə, ava slam ta manah tata majawa fe ɗuweŋ, pa taɓa ta ndah maɓəca fəma te Yesu da way ana. 20Masa Yesu a wala makəsparav teceŋ sə, ka gwaɗa nda mahahalɓa sə, gege: «Mebər takaa hay mapəla.» 21Ndah mesesərekecen ma majawa kad ndana hay va Farisa hay ac ta cəna ma ana sə, ac ka wulakaw dapa yaŋ tec, gege: «Nesey sə, tərsam ta nda wula, masa a pə yaŋ tata ka Zlavay? Mazlafa mapəla mebər ta ndana ɓa wa, say Zlav aŋga amta!» 22Anjəkar Yesu ka səna mawulak yaŋ tec sə, avəda. Ke nəkefec, gege: «Akwa wulakiya dapa rav takwar ara nesey sə, mafay te mey? 23Ma masa gədaŋ dapa aabay te megweɗey sə, wula? “Mebər takaa hay mapəla” geyey, daha aabay, “Zleftek, daɗay”? 24Yaw tehey, afa akwar da səna Wut ta nda aŋga ava gədaŋ ta mapal mebər hay ta ndana hay dapa vavara.» Ka gwaɗa nda mahahalɓa sə, gege: «Ya gwaɗakaa təlam nesey, zleftek, kəs caɓay takaa, daɗ kad a wunam.»

25Faŋga faŋga, nda sə, ke zleftek fəma teceŋ, ka kəs caɓay tata, ka data kad a wunam ava mambaɗ Zlavay. 26Ac fakwanay ec ke rəzleceŋ, ac ka mbaɗ Zlavay, ava zidaw manəha dapa eceŋ, ec ke gweɗ, gege: «Ta pəsna andə ka walakwaɗ jə masa ke ŋgə dapa manjah tandakwa sə, aabay.»

Yesu a zal Levi

(Mat 9.9-13; Mar 2.13-17)

27Ava dəɓa ta masa Yesu ka ŋgana cahay ana na cay, ka data a vəda dapa way ana. Ka wala nda macəkala budaw mezel Levi. Aŋga manjaha dapa slam ta macəkal budaw. Yesu ka gwaɗa, gege: «Cəpiyey.» 28Dapa ŋgesey ana, Levi sə, ka gərda jene hay tata fakwanay, ka cəpaw.

29Ava dəɓa ana, Levi ka ŋgana macunam kad Yesu da way tata. Miya ta ndah macəkala budaw va ndah mekele mabay ac faŋga, aca ndə ɗaf eve eceŋ. 30Farisa hay dərziya va ndah mesesərekecen ma majawa kad ndana hay ac ka wala Yesu a ndə ɗaf ava ndah te mebərey, ec ke hwehwer dapa taɓa teceŋ. Ec ke gweɗec ndah masasəraka jene tata, gege: «Akwa ndə ɗaf va masə jene ava ndah macəkala budaw va ndah maŋga mebər hay sə, mafay te mey?» 31Yesu ka kəs ma, gege: «Ndah masa ac werwer sə, ma tec ava daɓtar hay aabay. Amaa manəka daɓtar hay sə, ndah gwabay. 32Ye ke dek mafay ta ndah maŋga jene cəvey ana sə, aabay, amaa ye dek sə, mafay ta ndah te mebər hay, aca ra ŋgwada rav teceŋ.»

Maŋgə dalyama

(Mat 9.14-17; Mar 2.18-22)

33Farisa hay ac ka gwaɗa Yesu, gege: «Ndah masasəraka jene ta Zaŋ Baatis pas mekele ece ŋgə dalyama, aca cə mbahw, ara aŋga ana ndah taciya. Anjəkar, ta ndah masasəraka jene takaa aca ndə jene va masə jene!» 34Yesu ke vehecen ava ma maɗəva, gege: «Akwa zlafa mepeɗec ndah mazala kad pa macunam ta madəmay pa dalyama dapa masa makəsa madəmay ana aŋga de verec hel geyey? Eve metehwe ana, e ŋgə aabay! 35Amaa, pas ana e te dekey masa ec te kəsecen makəsa madəmay ana avəda. Dapa pas ana hay ŋgesey ac ta zlafa meŋgə dalyama.»

Jə mava va jə waya

36Yesu ke gweɗec ava ma maɗəva saya, gege: «Ndana maŋgara rəkwat waya ka ta ɗap rəkwat mava sə, aabay. Eve metehwe ana, daha a ŋgiya ara ŋgesey, ka nasa rəkwat waya ana ŋga avəda, afa rəkwat waya ece cem ava mava aabay. 37Asaya, ndana a zlafa macəhaɗ wuzam dedeɗek pe kwenekwene mava aabay. Daha aabay sə, wuzam dedeɗek a təha kwenekwene ana avəda, wuzam ana, a cəhata. Kwenekwene hay may ec te neseceŋ. 38Amaa a lada maɗah wuzam dedeɗek sə, pe kwenekwene hay waya. 39Nda masa a sə wuzam maɓəsla sə, a wal wuzam dedeɗek bay, afa ece gweɗ, gege: “Wuzam maɓəsla, e cen fəna wuzam dedeɗek.”»

Currently Selected:

Lukas 5: CUVnt

Highlight

Copy