Málkus 8
8
Yésus ag díɛ́hɛ akóó á ɓot ánáa
(Mat 15.32-39; Mlk 6.30-44)
1Múŋ á nyúŋ alɔ́, limut licɛ́ŋ lí ɓɛ́ɛ́ sīg-pɛ lí kómānɛ. Kasig bíh ɓɛ́ɛ́la ɓé yoóm li dí, Yésus ɔ yáŋá ɓáyēge ɓɛ́ɛ́, aá la ɓɔ nɛ́: 2«Mag kɔnle jé limut ŋgɔ́ɔ́, átɔm nɛ́ alɔ́ áŋháa nyú ɓá ɓot bí lɛ́ élɔŋ la ma, ɛ́h ɓɛ́ ɓé li ɓɛ́la lí tɔ jam á lí dí. 3Kí má sóɛ̄ ɓɔ la nzal, bíg ku siŋga-nzal á nzen, átɔm nɛ́ jogo líg sɔ́le enɛŋɛ́.» 4Ɓayége ɓɛ́ɛ́ bú pélē nyɛ nɛ́: «Á véé bi ŋga kúhle lidí lí ŋga yáhɛ ɓá ɓot bísɛ vá á ví ɔtígá é?» 5Yésus ɔ bíhī ɓɔ́ nɛ́: «Bikɔgá byáŋvéé miní byɛ́ɛ é?» La ɓɔ́ bú pélē nyɛ nɛ́: «Nzambúwá.» 6Váŋ nɛ́ a kānʼyɛ́ jéŋ limut nɛ́ lí tɔ́ɔ̄ á sí, ɔ nyɔ̄ŋ bíŋ bikɔgá nzambúwá. Ɛnɛ́ a tí Ɔ́lolómɛ̄ mítamlan, ɔ búg byɔ la nyɛ́ ɔ tí byɔ ɓayége ɓɛ́ɛ́ nɛ bí kaa byɔ́ la ɓot bísɛ; la ɓɔ́ bú ɓɔ̄ŋ náŋ. 7Ɓayége bí ɓɛ́ɛ́la ki puh ɓɔ́ɔ̄n bí kɔh. Yésus ɔ lómbó yíŋ kɔh, ɔ lāgá ɓáyēge ɓɛ́ɛ́ nɛ bí kaa ki yɔ́. 8Ɓot bísɛ bú dí, bú yál. Ɓayége bú kómánɛ̄ míbuga mí bítun mí mí yáhɛ́ɛ bisɛɛ nzambúwá. 9Ɓot bí ɓɛ́ɛ́ jam-kaa akóó ánáa. Ámbúh náŋ, Yésus ɔ sōɛ́ ɓɔ̄. 10Á ékūyá-kúyá, ɔ ɓét la ɓayége ɓɛ́ɛ́ á m̀ɓoŋgó, bú kɛ á épah-ékombo yé Dalmanúta.
Yésus ag ɓen li étɛ lí ɓot bí Élōg-Falísái ndembye
(Mat 12.38-39; 16.1-4; Lúk 11.16-29; 12.54-56)
11Ɓot bí Élōg-Falísái bú sɔ́ la ɓɔ́ bú ɓōtlé li kála la Yésus; á li ceglɛ lí nyɛ, bú ɓāt nyɛ nɛ́ a étɛ́ ɓɔ́ ndembye ɛ ŋga étɛ nɛ́ ag sɔ́léne á lóō. 12Yésus ɔ túú mvɛɛɓan, ɔ lága nɛ: «Ányúū yéé nyí nyɔŋɔn ɛ ŋga ɓāt ndembye é? La mbálɛ mag laga ɓɛ́nɛ nɛ́, nyí nyɔŋɔn ɛ ŋgá kɛ ɓé li kuh lí ndembye tɔ ya.» 13Eceg a ŋgí ɓáglan la ɓɔ́, ɔ ɓét á m̀ɓoŋgó, ɔ yáɓé á nyúŋú mií á ébúle.
Ŋgilí-sɔ́ŋtānɛ nyí ɓayége
(Mat 16.5-12; Lúk 12.1)
14Á míkɛ máɓá, Ɓayége bí Yésus bú vólánɛ́ li nyɔŋ lí bíkɔgá. Bí ɓɛ́ɛ́ ja la ekɔgá yáhyá mūŋ á m̀ɓoŋgó. 15Yésus ɔ ɓéhyɛ́ hɔ́ ɓɔ́ nɛ́: «Léɓyán! Nyɔŋán lítāt la esaŋɛ yé ɓot bí Falísái la yé Élóde.» 16Ɓayége bú ɓōtlé lí kála ányúū nɛ bíh ɓɛ́ɛ́la ɓé bíkɔgá. 17Ɛnɛ́ Yésus a yí míɔ̄ŋɔ máɓá, ɔ bíhī ɓɔ́ nɛ́: «Miní kála ányúū nɛ miníh byɛ́ɛ́ ɓé bíkɔgá é? Ɓaá miní ɓáág ŋgí li yí ndí tɔ li sɔ́ŋtánɛ é? Yéé miní ŋga lēt mimú náŋ é? 18Ányúū yéé miní byɛ́ɛ̄ miíh ndí miní ŋga ɛ́n ɓé; miní byɛ́ɛ́ míɔ̄ɔ̄ ndí miní ŋga ámble ɓé é? Maná ɔ́ŋɔ ɓé pɛ, 19eceg mi búgúú bíkɔgá bítáan á li kaahanɛ lí byɔ akóó á ɓot átáan; ɓaá bisɛɛ byáŋvéé maná timan la bí bí ɓɛ́ɛ́ bí yáhɛ la bitun é?» La ɓɔ́ bú pélē nyɛ nɛ́: «Jóom la bíɓáa.» 20Ɔ bíhī sīg-pɛ ɓɔ́ nɛ́: «Eceg ki mi búgúú bí bikɔgá nzambúwá á lí kaahanɛ lí byɔ akóó á ɓot ánáa; ɓaá bisɛɛ byáŋvéé maná timan la bí bí ɓɛ́ɛ́ bí yáhɛ la bitun é?» La ɓɔ́ bú pélē nyɛ nɛ́: «Nzambúwá.» 21Váŋ nɛ Yésus a lága ɓɔ́ nɛ́: «Ndí tɔ váŋ, miníh ŋgá sɔ́ŋtánɛ ɓé é?»
Yésus ag manɛ mut-a-ndím
22Ɛnɛ́ Yésus la ɓayége ɓɛ́ɛ́ bí pámáá á Betsaída, bú sɔ́la nyɛ́ mut-a-ndím, bú sɔ́hyé nɛ a sííɓán nyɛ. 23Váŋ nɛ́ a byeléé mut-a-ndím á wɔ, ɔ ɓógo la nyɛ múŋ á nyúŋ ŋkɔŋ. Ɔ ɔ́gɛ́ nyɛ mitɛ́ɛ́ á miíh, ɔ káhyɛ́ nyɛ́ mɔ la nyɛ́ ɔ ɓāt nyɛ nɛ́: «Ɓaá ɔg ɛ́n yoóm é?» 24Ɛnɛ́ nyɔ́ a légē miíh, ɔ pélē nyɛ nɛ́: «Mag ɛ́n ɓot, mag ɛ́n ɓɔ́ kaa biéé, ndí bíg wɛɛ.» 25Yésus ɔ síiɓán sīg-pɛ nyɛ́ miíh, la mut-a-ndím ɔ ɛ́n m̀ɓɛɛŋ. Ɔ tɔ́ɔ̄ mbólí, ɔ ɛ́n mam mísɛ ákaa ɛ́ ŋga somlɛ. 26Yésus ɔ sóɛ̄ nyɛ, aá la nyɛ nɛ́: «Ɔh timkágán ɓé tɔ pɛ á nyúŋ ŋkɔŋ.»
Yésus a lɛ Nyɔ́-a-Pɔ́hlɛ, ag wú ndí a páhyé
(Mat 16.13-23; Lúk 9.18-21, 22)
27Ámbúh náŋ, Yésus la ɓayége ɓɛ́ɛ́ bú nyɔ̄ŋ nzen li kɛ á míkɔŋ mí ŋgwáāg mikɔŋ mí Sezaléa nyí Filípi. Múŋ á nzen, Yésus ɔ ɓāt ɓɔ́ nɛ́: «Ɓot bíg laga nɛ́ mi lɛ nzáá é?» 28Bú pélē nyɛ nɛ́: «Ɓá bíg laga nɛ́ ɔ lɛ Yohánɛs Ǹtíi-nzoɓan, ɓáŋá ɓɔ́ɔ́ Elías, ányúū ɓáŋá ɓatám, m̀pɔ́tle-a-Ɔlolómɛ̄ wa.» 29Yésus ɔ bíhī ɓɔ nɛ́: «Ɓɛ́nɛ hɔ́, mi lɛ nzáá é?» Pétlos aá la nyɛ́ nɛ́: «Wa nɛ́ ɔ lɛ Nyɔ́-a-Pɔ́hlɛ.» 30Váŋ nɛ́ a ɓéhyɛ́ ɓɔ́ nɛ́ bíh laglág ɓé tɔ mut náŋ.
31Ámbúh náŋ, Yésus ɔ ɓōtlé li yíhɛ lí ɓáyēge ɓɛ́ɛ́ nɛ, ɛ́g somlɛ nɛ́ Mɔɔ́n Mut a táká ŋgandag; ɓacɛ́ŋ bí Élōg-Yúda, ɓakanʼyɛ ɓatíi-nsúlé la ɓayí-mbéndá bí ɓen nyɛ́, bí óm nyɛ́ á nyɛmb ndí á ɔlɔ́ vá yáhɛ áŋháa a páhyé. 32Ákaa a ŋgí pɔ́t náŋ á m̀ɓambá, Pétlos ɔ kɛ́la nyɛ á mɓagɓanɛ́, ɔ ɓōtlé nyɛ li ɓémɛ. 33Ɛnɛ́ Yésus a yáan, ɔ légɓé ɓáyēge ɓɛ́ɛ́, ɔ nyáálé Pétlos, aá la nyɛ nɛ́: «Ɓógó ma váŋ á Sátan! Nɛŋɛ́ la ma, átɔm nɛ́ miɔ́ŋɔ mɔ́ɔ mí sē ɓé mí mí Ɔ́lolómɛ̄, ndí mí mí ɓot-bí-bínam.»
Nɛ́-Láá mut a nyɛ́ɛ lí oŋ lí Yésus
(Mat 16.24-28; Lúk 9.23-27)
34Ámbúh náŋ Yésus ɔ yáŋa límut elɔŋ la ɓayége ɓɛ́ɛ́, aá la ɓɔ́ nɛ́: «Nyɔ́ la nyɔ́ a ŋga sómo ma lí oŋ, a vólánɛ̄ nyɛ́-mɛ̄n, ndí a ɓɛ́gɛ̄ ja mbásá yɛ́ɛ̄, a óŋ ma. 35Jɔ́ nɛ́, tɔ nzáá a ŋga sómo li suŋ lí éniŋ yɛ́ɛ́, ag kɛ yɔ́ li jáŋɛ; ndí nyɔ́ a ŋga kɛ́ lí jáŋɛ lí éniŋ yɛ́ɛ́ ányúū yama la ányúū Pɔ́l M̀ɓɛɛŋ, ag kɛ yɔ́ lí tombanɛ. 36Wɔɔ́wɔ́ɔ nsɛ́ŋ mut a byɛ́ɛ̄ á li tombanɛ lí ŋkɔŋ-á-sí ásɛ, kí wá véé nyɛ eniŋ yɛ́ɛ́ é? 37Yoóm tɔ yá ɛ́ ŋga loo eniŋ ɛ́ mut-a-binam ɛ́ sē ɓé. 38Ányúū nɛ́ nyɔ́ la nyɔ́ a ŋga kɔ̄n ɔsɔ́n ányúū yáma la ányúū biɓaŋgá byáma ɔ́sū ví nyí nyɔŋɔn ɛ lɛn, nyí miɓé, nyí yāh tiŋɓe ɓé la Ɔlolómɛ̄, Mɔɔ́n Mut nyɛ́g ag kɛ li kɔn lí ɔsɔ́n ányúū yɛ́ɛ̄, eceg a ŋga kɛ́ li sɔ́ elɔŋ la áŋgɛl epúán átē a lipém lí Ɛ́sāŋɛ́.»
Currently Selected:
Málkus 8: NTB
Highlight
Share
Copy

Want to have your highlights saved across all your devices? Sign up or sign in
© 2023, CABTAL