Lukas 9

Yesu e zlerdec ndah masasəraka jene tata kuraw dapa yaŋ ana ecew

(Mat 10.5-15; Mar 6.7-13)

1Yesu ke cemec ndah masasəraka jene tata kuraw dapa yaŋ ana ecew, ke vec gədaŋ mazlakava te meŋgə cah hay ta mambas damkwaw dapa ndana hay va membəl ndah eve mehecey hay. 2Ke zlerdec ka ta bəzad ma da yaŋ Meŋgə bay ta Zlavay va mambəl ndana hay dapa mehecey hay. 3Wagaa ac te dey sə, gege: «Madaɗay, amaa dapa medə takwar sə, akwa ta kəs jene pa ha bay, kwa gada, kwa bakatar, kwa jə ta manday, kwa daha aabay səlay bay. Ndana a ta kəs rəkwat ecew bay. 4Kwa fəla fəla masa ndana ta kəsakwar kad way tata sə, manjah faŋga kasl pa pas masa akwa wal madaɓa dapa kad pa slam mekele. 5Dapa wunam wula wula masa ndana hay ac ka kəsakwar aabay sə, masləva melbelbe fe sek takwar avəda, madaɓa dapa wunam ana, dapa ŋgesey ana, akwa wal meŋguzdecen sə, ac ndah te mebər hay, Zlav e te təɗec ma a yaŋ ava dəɓa ana.» 6Ndah masasəraka jene tata sə, ec ke dey, ac ka ŋgway dapa wunam hay mekele mekele dapa vavara te Gelile, ac ka bəzad Labara mambəla ana, ac ka mbəl ndah eve mehecey hay kwa fəla fəla.

Mawulak yaŋ ta Herawt da yaŋ Yesu

(Mat 14.1-12; Mar 6.14-29)

7Herawt, bay da yaŋ vavara te Gelile ana ŋgesey, ka cəna ma da yaŋ jene hay masa Yesu va ndah masasəraka jene tata ta ŋgiya. Ma ana ka vana mawulak yaŋ macəkuma bay, afa ndah leŋgeɗey ec ke gweɗ, gege: «Zaŋ Baatis ka pərakata dapa maməcay.» 8Dərziya hay ec ke gweɗ, gege: «Arkamba Eli te ŋguzdek vaw.» Mekele hay, ec ke gweɗ saya, gege: «Nda amta deveŋ ndah mehwedek ma ta Zlav zleezle te pərek dapa maməcay.» 9Amaa Herawt ke gweɗ, gege: «Ŋgesey ana sə, Zaŋ Baatis bay, afa ya ka ŋgəlan yaŋ tata avəda. Nda ana masa ece gweɗ da yaŋ ana ŋgesey sə, ndana wa la wa?» Ka yah cəvey a da wala Yesu.

Yesu e vec jə ta manday kad ndah bakatar zlam

(Mat 14.13-21; Mar 6.30-44; Zaŋ 6.1-14)

10Ava dəɓa ana, maslaŋ hay te Yesu kuraw dapa yaŋ ecew ece vehek dapa wunam hay masa ec te bəzedek ma ta Zlavay va membəlek ndah eve mehecey hay dapa sə, ac ka ŋguzdan jene hay masa ac ta ŋgiya dapa maŋgway teceŋ kad Yesu. Yesu ke pedecen ma ta ndah masasəraka jene tata ac babəla teceŋ, ec ke dec pe berne ta Baytisayda. 11Masa ac ka cəna ma tata cay, miya hay gaa ac ka cəpaw. Yesu ke kəseceŋ, ke bəzedec ma da yaŋ Meŋgə bay ta Zlavay, ke mbəlec ndah masa aca wal membəley dapa mehecey teceŋ.

12Yaw, pas mbala e te kezl kad way sə, ndah masasəraka jene kuraw dapa yaŋ ana ecew ac ka ŋgucafa vaw Yesu, ac ka gwaɗa, gege: «Gweɗec kad ndah nesey aca ra daɓa, aca ra ta yahaɓa slam ta manahay va jə ta manday, afa andakwa dapa səɓak.» 13Amaa, Yesu gege: «Akwar ava yaŋ takwar ana, mevec jə ta manday.» Ndah masasəraka jene tata sə, ac ka vahan, gege: «Da varandaw sə, magəra peŋ zlam ve kəlef ecew. Daha ka wal ndah ana fakwanay aca ra ndə jene sə, andaw te husemek mekele geyey?» 14Deveŋ ndah ana ŋgesey, mawulah ece ŋgə bakatar zlam. Yesu ke gweɗec ndah masasəraka jene tata sə, gege: «Menjeheɗec njakw njakw! Kwakwar zlam, kwakwar zlam.» 15Ndah masasəraka jene tata sə, ec ke njeheɗec ara masa Yesu te gweɗeceŋ. 16Ava dəɓa ana, Yesu ka hal peŋ zlam va kəlef ecew sə, ka pə ndey kad a wudam ka ŋgana wasay Zlavay mafay ta jə ta manday ana. Asaya, ka waca peŋ va kəlef ana ke vecen ndah masasəraka jene tata ece re vənecen kad miya. 17Kwa waawa deveŋ eceŋ ka ndaw mban. Ndah masasəraka jene tata ec ke ɓəcek mezekey ana. Maɓəca waŋ kuraw dapa yaŋ ana ecew.

Piyer e ŋguzdek Yesu sə, aŋga Kəristi

(Mat 16.13-28; Mar 8.27–9.1)

18Pas mekele ɓa Yesu a cə mbahw aŋga amta. Ndah masasəraka jene tata ac da cak tata, ke nəkefec, gege: «Ndana hay ece piyey sə, ka wa?» 19Ac ka vahan, gege: «Ta ndah leŋgeɗey sə, ka Zaŋ Baatis, ta ndah leŋgeɗ hay sə, ka Eli, ta ndah dərziya sə, ka nda amta deveŋ ndah mehwedek ma zleezle masa ka pərakata dapa maməcay.» 20Yesu ke nəkefec saya, gege: «Akwar may, akwa piyey sə, wa?» Piyer ka vahan, gege: «Kaa sə, ka Kəristi maslaŋ ta Zlavay.»

21Yesu ke kətec ndah masasəraka jene tata, ke ɓeɓəcec, gege: «Akwar ta ŋguzda ma ana nesey kad ndana bay.» 22Ava dəɓa ana, ke gweɗec saya, gege: «Cama, Wut ta nda a ta sə marga gaa ɗagay. Mesnendə te Zuwef hay, mazlakava hay ta ndaakwas hay va ndah mesesərekecen ma majawa kad ndana hay, ac ta kazlda, ac ta kəsiya ara masa Zlav te zlərekey sə, aabay, ac ta kəɗa avəda cukw cukw. Amaa dapa manah mamahkar ana sə, a ta pərakata dapa maməcay.»

Macəp Yesu sə, gwagumaw?

23Yesu ke gweɗec ndana hay fakwan faŋga, gege: «Daha ndana a wal mecəpiyey sə, da gərda mawulak yaŋ fə yaŋ tata. Da cəpiyey ava rav tata amta, da ɓəs marga masa e te dek kad yaŋ ana cəɗem cəɗem mafay taaɗaw, ara yey masa ya ta məc fa hap mazləlawa. 24Masəna, kwa waawa masa a wal mecəpiyey bay, da yaŋ masa a ta zə mesfen tata mafay taaɗaw sə, ŋgesey ka zana mesfen tata ana avəda cay. Amaa kwa waawa masa ka zana mesfen tata avəda mafay taaɗaw sə, ŋgesey ka mbəla mesfen tata ana avəda. 25Daha ndana ka ŋgat jene hay fakwanay dapa vavara nesey amaa ka zana mesfen tata avəda, daha aabay, ka nasa yaŋ tata avəda mafay te jeŋ ana sə, jeŋ ana hay masa aŋga te ŋgeteceŋ fakwan ŋgesey sə, a jəna avəda geyey? 26Kwa waawa masa e ŋgə hwar ta matə yaw da yaŋ ma taaɗaw fəma ta ndana hay, daha aabay a ŋgə hwar ta makəs ma aɗaw sə, ara nesey, pas masa Wut ta nda e te vehek ava gədaŋ tata, ava gədaŋ ta Papaŋ va ava gədaŋ ta maskəla tata hay da wudam sə, a ta ŋgafa hwar fəma ta Bay Zlav may. 27Eve metehwe ana ya gwaɗakwar, deveŋ ndah masa ac fana, dərziya hay ac ta məcay sə, say ac ta wala Meŋgə bay ta Zlavay eve ndey tec ɗagay.»

Membeɗ ta Wut ta Zlavay

(Mat 17.1-8; Mar 9.2-8)

28Manah cahkar ava dəɓa ta ma ana, Yesu ka kəs Piyer, Zaŋ va Zak ec ke tepə pa wudam ka ta cə mbahw. 29Dapa masa a cə mbahw sə, ndey tata ka ŋgwadata, rəkwat tata ka tərata məsle ana ndeɗ ndeɗ. 30A faŋga ana sə, ndah ecew ɓa aca kər maɗay ava Yesu, ac Muyiz va Eli. 31Ec ke ŋguzdek vaw dapa meweɗ ta Zlavay da baymaləvaŋ, ec ke gweɗ ava Yesu da yaŋ mezlər tata masa e te ndəv ava maməcay de Zeruzelem. 32Ac Piyer, Zaŋ va Zak sə, aca njawaŋ cukw cukw. Amaa ec ke pərekec dapa waŋ, ac ka wala gədaŋ te Yesu va ndah ecew masa da cak tata. 33Dapa masa ndah ana ac ka data da cak te Yesu sə, Piyer ka gwaɗa Yesu, gege: «Bay taciya, mambəla sə, manjahakwa fana! Anda karakwa slam hay mahkar: “Amta takaa, amta ta Muyiz, amta te Eli may.”» Anjəkar Piyer a sən ma da yaŋ ma masa e gweɗek sə, bay.

34Masa Piyer e gweɗ heley sə, magwabagwaba ke dekey, ke səretec avəda. Mesəret tec pa magwabagwaba sə, ndah masasəraka jene mahkar sə, ac ka ŋgə zidaw. 35Dapa magwabagwaba ana sə, uway ke cənek, gege: «Nesey sə, Wat aɗaw masa ya ta yahiya ka ta mbəl ndana hay, macəkafa zləmay.» 36Dapa masa uway ana e cəney sə, kwa ndana faŋga ɓasabay, magəra Yesu aŋga amta. Dapa ŋgesey ana, ndah masasəraka jene ac ke njehec teete, kwa jə masa ac ta wala sə, ac ke ŋguzdecen kad ndana hay aabay.

Yesu a mbas mesfen maləza dapa wat

(Mat 17.14-18; Mar 9.14-27)

37Tedew ana, Yesu va ndah masasəraka jene tata mahkar sə, ece bəreŋgek dapa wudam sə, kad fa vara, ac ka cə yaŋ ava miya gaa ec ke dey kad vara Yesu. 38Dapa taɓa ta miya ana ŋgesey, ndana ɓa ka zlar macə lalaw, ka gwaɗa Yesu, gege: «Bay aɗaw, ya cakaa mbahw, mbahw wuzaɗawa wat aɗaw nesey, afa wat aɗaw ana sə, malay amta war bəna, mekele aabay!» 39Aŋga eve mesfen maləza dapa yaŋ, daha ka zlara cay sə, a cə lalaw, mahəslaslaf dapa ma e dek kad a vəda. A ŋgada hahar mabay, a gərda zef aabay saya. 40Ye ke ŋgec mbahw kad ndah masasəraka jene takaa aca ra mbasana mesfen maləza ana, amaa ac ka zlafa aabay.

41Yesu ka kəs ma ke gweɗ, gege: «Akwar ndah makəsa ma aɗaw pahata, ndah maŋga jə mambəla ana hay aabay təlam nesey. Ya da njah ava akwar, masa ya da ɓəsafakwar marga ana hay kasl ewey?» Ka gwaɗa nda ana, gege: «Hwedek wudiyak ana kad fana.»

42Masa wat ana a husa mbala zef a vara Yesu sə, damkwaw dapa yaŋ tata sə, ka kazlaɗ fa vara, ka gurcaw ava gədaŋ. Amaa Yesu ka ɓaɓəca damkwaw dapa yaŋ ta wat sə, ava gədaŋ, ka mbasana. Ka gwaɗa papaŋ, gege: «Aha wudiyak.» 43Ndah faŋga sə, ac ke rəzlec fakwanay, ec ke gweɗ, gege: «Eve metehwe ana, Zlav sə, aŋga ava gədaŋ ɓa.»

Yesu a slaf maməcay va mepərek tata dapa maməcay meecew ana

(Mat 17.22-23; Mar 9.30-32)

Dapa masa ndana hay faŋga fakwan ece rəzl da yaŋ jene hay masa Yesu te ŋgeceŋ sə, ke gweɗec ndah masasəraka jene tata, gege: 44«Təlam nesey sə, macak zləmay mambəla ana, masləkaɗ ma hay nesey pe leŋgesl takwar: “Ac ta təhaz Wut ta nda avəda, ac ta paɗ pa ha ta maslagəra tata hay.”» 45Amaa ndah masasəraka jene tata, ac ka cəna ma da yaŋ ma masa Yesu te gweɗec sə, aabay. Ma ana masa mapana fa yam te ndey teceŋ sə, Zlav ka raɓda. Ac ka zlafa macəna ma da yaŋ ana aabay ɗagay. Dapa ŋgesey ana, ac ka ŋgə zidaw ta manəkafa Yesu da yaŋ ma ana.

Mazlakava sə, ndana wa?

(Mat 18.1-5; Mar 9.33-37)

46Ndah masasəraka jene aca cə mamənak dapa taɓa teceŋ, aca ra səna nda mazlakava da yaŋ eceŋ sə, wa? 47Amaa Yesu ka sən mawulak yaŋ tec avəda. Ka kəs wat kusetke, ka zlacaɗ a cak tata, 48gege: «Kwa waawa makəsa wat mekusetke ana nesey mafay ta masa e weliyey sə, a kəs ŋgesey yey ava yaŋ taaɗaw. Nda masa ke kəsiyey, a kəs ŋgesey nda mezlərekiyey may. Nda mapana yaŋ tata kusetke deveŋ akwar fakwanay sə, nda ŋgesey, aŋga nda mazlakava deveŋ akwar.»

Maslagəra va guula tandakwa

(Mar 9.38-40)

49Zaŋ ka vahan Yesu, gege: «Bay taciya, andə ka ŋgat ndana ɓa, a mbas damkwaw dapa ndana hay eve mezel takaa. Andə ka yah cəv ta mazlaciya, afa aŋga sə, aŋga deveŋ andakwa aabay.» 50Amaa Yesu ka vahan, gege: «Magərda, akwa zlaca bay, afa nda maslagəra tandakwa bay sə, ŋgesey, aŋga nda takwar.»

Ndah da Samariya ac ka kəs Yesu aabay

51Masa mbala Zlav a ta kəs Yesu kad a wudam a vara vaw sə, Yesu ka təhaz rav te medey pe berne te Zeruzelem. 52Ka zlar maslaŋ hay fəma tata. Aca ra də pa wunam ɓa da Samariya ka ta ləmadana slam ta manahay. 53Amaa ndah dapa wunam ana ac ka kəsaw aabay, afa aca səniya sə, Yesu a wal medə Zeruzelem. 54Masa aca wala ara nesey sə, ndah masasəraka jene Zak va Zaŋ ece gweɗ, gege: «Bay Mazlakava, ka wal sə, anda nəkafa Zlavay de bəreŋgek kwakwaw da baymaləvaŋ da ndala ndah ana avəda geyey?» 55Yesu ke ŋgwedefec ma, ke ɓeɓəceceŋ, gege: [«Away! Ye dek sə, ka ta zə ndana hay bay, amaa ke te mbəleceŋ.»] 56Ac ka data kad pa wunam mekele.

Macəp Yesu

(Mat 8.19-22)

57Dapa masa ac dapa cəv heley sə, ndana ɓa ka gwaɗa Yesu, gege: «Kwa pa slam wula wula masa ke te dey sə, ya cəpakaa.» 58Yesu ka vahan, gege: «Gwebegwebekw hay ac eve veɗ teceŋ, ɗiyak hay ac ava way teceŋ. Amaa Wut ta nda sə, kwa slam ta manah kusetke masa a da sasakaɓa vaw dapa sə, aabay.»

59Ka gwaɗa nda leŋgeɗey, gege: «Dek cəpiyey.» Amaa, nda ana ka vahan, gege: «Bay aɗaw, viyey cəvey, ye də a wunam ɗagay. Ava dəɓa ta maməc ta papa, daha ya ka pəsaha cay sə, ye vehekey, ya cəpakaa.» 60Yesu ka vahan, gege: «Gərdec ndah maməca, aca ra pəsah macəhwandə teceŋ. Kaa sə, daɗay ta bəzad ma da yaŋ Meŋgə bay ta Zlavay.» 61Nda mekele ɓa saya, ka gwaɗa, gege: «Yey sə, ya cəpakaa Bay Mazlakava, amaa viyey cəvey ya ta gwaɗafa ndah da hwaɗ ta way taciya avəda ɗagay.» 62Yesu ka gwaɗa, gege: «Kwa waawa matəhaza zlaba dapa mehəvey, e pə ndey kad ava dəɓa sə, nda ŋgesey, a ta zlafa meŋgə mezlərey kad pa Wunam ta bay ta Zlav aabay.»

Currently Selected:

Lukas 9: CUVnt

Highlight

Copy